Chapter 236

[English text for this chapter is available]

pārvatyuvāca |
tāmasāni ca śāstrāṇi samācakṣva mamānagha |
saṃproktānica tairvviprairbhagavadbhaktivarjitaiḥ |
teṣāṃ nāmāni kramaśaḥ samācakṣva sureśvara || 1 ||
[Analyze grammar]

rudra uvāca |
śṛṇu devi pravakṣyāmi tāmasāni yathākramam || 2 ||
[Analyze grammar]

teṣāṃ smaraṇamātreṇa mohaḥ syājjñānināmapi |
prathamaṃ hi mayaivoktaṃ śaivaṃ pāśupatādikam || 3 ||
[Analyze grammar]

macchaktyāveśitairvvipraiḥ proktāni ca tataḥ śṛṇu |
kaṇādena tu saṃproktaṃ śāstraṃ vaiśeṣikaṃ mahat || 4 ||
[Analyze grammar]

gautamena tathā nyāyaṃ sāṃkhyaṃ tu kapilena vai |
dhiṣaṇena tathā proktaṃ cārvvākamatigarhitam || 5 ||
[Analyze grammar]

daityānāṃ nāśanārthāya viṣṇunā buddharūpiṇā |
bauddhaśāstramasatproktaṃ nagnanīlapaṭādikam || 6 ||
[Analyze grammar]

māyāvādamasacchāstraṃ pracchannaṃ baddha ucyate |
mayaiva kathitaṃ devi kalau brāhmaṇarūpiṇā || 7 ||
[Analyze grammar]

apārthaṃ śrutivākyānāṃ darśayanlokagarhitam |
svakarmmarūpaṃ tyājyatvamatraiva pratipādyate || 8 ||
[Analyze grammar]

sarvakarmmaparibhraṣṭairvaidharmmatvaṃ taducyate |
pareśajīvapāraikyaṃ mayā tu pratipādyate || 9 ||
[Analyze grammar]

brahmaṇosya svayaṃ rūpaṃ nirguṇaṃ vakṣyate mayā |
sarvasya jagato'pyatra mohanārthaṃ kalau yuge || 10 ||
[Analyze grammar]

vedārthavanmahāśāstraṃ māyayā yadavaidikam |
mayaiva kalpitaṃ devi jagatāṃ nāśakāraṇāt || 11 ||
[Analyze grammar]

madājñayā jaimininā pūrvaṃ vedamapārthakam |
nirīśvareṇa vādena kṛtaṃ śāstraṃ mahattaram || 12 ||
[Analyze grammar]

śāstrāṇi caiva girije tāmasāni nibodha me |
purāṇāni ca vakṣyāmi tāmasāni yathākramāt || 13 ||
[Analyze grammar]

brāhmaṃ pādmaṃ vaiṣṇavaṃ ca śaivaṃ bhāgavataṃ tathā |
tathaiva nāradīyaṃ tu mārkaṇḍeyantu saptamam || 14 ||
[Analyze grammar]

āgneyamaṣṭamaṃ proktaṃ bhaviṣyaṃ navamaṃ tathā |
daśamaṃ brahmavaivartaṃ liṅgamekādaśaṃ smṛtam || 15 ||
[Analyze grammar]

dvādaśaṃ ca varāhaṃ ca vāmanaṃ ca trayodaśam |
kaurmmaṃ caturdaśaṃ proktaṃ mātsyaṃ paṃcadaśaṃ smṛtam || 16 ||
[Analyze grammar]

ṣoḍaśaṃ gāruḍaṃ proktaṃ skaṃdaṃ saptadaśaṃ smṛtam |
aṣṭādaśaṃ tu brahmāṃḍaṃ purāṇāni yathākramam || 17 ||
[Analyze grammar]

mātsyaṃ kaurmaṃ tathā laiḍgaṃ śaivaṃ skāṃdaṃ tathaiva ca |
āgneyaṃ ca ṣaḍetāni tāmasāni nibodha me || 18 ||
[Analyze grammar]

vaiṣṇavaṃ nāradīyaṃ ca tathā bhāgavataṃ śubham |
gāruḍaṃ ca tathā pādmaṃ vārāhaṃ śubhadarśane || 19 ||
[Analyze grammar]

sātvikāni purāṇāni vijñeyāni śubhāni vai |
brahmāṃḍa brahmavaivarttaṃ mārkaṃḍeyaṃ tathaiva ca || 20 ||
[Analyze grammar]

bhaviṣyaṃ vāmanaṃ brāhmaṃ rājasāni nibodha me |
sātvikā mokṣadāḥ proktā rājasāḥ sarvadā śubhāḥ || 21 ||
[Analyze grammar]

tathaiva tāmasā devi nirayaprāptihetavaḥ |
tathaiva smṛtayaḥ proktā ṛṣibhistriguṇānvitāḥ || 22 ||
[Analyze grammar]

sātvikā rājasāścaiva tāmasā śubhadarśane |
vāsiṣṭhaṃ caiva hārītaṃ vyāsaṃ pārāśaraṃ tathā || 23 ||
[Analyze grammar]

bhāradvājaṃ kāśyapaṃ ca sātvikā muktidāḥ śubhāḥ |
yājñavalkyaṃ tathātreyaṃ taittiraṃ dākṣameva ca || 24 ||
[Analyze grammar]

kātyāyanaṃ vaiṣṇavaṃ ca rājasāṃ svargadāḥ śubhāḥ |
gautamaṃ bārhaspatyaṃ ca sāṃvarttaṃ ca yamaṃ smṛtam || 25 ||
[Analyze grammar]

sākhyaṃ cauśanasaṃ ceti tāmasā nirayapradāḥ |
kimatra bahunoktena purāṇeṣu smṛtiṣvapi || 26 ||
[Analyze grammar]

tāmasā narakāyaiva varjayettānvicakṣaṇaḥ |
etatte sarvamākhyātaṃ prasaṃgācchubhadarśanam |
śeṣāṃ ca prabhavāvasthāṃ harervakṣyāmi te śṛṇu || 27 ||
[Analyze grammar]

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe tāmasaśāstrakathanaṃnāma ṣaṭtriṃśadadhikadviśatatamo'dhyāyaḥ || 236 ||
[Analyze grammar]