Chapter 224

[English text for this chapter is available]

dilīpa uvāca |
bhagavansarvamācakṣva haribhaktisudhāmayam |
śṛṇvato naiva tṛptirme viṣṇubhaktiṃ sukhāvahām || 1 ||
[Analyze grammar]

tāpatrayamahājvālā vahnibhiḥ satataṃ nṛṇām |
saṃtaptānāṃ muniśreṣṭha viṣṇubhaktisudhārṇavam || 2 ||
[Analyze grammar]

vinā kimanyaccharaṇaṃ bhavāraṇye bhayānake |
ācakṣva vistareṇātha bhaktibhedānmahāmune |
upāsyamānānsatataṃ munibhiḥ paramātmanaḥ || 3 ||
[Analyze grammar]

vasiṣṭha uvāca |
sādhu pṛcchasi rājeṃdra saṃsārottāraṇaṃ nṝṇāṃ |
vaikuṃṭhasya pareśasya bhaktiṃ nityasukhāvahām || 4 ||
[Analyze grammar]

imamevaṃ mahāpraśnaṃ kailāsaśikhare purā |
papraccha girijādevī śaṃkaraṃ lokapūjitam || 5 ||
[Analyze grammar]

pārvatyuvāca |
devadeva mahādeva tripuraghna sureśvara |
viṣṇubhaktiṃ mamācakṣva muktidāṃ sarvadehinām || 6 ||
[Analyze grammar]

upāsyabhedānmaṃtrāṃśca tasya pūjāvidhīṃstathā |
tasya viṣṇoḥ svarūpaṃ ca tadvibhūtirguṇādikam || 7 ||
[Analyze grammar]

tasya lokasvarūpaṃ ca yaṃ prāpya na nivartate |
sargasthitilayaṃ yena karoti bhagavānhariḥ || 8 ||
[Analyze grammar]

yadgatvā na nivartaṃte taddhāmaparamaṃ hareḥ |
yena kena ca kṛtyena sādhanena paraṃ padam || 9 ||
[Analyze grammar]

prāpnuvaṃti narāḥ pāpā viṣayāsaktacetasaḥ |
vistareṇa mayi prītyā brūhi sarvamaśeṣataḥ || 10 ||
[Analyze grammar]

vasiṣṭha uvāca |
iti pṛṣṭo mahādevyā harastripurahā tadā |
uvāca paramaprītyā namaskṛtya janārdanam || 11 ||
[Analyze grammar]

rudra uvāca |
sādhusādhu mahādevi sarvalokahitaiṣiṇi |
sādhu pṛcchasi māṃ devi śrīśamāhātmyamuttamam || 12 ||
[Analyze grammar]

dhanyāsi kṛtapuṇyāsi viṣṇubhaktāsi pārvati |
parituṣṭo'smi te bhadre śīlarūpaguṇaiḥ sadā || 13 ||
[Analyze grammar]

atha vakṣyāmi girije bhagavadbhaktimuttamām |
tanmaṃtrāṇāṃ vidhānaṃ ca svarūpaṃ tasya śārṅgiṇaḥ || 14 ||
[Analyze grammar]

tatvaṃ nārāyaṇo viṣṇurvāsudevassanātanaḥ |
paramātmā paraṃ brahma paraṃ jyotiḥ parātparaḥ || 15 ||
[Analyze grammar]

acyutaḥ puruṣaḥ kṛṣṇaḥ śāśvataḥ śiva īśvaraḥ |
nityaḥ sarvagataḥ sthāṇū rudrassākṣī prajāpatiḥ || 16 ||
[Analyze grammar]

yajño yajñapatiḥ sākṣādbrahmaṇaḥ patireva ca |
hiraṇyagarbhaṃ savitā lokakṛllokabhṛdvibhuḥ || 17 ||
[Analyze grammar]

akāravācyo bhagavān śrībhū nīlāpatiḥ prabhuḥ |
utāmṛtatvasyeśāno yadannenātirohati || 18 ||
[Analyze grammar]

sahasramūrddhā viśvātmā sahasrākṣaḥ sahasrapāt |
sa bhūmiṃ sarvataḥ spṛtvā hyatyatiṣṭhaddaśāṃgulam || 19 ||
[Analyze grammar]

anaṃtaḥ śrīpatī rāmo guṇabhṛnnirguṇo mahān |
sarvalokeśvaraḥ śrīmānsarvajñaḥ sarvatomukhaḥ || 20 ||
[Analyze grammar]

tasya lokapradhānasya jagannāthasya pārvati |
māhātmyaṃ vāsudevasya yacchakyaṃ tadbravīmi te || 21 ||
[Analyze grammar]

aśakyaṃ tanmayā vaktuṃ brahmaṇā saha daivataiḥ |
sarvopaniṣadāmarthaṃ vedāṃte pariniścitam || 22 ||
[Analyze grammar]

tasyopāsanabhedāṃśca śṛṇu vacmi punaḥ pṛthak |
ādyaṃtu vaiṣṇavaṃ proktaṃ śaṃkhacakrāṃkanaṃ hareḥ || 23 ||
[Analyze grammar]

dhāraṇaṃ cordhvarpuṃḍrāṇāṃ tanmaṃtrāṇāṃ parigrahaḥ |
arcanaṃ ca japodhyānaṃ tannāmasmaraṇaṃ tathā || 24 ||
[Analyze grammar]

kīrtanaṃ śravaṇaṃ caiva vaṃdanaṃ pādasevanam |
tatpādodakasevā ca tanniveditabhojanam || 25 ||
[Analyze grammar]

tadīyānāṃ ca sevāñca dvādaśīvrataniṣṭhitam |
tulasīropaṇaṃ viṣṇordevadevasya śārṅgiṇaḥ || 26 ||
[Analyze grammar]

bhaktiḥ ṣoḍaśadhā proktā bhavabaṃdhavimuktaye |
sarveṣāmeva devānāṃ mamāpi puruṣottamaḥ || 27 ||
[Analyze grammar]

pūjanīyo harirnityaṃ brāhmaṇānāṃ viśeṣataḥ |
tasmāttu brāhmaṇo nityaṃ vidhivatpūjayeddharim || 28 ||
[Analyze grammar]

taccihnairaṃkitaḥ śrīśapadaṃprāpnotyasaṃśayam |
śaṃkhacakrāṃkanaṃ kuryādbrāhmaṇo bāhumūlayoḥ || 29 ||
[Analyze grammar]

hutāgninaiva saṃtapya sarvapāpāpanuttaye |
cakraṃ vā śaṃkhacakre vā tathā paṃcāyudhāni vā || 30 ||
[Analyze grammar]

dhārayitvaiva vidhivadvrahmakarmasamārabhet |
agnitaptaṃ pavitraṃ ca dhṛtvā vai bhujamūlayoḥ || 31 ||
[Analyze grammar]

tyaktvā yamapuraṃ ghoraṃ yāti viṣṇoḥ paraṃ padam |
cakracihnavihīnastu yaḥ pūjayati keśavam || 32 ||
[Analyze grammar]

tatsarvaṃ viphalaṃ yāti pūjāmaṃtrajapādikam |
agnitaptena cakreṇa brāhmaṇo bāhumūlayoḥ || 33 ||
[Analyze grammar]

aṃkayitvā japanmaṃtraṃ saṃsārānmokṣamāpnuyāt |
sudarśanaṃ dhārayitvā vahnitaptaṃ dvijottamaḥ || 34 ||
[Analyze grammar]

upanīya vidhānena paścātkarmasu yojayet |
viṣṇucakravihīnaṃ tu ya śrāddhe bhojayiṣyati || 35 ||
[Analyze grammar]

vyarthaṃ bhavati tatsarvaṃ nirāśāḥ pitaro gatāḥ |
viṣṇucakrāṃkitaṃ vipraṃ pūjayecchrāddhakarmaṇi || 36 ||
[Analyze grammar]

viṣṇucakravihīnaṃ tu prayatnena vivarjayet |
dadyādgobhūhiraṇyādi cakrāṃkitabhujāya vai || 37 ||
[Analyze grammar]

yaddattaṃ cakrahīnāya tatsarvamasurāya vai |
agnitaptena cakreṇa bāhumūle tu lāṃchitāḥ || 38 ||
[Analyze grammar]

sarvapāpavinirmuktā yāṃti viṣṇoḥ paraṃ padam |
hutāgnitaptacakreṇa śarīraṃ yasya cihnitam || 39 ||
[Analyze grammar]

tasya tīrthāni yajñāśca saṃprāptā nātra saṃśayaḥ |
adhṛtvā vidhinā cakraṃ brāhmaṇaḥ prākṛto bhavet || 40 ||
[Analyze grammar]

na tasya kiṃcidaśnīyādapi kratusahasriṇaḥ |
adhṛtvā vidhinā cakraṃ brāhmaṇo jñānadurlabhaḥ || 41 ||
[Analyze grammar]

garhitassarvalokeṣu brāhmaṇyātpracyuto bhavet |
śaṅkhacakradharo devo hariḥ pūjyo yathātmabhiḥ || 42 ||
[Analyze grammar]

tathaiva sarvaissaṃpūjyo vipraścakrādicihnitaḥ |
sarvavedavido vāpi sarvaśāstraviśāradaḥ || 43 ||
[Analyze grammar]

adhṛtvā vidhinā cakraṃ brāhmaṇaḥ patito bhavet |
ūrddhvapuṃḍravihīnastu śaṃkha cakravivarjitaḥ || 44 ||
[Analyze grammar]

taṃ gardabhe samāropya bahiḥ kuryātsvapattanāt |
prakṛtisparśarahito vāsudevo janārdanaḥ || 45 ||
[Analyze grammar]

tathaiva brāhmaṇo devi viṣṇucakreṇa cihnitaḥ |
tasmātprakṛtisaṃsargapāpaughadahanaṃ hareḥ || 46 ||
[Analyze grammar]

prataptaṃ bibhṛyāccakraṃ śaṃkhaṃ ca bhujamūlayoḥ |
strīśūdrāṇāṃ sadā dhāryye caṃdanena sugaṃdhinā || 47 ||
[Analyze grammar]

bāhumūle likheccakraṃ taptaṃ tu brāhmaṇasya vai |
taptenaivāṃkanaṃ kuryādbrāhmaṇasya vidhānataḥ || 48 ||
[Analyze grammar]

śrautasmārttādisiddhyarthaṃ maṃtrasiddhyai tathaiva ca |
hareḥ pūjādhikārārthaṃ cakraṃ dhāryāṃ vidhānataḥ || 49 ||
[Analyze grammar]

vaiṣṇavatvasya siddhyarthaṃ jñānasiddhyarthameva ca |
pratapeccakraśaṃṅkhābhyāṃ hutvā homaṃ vidhānataḥ || 50 ||
[Analyze grammar]

anyairna dāhayedgātraṃ brāhmaṇo harilāṃchanāt |
śaṃkhacakragadākhaḍgaśārṅgādanyairharerapi || 51 ||
[Analyze grammar]

lakṣaṇena daheddehaṃ nānyadagdhorhatikriyām |
acakradhāriṇaṃ vipraṃ dūrataḥ parivarjayet || 52 ||
[Analyze grammar]

śvapākamiva nekṣeta loke vipramavaiṣṇavam |
vaiṣṇavo varṇabāhyo'pi punāti bhuvanatrayam || 53 ||
[Analyze grammar]

tasmāttu vidhinā cakraṃ dhāryaṃ vipraiḥ śubhānane |
brāhmaṇā maṃtrasiddhyai ca jñānasiddhyai ca muktaye || 54 ||
[Analyze grammar]

aprākṛtāmahātmāno viṣṇucakreṇa lāṃcchitāḥ |
viṣṇucakravihīnāstu brāhmaṇāḥ prākṛtāḥ smṛtāḥ || 55 ||
[Analyze grammar]

sarvāśrameṣu vasatāṃ brāhmaṇānāṃ viśeṣataḥ |
vidhinā vaiṣṇavaṃ cakraṃ dhāryaṃ hi śrutinodanāt || 56 ||
[Analyze grammar]

dakṣiṇe tu bhuje vipro bibhṛyādvai sudarśanam |
vāme tu śaṃkhaṃ bibhṛyāditi brahmavido viduḥ || 57 ||
[Analyze grammar]

evammahopaniṣadi proktaṃ cakrādidhāraṇam |
tathaiva sāmni yajuṣi ṛci proktaṃ śubhānane || 58 ||
[Analyze grammar]

pra te viṣṇo abjacakre pavitre janmāmbhodhiṃ tartave carṣaṇīndrāḥ |
mūle bāhvordadhate'nye purāṇā liṅgānyenye tāvakānyarpayanti || 59 ||
[Analyze grammar]

caraṇaṃ pavitraṃ vitataṃ purāṇaṃ vāṅmayaṃ śubham |
tena cakreṇa santaptāstareyuḥ pātakāmbudhim || 60 ||
[Analyze grammar]

pavitraṃ brāhmaṇaspatyaṃ jagadvyāptaṃ haressadā |
te nātaptatanūryeṣāṃ na te yānti paraṃ padam || 61 ||
[Analyze grammar]

tena taptā tanūryeṣāṃ te prayāṃti paraṃ paradam |
pavitracaraṇaṃ nemirhareścakraṃ sudarśanam || 62 ||
[Analyze grammar]

sahasrāraṃ prākṛtaghnaṃ lokadvāraṃ mahaujasam |
nāmāni viṣṇucakrasya paryāyeṇa nibodha me || 63 ||
[Analyze grammar]

śuddhena vahnitaptena brahmatvena punīhi naḥ |
yatte pavitramarcivadagne tena punīhi naḥ || 64 ||
[Analyze grammar]

yena devāḥ pavitreṇa ātmānaṃ punate sadā |
tena sahasradhāreṇa pāvamānyaḥ punaṃtu mām || 65 ||
[Analyze grammar]

prajāpatyaṃ pavitraṃ tu śatodyāmaṃ hiraṇmayam |
vayaṃ brahmavidastena pūtaṃ brahma punīmahe || 66 ||
[Analyze grammar]

sanemicakramajaraṃ cakṣurasya mahātmanaḥ |
asminhi vidhṛte devā mahonnatapada yayau || 67 ||
[Analyze grammar]

tasmādvai vidhivaddhāryāḥ śaṃkhacakrādihetayaḥ |
brāhmaṇānāṃ viśeṣeṇa vaiṣṇavānāṃ viśeṣataḥ || 68 ||
[Analyze grammar]

dhṛtorddhvapuṃḍraḥ kṛtacakradhārī viṣṇoḥ padaṃ dhyāyati yo mahātmā |
svareṇamaṃtreṇa sadā hṛdisthaṃ parātparaṃ yāti viśuddhacetāḥ || 69 ||
[Analyze grammar]

ye kaṃṭhalagnatulasī nalinākṣamālā ye bāhumūlaparicihnitaśaṃkhacakrāḥ |
ye vā lalāṭaphalake lasadūrdhvapuṃḍrāste vaiṣṇavā bhuvanamāśu pavitrayaṃti || 70 ||
[Analyze grammar]

divaspateḥ suvitataṃ pavitraṃ ye tu rakṣiṇaḥ |
na vahaṃti bhuje samyakna hi śocaṃti jantavaḥ || 71 ||
[Analyze grammar]

ye vahaṃti bhuje cakraṃ sasthiraṃ vidhinā drutam |
paraṃ vyomni tu te sthānamadhitiṣṭhanti tejasā || 72 ||
[Analyze grammar]

homāgnisaṃtaptapavitralāṃchitā mūle tu bāhvoḥ paramātmano hareḥ |
saṃtārayitvā bhavasāgaraṃ mahacchuddhaṃ paraṃ yāti pareśalokam || 73 ||
[Analyze grammar]

aṅkayettaptacakrādyairātmano bāhumūlayoḥ |
kalatrāpatyabhṛtyeṣu paśvādiṣu ca aṅkayet || 74 ||
[Analyze grammar]

ityevaṃ śrutayassarvāḥ kathayaṃti varānane |
tathaiva setihāseṣu purāṇeṣvapi kathyate || 75 ||
[Analyze grammar]

dvividhaṃ vaiṣṇavaṃ prauktaṃ bāhyamābhyaṃtaraṃ tathā |
śaṃkhacakrādibhirbāhyamāṃtaraṃ vītarāgatā || 76 ||
[Analyze grammar]

bāhyābhyaṃtarasāmyaṃ yattadvaiṣṇavamudāhṛtam |
tasmāccakrādicihnaṃ tu prathamaṃ vaiṣṇavaṃ smṛtam || 77 ||
[Analyze grammar]

āṃtaraṃ smaradoṣādi vimuktaṃ svātmadarśanam |
sarvabhūtadayāśāṃtiriṃdriyārtheṣvalolatā || 78 ||
[Analyze grammar]

putradārādyasaṃgatvaṃ yogābhyāsaratistathā |
ananyabhaktiyogena pareśasyābhiṣevaṇam || 79 ||
[Analyze grammar]

tasmāccakrādihetīnāmaṃkanaṃ vaiṣṇavaṃ smṛtam |
cakrādicihnahīnatvādvaiṣṇavatvaṃ na labhyate || 80 ||
[Analyze grammar]

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe umāmaheśvara |
saṃvāde sudarśanādimāhātmyaṃnāma caturviṃśatyadhikadviśatatamo'dhyāyaḥ || 224 ||
[Analyze grammar]