Chapter 223

[English text for this chapter is available]

śaunaka uvāca |
sūtasūta mahābhāga dhanyosi tvaṃ bhavāṃbudhau |
yanno'tyarthaṃ nimagnānāṃ pāyayasvamṛtotkaram || 1 ||
[Analyze grammar]

sādho'tra bhavanistāra vāṃchatāṃ naḥ samādiśa |
maṃtraratnaṃ bhāvaśuddhaṃ yanmayaṃ sacarācaram || 2 ||
[Analyze grammar]

sūta uvāca |
śṛṇu śaunaka vakṣyāmi maṃtraratnaṃ mahādbhutam |
yaddilīpāya gaditaṃ vasiṣṭhena mahātmanā || 3 ||
[Analyze grammar]

ekadā tu dilīpena pṛṣṭametadguruṃ prati |
vasiṣṭhaṃ dvijaśārdūlaṃ praṇipatya yathā tvayā || 4 ||
[Analyze grammar]

dilīpa uvāca |
bhagavanbhavatā proktāssarvadharmāviśeṣataḥ |
varṇāśramayutā dharmā nityanaimittikāḥ kriyāḥ || 5 ||
[Analyze grammar]

rājadharmmāśca yajñāśca tīrthadānavratādikam |
śrutā mayā muniḥśreṣṭha akṣayya svargabhogadāḥ || 6 ||
[Analyze grammar]

adhunā śrotumicchāmi mokṣamārgaṃ sanātanam |
diṣṭyāhaṃ yena gacchāmi tadbrahmanvaktumarhasi || 7 ||
[Analyze grammar]

ko maṃtraṃ sarvamaṃtrāṇāṃ bhavarogaikabheṣajam |
sarveṣāmeva dehīnāṃ ko hi mokṣapradaḥ paraḥ || 8 ||
[Analyze grammar]

tatsamākhyāhi tattvena mayi vātsalyagauravāt || 9 ||
[Analyze grammar]

vasiṣṭha uvāca |
sādhupṛṣṭaṃ tvayā rājansarvalokahitaiṣiṇā |
vakṣyāmi paramaṃ guhyamekaṃ saṃsāratārakam || 10 ||
[Analyze grammar]

purā maharṣayaḥ sarve yajñadānaparāḥ śubhāḥ |
papracchurbrahmaṇaḥ putraṃ nāradaṃ munisattamam || 11 ||
[Analyze grammar]

maharṣaya ūcuḥ |
bhagavankena maṃtreṇa gacchāmaḥ paramaṃ padam |
tanno brūhi mahābhāga prasādaṃ kartumarhasi || 12 ||
[Analyze grammar]

nārada uvāca |
pitāmahaṃ purā sarve yoginaḥ sanakādayaḥ |
papracchurekamekāṃte mokṣamārgaṃ sudurllabham || 13 ||
[Analyze grammar]

brahmovāca |
śṛṇudhvaṃ yoginaḥ sarve rahasyamidamadbhutam || 14 ||
[Analyze grammar]

na jānaṃti surāḥ sarve ṛṣayaśca tapodhanāḥ |
sargādau proktavāndevo mahyaṃ nārāyaṇo'vyayaḥ || 15 ||
[Analyze grammar]

īśvaryā saha devyā ca samyaksaṃpūjito mayā |
tataḥ prasanno bhagavānmama nārāyaṇo'vyayaḥ || 16 ||
[Analyze grammar]

prājāpatyaṃ dadau mahyaṃ śrutijaṃ sarvavāṅmayam |
prakāśakāni maṃtrāṇi vyāpakāvyāpakāni ca || 17 ||
[Analyze grammar]

tatastamabruvaṃ devaṃ purāṇapuruṣottamam |
bhagavankena maṃtreṇa saṃsārottāraṇaṃ nṛṇām || 18 ||
[Analyze grammar]

tanmamācakṣva tattvena sarvalokahitāya vai |
ko mantraḥ sarvamantrāṇāṃ puraścaraṇavarjitaḥ || 19 ||
[Analyze grammar]

sakṛduccāraṇānnṛṇāṃ dadāti paramaṃ padam |
śrībhagavānuvāca |
sādhupṛṣṭaṃ mahābhāga sarvalokahitaiṣiṇā || 20 ||
[Analyze grammar]

tasmādvakṣyāmi te guhyaṃ yena māmāpnuyurnarāḥ || 21 ||
[Analyze grammar]

sarveṣāmeva maṃtrāṇāṃ maṃtraratnaṃ śubhāvaham |
sakṛtsmaraṇamātreṇa dadāti paramaṃ padam || 22 ||
[Analyze grammar]

maṃtraratnadvayaṃ nyāsaṃ prayatiḥ śaraṇāgatiḥ |
lakṣmīnārāyaṇamiti mantraḥ sarvaphalapradaḥ || 23 ||
[Analyze grammar]

nāmāni maṃtraratnasya paryyāyeṇa nibodhata |
tasyoccāraṇamātreṇa parituṣṭosmi nityaśaḥ || 24 ||
[Analyze grammar]

kulajo vā tapasvī vā vedavedāṃgapāragaḥ |
yajñadānaparo vāpi sarvatīrthopasevakaḥ || 25 ||
[Analyze grammar]

vratī vā satyavādī vā yatirvā jñānavānapi |
mantrādhikārī na bhavettaṃ prayatnena varjayet || 26 ||
[Analyze grammar]

brāhmaṇāḥ kṣatriyā vaiśyā striyaḥ śūdrāstathetarāḥ |
tasyādhikāriṇaḥ sarve mama bhaktāstu te yadi || 27 ||
[Analyze grammar]

ananyaśaraṇānāṃ ca tathaivānanyasevinām |
ananyasādhakānāṃ ca vaktavyo mantra uttamaḥ || 28 ||
[Analyze grammar]

ārtānāmāśu phaladassakṛdeva kṛto hyasau |
dṛptānāmapi jantūnāṃ dehāntaranivāraṇaḥ || 29 ||
[Analyze grammar]

ārtto jijñāsurarthārthī jñānī vāpi prajāpatiḥ |
sakṛnmāṃ śaraṇaṃ yāti tataḥ kāmānavāpnuyāt || 30 ||
[Analyze grammar]

nādīkṣitāya vaktavyaṃ nābhaktāya ca mānine |
nāstikāya na lubdhāya na śraddhāvimukhāya ca || 31 ||
[Analyze grammar]

na cāśuśrūṣave vācyaṃ nāsaṃvatsaravāsine |
kāmakrodhavimuktastu daṃbhalobhavivarjitaḥ || 32 ||
[Analyze grammar]

māṃ ca yo vyabhicāreṇa bhaktiyogena sevate |
vaktavya tasya vidhivanmaṃtraratnamanuttamam || 33 ||
[Analyze grammar]

deśakālādiniyamānarimitrādi śodhanam |
nyāsamudrādikaṃ tasya puraścaraṇasaṃyutam || 34 ||
[Analyze grammar]

maccakrāṃkitadehatvaṃ madīyārādhanaṃ tathā |
mayi sanyastakarmatvaṃ madananyaśaraṇyatatā || 35 ||
[Analyze grammar]

mayi sarvaphalanyāso mahāviśvāsapūrvakam |
ananyasādhano yatnastvakiṃcanatvamātmanaḥ || 36 ||
[Analyze grammar]

avaiṣṇavānāṃ saṃbhāṣā vaṃdanādi vivarjanam |
ananyadevatānāṃ ca vandanaṃ pūjanaṃ tathā || 37 ||
[Analyze grammar]

evamādyādi niyamāṃ prapannasya prakīrtitāḥ |
ityādiguṇayuktasya vaktavyaṃ maṃtramuttamam || 38 ||
[Analyze grammar]

tasya nārāyaṇaścāhamṛṣirviṣṇuḥ sanātanaḥ |
devatā ca śriyā sārddhamahaṃ vātsalyasāgaraḥ || 39 ||
[Analyze grammar]

sarvalokeśvaraḥ śrīmānsuśīlaḥ subhagastathā |
sarvajñaḥ sarvaśaktiśca sadāpūrṇamanorathaḥ || 40 ||
[Analyze grammar]

sarvagaḥ sarvabaṃdhuśca kṛpāpīyūṣasāgaraḥ |
śrīmannārāyaṇaścāhaṃ devatā samudāhṛtaḥ || 41 ||
[Analyze grammar]

chaṃdastu devī gāyatrī paṃcaviṃśākṣarātmikā |
dvissaptaṣaṭtripaṃcadviṣaḍaṃgāni niyojayet || 42 ||
[Analyze grammar]

lakṣmyā madanapāyinyā māṃ dhyāyedviśvarūpiṇam |
cakraśaṃkhagadāpadmapāṇinaṃ divyarūpiṇam || 43 ||
[Analyze grammar]

vāmāṃkasthaśriyā sārddhaṃ pūjayetprayataṃ śuciḥ |
anena maṃtraratnena gaṃdhapuṣpanivedanaiḥ |
sakṛtsaṃpūjyamāno'pi saṃtuṣṭosmi prajāpate || 44 ||
[Analyze grammar]

brahmovāca |
samyaguktaṃ tvayā nātha rahasyamidamuttamam |
maṃtraratnaprabhāvaśca sarvasiddhiprado nṛṇām || 45 ||
[Analyze grammar]

pitā tvaṃ sarvalokānāṃ mātā tvaṃ gurureva ca |
tvaṃ ca svāmī sakhā bhrātā gatistvaṃ śaraṇaṃ suhṛt || 46 ||
[Analyze grammar]

ahaṃ tu tava deveśa dāsaśśiṣyastathā suhṛt |
tasmānmama dayāsiṃdho proktavānidamuttamam || 47 ||
[Analyze grammar]

adhunā maṃtraratnasya dīkṣāṃ samyagvidhānataḥ |
brūhi sarvatra tatvena lokānāṃ hitakāmyayā || 48 ||
[Analyze grammar]

śrībhagavānuvāca |
śaṇu vatsa pravakṣyāmi maṃtra dīkṣāvidhiṃ param |
ācāryaṃ saṃśrayetpūrvaṃ madāśrayaṇasiddhaye || 49 ||
[Analyze grammar]

ācāryo vedasaṃpanno viṣṇubhakto vimatsaraḥ |
maṃtrajño mantrabhaktaśca sadā maṃtrāśrayaḥ śuciḥ || 50 ||
[Analyze grammar]

satsaṃpradāyasaṃyukto brahmavidyāviśāradaḥ |
ananyasādhanaścaiva tathānanyaprayojanaḥ || 51 ||
[Analyze grammar]

brāhmaṇo vītarāgaśca krodhalobhavivarjitaḥ |
sadvṛttau śāsitā caiva mumukṣuḥ paramātmavit || 52 ||
[Analyze grammar]

evamādiguṇepeta ācāryaḥ sa mudā suhṛt |
ācārāñśāsayedyastu sa ācārya itīritaḥ || 53 ||
[Analyze grammar]

yastvācāryaparādhīnassadvṛttau śāsyate yadi |
śāsane sthiravṛttaśca śiṣyaḥ sadbhirudāhṛtaḥ || 54 ||
[Analyze grammar]

evaṃ lakṣaṇasaṃyuktaṃ śiṣyaṃ sarvaguṇānvitam |
adhyāpayedvidhānena mantraratnanuttamam || 55 ||
[Analyze grammar]

dvādaśyāṃ śravaṇe vāpi karhicidvaiṣṇave dine |
sadācāryopasaṃprītau tatra dīkṣāṃ samācet || 56 ||
[Analyze grammar]

sudarśanaṃ pāṃcajanyaṃ suvarṇena prakārayet |
raupyeṇa vāpi tāmreṇa kāṃsyenāpi prakārayet || 57 ||
[Analyze grammar]

snāpya paṃcāmṛtaiḥ śuddhairarcayetpurato mama |
arccayedgaṃdhapuṣpādyaistanmaṃtreṇa vidhānataḥ || 58 ||
[Analyze grammar]

tatra saṃsthāpayedagni svagṛhyokta vidhānataḥ |
ācāryo juhuyādājyaṃ maṃtreṇātha dvijottamaḥ || 59 ||
[Analyze grammar]

aṣṭottarasahasraṃ vā śatamaṣṭottaraṃ tu vā |
juhuyānmaṃtraratnena tathānyairvaiṣṇavaiḥ śubhaiḥ || 60 ||
[Analyze grammar]

maṃtraiḥ puruṣasūktādyairjuhuyāghṛtapāyasam |
tasminnagnau kṣipeccakraṃ śaṃkhaṃ ca dvijattamaḥ || 61 ||
[Analyze grammar]

ṣaḍakṣareṇa juhuyādājyaṃ viṃśatisaṃkhyayā |
prataptaṃ cakramādāya maṃtraiṇaiva tathā guruḥ || 62 ||
[Analyze grammar]

śaṃkhenaivāṃkanaṃ kuryādbāhvordakṣiṇasavyayoḥ |
homaśeṣaṃ samāpyātha punaḥ pūjāṃ samācaret || 63 ||
[Analyze grammar]

tataḥ kalaśamādāya pavitrodakapūritam |
maṃtreṇaivābhimaṃtryātha tasya mūrdhnyabhiṣecayet || 64 ||
[Analyze grammar]

sitavastradharaṃ samyagācāṃtaṃ vinayānvitam |
ūrddhvapuṇḍradharaṃ śiṣyaṃ maṃtramadhyāpayedguruḥ || 65 ||
[Analyze grammar]

maṃtrārthaśca pravaktavyo vṛttiścaiva viśeṣataḥ |
labdhamaṃtrastadācāryaṃ pūjayedbhūṣaṇādibhiḥ || 66 ||
[Analyze grammar]

anena vidhinā maṃtraṃ yo'dhīte vaiṣṇavādguroḥ |
tataḥ sa vaiṣṇavaṃ yāti nānyathā surasattama || 67 ||
[Analyze grammar]

nārada uvāca |
evamukttvā vidhātāraṃ devadevo hariḥ pitā |
svacakreṇāṃkayitvā tu tasmai maṃtraṃ dadau svayam || 68 ||
[Analyze grammar]

sarvalokeśvaro devo brahmā mama pitā prabhuḥ |
mamāpi vidhivanmaṃtraṃ sa dadau munisattamāḥ || 69 ||
[Analyze grammar]

tasmādyūyaṃ muniśreṣṭhā dhārayitvā sudarśanam |
nārāyaṇapadaṃ dvaṃdvaṃ gacchadhvaṃ śaraṇaṃ dvijāḥ || 70 ||
[Analyze grammar]

vasiṣṭha uvāca |
ityuktvā munayaḥ sarve nāradena surarṣiṇā |
dvayādhikāriṇaḥ sarve yātā viṣṇoḥ paraṃ padam || 71 ||
[Analyze grammar]

tasmāttvamapi rājarṣe viṣṇusāyujyamicchasi |
dīkṣāmārgavidhānena dhārayitvā sudarśanam || 72 ||
[Analyze grammar]

nārāyaṇapadadvaṃdvaṃ tadekaṃ śaraṇaṃ vraja |
sarvalokeśvaraḥ sākṣādbrahmā tribhuvaneśvaraḥ || 73 ||
[Analyze grammar]

mamāpi nāradasyāpi proktavānmaṃtramuttamam |
śaunakādi maharṣīṇāṃ naimiṣāraṇyavāsinām || 74 ||
[Analyze grammar]

nāradaḥ pradadau maṃtraṃ prapattiṃ śaraṇāgatim |
etadguhyatamaṃ rājanna jānaṃti maharṣayaḥ || 75 ||
[Analyze grammar]

devātāśca na jānaṃti siddhā sādhyāśca dānavāḥ |
mayāpi prāpito maṃtraṃ śaktiputraḥ parāśaraḥ || 76 ||
[Analyze grammar]

idaṃ rahasyaṃ paramaṃ lakṣmīnārāyaṇaṃ dvayam |
rājaṃstavāpi vakṣyāmi prapatti śaraṇāgatim || 77 ||
[Analyze grammar]

dvayātparataraṃ mantraṃ nāsti satyaṃ bravīmi te |
asmātparataraṃ dharmmaṃ nāsti lokeṣu kiṃcana || 78 ||
[Analyze grammar]

satyaṃ satyaṃ punaḥ satyaṃ brahmaṇā kathitaṃ purā |
nārāyaṇātparo devo nāsti muktiprado nṛṇām || 79 ||
[Analyze grammar]

tatsevaiva bhavenmokṣaḥ sarvakarma nikṛṃtanaḥ || 80 ||
[Analyze grammar]

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe vasiṣṭhadilīpasaṃvāde vidyopadeśonāma trayoviṃśatyadhikadviśatatamo'dhyāyaḥ || 223 ||
[Analyze grammar]