Chapter 182

[English text for this chapter is available]

śiva uvāca |
aṣṭamādhyāyamāhātmyaṃ śṛṇu vakṣyāmi pārvati |
yasya śravaṇamātreṇa parāṃ mudamavāpsyasi || 1 ||
[Analyze grammar]

āmardakaṃ puraṃ nāmnā viśrutaṃ dakṣiṇāpathi |
dvijanmā bhāvaśarmeti tatrāsīdgaṇikāpatiḥ || 2 ||
[Analyze grammar]

khādanmāṃsaṃ pibanmadyaṃ corayansādhusaṃpadaḥ |
ramamāṇaḥ parastrībhirākheṭaka kutūhalī || 3 ||
[Analyze grammar]

atyavāhayadatyugro garīyāṃsaṃ manoratham |
suhṛdāṃ viṭagoṣṭhyāṃ ca tālīphalasudhārasam || 4 ||
[Analyze grammar]

nipīya kaṃṭhaparyaṃtamajīrṇenātipīḍitaḥ |
mṛtaḥ kālena pāpātmā jātastālītarurmahān || 5 ||
[Analyze grammar]

tasyacchāyāmupāśritya nibiḍāmatiśītalām |
abhūtāṃ daṃpatī kaucidbrahmarākṣasatāṃ gatau || 6 ||
[Analyze grammar]

devyuvāca |
kiṃ jātīyau kimātmānau kiṃvṛttāvityudīraya |
karmaṇā kena vā deva brahmarākṣasatā tayoḥ || 7 ||
[Analyze grammar]

śiva uvāca |
vedavedāṃgatatvajñaḥ sarvaśāstrārthakovidaḥ |
sadācāro'bhavatkaściddivajo nāma kuśīvalaḥ || 8 ||
[Analyze grammar]

jāyā ca tasya kumati nāmadheyā durāśayā |
sa sabhāryo mahādānānyādadāno'tilobhavān || 9 ||
[Analyze grammar]

mahiṣīṃ kālapuruṣaṃ hayādīnanuvāsaram |
aprayacchandvijātibhyo dānalabdhāṃ varāṭikām || 10 ||
[Analyze grammar]

kālena daṃpatī pretau brahmarākṣasarūpiṇau |
paryaṭaṃtau mahīmetāṃ kṣuttṛṣākulavigrahau || 11 ||
[Analyze grammar]

viśaśramaturāgatya mūlaṃ tālītarostataḥ |
kathametanmahāduḥkhamāvayorapagacchati || 12 ||
[Analyze grammar]

kathaṃ vā jāyate muktirbrahmarākṣasayonitaḥ |
iti pṛṣṭo gṛhiṇyā'sau brāhmaṇaḥ samabhāṣata || 13 ||
[Analyze grammar]

brahmavidyopadeśena vinādhyātmavicāraṇāt |
vinākarmavidhijñānātkathaṃ mucyeta saṃkaṭāt || 14 ||
[Analyze grammar]

bhāryovāca |
kiṃ tad brahma kimadhyātmaṃ kiṃ karma puruṣottama |
etāvadukte tatpatnyā yadāścaryamabhūcchṛṇu || 15 ||
[Analyze grammar]

aṣṭamādhyāyaślokārddhaśravaṇātsa tarustadā |
vihāya tālīrūpaṃ tadbabhūva dvijasattamaḥ || 16 ||
[Analyze grammar]

sadyojñānavidhūtātmā vimuktaḥ pāpakaṃcukāt |
tanmāhātmyādvinirmuktau daṃpatī tau babhūvatuḥ || 17 ||
[Analyze grammar]

etāvadeva muktaṃ ca daivānnirgatya tanmukhāt |
tatoṃtarikṣādāyāṃtaṃ kvaṇatkiṃkiṇikaṃ śubham || 18 ||
[Analyze grammar]

divi divyāṃganāvaktracaṃdramaṃḍalamaṃḍitam |
apsarovadanāṃbhoja bhrāmyadbhramarasaṃkulam || 19 ||
[Analyze grammar]

nirmathyamānadugdhābdhi velāḍiṃḍirapāṃḍuraiḥ |
gaṃgātaraṃgasubhagaiścāmarairupaśobhitam || 20 ||
[Analyze grammar]

gāyadgaṃdharvasubhagaṃ nṛtyatsuravadhūśatam |
divyaṃ vimānamārūḍhau daṃpatī jagmaturdivam || 21 ||
[Analyze grammar]

atratyaṃ vṛttamakhilametadvismayakārakam |
tato lilekha medhāvī ślokārddhamidamādarāt || 22 ||
[Analyze grammar]

yayau vārāṇasīṃ nāma nagarīṃ muktidāyinīm |
ārādhayitumanvicchandevadevaṃ janārdanam || 23 ||
[Analyze grammar]

sa tatra kartumārebhe tapaḥ paramudāradhīḥ |
atrāṃtare jagannātho devadevo janārdanaḥ || 24 ||
[Analyze grammar]

pṛṣṭo dugdhābdhisutayā saṃyojya karasaṃpuṭam |
nidrāpathaṃ vihāyaiva sthīyate kathyatāmiti || 25 ||
[Analyze grammar]

śrībhagavānuvāca |
kāśyāṃ bhāgīrathī tīre tapasyatitarāṃ dvijaḥ |
bhāvaśarmāti medhāvī madbhaktirasapūritaḥ || 26 ||
[Analyze grammar]

japangītāṣṭamādhyāyaślokārddhaṃ niyateṃdriyaḥ |
saṃtuṣṭavānahaṃ devi tadīyatapasā bhṛśam || 27 ||
[Analyze grammar]

ciraṃ vicārayanneva tattapaḥ sadṛśaṃ phalam |
dātumutkaṃṭhitamanā varteyaṃ sāṃprataṃ priye || 28 ||
[Analyze grammar]

pārvatyuvāca |
hariḥ prasannabhūto'pi ciṃtāṃ prāpa yadi prabho |
bhāvaśarmā harerbhaktaḥ prāptaḥ kiṃ tatphalaṃ punaḥ || 29 ||
[Analyze grammar]

śrīmahādeva uvāca |
tataḥ prasādamāsādya prasannasya muradviṣaḥ |
sukhamātyaṃtikaṃ prāpa bhāvaśarmā dvijottamaḥ |
lebhire padavīṃ sarve tadīyā api vaṃśajāḥ || 30 ||
[Analyze grammar]

tatkarmavaśato ye vai saṃprāptā yātanāṃ purā |
etadevāṣṭamādhyāyamāhātmyaṃ kiṃcideva te || 31 ||
[Analyze grammar]

kathitaṃ mṛgaśāvākṣi draṣṭavyaṃ tu sadaiva ca || 32 ||
[Analyze grammar]