Chapter 183

[English text for this chapter is available]

śrīmahādeva uvāca |
ataḥ paraṃ pravakṣyāmi navamādhyāyamādarāt |
saṃśṛṇuṣva sthirībhūya tuhinācala kanyake || 1 ||
[Analyze grammar]

asti māhiṣmatīnāma nagarī narmadātaṭe |
tatrāsīnmādhavo nāma dvijanmā sa śivo dvijaḥ || 2 ||
[Analyze grammar]

vedavedāṃgatatvajñaḥ kālekāle'tithipriyaḥ |
arjayitvā bahudhanaṃ vidyayaiva viśuddhadhīḥ || 3 ||
[Analyze grammar]

mahāṃtamadhvaraṃ kartuṃ samārebhe kadācana |
ālaṃbhanārthamānītaśchāgaḥ pūjitavigrahaḥ || 4 ||
[Analyze grammar]

vācamūce hasannuccairjagadvismayakārakaḥ |
kimetairbahubhiryāgairvidhivadvihitairapi || 5 ||
[Analyze grammar]

vinaśvaraphalairjanma jarāmaraṇahetubhiḥ |
etāvatyapi me vipra daśeyaṃ dṛśyatāmiti || 6 ||
[Analyze grammar]

chāgasyaivaṃ vacotīva kutūhalaparaṃ janāḥ |
niśamyavismayaṃ yātāḥ kṛtamaṃḍapavāsinaḥ || 7 ||
[Analyze grammar]

tato baddhāṃjalipuṭo dvijātistimitekṣaṇaḥ |
praṇamya śraddadhānastamapṛcchacchāgamādarāt || 8 ||
[Analyze grammar]

dvija uvāca |
kiṃ jātīyaḥ kimātmā tvaṃ kiṃ vṛttamiti me vada |
kena vā karmaṇā vāsīcchāgatvamiti kāraṇam || 9 ||
[Analyze grammar]

chāga uvāca |
āsaṃ purā dvijātīnāmanvaye cātinirmale |
āhartā kratusaṃghānāṃ vedavidyāviśāradaḥ || 10 ||
[Analyze grammar]

ekadā mama gehinyā putrarogapraśāṃtaye |
chāgaḥ prayācito mattaḥ caṃḍikābhaktinamrayā || 11 ||
[Analyze grammar]

tato nihanyamānasya caṃḍikāmaṃḍapasthale |
chāgasya jananī māṃ tu śaśāpa brahmavādinī || 12 ||
[Analyze grammar]

aśāstrīyādhvanā pāpa matsutaṃ yajjighāṃsasi |
dvijātyadhamatena tvamajā yonimavāpsyasi || 13 ||
[Analyze grammar]

tato'haṃ pretyakālena chāgo'bhūvaṃ dvijottama |
nistīrya cānekavidhā yonisaṃtāpayātanāḥ || 14 ||
[Analyze grammar]

vipra uvāca |
jātismaratvamapyasti paśuyonimupeyuṣaḥ |
tvadīyajanmaśuśrūṣā kutūhalarasonmukham || 15 ||
[Analyze grammar]

chāga uvāca |
manaḥ sarvāndvijānetānapi tatkathayākhilam |
kadācinmarkaṭo bhūvamāhituṃḍikaśikṣayā || 16 ||
[Analyze grammar]

krīḍadbhirvīkṣito ḍiṃbhairnṛtyanpratigṛhāṃgaṇe |
udārānātmano dārānvilokya tanayānapi || 17 ||
[Analyze grammar]

kriyāparāṅmukho jātastyaktanartanasaṃbhramaḥ |
tato vartuladaṃḍaiśca duḥsahairāhituṃḍikaḥ || 18 ||
[Analyze grammar]

māmuccaistāḍayāṃcakre ruṣā lohitalocanaḥ |
tato'haṃ mūrcchito'bhūvaṃ kṣaratkṣatajasaṃtatiḥ || 19 ||
[Analyze grammar]

ājighrannannamudakamagamaṃ kāladharmatām |
tato'hamāsīcchunakaḥ paribhrāmyangṛhe gṛhe || 20 ||
[Analyze grammar]

kukṣiṃ bharirahaṃ mārge tyaktocchiṣṭānnabhakṣakaḥ |
kadācidāviśaṃ svāṃtarātmaveśmamahānasam || 21 ||
[Analyze grammar]

bubhukṣito bhakṣayituṃ sthālī sthāpitamodanam |
jighranbhūmitalaṃ paśyandiśo daśa śanairbhayāt || 22 ||
[Analyze grammar]

śaṃkamāno janaravātpārśve ca vilihanniva |
tataḥ kadācidāgatya vīkṣitastanujairnijaiḥ || 23 ||
[Analyze grammar]

jāyayā ca jaratyāhaṃ tāḍito lakuṭādibhiḥ |
tato bhagnakaṭiryāto bahuśoṇitamudvahan || 24 ||
[Analyze grammar]

nirjagāma bahirgehātkathaṃcinmūrcchayākulaḥ |
aṃgeṣu pūtigaṃdheṣu krimigarbheṣu kālataḥ || 25 ||
[Analyze grammar]

tataḥ kadaśvatāṃ prāptaḥ śauṃḍikasya ca veśmani |
aśvobhavamahaṃ vidvanmṛtaḥ kālakramādiha || 26 ||
[Analyze grammar]

kadāciccatvare tena samānīto janākule |
vikrayāya jarālīḍha patayāluradāvali || 27 ||
[Analyze grammar]

jāyayā dvārakāyātrāṃ kartumudyatayāsakṛt |
maulyenālpīyasā kretuṃ turaṃgaṃ ceṣṭamānayā || 28 ||
[Analyze grammar]

jagṛhehaṃ tayā dāmnā alpena vasunā jaran |
gaṃtuṃ cārabhatadvitraiḥ putrairāruhya māṃ samam || 29 ||
[Analyze grammar]

śanaiḥ śanai sarastīre magno'haṃ gāḍhakardame |
tatrāhaṃ kuṭilagrīvaścāpatankardamāntare || 30 ||
[Analyze grammar]

tāḍyamāno muhuḥ putraiḥ lakuṭopalapāṇibhiḥ |
utthāpyamāno bahudhā prāṇānmocitavānaham || 31 ||
[Analyze grammar]

tato niścitya māṃ tatra mṛtaṃ bhagnodyamāḥ sutāḥ |
ākruśya mātaraṃ dīnāṃ prāvṛtya niryayurgṛham || 32 ||
[Analyze grammar]

tataḥ saṃpretya bahunā kālena chāgatāṃ gataḥ |
nistīrṇānekahīnocca yonisaṃtāpayātanaḥ || 33 ||
[Analyze grammar]

dvija uvāca |
kimanena mahāchāga duḥkhajātena nityaśaḥ |
yathāvadaṃjasā mahyaṃ sukhamātyaṃtikaṃ bhavet || 34 ||
[Analyze grammar]

chāga uvāca |
āścaryaṃ kathayiṣyāmi punaranyadapi dvija |
svasthamāpṛcchamānasya tavāsti yadi kautukam || 35 ||
[Analyze grammar]

asti nāmnā kurukṣetraṃ nagaraṃ mokṣadāyakam |
sūryavaṃśo'bhavattatra caṃdraśarmā mahīpatiḥ || 36 ||
[Analyze grammar]

sūryoparāgasamaye śraddhayā parayānvitaḥ |
dānaṃ sa kālapuruṣaṃ dātuṃ samupacakrame || 37 ||
[Analyze grammar]

samāhūya dvijanmānaṃ vedavedāṃgapāragam |
snātuṃ puṇyodakaiḥ puṇyairyayau sārddhaṃ purodhasā || 38 ||
[Analyze grammar]

athoccaiḥ kālapuruṣo vācamūce hasanniva |
anyenaiva pragṛhṇaṃti kṣetre cāṇvapi kiṃcana || 39 ||
[Analyze grammar]

sūryoparāgasamaye kurukṣetrābhidhe sthale |
dānaṃ ca kālapuruṣaṃ jighṛkṣasi kathaṃ dvija || 40 ||
[Analyze grammar]

jñātvāpi niścitaṃ sarvametatpātakakārakam |
pravartase kathaṃ kartuṃ dhanalobhāndhayā dhiyā || 41 ||
[Analyze grammar]

itthamākarṇya tadvākyaṃ jagadvismayakārakam |
kimanena mahādānabhayenetyavadaddvijaḥ || 42 ||
[Analyze grammar]

evaṃvidha mahādāna pātakāgādhavāridhim |
jānāmi tarituṃ samyagupāyamahameva hi || 43 ||
[Analyze grammar]

tataḥ snātvā mahīpālaḥ paridhāya ca vāsasī |
śuciḥ prasannahṛdayaḥ sitamālyānulepanaḥ || 44 ||
[Analyze grammar]

avalaṃbya karāṃbhojaṃ pārśvavartipurodhasaḥ |
samāyayau sevyamānaḥ sa tatkālocitairjanaiḥ || 45 ||
[Analyze grammar]

samāgatya ca bhūpālaḥ saṃprādātkālapūruṣam |
yathocitena vidhinā tasmai bhaktyā dvijanmane || 46 ||
[Analyze grammar]

nirbhidya kālapuruṣahṛdayaṃ nirdayodayaḥ |
pāpātmā niryayau kaściccāṃḍālo raktalocanaḥ || 47 ||
[Analyze grammar]

kiṃca prāpitakālasya paraniṃdārasotsave |
niṃdā cāṃḍālikā dehapārśvamāgāddvijanmanaḥ || 48 ||
[Analyze grammar]

etaccāṃḍālayugalaṃ nirgatyāruṇalocanam |
tataḥ saṃcaritaṃ cakre prasahyāṃge dvijanmanaḥ || 49 ||
[Analyze grammar]

gītānāṃ navamādhyāyaṃ japanneva hṛdisthitaḥ |
kaṃpamānaṃ dvijaṃ kiṃcittūṣṇīṃ paśyati bhūpatau || 50 ||
[Analyze grammar]

aṃtarnidrāṇagoviṃdaṃ kaṃpamānamivāṃbudhim |
marudāṃdolanairvidvāndvijanmā pāpasaṃśrayam || 51 ||
[Analyze grammar]

tato gītākṣarodbhūtairvaiṣṇavaiḥ paripīḍitam |
palāyamānaṃ cāṃḍālayugalaṃ niṣphalodyamam || 52 ||
[Analyze grammar]

tanniścakrāma vegena dvijāteḥ pārśvavarti yat |
śarīre varttamānaṃ ca paraniṃdārasotsave || 53 ||
[Analyze grammar]

itthaṃ kalitavṛttāṃtaḥ pratyakṣaṃ kṣitivallabhaḥ |
paryapṛcchaddvijanmānaṃ vismayasmeralocanaḥ || 54 ||
[Analyze grammar]

kathamāpadiyaṃ ghorā nistīrṇā mahatī tvayā |
kaṃ maṃtraṃ japatā vipra kaṃ vāsaṃ smaratāsuram || 55 ||
[Analyze grammar]

kaḥ pumānkā ca sā yoṣitkathametāvupasthitau |
kathaṃ ca śāṃtimāpannāvityudīraya me dvija || 56 ||
[Analyze grammar]

dvija uvāca |
cāṃḍālamūrtimāsādya mūrtikilbiṣamulbaṇam |
yoṣinmūrttimayīṃ niṃdādvayametadavaimyaham || 57 ||
[Analyze grammar]

gītāyā navamādhyāyamaṃtramālā mayā smṛtā |
tanmāhātmyamidaṃ sarvaṃ tvamavehi mahīpate || 58 ||
[Analyze grammar]

gītāyā navamādhyāyaṃ japāmi pratyahaṃ nṛpa |
nistīrṇāścāpadastena kupratigrahasaṃbhavāḥ || 59 ||
[Analyze grammar]

abhyasya navāmādhyāyaṃ rājā tasmāddvijanmanaḥ |
tāvubhāvapi lebhāte parāṃ nirvṛtimuttamām || 60 ||
[Analyze grammar]

iti śrīpādme mahāpurāṇe paṃcapaṃcāśatsahasrasaṃhitāyāmuttarakhaṃḍe gītāmāhātmye tryaśītyadhikaśatatamo'dhyāyaḥ || 183 ||
[Analyze grammar]