Chapter 118

[English text for this chapter is available]

sūta uvāca |
punaḥ provāca bhagavānmahādevo vṛṣadhvajaḥ |
śrotāramupasaṃgamya bhaktiyuktaṃ ṣaḍānanam || 1 ||
[Analyze grammar]

īśvara uvāca |
kārtiko vaiṣṇavo māsaḥ sarvamāseṣu cottamaḥ |
asminmāse trayastriṃśaddevāḥ saṃnihitāḥ kalau || 2 ||
[Analyze grammar]

ūrje māsi mahābhāgau bhojanāni dvijātaye |
tiladhenuṃ hiraṇyaṃ ca rajataṃ bhūmivāsasī || 3 ||
[Analyze grammar]

gopradānāni dāsyaṃti sarvabhāvena suvrata |
sarveṣāmeva dānānāṃ kanyādānaṃ viśiṣyate || 4 ||
[Analyze grammar]

brāhmaṇāyātra ye kanyāṃ dāsyaṃti vidhivannarāḥ |
vaikuṃṭhe vasatisteṣāṃ yāvadiṃdrāścaturdaśa || 5 ||
[Analyze grammar]

romakāle tu saṃprāpte somo bhuṃkte tu kanyakām |
ṛtukāle tu gaṃdharvā vahnistu kucadarśane || 6 ||
[Analyze grammar]

tāvadvivāhayetkanyāṃ yāvannartumatī bhavet |
vivāhastvaṣṭavarṣāyāḥ kanyāyāḥ śasyate budhaiḥ || 7 ||
[Analyze grammar]

dātavyā śrotriyāyaiva brāhmaṇāya tapasvine |
sākṣādadhītavedāya vidhinā brahmacāriṇe || 8 ||
[Analyze grammar]

kanyāvarapramāṇāyā eṣa eva vidhiḥ smṛtaḥ |
yāvaṃti caiva romāṇi kanyāyāśca tanau suta || 9 ||
[Analyze grammar]

tāvadvarṣasahasrāṇi rudraloke mahīyate |
sahasrameva dhenūnāṃ śataṃ cānuḍuhāṃ samam || 10 ||
[Analyze grammar]

daśānuḍutsamaṃ yānaṃ daśayānasamo hayaḥ |
hayadānasahasrebhyo gajadānaṃ viśiṣyate || 11 ||
[Analyze grammar]

gajadānasahasrāṇāṃ svarṇadānaṃ ca tatsamam |
svarṇabhārasahasrāṇāṃ vidyādānaṃ ca tatsamam || 12 ||
[Analyze grammar]

vidyādānātkoṭiguṇaṃ bhūmidānaṃ viśiṣyate |
bhūmidānasahasrebhyo gopradānaṃ viśiṣyate || 13 ||
[Analyze grammar]

gopradānasahasrebhyo hyannadānaṃ viśiṣyate |
annādhāramidaṃ sarvaṃ jagatsthāvarajaṃgamam || 14 ||
[Analyze grammar]

tasmāddeyaṃ prayatnena kārtike śikhivāhana |
trīṇi tulyapradānāni trīṇi tulyaphalāni ca || 15 ||
[Analyze grammar]

kārtikeya uvāca |
anyānapi mahādeva dharmānme vaktumarhasi |
yānkṛtvā sarvapāpāni prakṣālya tridaśo bhavet || 16 ||
[Analyze grammar]

sūta uvāca |
itipṛṣṭastadā śaṃbhuḥ punarvaktuṃ pracakrame |
yāvatkiṃ bahudhā stutvāttacchṛṇudhvaṃ tapodhanāḥ || 17 ||
[Analyze grammar]

īśvara uvāca |
parānnaṃ varjayedyastu kārtike niyame kṛte |
parānnavarjanādeva labheccāṃdrāyaṇaṃ phalam || 18 ||
[Analyze grammar]

taṃ prāptaṃ kārtikaṃ dṛṣṭvā parānnaṃ yastu varjayet |
dinedine tu kṛcchrasya phalaṃprāpnoti mānavaḥ || 19 ||
[Analyze grammar]

kārtike varjayettailaṃ kārtike varjayenmadhu |
kārtike varjayetkāṃsyaṃ saṃghānnaṃ ca viśeṣataḥ || 20 ||
[Analyze grammar]

rākṣasīṃ yonimāpnoti sakṛnmāṃsasya bhakṣaṇāt |
ṣaṣṭivarṣasahasrāṇi viṣṭhāyāṃ paripacyate || 21 ||
[Analyze grammar]

tanmukto jāyate pāpo viṣṭhāśī grāmasūkaraḥ |
pravṛttānāṃ tu bhakṣāṇāṃ kārtike niyame kṛte || 22 ||
[Analyze grammar]

avaśyaṃ viṣṇurūpatvaṃ prāpyate mokṣadaṃ padam |
na kārtikasamo māso na daivaṃ keśavātparam || 23 ||
[Analyze grammar]

na vedasadṛśaṃ śāstraṃ na tīrthaṃ gaṃgayā samam |
na satyaṃ na samaṃ vṛttaṃ na kṛtena samaṃ yugam || 24 ||
[Analyze grammar]

na tṛptī rasanā tulyā na dānasadṛśaṃ sukham |
na dharmasadṛśaṃ mitraṃ na jyotiścakṣuṣā samam || 25 ||
[Analyze grammar]

avratena kṣipedyastu māsaṃ dāmodarapriyam |
karmabhraṣṭaḥ sa vijñeyo hīnayoniṣu jāyate || 26 ||
[Analyze grammar]

kārtikaḥ pravaro māso vaiṣṇavānāṃ sadā priyaḥ |
samudragā nadī puṇyā durlabhā snānaśālinām || 27 ||
[Analyze grammar]

kulaśīlavatīkanyā durlabhā daṃpatī nṛṇām |
durlabhā jananī loke pitā caiva viśeṣataḥ || 28 ||
[Analyze grammar]

durlabhaṃ sādhusanmānaṃ durlabho dhārmikaḥ sutaḥ |
durlabho dvārikāvāso durlabhaṃ kṛṣṇadarśanam || 29 ||
[Analyze grammar]

durlabhaṃ gomatīsnānaṃ durlabhaṃ kārtikavratam |
brāhmaṇebhyo mahīṃ dattvā grahaṇe caṃdrasūryayoḥ || 30 ||
[Analyze grammar]

yatphalaṃ labhate vatsa tatphalaṃ bhūmiśāyinaḥ |
bhojanaṃ dvijadaṃpatyoḥ pūjayecca vilepanaiḥ || 31 ||
[Analyze grammar]

kaṃbalāni ca ratnāni vāsāṃsi vividhāni ca |
tūlikāśca pradātavyāḥ pracchādanapaṭaiḥ saha || 32 ||
[Analyze grammar]

upānahā vātapatraṃ kārtike dehi pāvake |
yaḥ karoti naro nityaṃ kārtike patrabhojanam || 33 ||
[Analyze grammar]

na durgatimavāpnoti yāvadiṃdrāścaturdaśa |
sarvakāmaphalaṃ tasya sarvatīrthaphalaṃ labhet || 34 ||
[Analyze grammar]

na cāpi narakaṃ paśyedbrahmapatreṣu bhojanāt |
brahmā eṣa smṛtaḥ sākṣātpālāśaḥ sarvakāmadaḥ || 35 ||
[Analyze grammar]

madhyamaṃ varjayetpatraṃ kārtike śikhivāhana |
brahmā viṣṇuśca rudraśca trayo devāstripatrake || 36 ||
[Analyze grammar]

aiśvaraṃ varjayetpatraṃ brahmāviṣṇuranuttamaḥ |
sarvapuṇyamavāpnoti śeṣapatreṣu bhojanāt || 37 ||
[Analyze grammar]

bhojanānmadhyapatre tu kapilāpayasastathā |
prāśanānmuniśārdūla naro narakamāpnuyāt || 38 ||
[Analyze grammar]

ajñānādbhuṃjate yastu śūdro vā kapilāpayaḥ |
kapilāṃ brāhmaṇe dattvā śuddho bhavati kārtike || 39 ||
[Analyze grammar]

tiladānaṃ nadīsnānaṃ sarvadā sādhudarśanam |
bhojanaṃ brahmapatreṣu kārtike muktidāyakam || 40 ||
[Analyze grammar]

maunī pālāśabhojī ca jalasnāyī sadā kṣamī |
kārtike kṣitiśāyī ca hanyātpāpaṃ yugārjitam || 41 ||
[Analyze grammar]

jāgaraṃ kārtike māsi yaḥ karotyaruṇodaye |
dāmodarāgre senānīrgosahasraphalaṃ labhet || 42 ||
[Analyze grammar]

pitṛpakṣe'nnadānena jyeṣṭhāṣāḍhe ca vāriṇā |
kārtike tatphalaṃ puṃsāṃ paradīpaprabodhanāt || 43 ||
[Analyze grammar]

bodhanātparadīpasya vaiṣṇavānāṃ ca sevanāt |
kārtike phalamāpnoti rājasūyāśvamedhayoḥ || 44 ||
[Analyze grammar]

nadīsnānaṃ kathāviṣṇorvaiṣṇavānāṃ ca darśanam |
na bhavetkārtike yasya haretpuṇyaṃ daśābdikam || 45 ||
[Analyze grammar]

puṣkaraṃ yaḥ smaretprājñaḥ karmaṇā manasā girā |
kārtike muniśārdūla lakṣakoṭiguṇaṃ bhavet || 46 ||
[Analyze grammar]

prayāgo māghamāse tu puṣkaraṃ kārtike tathā |
avaṃtī mādhave māsi hanyātpāpaṃ yugārjitam || 47 ||
[Analyze grammar]

dhanyāste mānavā loke kalikāle viśeṣataḥ |
kurvaṃti skaṃda nityaṃ ye sarvathā harisevanam || 48 ||
[Analyze grammar]

kiṃ dattairbahubhiḥ piṃḍairgayāśrāddhādibhirmune |
tāritāstena pitaro narakācca na saṃśayaḥ || 49 ||
[Analyze grammar]

kṣīrādisnapanaṃ viṣṇoḥ kriyate pitṛkāraṇāt |
kalpakoṭiṃ divaṃ prāpya vasaṃti tridaśaiḥ saha || 50 ||
[Analyze grammar]

kārtike nārcito yaistu kṛṣṇastu kamalekṣaṇaḥ |
janmakoṭiṣu vipreṃdra na teṣāṃ kamalā gṛhe || 51 ||
[Analyze grammar]

daṣṭā muṣṭā vinaṣṭāste patitāḥ kalikaṃdare |
yairnārcito harirbhaktyā kamalairasitaiḥ sitaiḥ || 52 ||
[Analyze grammar]

padmenaikena deveśaṃ yo'rcayetkamalāpatim |
varṣāyutasahasrasya pāpasya kurute kṣayam || 53 ||
[Analyze grammar]

aparādhasahasrāṇi tathā saptaśatāni ca |
padmenaikena deveśaḥ kṣameta praṇato'rcitaḥ || 54 ||
[Analyze grammar]

tulasīpatralakṣeṇa kārtike yo'rcayeddharim |
patrepatre muniśreṣṭha mauktikaṃ labhate phalam || 55 ||
[Analyze grammar]

tulasīgaṃdhamiśraṃ tu yatkiṃcitkriyate suta |
kalpakoṭisahasrāṇi prīto bhavati keśavaḥ || 56 ||
[Analyze grammar]

mukhe śirasi dehe tu kṛṣṇottīrṇāṃ tu yo vahet |
tulasīṃ ṣaṇmukhaprītyā na tasya spṛśate kaliḥ || 57 ||
[Analyze grammar]

kṛṣṇottīrṇaistu nirmālyairyo gātraṃ parimārjayet |
sarvarogaistathā pāpairmukto bhavati ṣaṇmukha || 58 ||
[Analyze grammar]

viṣṇoraṃgāraśeṣeṇa yasyāṃgaṃ spṛśate suta |
duritāni vinaśyaṃti vyādhayo yāṃti saṃkṣayam || 59 ||
[Analyze grammar]

śaṃkhodakaṃ harerbhaktirnirmālyaṃ pādayorjalam |
caṃdanaṃ dhūpaśeṣaṃ tu brahmahatyāpahārakam || 60 ||
[Analyze grammar]

iti śrīpādme mahāpurāṇe paṃcapaṃcāśatsahasrasaṃhitāyāmuttarakhaṃḍe kārtikamāhātmye śrīśivakārtikeyasaṃvāde praśnottaronāma aṣṭādaśādhikaśatatamo'dhyāyaḥ || 118 ||
[Analyze grammar]