Chapter 116

[English text for this chapter is available]

ṛṣaya ūcuḥ |
aspṛśyatve kathaṃ jātaḥ sūta bodhitarustvayam |
spṛśyatvaṃ ca kathaṃ prāptastathā ca śanivāsare |
etadvistarataḥ sarvaṃ vaktumarhati no bhavān || 1 ||
[Analyze grammar]

sūta uvāca |
samudramathanādyāni ratnānyāpuḥ sureśvarāḥ |
śriyaṃ ca kaustubhaṃ teṣāṃ viṣṇave pradaduḥ surāḥ || 2 ||
[Analyze grammar]

yāvadaṃgīcakārāsau lakṣmīṃ bhāryārthamātmanaḥ |
tāvadvijñāpayāmāsa lakṣmīstaṃ cakrapāṇinam || 3 ||
[Analyze grammar]

lakṣmīruvāca |
asaṃskṛtya kathaṃ jyeṣṭhāṃ tvaṃ kaniṣṭhāṃ praṇīyase |
tasmānmamāgrajāmetāmalakṣmīṃ madhusūdana || 4 ||
[Analyze grammar]

vivāhya naya māṃ paścādeṣa dharmaḥ sanātanaḥ || 5 ||
[Analyze grammar]

sūta uvāca |
iti tadvacanaṃ śrutvā sa viṣṇurlokabhāvanaḥ |
uddālakāya munaye sudīrghatapase tadā || 6 ||
[Analyze grammar]

ātmavākyānurodhena tāmalakṣmīṃ dadau kila |
sthūlāsyāṃ śubhradaśanāṃ rājatīṃ bibhratīṃ tanum || 7 ||
[Analyze grammar]

vitatāṃ raktanayanāṃ rūkṣapiṃgaśiroruhām |
samunirviṣṇuvākyāttāmaṃgīkṛtya svamāśramam || 8 ||
[Analyze grammar]

vedadhvanisamāyuktamānayāmāsa dharmavit |
homadhūmasugaṃdhāḍhyaṃ vidyāghoṣavināditam || 9 ||
[Analyze grammar]

āśramaṃ taṃ samālokya vyathitā sābravīdidam |
jyeṣṭhovāca |
na hi vāso'nurūpo'yaṃ vedadhvaniyuto mama |
nātrāgamiṣye bho brahmannayasvānyatra mā ciram || 10 ||
[Analyze grammar]

uddālaka uvāca |
kathaṃ nāyāsi kiṃvātra varttate saṃmataṃ tava |
tava yogyā ca vasatiḥ kā bhavecca vadasva tat || 11 ||
[Analyze grammar]

jyeṣṭhovāca |
vedadhvanirbhavedyasminnatithīnāṃ ca pūjanam |
yajñadānādikaṃ vāpi naiva tatra vasāmyaham || 12 ||
[Analyze grammar]

parasparānurāgeṇa dāṃpatyaṃ yatra vartate |
pitṛdevārcanaṃ yatra naiva tatra vasāmyaham || 13 ||
[Analyze grammar]

durodararatā yatra paradravyāpahāriṇaḥ |
paradāraratāścāpi tatra sthāne ratirmama || 14 ||
[Analyze grammar]

govadho madyapānaṃ ca yatra saṃjāyateniśam |
brahmahatyādipāpāni tasminsthāne ratirmama |
vṛddhasajjanaviprāṇāṃ yatra syādapamānanam |
niṣṭhuraṃ bhāṣaṇaṃ yatra tatra nityaṃ vasāmyaham || 15 ||
[Analyze grammar]

sūta uvāca |
iti tadvacanaṃ śrutvā viṣaṇṇavadano'bhavat |
uddālakamunirviṣṇorvākyaṃ smṛtvā na cocivān || 16 ||
[Analyze grammar]

so'gacchadyatra tatrāsya pūjāmālokya sābravīt |
nāyāmīti tataḥ so'pi bhramādatyāturo'bhavat |
uddālakastato vākyaṃ tāmalakṣmīmuvāca ha || 17 ||
[Analyze grammar]

uddālaka uvāca |
aśvatthavṛkṣamūle'sminnalakṣmi sthīyatāṃ kṣaṇam |
āvāsasthānamālokya yāvadāyāmyahaṃ punaḥ || 18 ||
[Analyze grammar]

sūta uvāca |
iti tatra sa saṃsthāpya jagāmoddālakastadā |
pratīkṣaṃtī ciraṃ tatra yadā tanna dadarśa sā || 19 ||
[Analyze grammar]

tadā ruroda karuṇaṃ bhartṛtyāgena duḥkhitā |
tatrasthāṃ rudatīlakṣmīrvaikuṃṭhabhuvane'śṛṇot || 20 ||
[Analyze grammar]

tadā vijñāpayāmāsa viṣṇumudvignamānasā || 21 ||
[Analyze grammar]

lakṣmīruvāca |
svāminmadbhaginī jyeṣṭhā bhartṛtyāgena duḥkhitā |
tāmāśvāsayituṃ yāhi kṛpālo yadyahaṃ priyā || 22 ||
[Analyze grammar]

sūta uvāca |
lakṣmyā saha tato viṣṇustatrāgacchatkṛpānvitaḥ |
āśvāsayadalakṣmīṃ tāmidaṃ vacanamabravīt || 23 ||
[Analyze grammar]

śrīviṣṇuruvāca |
aśvatthavṛkṣamāsādya sadā'lakṣmi sthirā bhava |
mamāṃśasaṃbhavo hyeṣa āvāsaste mayā kṛtaḥ || 24 ||
[Analyze grammar]

pratyahaṃ ye'rcayiṣyaṃti tvāṃ jyeṣṭhāṃ gṛhadharmiṇaḥ |
teṣviyaṃ śrīḥ kaniṣṭhā te bhaginī niścalāstu vai || 25 ||
[Analyze grammar]

sūta uvāca |
ityūrjasya ca māhātmyaṃ ye śṛṇvaṃti paṭhaṃti ca |
teṣāṃ viṣṇupure vāso bhavedābhūtasaṃplavam || 26 ||
[Analyze grammar]

rogāpahaṃ pātakanāśakṛtparaṃ subuddhidaṃ putradhanādisādhanam |
mukternidānaṃ na hi kārtikādvai viṣṇupriyādanyadihāsti bhūtale || 27 ||
[Analyze grammar]

viṣṇupriyaṃ sakalakalmaṣanāśanaṃ ca satputrapautradhanadhānyasamṛddhikāri |
ūrjavrataṃ saniyamaṃ kurute manuṣyaḥ kiṃ tasya tīrthapariśīlanasevayā ca || 28 ||
[Analyze grammar]

iti śrīpādme mahāpurāṇe paṃcapaṃcāśatsahasrasaṃhitāyāmuttarakhaṃḍe kārtikamāhātmye śrīkṛṣṇasatyabhāmāsaṃvāde alakṣmyupākhyānaṃnāma ṣoḍaśādhikaśatatamo'dhyāyaḥ || 116 ||
[Analyze grammar]