Chapter 82

[English text for this chapter is available]

pārvatyuvāca |
vaiṣṇavānāṃ lakṣaṇaṃ ca kīdṛśaṃ pratipāditam |
mahimā kīdṛśaścaiva vada viśveśvara prabho || 1 ||
[Analyze grammar]

mahādeva uvāca |
viṣṇorayaṃ yataḥ prokto hyato vai vaiṣṇavo mataḥ |
sarvasyādistu vijñeyo brahmārūpadharastataḥ || 2 ||
[Analyze grammar]

yataḥ sakāśātsaṃjātā brāhmaṇā vedapāragāḥ |
te vaiṣṇavāstu vijñeyā naivānye tu kadācana || 3 ||
[Analyze grammar]

śaucasatyakṣāṃtiyukto rāgadveṣavivarjitaḥ |
vedavidyāvicārajño yaḥ sa vaiṣṇava ucyate || 4 ||
[Analyze grammar]

agnihotrarato nityaṃ nityaṃ cātithipūjakaḥ |
pitṛbhakto mātṛbhaktaḥ sa vai vaiṣṇava ucyate || 5 ||
[Analyze grammar]

dayādharmeṇa saṃyuktastathā pāpaparāṅmukhaḥ |
śaṃkhacakrāṃkitoyo vai sa vai vaiṣṇava ucyate || 6 ||
[Analyze grammar]

kaṃṭhe mālādharo yastu mukhe rāmaṃ sadoccaret |
gānaṃ kuryātsadā bhaktyā sa naro vaiṣṇavaḥ smṛtaḥ || 7 ||
[Analyze grammar]

purāṇeṣu ratā nityaṃ yajñeṣu caratāḥ sadā |
te narā vaiṣṇavā jñeyāḥ sarvadharmeṣu saṃmatāḥ || 8 ||
[Analyze grammar]

teṣāṃ niṃdāṃ prakurvaṃti ye narāḥ pāpakāriṇaḥ |
te mṛtāstu kuyoniṃ vai gacchaṃti ca punaḥ punaḥ || 9 ||
[Analyze grammar]

gopālanāmnīṃ mūrtiṃ ca ye'rcayaṃti dvijāḥ sadā |
dhātumātramayīṃ kṛtvā caturhastāṃ suśobhitām || 10 ||
[Analyze grammar]

pūjāṃ kurvaṃti ye viprāste jñeyāḥ puṇyabhājinaḥ |
kṛtvā pāṣāṇajāṃ mūrtiṃ kṛṣṇākhyāṃ rūpasuṃdarīm || 11 ||
[Analyze grammar]

pūjāṃ kurvaṃti ye viprāste jñeyāḥ puṇyamūrttayaḥ |
śālagrāmaśilā yatra yatra dvāravatī śilā || 12 ||
[Analyze grammar]

ubhayoḥ saṃgamo yatra muktistatra na saṃśayaḥ |
mūrtiṃ maṃtreṇa saṃsthāpya pūjanaṃ kriyate yadi || 13 ||
[Analyze grammar]

tadarcanaṃ koṭiguṇaṃ dharmakāmārthamokṣadam |
navadhā tatra vai bhaktiḥ kartavyā ca janārdane |
ataḥ pāṣāṇajā mūrtistathā dhātumayī tvayā || 14 ||
[Analyze grammar]

tasyāṃ bhaktaiḥ prakarttavyaṃ dhyānaṃ pūjanameva ca |
rājopacārakīṃ pūjāṃ mūrtau tatra prakalpayet || 15 ||
[Analyze grammar]

sarvātmānaṃ smarennityaṃ bhagavaṃtamadhokṣajam |
dīnānāthaikaśaraṇaṃ lokānāṃ vṛttikāraṇam || 16 ||
[Analyze grammar]

mūrttau tatra smarennityaṃ mahāpātakanāśanam |
gopālo'yaṃ tathā kṛṣṇo rāmo'yamiti ca bruvan || 17 ||
[Analyze grammar]

pūjāṃ karoti yaḥ samyaksa vai bhāgavato naraḥ |
gokule tu yathā rūpaṃ dhṛtaṃ vai keśavena tu || 18 ||
[Analyze grammar]

tādṛgrūpaṃ prakarttavyaṃ vaiṣṇavairnarasattamaiḥ |
ātmasaṃtoṣaṇārthāya svarūpaṃ kārayedbudhaḥ || 19 ||
[Analyze grammar]

yato bhaktistu bahulā jāyate nātra saṃśayaḥ |
śaṃkhacakragadādīni viṣṇoścaivāyudhāni ca || 20 ||
[Analyze grammar]

tasyāṃ mūrtau viśeṣeṇa karttavyāni pramāṇataḥ |
caturbhujāṃ dvinetrāṃ ca śaṃkhacakragadādharām || 21 ||
[Analyze grammar]

pītavāsaḥ parīdhānāṃ śobhamānāṃ garīyasīm |
vanamālāṃ dadhānāṃ tāṃ lasadvaiḍūryakuṃḍalām || 22 ||
[Analyze grammar]

mukuṭe maṇisaṃyuktāṃ kaustubhodbhāsitāṃ sadā |
sauvarṇīṃ cātha raupyāṃ vā tāmrajāṃ cātha paittalīm || 23 ||
[Analyze grammar]

kārayetparayā bhaktyā vaiṣṇavairdvijasattamaiḥ |
āgamoktairvedamaṃtraiḥ pratiṣṭhāpya viśeṣataḥ || 24 ||
[Analyze grammar]

paścādvai arcanaṃ kāryaṃ yathāśāstrānusārataḥ |
ṣoḍaśopacārairmaṃtraiḥ pūjanaṃ vidhipūrvakam || 25 ||
[Analyze grammar]

pūjite tu jagannāthe sarve devāśca pūjitāḥ |
ato yena prakāreṇa pūjanīyo mahāprabhuḥ || 26 ||
[Analyze grammar]

anādinidhano devaḥ śaṃkhacakragadādharaḥ |
sarvaṃ dadāti sarveśo vaiṣṇavānpuṇyarūpiṇaḥ || 27 ||
[Analyze grammar]

yathā viṣṇustathā śarvo nāṃtaraṃ varttate kvacit |
evaṃ jñātvā tu bho devi hyubhayormūrtikalpanam || 28 ||
[Analyze grammar]

śivapūjāṃ prakurvāṇo viṣṇuniṃdāsu tatparaḥ |
rauraveṣu narakeṣu vasate nātra saṃśayaḥ || 29 ||
[Analyze grammar]

ahaṃ viṣṇurahaṃ rudro hyahaṃ brahmā pitāmahaḥ |
sarvabhūteṣu satataṃ saṃvasāmi punaḥ punaḥ || 30 ||
[Analyze grammar]

pārvatyuvāca |
ke dāsā vaiṣṇavāḥ ke tu ke bhaktā bhuvi kīrtitāḥ |
teṣāṃ vai lakṣaṇaṃ brūhi yathārthaṃ vai maheśvara || 31 ||
[Analyze grammar]

mahādeva uvāca |
śūdrā bhavaṃti vai dāsā vaiṣṇavā nāradādayaḥ |
prahlādaścāṃbarīṣādyā bhaktāste naganaṃdini || 32 ||
[Analyze grammar]

brahmakriyārato nityaṃ vedavedāṃgapāṭhakaḥ |
śaṃkhacakrāṃkito yastu sa vai vaiṣṇava ucyate || 33 ||
[Analyze grammar]

dvijasevārato nityaṃ nityaṃ viṣṇuprapūjakaḥ |
śṛṇoti bahudhā caiva purāṇaṃ vedasaṃmitam || 34 ||
[Analyze grammar]

sa śūdro haridāsastu ityukto naganaṃdini |
paṃcavarṣatvamāśritya kṛtā bhaktiranekadhā || 35 ||
[Analyze grammar]

sa vai bhakta iti proktaḥ sarvasādhuṣu saṃmataḥ |
dhruvādayaste vijñeyā aṃbarīṣādayaśca ye || 36 ||
[Analyze grammar]

bhaktāśca munibhiḥ proktāḥ sarvakāleṣu bhāmini |
kalau dhanyatamāḥ śūdrā viṣṇudhyānaparāyaṇāḥ || 37 ||
[Analyze grammar]

ihaloke sukhaṃ bhuktvā yāṃti viṣṇoḥ sanātanam |
śaṃkhacakrāṃkito yastu viṣṇubhaktiprakārakaḥ || 38 ||
[Analyze grammar]

caturvidhamahotsāhakarttā caiva viśeṣataḥ |
sa śūdro viṣṇudāsastu yathādṛṣṭaṃ yathāśrutam || 39 ||
[Analyze grammar]

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe umāmaheśvarasaṃvāde dāsavaiṣṇavānāṃ mahimānāma dvyaśītitamo'dhyāyaḥ || 82 ||
[Analyze grammar]