Chapter 83

[English text for this chapter is available]

pārvatyuvāca |
sarveṣāṃ caiva māsānāṃ vidhiṃ brūhi maheśvara |
mahotsavaḥ prakarttavyaḥ ko vidhistatra saṃmataḥ || 1 ||
[Analyze grammar]

ko devaḥ pūjanaṃ kasya mahimā kīdṛśo bhavet |
kasyāṃ tithau prakarttavyaṃ tanme vada sureśvara || 2 ||
[Analyze grammar]

māsaṃ prati kimuktaṃ ca vaiṣṇavānpuṇyakarmaṇaḥ |
dhanyāhaṃ kṛtakṛtyāhaṃ subhagāhaṃ dharātale |
viṣṇoḥ kathāṃ śṛṇomīti darśanātsparśanāttava || 3 ||
[Analyze grammar]

śiva uvāca |
utsavānāṃ vidhiṃ brūmo māsaṃ prati tavānaghe |
yānākarṇya punardevi gītavāditra harṣitā || 4 ||
[Analyze grammar]

tatrādau ca site pakṣe caitramāse suśobhane |
ekādaśyāṃ viśeṣeṇa dolārūḍhaṃ prapūjayet || 5 ||
[Analyze grammar]

kuryādbhaktyā sadā devi utsavaṃ vidhipūrvakam |
dolārūḍhaṃ prapaśyaṃti kṛṣṇaṃ kalimalāpaham || 6 ||
[Analyze grammar]

aparādhasahasraistu muktāste naganaṃdini |
tāvattiṣṭhaṃti pāpāni koṭijanmakṛtānyapi || 7 ||
[Analyze grammar]

yāvannāṃdolayeddevaṃ viśveśaṃ viśvanāyakam |
kalau vai ye prapaśyaṃti dolārūḍhaṃ janārdanam || 8 ||
[Analyze grammar]

goghnādikāḥ pramucyaṃte kā kathā itareṣvapi |
dolotsave prahṛṣṭāstu rudreṇa sahitāḥ surāḥ || 9 ||
[Analyze grammar]

kurvaṃti prāṃgaṇe nṛtyaṃ gītavādyaṃ ca harṣitāḥ |
ṛṣayo gaṇagaṃdharvā raṃbhādyapsarasāṃ gaṇāḥ || 10 ||
[Analyze grammar]

vāsukipramukhā nāgāstathā devāḥ sureśvarāḥ |
dolāyāṃ ca samāyāṃti viṣṇudarśanalālasāḥ || 11 ||
[Analyze grammar]

dolāyātrānimittaṃ tu dolāhne madhumādhave |
bhūtāni saṃti bhūpṛṣṭhe ye keciddevayonayaḥ || 12 ||
[Analyze grammar]

samāyāṃti mahādevi kṛṣṇe dolāsthite dhruvam |
viṣṇuṃ dolāsthitaṃ dṛṣṭvā trailokyasyotsavo bhavet || 13 ||
[Analyze grammar]

tasmātkāryaśataṃ tyaktvā dolāhne utsavaṃ kuru |
prahlādastu samāyāti viṣṇurdolādhirohaṇam || 14 ||
[Analyze grammar]

kurute ca mahādevi varadaṃ tamanusmaran |
dolāsthitasya kṛṣṇasya ye kurvaṃti prajāgaram || 15 ||
[Analyze grammar]

sarvapuṇyaphalaprāptirnimeṣaikena jāyate |
dolāyāṃ saṃsthitaṃ viṣṇuṃ paśyaṃti madhumādhave || 16 ||
[Analyze grammar]

krīḍaṃti viṣṇunā sārddhaṃ devadevena vaṃditāḥ |
dakṣiṇābhimukhaṃ devaṃ dolārūḍhaṃ sureśvari || 17 ||
[Analyze grammar]

sakṛddṛṣṭvā tu goviṃdaṃ mucyate brahmahatyayā |
oṃ dolārūḍhāya vidmahe mādhavāya ca dhīmahi |
tanno devaḥ pracodayāt || 18 ||
[Analyze grammar]

idaṃ gāyatryā pūjanam |
mādhavāya goviṃdāya śrīkaṃṭhāya namonamaḥ |
pūjanaṃ maṃtrapūrvaṃ ca kartavyaṃ vidhipūrvakam || 19 ||
[Analyze grammar]

gurave dakṣiṇāṃ dadyādyathāśaktyā samāhitaḥ |
gāyanviṣṇoḥ sadā bhaktyā paripūrṇaṃ tato bhavet || 20 ||
[Analyze grammar]

kimanyadbahunoktena bhūyo bhūyo varānane |
dolāyāṃ saṃsthito viṣṇuḥ sarvapāpāpahārakaḥ || 21 ||
[Analyze grammar]

pūjito yairnaraiḥ samyaksadā sarvaṃ dadāti ca |
yatra devāḥ sagaṃdharvāḥ kinnarā ṛṣayastathā || 22 ||
[Analyze grammar]

āyāṃti bahudhā tatra dolārūḍhe na saṃśayaḥ || 23 ||
[Analyze grammar]

oṃ namo bhagavate vāsudevāyeti maṃtreṇa pūjanaṃ tatra kārayet |
ṣoḍaśopacāraiḥ pūjā ca kartavyā vidhipūrvakam |
dharmārthamukhyā ye kāmāste sarve prāpnuyurdhruvam || 24 ||
[Analyze grammar]

aṃganyāsaṃ karanyāsaṃ nyāsaṃ śārīrakaṃ ca yat |
tatsarvaṃ tu prakarttavyaṃ maṃtreṇānena suvrata || 25 ||
[Analyze grammar]

āgamoktena maṃtreṇa karttavyo hi mahotsavaḥ |
śrīlakṣmyāsahitaṃ devaṃ dolāyāṃ ca prakalpayet || 26 ||
[Analyze grammar]

devāgre vaiṣṇavāḥ sthāpyā nāradādyāḥ surarṣayaḥ |
viṣvaksenādikā bhaktā sthāpyāste hyagrataḥ sadā || 27 ||
[Analyze grammar]

paṃcavāditranirghoṣaiḥ kuryādārārtikaṃ budhaḥ |
yāme yāme tathā devi pūjanīyaḥ prayatnataḥ || 28 ||
[Analyze grammar]

nālikeraistathā śubhraiḥ kadalairvā tathā punaḥ |
arghaṃ dadyāttato devi pūjanīyaḥ prayatnataḥ || 29 ||
[Analyze grammar]

devadeva jagannātha śaṃkhacakragadādhara |
arghaṃ gṛhāṇa me deva kṛpāṃ kuru mamopari || 30 ||
[Analyze grammar]

taccheṣaṃ vaiṣṇavānāṃ tu dadyātprācchādikaṃ punaḥ |
vādanaṃ narttanaṃ tatra karttavyaṃ vaiṣṇavairnaraiḥ || 31 ||
[Analyze grammar]

āṃdolanaṃ tataḥ sarvaiḥ karttavyaṃ ca viśeṣataḥ |
pṛthivyāṃ yāni tīrthāni kṣetrāṇi ca sureśvari || 32 ||
[Analyze grammar]

sarvānyetāni vai tatra draṣṭumāyāṃti taddine |
evaṃ jñātvā sadā devi karttavyaḥ sotsavo mahān || 33 ||
[Analyze grammar]

brāhmaṇāḥ kṣatriyā vaiśyāḥ śūdrā yāścānyajātayaḥ |
śaṃkhacakragadādhārā jñātavyā naganaṃdini || 34 ||
[Analyze grammar]

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe umāmaheśvarasaṃvāde dolāmahotsavonāma tryaśītitamo'dhyāyaḥ || 83 ||
[Analyze grammar]