Chapter 81

[English text for this chapter is available]

pārvatyuvāca |
gaṃgāyāścaiva māhātmyaṃ punarvada mahāmate |
yacchrutvā munayaḥ sarve vītarāgāḥ punaḥ punaḥ || 1 ||
[Analyze grammar]

māhātmyaṃ kīdṛśaṃ caiva tasyāḥ sarveśvara prabho |
utpattiśca śrutā pūrvaṃ mahimā na śruto mayā |
tvamādyaḥ sarvabhūtānāṃ tvaṃ devaśca sanātanaḥ || 2 ||
[Analyze grammar]

mahādeva uvāca |
bṛhaspatisamaṃ buddhyā śakratulyaparākramam |
śaratalpagataṃ bhīṣmaṃ ṛṣayo draṣṭumāyayuḥ || 3 ||
[Analyze grammar]

atrirvasiṣṭhaśca bhṛguḥ pulastyaḥ pulahaḥ kratuḥ |
aṃgirāvagautamo'gastyaḥ sumatistvāpurātmavān || 4 ||
[Analyze grammar]

viśvāmitraḥ sthūlaśirāḥ sarvajñaḥ pramathādhipaḥ |
raibhyo bṛhaspatirvyāsaḥ pāvanaḥ kaśyapo dhruvaḥ || 5 ||
[Analyze grammar]

durvāsā jamadagniśca mārkaṃḍeyo'tha gālavaḥ |
uśanātha bharadvājaḥ kraturāstīka eva ca || 6 ||
[Analyze grammar]

sthūlākṣaḥ sarvalokākṣaḥ kaṇvo medhātithiḥ kuśaḥ |
nāradaḥ parvataścaiva sudhanvā cyavano dvijaḥ || 7 ||
[Analyze grammar]

matibhūrbhuvano dhaumyaḥ śatānaṃdokṛtavraṇaḥ |
jāmadagnyo'tha rāmaśca ṛcīkaścaivamādayaḥ || 8 ||
[Analyze grammar]

tānpraṇamya yathānyāyaṃ dharmaputraḥ sahānujaḥ |
pūjayāmāsa vidhivajjagatpūjyāṃstu tejasaḥ || 9 ||
[Analyze grammar]

te pūjitā mahātmānaḥ sukhāsīnāstapodhanāḥ |
bhīṣmāśritāḥ kathāścakrurdivyadharmāśritāstathā || 10 ||
[Analyze grammar]

kathāṃte tu tatasteṣāṃ ṛṣīṇāṃ bhāvitātmanām |
praṇamya śirasā bhīṣmaṃ papracchedaṃ yudhiṣṭhiraḥ || 11 ||
[Analyze grammar]

yudhiṣṭhira uvāca |
ke deśāstu mahāpuṇyāḥ ke śailāḥ ke'picāśramāḥ |
sevyā dharmārthibhirnityaṃ tanme brūhi pitāmaha || 12 ||
[Analyze grammar]

bhīṣma uvāca |
atraivodāharaṃtīmamitihāsaṃ narottama |
śiloṃchavṛtteḥ saṃvādaṃ siddhasya ca yudhiṣṭhira || 13 ||
[Analyze grammar]

kaścitsiddhaḥ parikramya samastāṃ pṛthivīmimām |
uṃchavṛtteḥ śiberājangṛhaṃ prāpto mahātmanaḥ || 14 ||
[Analyze grammar]

ātmavidyāsu tatvajñaḥ sarvadā sa jiteṃdriyaḥ |
rāgadveṣaparityaktaḥ kuśalī jñānakarmasu || 15 ||
[Analyze grammar]

vaiṣṇaveṣu sadā śreṣṭho viṣṇudharmaparāyaṇaḥ |
aniṃdako vaiṣṇavānāṃ sadā dharmaparāyaṇaḥ || 16 ||
[Analyze grammar]

yogābhyāsarato nityaṃ śaṃkhacakravidhārakaḥ |
trikālapūjā tatvajñaḥ śrīkaṃṭhe'nurataḥ sadā || 17 ||
[Analyze grammar]

vedavidyāsu viduṣo dharmādharmavicārakaḥ |
vedapāṭhavrato nityaṃ nityaṃ cātithipūjakaḥ || 18 ||
[Analyze grammar]

satīrthamatiyuktastu śiloṃcheṣu sthitaḥ sadā |
caturvedeṣu yaddhyānaṃ gītaṃ yadyatsvayaṃbhuvā || 19 ||
[Analyze grammar]

tatsarvaṃ sa ca jānāti dvijo viṣṇusvarūpadhṛk |
nānādharmārthaviśado hyavyayeṣṭamatiḥ sadā || 20 ||
[Analyze grammar]

ekasminneva kāle tu gato'sau vai śibergṛham |
taṃ dṛṣṭvā vidhivaccaiva kṛtvātithyaṃ mahāmanāḥ || 21 ||
[Analyze grammar]

śibiḥ saṃpṛcchayāmāsa deśānāṃ hitakāraṇam || 22 ||
[Analyze grammar]

uṃchavṛttiruvāca |
ke deśāḥ ke janapadāḥ ke śailāḥ ke'pi cāśramāḥ |
puṇyā dvijavara prītyā mahyaṃ nirdeṣṭumarhasi || 23 ||
[Analyze grammar]

siddha uvāca |
te deśāste janapadāste śailāste'pi cāśramāḥ |
puṇyāstripathagā yeṣāṃ madhye nityaṃ saridvarā || 24 ||
[Analyze grammar]

tapasā brahmacaryeṇa yajñaistyāgena vā punaḥ |
gatiṃ tāṃ na labhejjaṃturgaṃgāṃ saṃsevya yāṃ labhet || 25 ||
[Analyze grammar]

snātānāṃ tatra payasi gāṃgeye niyatātmanām |
tuṣṭirbhavati yā puṃsāṃ na sā kratuśatairapi || 26 ||
[Analyze grammar]

apahṛtya tamastīvraṃ yathā bhātyudaye raviḥ |
tathāpahṛtya pāpmānaṃ bhāti gaṃgājalāplutaḥ || 27 ||
[Analyze grammar]

agniṃ prāpya yathā vipra tūlarāśirvinaśyati |
tathā gaṃgāvagāhaśca sarvaṃ pāpaṃ vyapohati || 28 ||
[Analyze grammar]

yastu sūryāṃśusaṃtaptaṃ gāṃgeyaṃ salilaṃ pibet |
sa gonīhāranirmuktaḥ pāvakāddhi viśiṣyate || 29 ||
[Analyze grammar]

cāṃdrāyaṇasahasraṃ tu pādenaikena yaḥ pumān |
saṃplutaścāpi gaṃgāyāṃ yo naraḥ sa viśiṣyate || 30 ||
[Analyze grammar]

laṃbedadhaḥśirā yastu varṣāṇāmayutaṃ naraḥ |
māsamekaṃ tu gaṃgāṃbhaḥ sevate yo narottamaḥ || 31 ||
[Analyze grammar]

brahmahatyāvinirmukto yāti viṣṇoranāmayam |
iyaṃ veṇīsamā puṇyā pavitrā pāpanāśinī || 32 ||
[Analyze grammar]

yasyāḥ smaraṇamātreṇa bālahā mucyate kṣaṇāt |
sa prayāgastīrtharājo vaiṣṇavānāṃ hi durllabhaḥ || 33 ||
[Analyze grammar]

snātvā yatra naraśreṣṭha vaikuṃṭhe satvaraṃ vrajet |
priyāpriye na jānāti dharmādharmau na viṃdati || 34 ||
[Analyze grammar]

snātvā caiva tu gaṃgāyāṃ mahāpāpātpramucyate || 35 ||
[Analyze grammar]

gaṃgāgaṃgeti yo brūyādyojanānāṃ śatairapi |
mucyate sarvapāpebhyo viṣṇulokaṃ sa gacchati || 36 ||
[Analyze grammar]

brahmahā caiva goghno vā surāpī bālaghātakaḥ |
mucyate sarvapāpebhyo divaṃ yāti ca satvaram || 37 ||
[Analyze grammar]

darśanaṃ mādhavasyātha varasya darśanaṃ tathā |
veṇyāṃ snānaṃ prakurvāṇo vaikuṃṭhaṃ prati gacchati || 38 ||
[Analyze grammar]

udite ca yathā sūrye vilayaṃ yāti vai tamaḥ |
tathaiva tasyāṃ pāpāni naśyaṃti snānamātrataḥ || 39 ||
[Analyze grammar]

gaṃgādvāre kuśāvarte gallike nīlaparvate |
snātvā kanakhale tīrthe punarjanma na vidyate || 40 ||
[Analyze grammar]

evaṃ jñātvā naraśreṣṭho gaṃgāsnāyī punaḥpunaḥ |
snānamātreṇa bho rājanmucyate kilbiṣādataḥ || 41 ||
[Analyze grammar]

devānāṃ pravaro viṣṇuryajñānāṃ cāśvamedhakaḥ |
aśvatthaḥ sarvavṛkṣāṇāṃ nadī bhāgīrathī sadā || 42 ||
[Analyze grammar]

iti śrīpādmemahāpurāṇe paṃcapaṃcāśatsāhasryāṃ saṃhitāyāmuttarakhaṃḍe |
umāpatināradasaṃvāde gaṃgāmāhātmyaṃnāmaikāśītitamo'dhyāyaḥ || 81 ||
[Analyze grammar]