Chapter 108

[English text for this chapter is available]

śrīrāma uvāca |
bhasmotpattiṃ mahābhāga bhasmamāhātmyameva ca |
bhasmasaṃdhāraṇe puṇyaṃ bhasmadāne ca tadvada || 1 ||
[Analyze grammar]

śaṃbhuruvāca |
bhasmotpattiṃ pravakṣyāmi sarvapāpapraṇāśinīm |
smaraṇātkīrtanādrāma tāṃ śṛṇuṣva narādhipa || 2 ||
[Analyze grammar]

ya ekaḥ śāśvato devo brahmavaṃdyaḥ sadāśivaḥ |
trilocano guṇādhāro guṇātīto'kṣarovyayaḥ || 3 ||
[Analyze grammar]

sisṛkṣā tasya jātātha vīkṣyātmasthaṃ guṇatrayam |
vedatrayamidaṃ jñeyaṃ guṇatrayamidaṃ hi yat || 4 ||
[Analyze grammar]

pṛthakkṛtvātmanastāta tatrasthānaṃ vibhajya ca |
dakṣiṇāṃgesṛjatputraṃ brahmāṇaṃ vāmato harim || 5 ||
[Analyze grammar]

pṛṣṭhadeśe maheśānaṃ trīnputrānasṛjadvibhuḥ |
jātamātrāstrayo devā brahmaviṣṇumaheśvarāḥ || 6 ||
[Analyze grammar]

idamūcurvacaḥ spaṣṭaṃ ko bhavānke vayaṃtviti |
tānāha ca śivaḥ putrānyūyaṃ putrā ahaṃ pitā || 7 ||
[Analyze grammar]

idaṃ guṇatrayaṃ putrā bhajadhvaṃ karmahetukam |
putrā ūcuḥ |
kaṃ vā guṇaṃ ko bhajatāṃ kiyaṃtaṃ kālamīśvara || 8 ||
[Analyze grammar]

kathaṃ guṇanivṛttiśca bhavedetadvadasva naḥ |
śiva uvāca |
yāvajjñānaṃ hi bhavatāṃ yāvadāyurathāpi vā || 9 ||
[Analyze grammar]

dhāraṇaṃ tāvadevasyādekaikasya guṇasya ca |
satvaṃ brahmā rajoviṣṇurbhajenmaheśvarastamaḥ || 10 ||
[Analyze grammar]

ityuktamātre deveśe brahmā satvamathāgrahīt |
na ca cālayituṃ śakto dhāraṇe kimu śaktimān || 11 ||
[Analyze grammar]

taṃ guṇaṃ tu tiraskṛtya rajoguṇamathāgrahīt |
na ca cālayituṃ śakto jagrāhātha tamoguṇam || 12 ||
[Analyze grammar]

na ca cālayituṃ śakto nipapāta ruroda ca |
viṣṇuśca vāmahastena rajoguṇamadhārayat || 13 ||
[Analyze grammar]

aṃgulībhyāṃ maheśo'pi tamoguṇamadhārayat |
satvamekoṃgulībhyāṃ ca satvaṃ viṣṇumathādadhāt || 14 ||
[Analyze grammar]

brahmāṇaṃ pādapīṭhe ca dadhāra ca nanarta ca || 15 ||
[Analyze grammar]

nṛtyaṃtamatyaṃtavilāsarūpaṃ gokṣīrarūpaṃ taruṇaṃ trinetram |
sarvaṃ dadhānaṃ kṛtakautukaṃ śivaṃ samīkṣya putrānvarado babhāṣe || 16 ||
[Analyze grammar]

śiva uvāca |
prīto'smi tava putrāhaṃ varaṃ vṛṇu yathepsitam |
athāha pitaraṃ putro varamenaṃ dadasva me || 17 ||
[Analyze grammar]

māmuddiśya kṛtā pūjā tava pūjā bhavecchiva |
tiṣṭhermayi sadā tvaṃ ca tvamevāhaṃ ca vāvyayaḥ || 18 ||
[Analyze grammar]

śiva uvāca |
evametanmahābhāga bhaviṣyati na saṃśayaḥ |
raktagaurāvimau putrau brahmaviṣṇū mamaiva tu || 19 ||
[Analyze grammar]

bāhumūlastharomau ca mamākārau tathānaghau |
atha brahmāṇamāhedaṃ bhajatvekaṃ guṇaṃ bhavān || 20 ||
[Analyze grammar]

brahmovāca |
tvannirdiṣṭaṃ guṇamahaṃ dhartuṃ śakto na hīśvara |
dhārayiṣye rajo deva satvaṃ bhajatu vai hariḥ || 21 ||
[Analyze grammar]

avaśiṣṭaṃ guṇaṃ cāyamīśvaro dhārayiṣyati |
śaṃbhuruvāca |
guṇānādāyate devā naśekurnityadhāraṇam || 22 ||
[Analyze grammar]

kartuṃ bharaṇaśaktyarthaṃ śivamityavadatpunaḥ |
guṇānvayaṃ sarvakālaṃ na ca dhārayituṃ kṣamāḥ || 23 ||
[Analyze grammar]

dīyatāṃ bhagavañchaktiryadi bhostvaṃ varapradaḥ |
atha tadvacanaṃ śrutvā śivo vākyamabhāṣata || 24 ||
[Analyze grammar]

śiva uvāca |
vidyāśaktiḥ samastānāṃ śaktirityabhidhīyate |
guṇatrayāśrayā vidyā avidyā ca tadāśrayā || 25 ||
[Analyze grammar]

guṇatrayaṃ ca dagdhvaiva tatsāraṃ dhartumarhatha |
yacca kiṃcidbhavettatra bhavadbhirdhriyatāṃ hi tat || 26 ||
[Analyze grammar]

athāhustatsutā vākyaṃ na dāho jvalanaṃ vinā |
śivaḥ prāha maheśasya locane vahnirasti vai || 27 ||
[Analyze grammar]

guṇatrayamidaṃ dhenurvidyā syādgomayaṃ śubham |
mūtraṃ copaniṣatproktaṃ kuryādbhasma tataḥ param || 28 ||
[Analyze grammar]

vatsāstu smṛtayo yasyāstatsaṃbhūtaṃ tu gomayam |
āgāva iti maṃtreṇa dhenuṃ tatrābhimaṃtrayet || 29 ||
[Analyze grammar]

gāvo gāvo gāva iti prāśayettu tṛṇaṃ jalam |
upoṣya ca caturddaśyāṃ śukle kṛṣṇe'thavā vratī || 30 ||
[Analyze grammar]

paredyuḥ prātarutthāya śucirbhūtvā samāhitaḥ |
kṛtasnāno dhautavastro gomayārthaṃ vrajettu gām || 31 ||
[Analyze grammar]

utthāpya tāṃ prayatnena gāyatryā mūtramāharet |
sauvarṇe rājate tāmre dhārayenmṛnmaye ghaṭe || 32 ||
[Analyze grammar]

pauṣkare vā palāśe vā pātre gośṛṃga eva vā |
ādadhīta hi gomūtraṃ gaṃdhadvāreti gomayam || 33 ||
[Analyze grammar]

abhūmipātaṃ gṛhṇīyātpātre pūrvodite'dhike |
gomayaṃ śodhayedvidvāñchrīrme bhajatu maṃtrataḥ || 34 ||
[Analyze grammar]

alakṣmīrmayīti maṃtreṇa gomayasyāpamārjanam |
saṃ tvā siṃcāmi maṃtreṇa gomūtraṃ gomaye kṣipet || 35 ||
[Analyze grammar]

paṃcānāṃ tveti maṃtreṇa piṃḍāṃścaiva caturddaśa |
kuryātsaṃśoṣya kiraṇaistaraṇerāharettu tān || 36 ||
[Analyze grammar]

nidadhyādatha pūrvoktapātre gomayapiṃḍakān |
svagṛhyoktavidhānena pratiṣṭhāpyāgnimiṃdhayet || 37 ||
[Analyze grammar]

piṃḍānvinikṣipettattadarṇadevāya piṃḍakān |
āghārāvājyabhāgau ca prakṣipya dvau hunetsudhīḥ || 38 ||
[Analyze grammar]

tato nidhanapataye trayodaśajayādayaḥ |
hotavyāḥ paṃcabrahmāṇi namo hiraṇyabāhave || 39 ||
[Analyze grammar]

iti sarvāhutīrhutvā caturthyaṃtaistu maṃtrakaiḥ |
tataḥ śarvāya rudrāya yasya vaikaṃkatīti ca || 40 ||
[Analyze grammar]

etaistu juhuyādvidvānanājñātatrayaṃ tathā |
vyāhṛtīratha hutvā tu tataḥ sviṣṭakṛtaṃ hunet || 41 ||
[Analyze grammar]

idhmaśeṣaṃ tu nirvartya pūrṇapātrodakaṃ tataḥ |
pūrṇamāsāṃtayajuṣā jalenānyena bṛṃhayet || 42 ||
[Analyze grammar]

brāhmaṇeṣvamṛtamiti tajjalaṃ śirasi kṣipet |
prācyāmiti diśāṃ liṃgairdikṣu toyaṃ vinikṣipet || 43 ||
[Analyze grammar]

brahmaṇe dakṣiṇāṃ datvā śāṃte pulakamāharet |
āhariṣyāmi devānāṃ sarveṣāṃ karmaguptaye || 44 ||
[Analyze grammar]

jātavedasamene tvāṃ pulākaṃ cchādayādya me |
maṃtreṇānena taṃ vahniṃ pulāke chādayedatha || 45 ||
[Analyze grammar]

tridinaṃ jvalanasthityai chādanaṃ pulakaiḥ smṛtam |
brāhmaṇānbhojayedbhaktyā svayaṃ bhuṃjīta vāgyataḥ || 46 ||
[Analyze grammar]

bhasmādhikamabhīpsaṃstu hyadhikaṃ gomayaṃ haret |
dinatrayeṇa yadi vā ekasmindivase bahu || 47 ||
[Analyze grammar]

tṛtīye vā caturthe vā prātaḥsnātvā sitāṃbaraḥ |
śuklayajñopavītī ca śuklamālyānulepanaḥ || 48 ||
[Analyze grammar]

śukladaṃto bhasmadigdho maṃtreṇānena maṃtravit |
tadveti coccārayitvā bhasmasatyaṃ na saṃtyajet || 49 ||
[Analyze grammar]

tata āvāhanamukhā upacārāstu ṣoḍaśa |
kartavyā hutadānena tato'gnimupasaṃharet || 50 ||
[Analyze grammar]

agne bhasmeti maṃtreṇa gṛhṇīyādbhasma codbhavam |
agnirasmīti maṃtreṇa pramṛjya ca tataḥ param || 51 ||
[Analyze grammar]

saṃyojya gaṃgāsalilaiḥ kapilāpayasāthavā |
caṃdraṃ kuṃkumakāśmīramuśīraṃ caṃdanaṃ tathā || 52 ||
[Analyze grammar]

agurudvitayaṃ caiva cūrṇayitvā tu sūkṣmataḥ |
kṣipedbhasmani taccūrṇamomiti brahmamaṃtrataḥ || 53 ||
[Analyze grammar]

tataḥ payaḥ secane ca gaditaḥ kapilā manuḥ |
amṛtaṃ devi te kṣīraṃ pavitramiha varddhitam || 54 ||
[Analyze grammar]

tavaprasādānmucyaṃte manujāḥ sarvapāpmanaḥ |
praṇavenāvahedvidvānbhasmano vaṭakānatha || 55 ||
[Analyze grammar]

aṇoraṇīyāniti hi maṃtreṇa tu vicakṣaṇam |
śaṃbhuruvāca |
itthaṃ tu bhasmasaṃpādya śuṣkamādāya maṃtravit || 56 ||
[Analyze grammar]

praṇavena vimṛjyātha saptapraṇavamaṃtritam |
īśānena śirodeśaṃ mukhaṃ tatpuruṣeṇa ca || 57 ||
[Analyze grammar]

urodeśamaghoreṇa guhyaṃ vāmena maṃtrayet |
sadyojātena vai pādau sarvāṃgaṃ praṇavena tu || 58 ||
[Analyze grammar]

tata uddhūlya sarvāṃgamāpādatalamastakam |
tata ācamya vasanaṃ dhautaṃ śvetaṃ pradhārayet || 59 ||
[Analyze grammar]

punarācamya karma svaṃ kartumarhati sarvataḥ |
tato bhasmasamādāya pramṛjya praṇavena tu || 60 ||
[Analyze grammar]

trinetraṃ triguṇādhāraṃ trayāṇāṃ janakaṃ vibhum |
smarannamaḥ śivāyeti lalāṭe tu tripuṃḍrakam || 61 ||
[Analyze grammar]

namaḥ śivābhyāmityuktvā bāhvorvāpi tripuṃḍrakam |
aghorāya nama iti ubhābhyāṃ ca prakoṣṭhayoḥ || 62 ||
[Analyze grammar]

bhīmāyeti tataḥ pṛṣṭhe śirodhi paścime tathā |
nīlakaṃṭhāya śirasi kṣipetsarvātmane namaḥ || 63 ||
[Analyze grammar]

prakṣālyātha tato hastau karmānuṣṭhānamācaret |
śiva uvāca |
yūyamevaṃ prakāreṇa bhasma kṛtvā praghṛṣya ca || 64 ||
[Analyze grammar]

guṇāndhārayituṃ śaktāstataḥ srakṣyatha vai prajāḥ |
śaṃbhuruvāca |
itthaṃ śivoditā devā brahmaviṣṇumaheśvarāḥ || 65 ||
[Analyze grammar]

tathā kṛtvā ca vidhinā hamahamikayā tadā |
anyonyabodhanāśaktāḥ praṇamya śivamūcire || 66 ||
[Analyze grammar]

kaṃ guṇaṃ dhārayetko vā śivaḥ prāha sutānatha |
karmaśaktiṃ tathā jñānaṃ mukhareṇvaiva naśyati || 67 ||
[Analyze grammar]

alpāyurdṛśyate brahmā manubhiścāsya jīvitam |
yo'haṃ brahmāṃḍamālābhirbhūṣito brahmagopanam || 68 ||
[Analyze grammar]

rajoguṇamavaṣṭabhya na ca jānāsi māṃ tadā |
brahmādhikabalo viṣṇurāyuṣi brahmaṇo'dhikaḥ || 69 ||
[Analyze grammar]

brahmāṃḍamālābharaṇe maheśasya mamaiva tu |
caturniḥśvāsamātreṇa viṣṇorāyurudāhṛtam || 70 ||
[Analyze grammar]

brahmaṇo'dhikasatvatvātsatvamālaṃbatāṃ hariḥ |
jānāti sarvakālaṃ māṃ kvacideva na vismaret || 71 ||
[Analyze grammar]

sātvikaikaiva pūjāsya rājasī tāmasī na tu |
śāṃtaṃ śivaṃ satvaguṇaṃ rajavaktrāvamānataḥ || 72 ||
[Analyze grammar]

nabhonīlaṃ tathā caiva guṇaṃ śaṃbhustathābhajat |
satvaṃ rajastamaścāpi dadhāra ca purā kila || 73 ||
[Analyze grammar]

ato'sya vividhā pūjā śaṃkarasya vidhīyate |
rajaśca tamasāyuktaṃ dāruṇaṃ parikīrtitam || 74 ||
[Analyze grammar]

dāruṇāpi tataḥ pūjā śaṃkare gatidā matā |
rajaśca tamasāyuktamalaṃ śāstrapravartakam || 75 ||
[Analyze grammar]

vicchinnāpi tataḥ pūjā śaṃkare phaladā matā |
tamaśca satvasaṃyuktaṃ miśrakaṃ ca pravartakam || 76 ||
[Analyze grammar]

miśrapūjā viphaladā śaṃkare lokaśaṃkare |
yādṛśaṃ tādṛśaṃ vāpi niyamenārcanaṃ vibhoḥ || 77 ||
[Analyze grammar]

śaṃkarasyāśuphaladaṃ yādṛśasyāpi dehinaḥ |
śaṃbhuruvāca |
etatsaṃkṣepataḥ proktaṃ vidhānaṃ bhasmano'nagha || 78 ||
[Analyze grammar]

vaktṛśrotṛjanānāṃ ca samastāghavināśanam || 79 ||
[Analyze grammar]

iti śrīpadmapurāṇe pātālakhaṃḍe śivarāghavasaṃvāde bhasmotpattividhānaṃ nāmāṣṭottaraśatatamo'dhyāyaḥ || 108 ||
[Analyze grammar]