Chapter 109

[English text for this chapter is available]

śaṃbhuruvāca |
atra te kīrtayiṣyāmi kathāṃ pāpapraṇāśinīm |
śrutvā yāṃ prāpa dharmātmā śivabhaktimanuttamām || 1 ||
[Analyze grammar]

ikṣvākurnāma vipreṃdro mahāvidyo mahāmatiḥ |
bahuśāstrapravīṇaśca nītiśāstraviśāradaḥ || 2 ||
[Analyze grammar]

na yaṣṭā na ca dātā ca na devānāṃ ca pūjakaḥ |
na cādhyāpayitā vedaṃ na vyākhyātā śrutasya ca || 3 ||
[Analyze grammar]

na purāṇetihāsānāṃ śrutīnāmāgamasya vā |
yatnādbhoktā tathā dehasaṃskāraikapravartakaḥ || 4 ||
[Analyze grammar]

tādṛśasya dvijasyātha samālakṣyāyuratyagāt |
lakṣāṃtare tathaikasminvatsare māsi paṃcame || 5 ||
[Analyze grammar]

tṛtīya divase rātryāṃ purāṇaṃ śrutavānidam |
svasaṃpāditavittasya yena dānaṃ na vai kṛtam || 6 ||
[Analyze grammar]

dinedine bhujyamānaṃ niḥsāraṃ syātkrameṇa hi |
varṣāṇyeva ca tāvaṃti narake pacyate dhruvam || 7 ||
[Analyze grammar]

kṛmiyonisahasraṃ ca anubhūya tataḥ param |
daridro vyādhito'baṃdhurduṣṭabhāryo bahuprajaḥ || 8 ||
[Analyze grammar]

dinedine bhikṣitena yācitena ca jīvanam |
yanna kvāpi ca bījānāṃ magnānāmatha mārgaṇāt || 9 ||
[Analyze grammar]

labdhenajīvanaṃ karma bhṛtyānāmatha jīvanam |
madhye śrotravihīnaśca netrahīnaḥ skhalanmalaḥ || 10 ||
[Analyze grammar]

evaṃ purāṇaṃ śrutvā sāvikṣvākurbhṛśaduḥkhitaḥ |
manasā ciṃtayaccedaṃ smāraṃ smāraṃ dvijādhamaḥ || 11 ||
[Analyze grammar]

rūpapuṣpairmāhiṣmayī durgāpi phalavarjitā |
tathā purāṇarahitā vidyā no gatidarśanī || 12 ||
[Analyze grammar]

bahuśāstraṃ samabhyasya bahuvedānsavistarān |
puṃsośrutapurāṇasya samyagyāti na darśanam || 13 ||
[Analyze grammar]

śaṃbhuruvāca |
evaṃ ciṃtayatastasya akālamaraṇaṃ tvabhūt |
yamalokaṃ gataścātha yamena paribhāṣitaḥ || 14 ||
[Analyze grammar]

yama uvāca |
anekapāpayuktosi puṇyaṃ naiva mahattava |
na vedādhyāpanātprāptaṃ pāpaṃ ca viditaṃ tava || 15 ||
[Analyze grammar]

koṭivarṣāṇi narake tavasthitiriti dvija |
āyurasti tavātyalpaṃ gamyatāṃ paurvikīṃ tanum || 16 ||
[Analyze grammar]

kuru puṇyaṃ hitaṃ dānaṃ devatāpūjanaṃ japam |
sāṃgamadhyāpanaṃ vipra bhojanaṃ bhasmadhāraṇam || 17 ||
[Analyze grammar]

bhaja viśveśvaraṃ devaṃ devadevamumāpatim |
tasya prayatnamātreṇa mama lokaṃ na gacchasi || 18 ||
[Analyze grammar]

yatkiṃcitpratyahaṃ pāpinpurāṇaṃ śṛṇu sādaram |
tatastacchravaṇādeva nekṣase mama yātanāḥ || 19 ||
[Analyze grammar]

yamasya vacanaṃ śrutvā brāhmaṇaḥ svāṃ yayau tanum |
atheśapūjanakṛte yatnamāsthāya sa dvijaḥ || 20 ||
[Analyze grammar]

agamanmunivaryaṃ tu jābāliśivapūjakam |
tapaḥ svādhyāyasaṃpannaṃ śrutismṛtivivecakam || 21 ||
[Analyze grammar]

purāṇatattvavettāraṃ lakṣaśiṣyasamāvṛtam |
jarāśithilasarvāṃgaṃ vedavedāṃgapāragam || 22 ||
[Analyze grammar]

draṣṭukāmo yayau śailaṃ maṃdaraṃ cārukaṃdaram |
nānāvihaṃgasaṃpūrṇaṃ nānāpuṣpalatāvṛtam || 23 ||
[Analyze grammar]

sarvartukusumopetaṃ nānāgaṃdhopaśobhitam |
kinnarāṇāṃ ca mithunairgītapūrṇamahāguham || 24 ||
[Analyze grammar]

anekarūpalāvaṇya vanitoṣitapādapam |
laṃbamānavicitrābhistābhiḥ śobhitapādapam || 25 ||
[Analyze grammar]

ratiśramaprasuptānāṃ bodhanāditaṣaṭpadam |
kūjaṃti ca pikāḥ kāmaṃ viyuktānāṃ yuje kila || 26 ||
[Analyze grammar]

nānāmunigaṇākīrṇaṃ praśāṃtamṛgacāriṇam |
apsarogaṇasaṃkīrṇaṃ gaṃdharvagaṇasevitam || 27 ||
[Analyze grammar]

nānāsiddhamukhodbhūtagītapūrṇavanāṃtaram |
vicitraphalasaṃpūrṇaṃ nānādevālayānvitam || 28 ||
[Analyze grammar]

prāsādaśatasaṃbādhaṃ nānāgṛhasamanvitam |
siṃhānanairgajamukhairulūkavadanairatha || 29 ||
[Analyze grammar]

amukhairvimukhairugrairarddhavaktrairmṛgīmukhaiḥ |
rurujaṃtukagodhāhi vānararkṣamukhairapi || 30 ||
[Analyze grammar]

vyāghravṛścikabhallūṣṭraśvānagardabhatuṃḍakaiḥ |
samastajīvavadanasadṛśāsyairgaṇeśvaraiḥ |
vallīmukhairvṛkṣamukhaiḥ śilāvaktrairayomukhaiḥ || 31 ||
[Analyze grammar]

śaṃkhamuktādijalajavadanairupaśobhitam |
adhikāṃgairanaṃgaiśca jaṭilaiḥ śikhimuṃḍitaiḥ || 32 ||
[Analyze grammar]

patrivaktrairdviṣaḍvaktraistrivigrahamukhairapi |
ghaṃṭāsyaiḥ śūrpavadanakarṇapādamukhairapi || 33 ||
[Analyze grammar]

ghaṃṭāmukhairveṇumukhaiḥ kiṃkiṇīvadanairapi |
yādṛgvastu jagatyasti tādṛśāsyairayomukhaiḥ || 34 ||
[Analyze grammar]

kaiścinnibhṛtakaṃdarparūpalāvaṇyakomalaiḥ |
koṭisūryapratīkāśaiścaṃdra koṭisamaprabhaiḥ || 35 ||
[Analyze grammar]

nānāvarṇairviśvamukhairviśvarūpaiścaturmukhaiḥ |
dvimukhaiḥ paṃcavaktraiśca trimukhaiḥ ṣaṇmukhairapi || 36 ||
[Analyze grammar]

ekānekamukhaiḥ śāṃtaiḥ sarvadā sukhibhiryutam |
nānābhogasamṛddhaiśca ratikāmasamairapi || 37 ||
[Analyze grammar]

lakṣmīnārāyaṇamukhairumeśasamavigrahaiḥ |
nānārūpadharaiścānyaiḥ sevitaṃ maṃdarācalam || 38 ||
[Analyze grammar]

dhenavo yatra vedāśca mīmāṃsāvatsa saṃyutāḥ |
dharmādayaḥ savarṣmāṇaḥ purāṇāni ca karmaṇā || 39 ||
[Analyze grammar]

smṛtītihāsajātāni āgamāśca śarīriṇaḥ |
sthitāśca maṃdare yatra saśailaḥ pāpanāśanaḥ || 40 ||
[Analyze grammar]

tasya madhye mahāpuṇyaṃ puraṃ paramaśobhitam |
vāpītaḍāgopavanaprāsādaśataśobhitam || 41 ||
[Analyze grammar]

saptaprākāraparikhaṃ ratnāṭṭālakasaṃyutam |
gopurairnavabhiryuktaṃ vicitragṛhasaṃyutam || 42 ||
[Analyze grammar]

yasya cāpratimaṃ teja uṣṇaśītādivarjitam |
tanmadhye nagarī puṇyā tanmadhye ca sabhā śubhā || 43 ||
[Analyze grammar]

tasyāṃ bhadrāsanaṃ madhye vedapādavicitritam |
sarvopaniṣadākḷptaṃ pādapīṭhaṃ suśobhanam || 44 ||
[Analyze grammar]

purāṇānyāgamāstasya svastīti śivapādayoḥ |
tatrāsīno mahāyogī gokṣīrasadṛśākṛtiḥ || 45 ||
[Analyze grammar]

maṃdasmitasucārvāsyodvyaṣṭavarṣavayāḥ prabhuḥ |
dadhāna urasāmālāṃ maṇirudrākṣakalpitām || 46 ||
[Analyze grammar]

bibhrāṇa upavītaṃ ca karṇikārasamadyutiḥ |
suratnakuṃḍalo devaḥ kirīṭakanakāṃbaraḥ || 47 ||
[Analyze grammar]

nānābhūṣaṇasaṃyukto nānāgaṃdhavilepanaḥ |
vāmāṃkanyastagirijo vīkṣamāṇastadānanam || 48 ||
[Analyze grammar]

mugdhāṃ ca sumukhīṃ bālāṃ navayauvanaśobhitām |
bhūṣitāṃ cārusarvāṃgīṃ bibhratīṃ kanakāṃbujam || 49 ||
[Analyze grammar]

āliṃgya vāmenakareṇa devīṃ dakṣeṇa tasyā mukhamunnamayya |
spṛṣṭvā śiro vāmakareṇa tasyā dakṣeṇa kurvaṃstilakaṃ ca devaḥ || 50 ||
[Analyze grammar]

bhaktirvījayate devaṃ praṇava vyajanena ca |
pūjākāṃtāpi kusumairmālāṃ devāya bibhratī || 51 ||
[Analyze grammar]

jñaptirviraktirvanite bibhratyau yogacāmare |
samādhiḥ kāryakartāsya dhāraṇāyoṣidasya ca || 52 ||
[Analyze grammar]

yamāścaniyamāścaiva kiṃkarāstasya kīrtitāḥ |
prāṇāyāmaḥ purodhāstu pratyāhāraḥ suvarṇadhṛk || 53 ||
[Analyze grammar]

dhyānaṃ ca draviṇādhyakṣaḥ satyaṃ senāpatistathā |
brahmaprabhṛtikīṭāṃtāḥ paśavastatpatiḥ śivaḥ || 54 ||
[Analyze grammar]

paśūnāṃ pālako dharmaḥ syādadharmaśca taskaraḥ |
māyāpāśena te baddhā mocanī kāśikā mṛtiḥ || 55 ||
[Analyze grammar]

nānāvidhāśca pramadā devadevamumāpatim |
etādṛśamumānāthaṃ koṭijaṃturanusmaret || 56 ||
[Analyze grammar]

iṣṭānbhogānavāpyātha śivaloke mahīyate |
brahmaviṣṇumaheṃdrādyāstatpuradvārapālakāḥ || 57 ||
[Analyze grammar]

lakṣmīsarasvatīdevyau dehalyādyarccanekṣiteḥ |
niyukte devadevasya devāśca surayoṣitaḥ || 58 ||
[Analyze grammar]

dāsyo devāḥ samastāśca dāsā yasya mahātmanaḥ |
etādṛśamahāśailamikṣvākuḥ saṃdadarśa ha || 59 ||
[Analyze grammar]

muniṃ praṇamya jābālimidamāha vacastadā |
gaṃtukāmo mahāśailaṃ śaktosyasminna vā mune || 60 ||
[Analyze grammar]

mamāyuralpaṃ kathitaṃ yamena jñāninā purā || 61 ||
[Analyze grammar]

narakaśca bahuḥproktaḥ kathaṃ śreyo bhaviṣyati |
jābāliruvāca |
mayāpi sarvametatte jñātaṃ divyena cakṣuṣā || 62 ||
[Analyze grammar]

āyurdaśadinaṃ brahmanvidvānapi na dharmakṛt |
na tapaste hyanabhyāsānna ca yogo'lpakālataḥ || 63 ||
[Analyze grammar]

na dānaṃ draviṇābhāvādasāmarthyāttathārhaṇā |
na yajño na vrataṃ pūrtaṃ na ca puṇyamanāyuṣaḥ || 64 ||
[Analyze grammar]

na cādhyāpanatīrthādi sevākālavirodhataḥ |
tasmāttatpāpanāśāya prāyaścittaṃ na vidyate || 65 ||
[Analyze grammar]

gatipradaṃ tathā dharmaṃ gaccha vā tiṣṭha vā mune |
ikṣvākuruvāca |
yāvajjīvaṃ pratijñāya kriyate yo vṛṣo dvija || 66 ||
[Analyze grammar]

tena pāpaparīhāro bhaviṣyati suniścitam |
taṃ brūhi yena dharmeṇa mama pāpaṃ praṇaśyati || 67 ||
[Analyze grammar]

kena vā puṇyayogena svargatiśca bhaviṣyati |
śaraṇaṃ bhava viprarṣe narakādatibibhyataḥ || 68 ||
[Analyze grammar]

sarvadharmaphalaṃ prāhuḥ śaraṇāgatapālanam |
jābāliruvāca |
satyaṃ svalpena kālena na tādṛglabhyate vṛṣaḥ || 69 ||
[Analyze grammar]

amṛtetvanṛte śakyaṃ vaktuṃ svapnāṃtareṣvapi |
rahasyamekaṃ kiṃcittu yasya kasyāpi nocyate || 70 ||
[Analyze grammar]

ikṣvākuruvāca |
śaraṇaṃ pālaya mune kālo me nirgamiṣyati |
jābāliruvāca |
mama prāṇādhikaṃ vipra rahasyaṃ śruticoditam || 71 ||
[Analyze grammar]

śivaliṃgārcanaṃ nāma brahmādibhiranuṣṭhitam |
samastapāpaśamanaṃ sarvopadravanāśanam || 72 ||
[Analyze grammar]

bhuktimuktipradaṃ tasmācchivapūjāṃ samācara |
nātikrāmedyadi mune śivaliṃgārcanaṃ śubham || 73 ||
[Analyze grammar]

yaḥ śaṃbhupūjāṃ vicchiṃdyāttena cchinnaṃ hi me śiraḥ |
varaṃ śūlavinikṣepo varaṃ śālmalikarṣaṇam || 74 ||
[Analyze grammar]

varaṃ prāṇaparityāgo naiva pūjāvyatikramaḥ |
varaṃ vahniprapatanaṃ varaṃ cādhaḥśiraḥ kṛtam || 75 ||
[Analyze grammar]

varaṃ svamalabhuktirvā neśapūjāvyatikramaḥ |
apūjayitvā ceśānaṃ yo hi bhuṃkte narādhamaḥ || 76 ||
[Analyze grammar]

pāpānāmannarūpāṇāṃ tasya bhojanamucyate |
anuccārya padaṃ śaṃbhorbhuṅkte yadi ca khādati || 77 ||
[Analyze grammar]

śiveti maṃgalaṃ nāma yasya vāci pravartate |
bhasmībhavaṃti tasyāśu mahāpātakakoṭayaḥ || 78 ||
[Analyze grammar]

śivaṃ pradakṣiṇīkṛtya yo namasyati mānavaḥ |
bhūmeḥ pradakṣiṇaṃ kṛtvā yattatpuṇyamavāpnuyāt || 79 ||
[Analyze grammar]

pradakṣiṇatrayaṃ kṛtvā namaskāraṃ ca paṃcadhā |
punaḥ pradakṣiṇaṃ kṛtvā natvā mucyeta pātakaiḥ || 80 ||
[Analyze grammar]

sarvavādyāni yaḥ kuryātkārayedvā śivālaye |
balena mahatā yukto vedasevyatra jāyate || 81 ||
[Analyze grammar]

śrāvayedyaḥ purāṇāni devadevaṃ trilocanam |
sarvapāpavinirmukto vasecchivapure kṛtī || 82 ||
[Analyze grammar]

taṃ nityamādareṇeśo vakti vākyaṃ priyaṃ sadā |
etatsaṃkṣepataḥ proktamīśapūjanamuttamam || 83 ||
[Analyze grammar]

alpāyuśca bhavānvipra śivapūjanamācara |
trikālaṃ vā dvikālaṃ vā ekakālamathāpi vā || 84 ||
[Analyze grammar]

yāmaṃ yāmārdhamathavā śivapūjanamācara |
vānaprasthāśramo bhūtvā vānaprasthakṛtāśrayaḥ || 85 ||
[Analyze grammar]

vānaprasthaprasūnaiśca prātaḥpūjaya śaṃkaram |
śrīphalaiḥ śatapatraiśca padmasaugaṃdhikairapi || 86 ||
[Analyze grammar]

nīpairjapābhiḥ punnāgaiḥ karavīraiśca pāṭalaiḥ |
tulasyāca ravidalairaparājitayā tathā || 87 ||
[Analyze grammar]

apāmārgadalai rudra jaṭādamanakena ca |
sarvairebhiḥ samaphalairbilvapatraiśca dhūrtakaiḥ || 88 ||
[Analyze grammar]

droṇaiḥ śirīṣaiḥ śaktaiśca dūrvayā korakairapi |
naṃdyāvartairakṣataiśca tilamiśraiśca kevalaiḥ || 89 ||
[Analyze grammar]

anyairapi yathāśakti prātaḥ saṃpūjayecchivam |
karṇikāraiśca sauvarṇardūvaryayāpi śivārcanam || 90 ||
[Analyze grammar]

mukulairnārcayeddevaṃ caṃpakairjalajaṃ vinā |
jalajānāṃ ca sarveṣāṃ patrāṇāmakṣatasya ca || 91 ||
[Analyze grammar]

kuśapuṣpasya rajatasuvarṇakṛtayorapi |
anyatkṛtvā yathā yattu tailapakvaṃ bhavennṛpa || 92 ||
[Analyze grammar]

na tatparyuṣitaṃ proktamapūpādi gamiṣyati |
ukṣitaṃ yatphalāyuktaṃ tailakṣārāmlajīrakaiḥ || 93 ||
[Analyze grammar]

jale tatprokṣitaṃ mūlaphalaśākādikaṃ nṛpa |
na ca paryuṣitaṃ proktaṃ gaṃgātoyaṃ ca sāgaram || 94 ||
[Analyze grammar]

mahānadījalaṃ sarvaṃ kedārajalameva ca |
hradarūpeṇa yattīrthaṃ kūpatīrthena rāghava || 95 ||
[Analyze grammar]

taḍāgavāpīsarasāṃ kūpenāpāṃ ca yadbhavet |
tattīrthatoyaṃ sarvaṃ ca na ca paryuṣitaṃ bhavet || 96 ||
[Analyze grammar]

na rātrau jalamāhāryaṃ divā saṃpādayejjalam |
sasaikataṃ tathā dhāryaṃ na ca paryuṣitaṃ hi tat || 97 ||
[Analyze grammar]

evaṃ viditvā pūjāṃ tvaṃ śivaliṃge samācara |
śaṃbhuruvāca |
evamuktotha muninā ikṣvākurbrāhmaṇapriyaḥ || 98 ||
[Analyze grammar]

śivapūjāparo bhūtvā dināṣṭakamatiṣṭhata |
navame'tha dine prāpte prātaḥkāle kṛtārcanaḥ || 99 ||
[Analyze grammar]

maraṇāvasare prāpte śivapūjāṃ vidhāya saḥ |
svānprāṇānupahārāya tatyājaiva maheśituḥ || 100 ||
[Analyze grammar]

mṛtaṃ tamatha vijñāya yamadūtāḥ samāgatāḥ |
yamalokaprāpakā ye yatamāsthāya tasthire || 101 ||
[Analyze grammar]

śaivāścāpi samāyātā dūtā vahnimukhādayaḥ |
teṣāmanyonyavādobhūnmāmako māmakastviti || 102 ||
[Analyze grammar]

atha yāmaḥ pāśapāṇiḥ śivadūtamathārdayat |
atha vahnimukhaḥ kruddho yamadūtaśataṃ tataḥ || 103 ||
[Analyze grammar]

mahākāyastathā bhūtvā gṛhītvā ca kareṇa tat |
śirāṃsi ca tathaikenāpīḍya ciccheda śaṣpavat || 104 ||
[Analyze grammar]

mārayitvā tato dūtānādāyekṣvākumabhyagāt |
nivedayāmāsa ca taṃ vīrabhadrāya dhīmate || 105 ||
[Analyze grammar]

sa cāpi śaṃkarāyātha taṃ prāha ca maheśvaraḥ |
tvayāṣṭadinapūjaiva kṛtā kṛṣṇā dine dine || 106 ||
[Analyze grammar]

tvamaniṃdaḥ purā māṃ ca liṃgaṃ śiśnāgramityuta |
tenaiva pāpayogena śiśnavaktro bhaviṣyasi || 107 ||
[Analyze grammar]

śiśnāgre vivaraṃ cakraṃ jihvānāsādivarjitaḥ |
pūrvaṃ mannāmavaktṛtvādvaktā cāpi bhaviṣyasi || 108 ||
[Analyze grammar]

atheśavacanātsopi tathābhūtobhavatkṣaṇāt |
śaṃbhuruvāca |
ya idaṃ śṛṇuyānnityaṃ purāṇākhyānamuttamam || 109 ||
[Analyze grammar]

vimuktapāpabaṃdhaśca śivabhakto bhaviṣyati |
sa yāti ca śivasthāne vaktā cāpi tathā bhavet || 110 ||
[Analyze grammar]

yaśca vakti kathāmenāṃ hareṇa sadṛśo bhavet |
uktvā kathāmimāṃ pūrvamadhīro nāma bhūmipaḥ || 111 ||
[Analyze grammar]

svargaṃ sa gatavānrājā kṛtapāpotha bhāryayā || 112 ||
[Analyze grammar]

iti śrīpadmapurāṇe pātālakhaṃḍe śivarāghavasaṃvāde vibhūtimāhātmyena |
navottaraśatatamo'dhyāyaḥ || 109 ||
[Analyze grammar]