Chapter 22

[English text for this chapter is available]

sumatiruvāca |
atha sarvaṃ dinaṃ nītvā harismaraṇakīrtanaiḥ |
rātrau suṣvāpa gaṃgāyā rodhasyuruphalaprade || 1 ||
[Analyze grammar]

dadarśa svapnamadhye tu sa svātmānaṃ caturbhujam |
śaṃkhacakragadāpadmaśārṅgakodaṃḍadhāriṇam || 2 ||
[Analyze grammar]

nṛtyaṃtaṃ puruṣottamasya purataḥ śarvādi devaiḥ saha |
śrīmadbhiḥ svatanūyutairarigadāṃbūtthābjahetyādibhiḥ |
viṣvaksenavarairgaṇaiḥ sutanubhiḥ śrīśaṃsadopāsitaṃ |
dṛṣṭvā vismayamāpa lokaviṣayaṃ harṣaṃ tathātyadbhutam || 3 ||
[Analyze grammar]

dadataṃ manaso'bhīṣṭaṃ puruṣottamasaṃjñitam |
ātmānaṃ ca kṛpāpātramamanyata mahāmatiḥ || 4 ||
[Analyze grammar]

ityevaṃ svapnaviṣaye dadarśa nṛpasattamaḥ |
prātaḥ prabuddho viprāya jagāda svapnamīkṣitam || 5 ||
[Analyze grammar]

tacchrutvā vāḍavo dhīmānkathayāmāsa vismitaḥ |
rājaṃstvayāsau dṛṣṭo yaḥ puruṣottamasaṃjñitaḥ || 6 ||
[Analyze grammar]

dāsyate śaṃkhacakrādicihnitāṃ svatanuṃ hariḥ |
iti śrutvā tu tadvākyaṃ ratnagrīvo mahāmanāḥ || 7 ||
[Analyze grammar]

dāpayāmāsa dānāni dīnānāṃ mānasocitam |
snātvā gaṃgābdhisaṃyoge tarpayitvā pitṝnsurān || 8 ||
[Analyze grammar]

gāyanhariguṇagrāmaṃ pratyaikṣata ca darśanam |
tato madhyāhnasamaye dividuṃdubhayo muhuḥ || 9 ||
[Analyze grammar]

jaghnuḥ surakarāghāta bahuśabdasuśabditāḥ |
akasmātpuṣpavṛṣṭiśca babhūva nṛpamastake || 10 ||
[Analyze grammar]

dhanyosi nṛpavaryastvaṃ nīlaṃ paśyākṣigocaram || 11 ||
[Analyze grammar]

śṛṇotīti yadā vākyaṃ nṛpo devapraṇoditam |
tadā sa sūryakoṭīnāmadhikāṃti dharodbhutaḥ || 12 ||
[Analyze grammar]

rājño'kṣigocaro jāto nīlanāmā mahāgiriḥ |
rājataiḥ kānakaiḥ śṛṃgaiḥ samaṃtātparirājitaḥ || 13 ||
[Analyze grammar]

kimagniḥ prajvalatyeṣa dvitīyaḥ kimu bhāskaraḥ |
kimayaṃ vaidyutaḥ puṃjo hyakasmātsthirakāṃtidhṛk || 14 ||
[Analyze grammar]

tāpasa brāhmaṇo dṛṣṭvā nīlaprasthaṃ suśobhitam |
rājñe nivedayāmāsa eṣa puṇyo mahāgiriḥ || 15 ||
[Analyze grammar]

tacchrutvā nṛpatiśreṣṭhaḥ śirasā praṇanāma ha |
dhanyo'smi kṛtakṛtyo'smi nīlo me dṛṣṭigocaraḥ || 16 ||
[Analyze grammar]

amātyo rājapatnī ca karambastaṃtuvāyakaḥ |
nīladarśanasaṃhṛṣṭā babhūvuḥ puruṣarṣabha || 17 ||
[Analyze grammar]

paṃcaite vijaye kāle nīlaparvatamāruhan |
mahāduṃdubhinirghoṣāñcchṛṇvanto hyamaraiḥ kṛtān || 18 ||
[Analyze grammar]

tasyoparitane śṛṃge citrapādaparājite |
dadarśa hāṭakābaddhaṃ devālayamanuttamam || 19 ||
[Analyze grammar]

brahmāgatya sadā pūjāṃ karoti parameṣṭhinaḥ |
naivedyaṃ kurute yatra harisaṃtoṣakārakam || 20 ||
[Analyze grammar]

dṛṣṭvātha tatra vimalaṃ devāyatanamuttamam |
praviveśa parīvāraiḥ paṃcabhiḥ saha saṃvṛtaḥ || 21 ||
[Analyze grammar]

tatra dṛṣṭvā jātarūpe mahāmaṇivicitrite |
siṃhāsane virājaṃtaṃ caturbhujamanoharam || 22 ||
[Analyze grammar]

caṃḍa pracaṃḍa vijaya jayādibhirupāsitam |
praṇanāma sapatnīko rājā sevakasaṃyutaḥ || 23 ||
[Analyze grammar]

praṇamya paramātmānaṃ mahārājaḥ surottamam |
snāpayāmāsa vidhivadvedoktaiḥ snānamaṃtrakaiḥ || 24 ||
[Analyze grammar]

arghyapādyādikaṃ cakre prītena manasā nṛpaḥ |
caṃdanena vilipyainaṃ suvastre vinivedya ca || 25 ||
[Analyze grammar]

dhūpamārārtikaṃ kṛtvā sarvasvādumanoharam |
naivedyaṃ bhagavanmūrtyai nyavedayadatho nṛpaḥ || 26 ||
[Analyze grammar]

praṇamya ca stutiṃ cakre tāpasabrāhmaṇena ca |
yathāmatiguṇagrāmaguṃphitastotrasaṃcayaiḥ || 27 ||
[Analyze grammar]

rājovāca |
ekastvaṃ puruṣaḥ sākṣādbhagavānprakṛteḥ paraḥ |
kāryakāraṇato bhinno mahattattvādipūjitaḥ || 28 ||
[Analyze grammar]

tvannābhikamalājjajñe brahmā sṛṣṭivicakṣaṇaḥ |
tathā saṃhārakartā ca rudrastvannetrasaṃbhavaḥ || 29 ||
[Analyze grammar]

tvayājñaptaḥ karotyasya viśvasya pariceṣṭitam |
tvatto jātaṃ purāṇādyajjagatsthāsnu cariṣṇu ca || 30 ||
[Analyze grammar]

cetanāśaktimāviśya tvamenaṃ cetayasyaho |
tava janma tu nāstyeva nāṃtastava jagatpate |
vṛddhikṣayaparīṇāmāstvayi saṃtyeva no vibho || 31 ||
[Analyze grammar]

tathāpi bhaktarakṣārthaṃ dharmasthāpanahetave |
karoṣi janmakarmāṇi hyanurūpaguṇāni ca || 32 ||
[Analyze grammar]

tvayā mātsyaṃ vapurdhṛtvā śaṃkhastu nihatosuraḥ |
vedāḥ surakṣitā brahmanmahāpuruṣapūrvaja || 33 ||
[Analyze grammar]

śeṣo na vetti mahi te bhāratyapi maheśvarī |
kimutānye mahāviṣṇo mādṛśāstu kubuddhayaḥ || 34 ||
[Analyze grammar]

manasā tvāṃ na cāpnoti vāgiyaṃ parameśvarī |
tasmādahaṃ kathaṃ tvāṃ vai stotuṃ syāmīśvaraḥ prabho || 35 ||
[Analyze grammar]

iti stutvā sa śirasā praṇāmamakaronmuhuḥ |
gadgadasvarasaṃyukto romaharṣāṃkitāṃgakaḥ || 36 ||
[Analyze grammar]

iti stutyā prahṛṣṭātmā bhagavānpuruṣottamaḥ |
uvāca vacanaṃ satyaṃ rājānaṃ prati sārthakam || 37 ||
[Analyze grammar]

śrībhagavānuvāca |
tava stutyā praharṣo'bhūnmama rājanmahāmate |
jānīhi tvaṃ mahārāja māṃ ca prakṛtitaḥ param || 38 ||
[Analyze grammar]

naivedyabhakṣaṇaṃ tvaṃ hi śīghraṃ kuru manoharam |
caturbhujatvamāptaḥ sangaṃtāsi paramaṃ padam || 39 ||
[Analyze grammar]

tvatkṛtstutiratnena yo māṃ stoṣyati mānavaḥ |
tasyāpi darśanaṃ dāsye bhuktimuktivarapradam || 40 ||
[Analyze grammar]

ityevaṃ vacanaṃ rājā śrutvā bhagavatoditam |
naivedyabhakṣaṇaṃ cakre caturbhiḥ saha sevakaiḥ || 41 ||
[Analyze grammar]

tato vimānaṃ saṃprāptaṃ kiṃkiṇījālamaṃḍitam |
apsarovṛṃdasaṃsevyaṃ sarvabhogasamanvitam || 42 ||
[Analyze grammar]

puruṣottamasaṃjñaṃ ca paśyanrājā sa dhārmikaḥ |
vavaṃde caraṇau tasya kṛpāpātrakṛtātmakaḥ || 43 ||
[Analyze grammar]

tadājñayā vimāne sa āruhya mahilāyutaḥ |
jagāma paśyatastasya divi vaikuṃṭhamadbhutam || 44 ||
[Analyze grammar]

maṃtrī dharmaparo rājñaḥ sarvadharmaviduttamaḥ |
yayau sākaṃ vimānena lalanāvṛndasevitaḥ || 45 ||
[Analyze grammar]

tāpasabrāhmaṇastatra sarvatīrthāvagāhakaḥ |
caturbhujatvaṃ saṃprāpto yayau devairvimānibhiḥ || 46 ||
[Analyze grammar]

karaṃbo'pi mahārāja gānapuṇyena darśanam |
prāpto yayau surāvāsaṃ sarvadevādidurllabham || 47 ||
[Analyze grammar]

sarve pracalitā viṣṇulokaṃ paramamadbhutam |
caturbhujāḥ śaṃkhacakragadāpāthojadhāriṇaḥ || 48 ||
[Analyze grammar]

sarve meghaśriyaḥ śuddhā lasadaṃbhojapāṇayaḥ |
hārakeyūrakaṭakairbhūṣitāṃgā yayurdivam || 49 ||
[Analyze grammar]

tadvimānāvalīrdṛṣṭvā lokaiḥ prakṛtibhistadā |
duṃdubhīnāṃ tu nirghoṣastaiḥ kṛtaḥ karṇagocaraḥ || 50 ||
[Analyze grammar]

tadaiko brāhmaṇo hyāsīdviṣṇupādābjavallabhaḥ |
gatastadvirahākṛṣṭacetā jātaścaturbhujaḥ || 51 ||
[Analyze grammar]

taccitraṃ vīkṣya lokāste praśaṃsaṃto mahodayam |
gaṃgāsāgarasaṃyoge snātvā'gustaṃ puraṃ prati || 52 ||
[Analyze grammar]

aho bhāgyaṃ bhūmipate ratnagrīvasya sanmateḥ |
jagāmānena dehena tadviṣṇoḥ paramaṃ padam || 53 ||
[Analyze grammar]

rājannasau nīlagiriḥ puruṣottamasatkṛtaḥ |
yaṃ vīkṣyaiva vrajaṃtyaddhā vaikuṃṭhaṃ paramāyanam || 54 ||
[Analyze grammar]

etannīlasya māhātmyaṃ yaḥ śṛṇoti sa bhāgyavān |
yaḥ śrāvayati lokānvai tau gacchetāṃ paraṃ padam || 55 ||
[Analyze grammar]

etacchrutvā tu duḥsvapno naśyati smṛtimātrataḥ |
prāṃte saṃsāranistāraṃ dadāti puruṣottamaḥ || 56 ||
[Analyze grammar]

yo'sau nīlādhivāsī ca sa rāmaḥ puruṣottamaḥ |
sītāsākṣānmahālakṣmīḥ sarvakāraṇakāraṇam || 57 ||
[Analyze grammar]

hayamedhaṃ caritvā sa lokānvai pāvayiṣyati |
yannāmabrahmahatyāyāḥ prāyaścitte pradiśyate || 58 ||
[Analyze grammar]

idānīṃ tvaddhayaḥ prāpto nīleparvatasattame |
puruṣottamadevaṃ tvaṃ namaskuru mahāmate || 59 ||
[Analyze grammar]

tatra niṣpāpino bhūtvā yāsyāmaḥ paramaṃ padam |
yasya prasādādbahavo nistīrṇā bhavasāgarāt || 60 ||
[Analyze grammar]

evaṃ pravadatastasya prāpto'śvo nīlaparvatam |
vāyuvegena pṛthivīṃ kurvansaṃkṣuṇṇamaṃḍalām || 61 ||
[Analyze grammar]

tadā rājāpi tatpṛṣṭhacārī nīlābhidhaṃ girim |
prāpto gaṃgābdhisaṃyoge snātvāgātpuruṣottamam || 62 ||
[Analyze grammar]

stutvā natvā ca deveśaṃ surāsuranamaskṛtam |
jātaṃ kṛtārthamātmānamamanyata sa śatruhā || 63 ||
[Analyze grammar]

iti śrīpadmapurāṇe pātālakhaṃḍe śeṣavātsyāyanasaṃvāde rāmāśvamedhe |
nīlagirimahimavarṇanaṃnāma dvāviṃśo'dhyāyaḥ || 22 ||
[Analyze grammar]