Chapter 58

[English text for this chapter is available]

vyāsa uvāca |
evaṃ gṛhāśrame sthitvā dvitīyaṃ bhāgamāyuṣaḥ |
vānaprasthāśramaṃ gacchetsadāraḥ sāgnireva ca || 1 ||
[Analyze grammar]

nikṣipya bhāryāṃ putreṣu gacchedvanamathāpi vā |
dṛṣṭvāpatyasya vāpatyaṃ jarjarīkṛtavigrahaḥ || 2 ||
[Analyze grammar]

śuklapakṣasya pūrvāhṇe praśaste cottarāyaṇe |
gatvāraṇyaṃ niyamavāṃstapaḥ kuryātsamāhitaḥ || 3 ||
[Analyze grammar]

phalamūlāni pūtāni nityamāhāramāharet |
yadāhāro bhavettena pūjayetpitṛdevatāḥ || 4 ||
[Analyze grammar]

pūjayedatithiṃ nityaṃ snātvā cābhyarcayetsurān |
gṛhādādāya cāśnīyādaṣṭau grāsānsamāhitaḥ || 5 ||
[Analyze grammar]

jaṭāśca bibhṛyānnityaṃ nakharomāṇi notsṛjet |
svādhyāyaṃ sarvathā kuryānniyacchedvācamanyataḥ || 6 ||
[Analyze grammar]

agnihotraṃ ca juhuyātpaṃcayajñānsamācaret |
utpannairvividhairmedhyaiḥ śākamūlaphalena vā || 7 ||
[Analyze grammar]

cīravāsā bhavennityaṃ snāyāttriṣavaṇaṃ śuciḥ |
sarvabhūtānukaṃpaśca pratigrahavivarjitaḥ || 8 ||
[Analyze grammar]

darśena paurṇamāsena yajeta niyataṃ dvijaḥ |
ṛtviṣṭyāgrayaṇe caiva cāturmāsyāni kārayet || 9 ||
[Analyze grammar]

uttarāyaṇaṃ ca kramaśo dakṣiṇāyanameva ca |
vāsaṃtaśāradairmeddhyairutpannaiḥ svayamāhṛtaiḥ || 10 ||
[Analyze grammar]

puroḍāśāṃścarūṃścaiva vidhivannirvapetpṛthak |
devatābhyaḥ pitṛbhyaśca dattvā medhyataraṃ haviḥ || 11 ||
[Analyze grammar]

śeṣaṃ samupabhuṃjīta lavaṇaṃ ca svayaṃkṛtam |
varjjayenmadyamāṃsāni bhaumāni kavakāni ca || 12 ||
[Analyze grammar]

bhūstṛṇaṃ śaṣpakaṃ caiva śleṣmātaka phalāni ca |
na phālakṛṣṭamaśnīyādutsṛṣṭamapi kenacit || 13 ||
[Analyze grammar]

na grāmajātānyārtopi puṣpāṇi ca phalāni ca |
śrāvaṇenaiva vidhinā vahniṃ paricaretsadā || 14 ||
[Analyze grammar]

na druhyetsarvabhūtāni nirdvaṃdvo nirbhayo bhavet |
na naktaṃ kiṃcidaśnīyādrātrau dhyānaparo bhavet || 15 ||
[Analyze grammar]

jiteṃdriyo jitakrodhastattvajñānaviciṃtakaḥ |
brahmacārī bhavennityaṃ na patnīmapi saṃśrayet || 16 ||
[Analyze grammar]

yastu patnyā vanaṃ gatvā maithunaṃ kāmataścaret |
tadvrataṃ tasya lupyeta prāyaścittīyate dvijaḥ || 17 ||
[Analyze grammar]

tatra yo jāyate garbho na sa spṛśyo dvijātibhiḥ |
na hi vededhikārosya tadvaṃśepyevameva hi || 18 ||
[Analyze grammar]

bhūmau śayīta satataṃ sāvitrījapyatatparaḥ |
śaraṇyaḥ sarvabhūtānāṃ sadvibhāgaparaḥ sadā || 19 ||
[Analyze grammar]

parivādaṃ mṛṣāvādaṃ nidrālasye ca varjayet |
ekāgniraniketaḥ syātprokṣitāṃ bhūmimāśrayet || 20 ||
[Analyze grammar]

mṛgaiḥ saha careddāṃtastaiḥ sahaiva ca saṃvaset |
śilāyāṃ śarkarāyāṃ vā śayīta susamāhitaḥ || 21 ||
[Analyze grammar]

sadyaḥ prakṣālako vā syānmāsasaṃcayikopi vā |
ṣaṇmāsanicayo vāpi samānicaya eva vā || 22 ||
[Analyze grammar]

naktaṃ cānnaṃ samaśnīyāddivā cāhṛtya śaktitaḥ |
caturthakālako vā syātkiṃ vāpyaṣṭamakālikaḥ || 23 ||
[Analyze grammar]

cāṃdrāyaṇavidhānairvā śuklekṛṣṇe ca varjayet |
pakṣepakṣe samaśnīyādyavāgūṃ kvathitāṃ sakṛt || 24 ||
[Analyze grammar]

puṣpamūlaphalairvāpi kevalairvartayetsadā |
svābhāvikaiḥ svayaṃśīrṇairvaikhānasamate sthitaḥ || 25 ||
[Analyze grammar]

bhūmau vā parivarteta tiṣṭhedvā prapadairdinam |
sthānāsanābhyāṃ viharenna kvaciddhairyyamutsṛjet || 26 ||
[Analyze grammar]

grīṣme paṃcatapāśca syādvarṣāsvabhrāvakāśikaḥ |
ārdravāsāśca hemaṃte kramaśo varddhayettapaḥ || 27 ||
[Analyze grammar]

upaspṛśettriṣavaṇaṃ pitṛdevāṃśca tarpayet |
ekapādena tiṣṭheta marīciṃ vā pibetsadā || 28 ||
[Analyze grammar]

paṃcāgnidhūmago vā syādūṣmagaḥ somapopi vā |
payaḥ pibecchuklapakṣe kṛṣṇapakṣe tu gomayam || 29 ||
[Analyze grammar]

śīrṇaparṇāśano vā syātkṛcchrairvā vartayetsadā |
yogābhyāsarataśca syādrudrādhyāyī bhavetsadā || 30 ||
[Analyze grammar]

atharvaśirasodhyetā vedāṃtābhyāsatatparaḥ |
yamānseveta satataṃ niyamāṃścāpyataṃdritaḥ || 31 ||
[Analyze grammar]

atha cāgnīnsamāropya svātmani dhyānatatparaḥ || 32 ||
[Analyze grammar]

anagniraniketo vā munirmokṣaparo bhavet |
tāpaseṣveva vipreṣu yātrikaṃ bhaikṣamāharet || 33 ||
[Analyze grammar]

gṛhamedhiṣu cānyeṣu dvijeṣu vanacāriṣu |
grāmādāhṛtya cāśnīyādaṣṭau grāsānvane vasan || 34 ||
[Analyze grammar]

pratigṛhya puṭenaiva pāṇinā śakalena vā |
vividhāścopaniṣada ātmasaṃsiddhaye japet || 35 ||
[Analyze grammar]

vidyāviśeṣānsāvitrīṃ rudrādhyāyaṃ tathaiva ca |
mahāprasthānikaṃ vāsau kuryyādanaśanaṃ tathā |
agnipraveśamanyadvā brahmārpaṇavidhau sthitaḥ || 36 ||
[Analyze grammar]

iti śrīpādme mahāpurāṇe svargakhaṃḍe vānaprasthāśramācāradharmo |
nāmāṣṭapaṃcāśattamo'dhyāyaḥ || 58 ||
[Analyze grammar]