Chapter 59

[English text for this chapter is available]

vyāsa uvāca |
evaṃ vanāśrame sthitvā tṛtīyaṃ bhāgamāyuṣaḥ |
caturthaṃ cāyuṣo bhāgaṃ saṃnyāsena nayetkramāt || 1 ||
[Analyze grammar]

agnīnātmani saṃsthāpya dvijaḥ pravrajito bhavet |
yogābhyāsarataḥ śāṃto brahmavidyāparāyaṇaḥ || 2 ||
[Analyze grammar]

yadā manasi saṃpannaṃ vairāgyaṃ sarvavastuṣu |
tadā saṃnyāsamicchecca patitaḥ syādviparyaye || 3 ||
[Analyze grammar]

prājāpatyāṃ nirūpyeṣṭimāgneyīmathavā punaḥ |
dāṃtaḥ śuklakaṣāyosau brahmāśramamupāśrayet || 4 ||
[Analyze grammar]

jñānasaṃnyāsinaḥ kecidvedasaṃnyāsino'pare |
karmasaṃnyāsinastvanye trividhāḥ parikīrtitāḥ || 5 ||
[Analyze grammar]

yaḥ sarvatra vinirmukto nirdvaṃdvaścaiva nirbhayaḥ |
procyate jñānasaṃnyāsī ātmanyeva vyavasthitaḥ || 6 ||
[Analyze grammar]

vedamevābhyasennityaṃ nirāśīrniṣparigrahaḥ |
procyate vedasaṃnyāsī mumukṣurvijiteṃdriyaḥ || 7 ||
[Analyze grammar]

yastvagnimātmasākṛtvā brahmārpaṇaparo dvijaḥ |
jñeyaḥ sa karmasaṃnyāsī mahāyajñaparāyaṇaḥ || 8 ||
[Analyze grammar]

trayāṇāmapi caiteṣāṃ jñānī tvabhyadhiko mataḥ |
na tasya vidyate kāryaṃ na liṃgaṃ vā vipaścitaḥ || 9 ||
[Analyze grammar]

nirmamo nirbhayaḥ śāṃto nirdvaṃdvaḥ parṇabhojanaḥ |
jīrṇakaupīnavāsāḥ syānnagno vā dhyānatatparaḥ || 10 ||
[Analyze grammar]

brahmacārī jitāhāro grāmādannaṃ samāharet |
adhyātmaratirāsīta nirapekṣo nirāśiṣaḥ || 11 ||
[Analyze grammar]

ātmanaiva sahāyena sukhārthaṃ vicarediha |
nābhinaṃdeta maraṇaṃ nābhinaṃdeta jīvanam || 12 ||
[Analyze grammar]

kālameva pratīkṣeta nirdeśaṃ bhṛtako yathā |
nādhyetavyaṃ na vartavyaṃ śrotavyaṃ na kadācana || 13 ||
[Analyze grammar]

evaṃ jñānaparo yogī brahmabhūyāya kalpate |
ekavāsātha vā vidvānkaupīnācchādanopi vā || 14 ||
[Analyze grammar]

muṃḍī śikhī vātha bhavettridaṃḍī niṣparigrahaḥ |
kāṣāyavāsāḥ satataṃ dhyānayogaparāyaṇaḥ || 15 ||
[Analyze grammar]

grāmāṃte vṛkṣamūle vā vaseddevālayepi vā |
samaḥ śatrau tathā mitre tathā mānāpamānayoḥ || 16 ||
[Analyze grammar]

bhaikṣyeṇa vartayennityaṃ naikānnādī bhavetkvaccit |
yastu mohena vānyasmādekānnādī bhavedyatiḥ || 17 ||
[Analyze grammar]

na tasya niṣkṛtiḥ kāciddharmaśāstreṣu dṛśyate |
rāgadveṣaviyuktātmā samaloṣṭāśmakāṃcanaḥ || 18 ||
[Analyze grammar]

prāṇihiṃsānivṛttaśca maunī syātsarvanispṛhaḥ |
dṛṣṭipūtaṃ nyasetpādaṃ vastrapūtaṃ jalaṃ pibet || 19 ||
[Analyze grammar]

satyapūtāṃ vadedvāṇīṃ manaḥpūtaṃ samācaret |
naikatra nivaseddeśe varṣābhyonyatra bhikṣukaḥ || 20 ||
[Analyze grammar]

snātvā śaucayuto nityaṃ kamaṃḍalukaraḥ śuciḥ |
brahmacaryarato nityaṃ vanavāsarato bhavet || 21 ||
[Analyze grammar]

mokṣaśāstreṣu nirato brahmasūtrī jiteṃdriyaḥ |
daṃbhāhaṃkāranirmukto niṃdāpaiśunyavarjitaḥ || 22 ||
[Analyze grammar]

ātmajñānaguṇopeto yadi mokṣamavāpnuyāt |
abhyasetsatataṃ devaṃ praṇavākhyaṃ sanātanam || 23 ||
[Analyze grammar]

snātvācamya vidhānena śucirdevālayādiṣu |
yajñopavītī śāṃtātmā kuśapāṇiḥ samāhitaḥ || 24 ||
[Analyze grammar]

dhautakāṣāyavasano tasmiñchannatanūruhaḥ |
adhiyajñaṃ brahmajapedādhidaivikameva ca || 25 ||
[Analyze grammar]

ādhyātmikaṃ ca satataṃ vedāntābhihitaṃ ca yat |
putreṣu cātha nivasanbrahmacārī yatirmuniḥ || 26 ||
[Analyze grammar]

vedamevābhyasennityaṃ sa yāti paramāṃ gatim |
ahiṃsāsatyamasteyaṃ brahmacaryaṃ tapaḥ param || 27 ||
[Analyze grammar]

kṣamādayā ca saṃtoṣo vratānyasya viśeṣataḥ |
vedāṃtajñānaniṣṭho vā paṃcayajñānsamāhitaḥ || 28 ||
[Analyze grammar]

kuryyādaharahaḥ snātvā bhikṣārthe naiva tena hi |
homamaṃtrānjapennityaṃ kālekāle samāhitaḥ || 29 ||
[Analyze grammar]

svādhyāyaṃ cānvahaṃ kuryyātsāvitrīṃ saṃdhyayorjapet |
dhyāyīta satataṃ devamekāṃtaṃ parameśvaram || 30 ||
[Analyze grammar]

ekānnaṃ varjayennityaṃ kāmaṃ krodhaṃ parigraham |
ekavāsā dvivāsā vā śikhī yajñopavītavān |
kamaṃḍalukaro vidvāṃstridaṃḍo yāti tatparam || 31 ||
[Analyze grammar]

iti śrīpādme mahāpurāṇe svargakhaṃḍe yatidharmanirūpaṇaṃ |
nāmaikonaṣaṣṭitamo'dhyāyaḥ || 59 ||
[Analyze grammar]