Chapter 27

[English text for this chapter is available]

nārada uvāca |
tato gaccheta dharmajña kanyātīrthamanuttamam |
kanyātīrthe naraḥ snātvā agniṣṭomaphalaṃ labhet || 1 ||
[Analyze grammar]

tato gacchennaravyāghra brahmaṇaḥ sthānamuttamam |
tatra varṇāvaraḥ snātvā brāhmaṇyaṃ labhate naraḥ || 2 ||
[Analyze grammar]

brāhmaṇastu viśuddhātmā gaccheta paramāṃ gatim |
tato gacchennaravyāghra somatīrthamanuttamam || 3 ||
[Analyze grammar]

tatra snātvā naro rājansomalokamavāpnuyāt |
saptasārasvataṃ tīrthaṃ tato gacchennarādhipa || 4 ||
[Analyze grammar]

yatra maṃkaṇakaḥ siddho brahmarṣirlokaviśrutaḥ |
purā maṃkaṇako rājankuśāgreṇeti viśrutam || 5 ||
[Analyze grammar]

kṣataḥ kila kare rājantasya śākaraso'sravat |
sa vai śākarasaṃ dṛṣṭvā harṣāviṣṭo mahātapāḥ || 6 ||
[Analyze grammar]

nanarta kila viprarṣirvismayotphullalocanaḥ |
tatastasminpranṛtte vai sthāvaraṃ jaṃgamaṃ ca yat || 7 ||
[Analyze grammar]

pranṛttamubhayaṃ vīra tejasā tasya mohitam |
brahmādibhistato devairṛṣibhiśca tapodhanaiḥ || 8 ||
[Analyze grammar]

vijñapto vai ṛṣerarthe mahādevo narādhipa |
nāyaṃ nṛtyedyathā deva tathā tvaṃ kartumarhasi || 9 ||
[Analyze grammar]

tato devo muniṃ dṛṣṭvā harṣāviṣṭena cetasā |
nṛtyaṃtamabravīccainaṃ sthirāṇāṃ hitakāmyayā || 10 ||
[Analyze grammar]

aho maharṣe dharmajña kimarthaṃ nṛtyate bhavān |
harṣasthānaṃ kimarthaṃ vā tavādya munipuṃgava || 11 ||
[Analyze grammar]

ṛṣiruvāca |
tapasvino dharmmapathasthitasya dvijasattama |
kiṃ na paśyasi me brahmankṣatācchākarasaṃ sṛtam || 12 ||
[Analyze grammar]

yaṃ dṛṣṭvā saṃpranṛtto'haṃ harṣeṇa mahatā vṛtaḥ |
taṃ prahasyābravīddeva ṛṣiṃ rāgeṇa mohitam || 13 ||
[Analyze grammar]

ahaṃ tu vismayaṃ vipra na gacchāmīha paśya mām |
evamuktvā naraśreṣṭha mahādevena vai tadā || 14 ||
[Analyze grammar]

aṃgulyagreṇa rājeṃdra svāṃguṣṭhastāḍito'nagha |
tasya bhasmakṣatādrājanniḥsṛtaṃ himasaṃnibham || 15 ||
[Analyze grammar]

yaṃ dṛṣṭvā vrīḍito rājansa muniḥ pādayorgataḥ |
nānyaṃ devādahaṃ manye rudrātparataraṃ mahat || 16 ||
[Analyze grammar]

surāsurasya jagato gatistvamasi śūladhṛk |
tvayā sṛṣṭamidaṃ viśvaṃ trailokyaṃ sacarācaram || 17 ||
[Analyze grammar]

tvāmeva bhagavansarve praviśaṃti yugakṣaye |
devairapi na śakyastvaṃ parijñātuṃ kuto mayā || 18 ||
[Analyze grammar]

tvayi sarveśa dṛśyaṃte surāḥ śakrādayo'nagha |
sarvastvamasi lokānāṃ kartā kārayitānvaham || 19 ||
[Analyze grammar]

tvatprasādātsurāḥ sarve modaṃtīhākutobhayāḥ |
evaṃ stutvā mahādevaṃ sa ṛṣiḥ praṇato'bravīt || 20 ||
[Analyze grammar]

tvatprasādānmahādeva tapo me na kṣareta vai |
tato devaḥ prahṛṣṭātmā brahmarṣimidamabravīt || 21 ||
[Analyze grammar]

tapaste varddhatāṃ vipra matprasādātsahasradhā |
āśrame ceha vatsyāmi tvayā sārddhaṃ mahāmune || 22 ||
[Analyze grammar]

saptasārasvate snātvā arcayiṣyaṃti ye tu mām |
na teṣāṃ durlabhaṃ kiṃcidiha loke paratra vā || 23 ||
[Analyze grammar]

gacchetsārasvataṃ cāpi lokaṃ nāstyatra saṃśayaḥ |
evamuktvā mahādevastatraivāṃtaradhīyata || 24 ||
[Analyze grammar]

tatastvauśanasaṃ gacchettriṣu lokeṣu viśrutam |
yatra brahmādayo devā ṛṣayaśca tapodhanāḥ || 25 ||
[Analyze grammar]

kārtikeyaśca bhagavāṃstrisaṃdhyāṃ kila bhārata |
sānnidhyamakarottatra bhārgavapriyakāmyayā || 26 ||
[Analyze grammar]

kapālamocanaṃ tīrthaṃ sarvapāpapraṇāśanam |
tatra snātvā naravyāghra sarvapāpaiḥ pramucyate || 27 ||
[Analyze grammar]

agnitīrthaṃ tato gacchetsnātvā ca bharatarṣabha |
agnilokamavāpnoti kulaṃ caiva samuddharet || 28 ||
[Analyze grammar]

viśvāmitrasya tatraiva tīrthaṃ bharatasattama |
tatra snātvā mahārāja brāhmaṇyamabhijāyate || 29 ||
[Analyze grammar]

brahmayoniṃ samāsādya śuciḥ prayatamānasaḥ |
tatra snātvā naravyāghra brahmalokaṃ prapadyate || 30 ||
[Analyze grammar]

punātyā saptamaṃ caiva kulaṃ nāstyatra saṃśayaḥ |
tato gaccheta rājeṃdra tīrthaṃ trailokyaviśrutam || 31 ||
[Analyze grammar]

pṛthūdakamiti khyātaṃ kārtikeyasya vnṛpa |
tatrābhiṣekaṃ kurvīta pitṛdevārcane rataḥ || 32 ||
[Analyze grammar]

ajñānājjñānato vāpi striyā vā puruṣeṇa vā |
yatkiṃcidaśubhaṃ karma kṛtaṃ mānuṣabuddhinā || 33 ||
[Analyze grammar]

tatsarvaṃ naśyate tatra snātamātrasya bhārata |
aśvamedhaphalaṃ cāpi labhate svargameva ca || 34 ||
[Analyze grammar]

puṇyamāhuḥ kurukṣetraṃ kurukṣetrātsarasvatīm |
sarasvatyāśca tīrthāni tīrthebhyaśca pṛthūdakam || 35 ||
[Analyze grammar]

uttame sarvatīrthānāṃ yastyajedātmanastanum |
pṛthūdake japyaparo naiva saṃsaraṇaṃ labhet || 36 ||
[Analyze grammar]

gītaṃ sanatkumāreṇa vyāsena ca mahātmanā |
vede ca niyataṃ rājannabhigacchetpṛthūdakam || 37 ||
[Analyze grammar]

pṛthūdakātpuṇyatamaṃ nānyattīrthaṃ narottama |
etanmedhyaṃ pavitraṃ ca pāvanaṃ ca na saṃśayaḥ || 38 ||
[Analyze grammar]

tatra snātvā divaṃ yāṃti api pāpakṛto janāḥ |
pṛthūdake naraśreṣṭhamāhurevaṃ manīṣiṇaḥ || 39 ||
[Analyze grammar]

madhusravaṃ ca tatraiva tīrthaṃ bharatasattama |
tatra snātvā naro rājangosahasraphalaṃ labhet || 40 ||
[Analyze grammar]

tato gacchennaraśreṣṭha tīrthaṃ devyā yathākramam |
sarasvatyāruṇāyāśca saṃgamaṃ lokaviśrutam || 41 ||
[Analyze grammar]

trirātropoṣitaḥ snātvā mucyate brahmahatyayā |
agniṣṭomātirātrābhyāṃ phalaṃ caiva samaśnute || 42 ||
[Analyze grammar]

punātyāsaptamaṃ caiva kulaṃ nāstyatra saṃśayaḥ |
avakīrṇaṃ ca tatraiva tīrthaṃ kurukulodvaha || 43 ||
[Analyze grammar]

viprāṇāmanukaṃpārthaṃ darbhiṇā nirmitaṃ purā |
vratopanayanābhyāṃ cāpyupavāsena vā dvijaḥ || 44 ||
[Analyze grammar]

kriyāmaṃtraiśca saṃyukto brāhmaṇaḥ syānna saṃśayaḥ |
kriyāmaṃtravihīno'pi tatra snātvā nararṣabha || 45 ||
[Analyze grammar]

cīrṇavrato bhavedvipro dṛṣṭametatpurātanam |
samudrāścāpi catvāraḥ samānītāśca darbhiṇā || 46 ||
[Analyze grammar]

tatra snātvā naravyāghra na durgatimavāpnuyāt |
phalāni gosahasrāṇāṃ caturṇāṃ viṃdate ca saḥ || 47 ||
[Analyze grammar]

tato gaccheta rājendra tīrthaṃ śatasahasrakam |
sāhasrakaṃ ca tatraiva dve tīrthe lokaviśrute || 48 ||
[Analyze grammar]

ubhayorhi naraḥ snātvā gosahasraphalaṃ labhet |
dānaṃ vāpyupavāso vā sahasraguṇito bhavet || 49 ||
[Analyze grammar]

tato gaccheta rājeṃdra reṇukātīrthamuttamam |
tatrābhiṣekaṃ kurvīta pitṛdevārcane rataḥ || 50 ||
[Analyze grammar]

sarvapāpaviśuddhātmā agniṣṭomaphalaṃ labhet |
vimocana upaspṛśya jitamanyurjiteṃdriyaḥ || 51 ||
[Analyze grammar]

pratigrahakṛtaiḥ pāpaiḥ sarvaiḥ saṃparimucyate |
tataḥ paṃcavaṭaṃ gatvā brahmacārī jiteṃdriyaḥ || 52 ||
[Analyze grammar]

puṇyena mahatā yuktaḥ svargaloke mahīyate |
yatra yogīśvaraḥ sthāṇuḥ svayameva vṛṣadhvajaḥ || 53 ||
[Analyze grammar]

tamarcayitvā deveśaṃ gamanādeva sidhyati |
taijasaṃ vāruṇaṃ tīrthaṃ dīpyate svena tejasā || 54 ||
[Analyze grammar]

yatra brahmādibhirdevairṛṣibhiśca tapodhanaiḥ |
saināpatye ca devānāmabhiṣikto guhastadā || 55 ||
[Analyze grammar]

taijasasya tu pūrveṇa kurutīrthaṃ kurūdvaha |
kurutīrthe naraḥ snātvā brahmacārī jiteṃdriyaḥ || 56 ||
[Analyze grammar]

sarvapāpaviśuddhātmā rudralokaṃ prapadyate |
svargadvāraṃ tato gacchenniyato niyatāśanaḥ || 57 ||
[Analyze grammar]

agniṣṭomamavāpnoti brahmalokaṃ ca gacchati |
tato gacchedanarakaṃ tīrthasevī narādhipa || 58 ||
[Analyze grammar]

tatra snātvā naro rājanna durgatimavāpnuyāt |
tatra brahmā svayaṃ nityaṃ devaissaha mahīyate || 59 ||
[Analyze grammar]

adhyāste puruṣavyāghra nārāyaṇaparāgamaiḥ |
sānnidhyaṃ caiva rājeṃdra rudravedyāṃ kurudvaha || 60 ||
[Analyze grammar]

abhigamya tu tāṃ devīṃ na durgatimavāpnuyāt |
tatraiva ca mahārāja viśveśvaramumāpatim || 61 ||
[Analyze grammar]

abhigamya mahādevaṃ mucyate sarvakilbiṣaiḥ |
nārāyaṇaṃ cābhigamya padmanābhamariṃdama || 62 ||
[Analyze grammar]

śobhamāno mahārāja viṣṇulokaṃ prapadyate |
tīrtheṣu sarvadevānāṃ snātamātro narādhipa || 63 ||
[Analyze grammar]

sarvaduḥkhaparityakto dyotate śivavatsadā |
tatastvasthipuraṃ gacchettīrthasevī narādhipa || 64 ||
[Analyze grammar]

pāvanaṃ tīrthamāsādya tarpayetpitṛdevatāḥ |
agniṣṭomasya yajñasya phalamāpnoti bhārata || 65 ||
[Analyze grammar]

gaṃgāhradaśca tatraiva kūpaśca bharatarṣabha |
tisraḥ koṭyastu tīrthānāṃ tasminkūpe mahīyate || 66 ||
[Analyze grammar]

tatra snātvā naro rājanbrahmaloke prapadyate |
āpagāyāṃ naraḥ snātvā arcayitvā maheśvaram || 67 ||
[Analyze grammar]

gatiṃ parāmavāpnoti kulaṃ caiva samuddharet |
tataḥ sthāṇuvaṭaṃ gachettriṣulokeṣu viśrutam || 68 ||
[Analyze grammar]

tatra snātvā sthito rātriṃ rudralokamavāpnuyāt |
badarīṇāṃ vanaṃ gacchedvasiṣṭhasyāśramaṃ tataḥ || 69 ||
[Analyze grammar]

badarī bhakṣyate yatra trirātropoṣito naraḥ |
samyagdvādaśavarṣāṇi badarīṃ bhakṣayettu yaḥ || 70 ||
[Analyze grammar]

trirātropoṣitaścaiva bhavettulyo narādhipa |
iṃdramārgaṃ samāsādya tīrthasevī narādhipa || 71 ||
[Analyze grammar]

ahorātropavāsena svargaloke mahīyate |
ekarātraṃ samāsādya ekarātroṣito naraḥ || 72 ||
[Analyze grammar]

niyataḥ satyavādī ca brahmaloke mahīyate |
tathā gachecca rājeṃdra tīrthaṃ trailokyaviśrutam || 73 ||
[Analyze grammar]

ādityasyāśramo yatra tejorāśermahātmanaḥ |
tasmiṃstīrthe naraḥ snātvā pūjayitvā vibhāvasum || 74 ||
[Analyze grammar]

ādityalokaṃ vrajati kulaṃ caiva samuddharet |
somatīrthe naraḥ snātvā tīrthasevī kurūdvaha || 75 ||
[Analyze grammar]

somalokamavāpnoti naro nāstyatra saṃśayaḥ |
tato gaccheta dharmajña dadhīcasya narādhipa || 76 ||
[Analyze grammar]

tīrthaṃ puṇyatamaṃ rājanpāvanaṃ lokaviśrutam |
yatra sārasvato yātaḥ siddhiṃ sa tapasonidhiḥ || 77 ||
[Analyze grammar]

tasmiṃstīrthe naraḥ snātvā vājapeyaphalaṃ labhet |
sārasvatīṃ matiṃ caiva labhate nātra saṃśayaḥ || 78 ||
[Analyze grammar]

tataḥ kanyāśramaṃ gatvā niyato brahmacaryayā |
trirātramuṣito rājannupavāsaparāyaṇaḥ || 79 ||
[Analyze grammar]

labhetkanyāśataṃ divyaṃ bahmalokaṃ ca gacchati |
tato gaccheta dharmajña tīrthaṃ saṃnihitīmapi || 80 ||
[Analyze grammar]

yatra brahmādayo devā ṛṣayaśca tapodhanāḥ |
māsi māsi sameṣyaṃti puṇyena mahatānvitāḥ || 81 ||
[Analyze grammar]

sannihityāmupaspṛśya rāhugraste divākare |
aśvamedhaśataṃ tena iṣṭaṃ bhavati śāśvatam || 82 ||
[Analyze grammar]

pṛthivyāṃ yāni tīrthāni aṃtarikṣacarāṇi ca |
udapānāśca viprāśca puṇyānyāyatanāni ca || 83 ||
[Analyze grammar]

niḥsaṃśayamamāvāsyāṃ sameṣyaṃti narādhipa |
māsimāsi naravyāghra sannihityāṃ janeśvara || 84 ||
[Analyze grammar]

tīrthasannayanādeva sannihitī bhuvi viśrutā |
tatra snātvā ca pītvā ca svargaloke mahīyate || 85 ||
[Analyze grammar]

amāvāsyāṃ tathā caiva rāhugraste divākare |
yaḥ śrāddhaṃ kurute martyastasya puṇyaphalaṃ śṛṇu || 86 ||
[Analyze grammar]

aśvamedhasahasrasya samyagiṣṭasya yatphalam |
snāta eva tadāpnoti śrāddhaṃ kṛtvā ca mānavaḥ || 87 ||
[Analyze grammar]

yatkiṃcidduṣkṛtaṃ karmma striyā vā puruṣasya vā |
snātamātrasya tatsarvaṃ naśyate nātra saṃśayaḥ || 88 ||
[Analyze grammar]

padmavarṇena yānena brahmalokaṃ sa gacchati |
abhivādya tato nāmnā dvārapālaṃ macakrukam || 89 ||
[Analyze grammar]

gaṃgāhradaśca tatraiva tīrthaṃ bharatasattama |
tatra snāyīta dharmajña brahmacārī samāhitaḥ || 90 ||
[Analyze grammar]

rājasūyāśvamedhābhyāṃ phalaṃ viṃdati mānavaḥ |
pṛthivyāṃ naimiṣaṃ puṇyamaṃtarikṣe ca puṣkaram || 91 ||
[Analyze grammar]

trayāṇāmapi lokānāṃ kurukṣetraṃ viśiṣyate |
pāṃsavo'pi kurukṣetre vāyunāti samīritāḥ || 92 ||
[Analyze grammar]

api duṣkṛtakarmmāṇaṃ nayaṃti paramāṃ gatim |
dakṣiṇena sarasvatyāmuttareṇa sarasvatīm || 93 ||
[Analyze grammar]

ye vasaṃti kurukṣetre te vasaṃti triviṣṭape |
kurukṣetraṃ gamiṣyāmi kurukṣetre vasāmyaham || 94 ||
[Analyze grammar]

apyekāṃ vācamutmṛjya svargaloke mahīyate |
brahmavedyāṃ kurukṣetraṃ puṇyaṃ brahmarṣisevitam || 95 ||
[Analyze grammar]

tasminvasaṃti ye rājanna te śocyāḥ kathaṃcana |
taraṃḍakāraṃḍakayoryadaṃtaraṃ rāmahradānāṃ ca macakrukasya ca |
etatkurukṣetra samaṃtapaṃcakaṃ pitāmahasyottara vedirucyate || 96 ||
[Analyze grammar]

iti śrīpādmemahāpurāṇe svargakhaṃḍe saptaviṃśo'dhyāyaḥ || 27 ||
[Analyze grammar]