Chapter 26

[English text for this chapter is available]

nāradauvāca |
tato gaccheta rājeṃdra kurukṣetramabhiṣṭutam |
pāpebhyo vipramucyaṃte tadgatāḥ sarvajaṃtavaḥ || 1 ||
[Analyze grammar]

kurukṣetraṃ gamiṣyāmi kurukṣetre vasāmyaham |
ya evaṃ satataṃ brūyātsarvapāpaiḥ pramucyate || 2 ||
[Analyze grammar]

tatra māsaṃ vaseddhīraḥ sarasvatyāṃ narādhipa |
yatra brahmādayo devā yatra brahmarṣicāraṇāḥ || 3 ||
[Analyze grammar]

gaṃdharvāpsaraso yakṣāḥ pannagāśca mahīpate |
brahmakṣetraṃ mahāpuṇyamabhigacchaṃti bhārata || 4 ||
[Analyze grammar]

manasāpyabhikāmasya kurukṣetre yudhiṣṭhira |
pāpāni vipraṇaśyaṃti brahmalokaṃ ca gacchati || 5 ||
[Analyze grammar]

gatvā hi śraddhayā yuktaḥ kurukṣetraṃ kurūdvaha |
vājapeyāśvamedhyābhyāṃ phalaṃ prāpnoti mānavaḥ || 6 ||
[Analyze grammar]

tato mattarṇakaṃ rājandvārapālaṃ mahābalam |
yaṃ vai samabhivādyaiva gosahasraphalaṃ labhet || 7 ||
[Analyze grammar]

tato gaccheta dharmajña viṣṇoḥ sthānamanuttamam |
satataṃ nāma rājeṃdra yatra sannihito hariḥ || 8 ||
[Analyze grammar]

tatra snātvā ca dṛṣṭvā ca trilokaprabhavaṃ harim |
aśvamedhamavāpnoti viṣṇulokaṃ ca gacchati || 9 ||
[Analyze grammar]

tataḥ pāriplavaṃ gacchettīrthaṃ trailokyaviśrutam |
agniṣṭomātirātrābhyāṃ phalaṃ prāpnoti mānavaḥ || 10 ||
[Analyze grammar]

pṛthivyāṃ tīrthamāsādya gosahasraphalaṃ labhet |
tataḥ śālvikinīṃ gatvā tīrthasevī narādhipa || 11 ||
[Analyze grammar]

daśāśvamedhike snātvā tadeva labhate phalam |
sarpanīviṃ samāsādya nāgānāṃ tīrthamuttamam || 12 ||
[Analyze grammar]

agniṣṭomamavāpnoti nāgalokaṃ ca gacchati |
tato gaccheta dharmajña dvārapālamatarṇakam || 13 ||
[Analyze grammar]

tatroṣya rajanīmekāṃ gosahasraphalaṃ labhet |
tataḥpaṃcanadaṃgatvāniyatoniyatāśanaḥ || 14 ||
[Analyze grammar]

koṭitīrthamupaspṛśya hayamedhaphalaṃ labhet |
aśvinītīrthamāgamya rūpavānabhijāyate || 15 ||
[Analyze grammar]

tato gaccheta dharmajña vārāhaṃ tīrthamuttamam |
viṣṇurvārāharūpeṇa purā yatra sthito'bhavat || 16 ||
[Analyze grammar]

tatra sthitvā naravyāghra agniṣṭomaphalaṃ labhet |
tato jayinyāṃ rājeṃdra somatīrthaṃ samāviśet || 17 ||
[Analyze grammar]

snātvā phalamavāpnoti rājasūyasya mānavaḥ |
ekahaṃse naraḥ snātvā gosahasraphalaṃ labhet || 18 ||
[Analyze grammar]

kṛtaśaucaṃ samāsādya tīrthasevī kurūdvaha |
puṃḍarīkamavāpnoti kṛtaśauco bhavecca saḥ || 19 ||
[Analyze grammar]

tato muṃjāvaṭaṃ nāma mahādevasya dhīmataḥ |
tatroṣya rajanīmekāṃ gāṇapatyamavāpnuyāt || 20 ||
[Analyze grammar]

tatraiva ca mahārāja jayāṃ lokapariśrutām |
snātvābhigamya rājeṃdra sarvakāmamavāpnuyāt || 21 ||
[Analyze grammar]

kurukṣetrasya taddvāraṃ viśrutaṃ bharatarṣabha |
pradakṣiṇamupāvṛtya tīrthasevī samāvṛtaḥ || 22 ||
[Analyze grammar]

saṃsmṛte puṣkarāṇāṃ tu snātvārcya pitṛdevatāḥ |
jāmadagnyena rāmeṇa āhūte vai mahātmanā || 23 ||
[Analyze grammar]

kṛtakṛtyobhavedrājannaśvamedhaṃ ca viṃdati |
tato rāmahradaṃ gacchettīrthasevī narādhipa || 24 ||
[Analyze grammar]

yatra rāmeṇa rājeṃdra tarasā dīptatejasā |
kṣatramutsārya vīryeṇa hradāḥ paṃca niṣevitāḥ |
pūrayitvā naravyāghra rudhireṇeti naḥ śrutam || 25 ||
[Analyze grammar]

pitarastarpitāḥ sarve tathaiva prapitāmahāḥ |
tataste pitaraḥ prītāḥ rāmamūcurmahīpate || 26 ||
[Analyze grammar]

rāmarāma mahābhāga prītāḥ sma tava bhārgava |
anayā pitṛbhaktyā ca vikrameṇa ca te'nagha || 27 ||
[Analyze grammar]

varaṃ vṛṇīṣva bhadraṃ te kimicchasi mahāmate |
evamuktaḥ sa rājeṃdra rāmaḥ pravadatāṃ varaḥ || 28 ||
[Analyze grammar]

abravītprāṃjalirvākyaṃ pitṝnsa gagane sthitān |
bhavaṃto yadi me prītā yadyanugrāhyatā mayi || 29 ||
[Analyze grammar]

pitṛprasādādiccheyaṃ tapasāpyāyanaṃ punaḥ |
yacca roṣābhibhūtena kṣatramutsāditaṃ mayā || 30 ||
[Analyze grammar]

tataśca pāpānmucyeyaṃ yuṣmākaṃ tejasā hyaham |
hradāśca tīrthabhūtā me bhaveyurbhuvi viśrutāḥ || 31 ||
[Analyze grammar]

etacchrutvā śubhaṃ vākyaṃ rāmasya pitarastadā |
pratyūcuḥ paramaprītā rāmaṃ toṣasamanvitāḥ || 32 ||
[Analyze grammar]

tapaste varddhatāṃ bhūyaḥ pitṛbhaktyā viśeṣataḥ |
yacca roṣābhibhūtena kṣatramutsāditaṃ tvayā || 33 ||
[Analyze grammar]

tataśca pāpānmuktastvaṃ nihatāste svakarmmaṇā |
hradāśca tava tīrthatvaṃ gamiṣyaṃti na saṃśayaḥ || 34 ||
[Analyze grammar]

hradeṣveteṣu yaḥ snātvā pitṝnsaṃtarpayiṣyati |
pitarastasya vai prītā dāsyaṃti bhuvi durllabham || 35 ||
[Analyze grammar]

īpsitaṃ manasaḥ kāmaṃ svargalokaṃ saśāśvatam |
evaṃ dattvā varaṃ rājanrāmasya pitarastadā |
āmaṃtrya bhārgavaṃ prītāstatraivāṃtardadhustataḥ || 36 ||
[Analyze grammar]

evaṃ rāmahradāḥ puṇyā bhārgavasya mahātmanaḥ |
snātvā hradeṣu rāmasya brahmacārī śubhavrataḥ || 37 ||
[Analyze grammar]

rāmamabhyarcya rājeṃdra labhedbahusuvarṇakam |
vaṃśamūlaṃ samāsādya tīrthasevī kurūdvaha || 38 ||
[Analyze grammar]

svavaṃśamuddharedrājansnātvā vai vaṃśamūlake |
kāyaśodhanamāsādya tīrthaṃ bharatasattama || 39 ||
[Analyze grammar]

śarīraśuddhimāpnoti snātastasminna saṃśayaḥ |
śuddhadehastu saṃyāti śubhāṃllokānanuttamān || 40 ||
[Analyze grammar]

tato gaccheta rājeṃdra tīrthaṃ trailokyadurlabham |
lokā yatroddhṛtāḥ pūrvaṃ viṣṇunā prabhaviṣṇunā || 41 ||
[Analyze grammar]

lokoddhāraṃ samāsādya tīrthaṃ trailokyaviśrutam |
snātvā tīrthavare rājanlokānuddharate svakān || 42 ||
[Analyze grammar]

śrītīrthaṃ ca samāsādya viṃdate śriyamuttamām |
kapilātīrthamāsādya brahmacārī samāhitaḥ || 43 ||
[Analyze grammar]

tatra snātvārcayitvā ca devāniha pitṝṃstathā |
kapilānāṃ sahasrasya phalaṃ viṃdati mānavaḥ || 44 ||
[Analyze grammar]

sūryatīrthaṃ samāsādya snātvā niyatamānasaḥ |
arcayitvā pitṝndevānupavāsaparāyaṇaḥ || 45 ||
[Analyze grammar]

agniṣṭomamavāpnoti sūryalokaṃ ca gacchati |
gavāṃbhavanamāsādya tīrthasevī yathākramam || 46 ||
[Analyze grammar]

tatrābhiṣekaṃ kurvāṇo gosahasraphalaṃ labhet |
gaṃgātīrthaṃ samāsādya tīrthasevī narādhipa || 47 ||
[Analyze grammar]

kevyāstīrthe naraḥ snātvā labhate vīryamuttamam |
tato gaccheta rājeṃdra dvārapālaṃ lavarṇakam || 48 ||
[Analyze grammar]

tasya tīrthe sarasvatyāṃ yatheṃdrasya mahātmanaḥ |
tatra snātvā naro rājannagniṣṭomaphalaṃ labhet || 49 ||
[Analyze grammar]

tato gaccheta dharmajña brahmāvartaṃ narādhipa |
brahmāvarte naraḥ snātvā brahmalokamavāpnuyāt || 50 ||
[Analyze grammar]

tato gaccheta dharmajña sutīrthakamanuttamam |
yatra sannihitā nityaṃ pitaro daivataiḥ saha || 51 ||
[Analyze grammar]

tatrābhiṣekaṃ kurvīta pitṛdevārcane rataḥ |
aśvamedhamavāpnoti pitṛlokaṃ ca gacchati || 52 ||
[Analyze grammar]

tato'nyatīrthaṃ dharmajña samāsādya yathākramam |
kāśīśvarasya tīrtheṣu snātvā bharatasattama || 53 ||
[Analyze grammar]

sarvavyādhivinirmukto brahmaloke mahīyate |
mātṛtīrthaṃ ca tatraiva yatra snātasya pārthiva || 54 ||
[Analyze grammar]

prajā vivarddhate rājansvargatiṃ samavāpnuyāt |
tataḥ śītavanaṃ gacchenniyato niyatāśanaḥ || 55 ||
[Analyze grammar]

tīrthaṃ tatra mahārāja mahadanyatra durlabham |
punāti darśanādeva daṃḍenaikaṃ narādhipa || 56 ||
[Analyze grammar]

keśānāvapya vai tasminpūto bhavati bhārata |
tatra tīrthavaraṃ cānyatsnāta lokārtihaṃ smṛtam || 57 ||
[Analyze grammar]

tatra viprā naravyāghra vidvāṃsastatra tatparāḥ |
gatiṃ gacchaṃti paramāṃ snātvā bharatasattama || 58 ||
[Analyze grammar]

svarṇalomāpanayane tīrthe bharatasattama |
prāṇāyāmairnirharaṃti svalomāni dvijottamāḥ || 59 ||
[Analyze grammar]

pūtātmānaśca rājendra prayāṃti paramāṃ gatim |
daśāśvamedhike caiva tasmiṃstīrthe mahīpate || 60 ||
[Analyze grammar]

tatra snātvā naravyāghra gacchaṃti paramāṃ gatim |
tato gaccheta rājeṃdra mānuṣaṃ lokaviśrutam || 61 ||
[Analyze grammar]

tatra kṛṣṇāmṛgā rājanvyādhena śarapīḍitāḥ |
vigāhya tasminsarasi mānuṣatvamupāgatāḥ || 62 ||
[Analyze grammar]

tasmiṃstīrthe naraḥ snātvā brahmacārī samāhitaḥ |
sarvapāpaviśuddhātmā svargaloke mahīyate || 63 ||
[Analyze grammar]

mānuṣasya tu pūrveṇa krośamātraṃ mahīpate |
āpagā nāma vikhyātā nadī siddhaniṣevitā || 64 ||
[Analyze grammar]

śyāmāka bhojanaṃ tatra yaḥ prayacchati mānavaḥ |
devānpitṝnsamuddiśya tasya dharmaphalaṃ mahat || 65 ||
[Analyze grammar]

ekasminbhojite vipre koṭirbhavati bhojitā |
tatra snātvārcayitvā ca daivatāni pitṝṃstathā || 66 ||
[Analyze grammar]

uṣitvā rajanīmekāmagniṣṭomaphalaṃ labhet |
tato gaccheta dharmmajña brahmaṇaḥ sthānamuttamam || 67 ||
[Analyze grammar]

brahmānusvaramityevaṃ prakāśaṃ bhuvi bhārata |
tatra saptarṣikuṃḍeṣu snātasya bharatarṣabha || 68 ||
[Analyze grammar]

kedāre caiva rājeṃdra kapilasya mahātmanaḥ |
brahmāṇamabhigamyātha śuciḥ prayatamānasaḥ || 69 ||
[Analyze grammar]

sarvapāpaviśuddhātmā brahmalokaṃ prapadyate |
kapiṣṭhalasya kedāraṃ samāsādya sudurlabham || 70 ||
[Analyze grammar]

aṃtardhānamavāpnoti tapasā dagdhakilbiṣaḥ |
tato gaccheta rājeṃdra sarvakaṃ lokaviśrutam || 71 ||
[Analyze grammar]

kṛṣṇapakṣe caturdaśyāmabhigamya vṛṣadhvajaṃ |
labhate sarvakāmānhi svargalokaṃ ca gacchati |
tisraḥkoṭyaśca tīrthānāṃ pravaraṃ kurunaṃdana || 72 ||
[Analyze grammar]

rudrakoṭī tathā kūpe hradeṣu ca samaṃtakaḥ |
ilāspadaṃ ca tatraiva tīrthaṃ bharatasattama || 73 ||
[Analyze grammar]

tatra snātvārcayitvā ca daivatāni pitṝnapi |
na durgatimavāpnoti vājapeyaṃ ca viṃdati || 74 ||
[Analyze grammar]

kiṃdāne ca naraḥ snātvā kiṃjape ca mahīpate |
aprameyamavāpnoti dānaṃ yajñaṃ tathaiva ca |
kalaśyāṃ vāryyupaspṛśya śraddadhāno jiteṃdriyaḥ || 75 ||
[Analyze grammar]

agniṣṭomasya yajñasya phalaṃ prāpnoti mānavaḥ |
sarakasya tu pūrveṇa nāradasya mahātmanaḥ || 76 ||
[Analyze grammar]

kuruśreṣṭha śubhaṃ tīrthaṃ rāmajanmeti viśrutam |
tatra tīrthe naraḥ snātvā prāṇāṃścotsṛjya bhārata || 77 ||
[Analyze grammar]

nāradenābhyanujñāto lokānāpnoti durllabhān |
śuklapakṣe daśamyāṃ tu puṃḍarīkaṃ samāviśet || 78 ||
[Analyze grammar]

tatra snātvā naro rājanpuṃḍarīkaphalaṃ labhet |
tatastriviṣṭapaṃ gacchettriṣu lokeṣu viśrutam || 79 ||
[Analyze grammar]

tatra vaitaraṇī puṇyā nadī pāpapramocanī |
tatra snātvārcayitvā ca śūlapāṇiṃ vṛṣadhvajam || 80 ||
[Analyze grammar]

sarvapāpaviśuddhātmā gaccheta paramāṃ gatim |
tato gaccheta rājeṃdra phalakīvanamuttamam || 81 ||
[Analyze grammar]

tatra devāḥ sadā rājanphalakīvanamāśritāḥ |
tapaścaraṃti vipulaṃ bahuvarṣasahasrakam || 82 ||
[Analyze grammar]

dṛṣatpāne naraḥ snātvā tarpayitvā ca devatāḥ |
agniṣṭomātirātrābhyāṃ phalaṃ viṃdati mānavaḥ || 83 ||
[Analyze grammar]

tīrthe ca sarvadevānāṃ snātvā bharatasattama |
gosahasrasya rājeṃdra phalamāpnoti mānavaḥ || 84 ||
[Analyze grammar]

pāṇikhyāte naraḥ snātvā tarpayitvā ca devatāḥ |
avāpnute rājasūyamṛṣilokaṃ ca gacchati || 85 ||
[Analyze grammar]

tato gaccheta dharmajña miśrakaṃ lokaviśrutam |
tatra tīrthāni rājeṃdra miśritāni mahātmanā || 86 ||
[Analyze grammar]

vyāsena nṛpaśārdūla dvijārthamiti naḥ śrutam |
sarvatīrtheṣu sa snāti miśrake snāti yo naraḥ || 87 ||
[Analyze grammar]

tato vyāsavanaṃ gacchenniyato niyatāśanaḥ |
manojave naraḥ snātvā gosahasraphalaṃ labhet || 88 ||
[Analyze grammar]

gatvā madhuvanīṃ cāpi devyāḥ sthānaṃ naraḥ śuciḥ |
tatra snātvārcayeddevānpitṝṃśca niyataḥ śuciḥ || 89 ||
[Analyze grammar]

sadevyā samanujñāto gosahasraphalaṃ labhet |
kauśikyāḥ saṃgame yastu dṛṣadvatyāśca bhārata || 90 ||
[Analyze grammar]

snāto vai niyatāhāraḥ sarvapāpaiḥ pramucyate |
tato vyāsasthalī nāma yatra vyāsena dhīmatā || 91 ||
[Analyze grammar]

putraśokābhitaptena dehatyāgāya niścayaḥ |
kṛto devaiśca rājeṃdra punarutthāpitastathā || 92 ||
[Analyze grammar]

abhigamya sthaladyaṃ tasya gosahasraphalaṃ labhet |
ṛṇāṃtaṃ kūpamāsādya tilaprasthaṃ pradāya ca || 93 ||
[Analyze grammar]

gaccheta paramāṃ siddhimṛṇairmukto nareśvara |
vedītīrthe naraḥ snātvā gosahasraphalaṃ labhet || 94 ||
[Analyze grammar]

ahaśca sudinaścaiva dve tīrthe nṛpa durlabhe |
tayoḥ snātvā naraḥ śreṣṭha sūryalokamavāpnuyāt || 95 ||
[Analyze grammar]

mṛgadhūmaṃ tato gacchettriṣu lokeṣu viśrutam |
tatra rudrapade snātvā samabhyarcya ca mānavaḥ || 96 ||
[Analyze grammar]

śūlapāṇiṃ mahātmānamaśvamedhaphalaṃ labhet |
koṭitīrthe naraḥ snātvā gosahasraphalaṃ labhet || 97 ||
[Analyze grammar]

atha vāmanakaṃ gatvā triṣu lokeṣu viśrutam |
tatra viṣṇupade snātvā samabhyarcya ca vāmanam || 98 ||
[Analyze grammar]

sarvapāpaviśuddhātmā viṣṇulokamavāpnuyāt |
kulaṃpune naraḥ snātvā punāti svakulaṃ naraḥ || 99 ||
[Analyze grammar]

pavanasya hradaṃ gatvā marutāṃ tīrthamuttamam |
tatra snātvā naravyāghra vāyuloke mahīyate || 100 ||
[Analyze grammar]

amarāṇāṃ hrade snātvā samabhyarcyāmarādhipam |
amarāṇāṃ prabhāveṇa svargaloke mahīyate || 101 ||
[Analyze grammar]

śālihotrasya rājeṃdra śālisūrye yathāvidhi |
snātvā naravaraśreṣṭha gosahasraphalaṃ labhet || 102 ||
[Analyze grammar]

śrīkuṃjaṃ ca sarasvatyāṃ tīrthaṃ bharatasattama |
tatra snātvā naro rājannagniṣṭomaphalaṃ labhet || 103 ||
[Analyze grammar]

tato naimiṣikuṃjaṃ ca samāsādya sudurlabham |
ṛṣayaḥ kila rājeṃdra naimiṣeyāstapodhanāḥ || 104 ||
[Analyze grammar]

tīrthayātrāṃ puraskṛtya kurukṣetre gatāḥ purā |
tataḥ kuṃjaḥ sarasvatyāṃ kṛto bharatasattama || 105 ||
[Analyze grammar]

ṛṣīṇāmavakāśaḥ syādyathā tuṣṭikaro mahān |
tasminkuṃje naraḥ snātvā gosahasraphalaṃ labhet || 106 ||
[Analyze grammar]

iti śrīpādme mahāpurāṇe svargakhaṃḍe ṣaḍviṃśo'dhyāyaḥ || 26 ||
[Analyze grammar]