Chapter 4

[English text for this chapter is available]

ṛṣaya ūcuḥ |
merorathottaraṃ paścātpūrvamācakṣva sūtataḥ |
nikhilena mahābuddha mālyavaṃtaṃ ca parvatam || 1 ||
[Analyze grammar]

sūta uvāca |
dakṣiṇena tu nīlasya meroḥ pārśve tathottare |
uttarāḥ kuravo viprāḥ puṇyāḥ siddhaniṣevitāḥ || 2 ||
[Analyze grammar]

tatra vṛkṣā madhuphalā nityapuṣpaphalopagāḥ |
puṣpāṇi ca sugaṃdhīni rasavaṃti phalāni ca || 3 ||
[Analyze grammar]

sarvakāmaphalāstatra kecidvṛtyā dvijottamāḥ |
apare kṣīriṇo nāma vṛkṣāstatra dvijottamāḥ || 4 ||
[Analyze grammar]

prakṣaraṃti sadā kṣīraṃ tatra sarve'mṛtopamam |
vastrāṇi ca prasūyaṃte phaleṣvābharaṇāni ca || 5 ||
[Analyze grammar]

sarvā maṇimayī bhūmiḥ sūkṣmakāṃcanavālukā |
sarvartusukhasaṃsparśā niṣphalāśca tapodhanāḥ || 6 ||
[Analyze grammar]

devalokacyutāḥ sarve jāyaṃte tatra mānavāḥ |
śuklābhijanasaṃpannāḥ sarvasupriyadarśanāḥ || 7 ||
[Analyze grammar]

mithunāni ca jāyaṃte striyaścāpsarasopamāḥ |
teṣāṃ te kṣīriṇāṃ kṣīraṃ pibaṃtyamṛtasaṃnibham || 8 ||
[Analyze grammar]

mithunaṃ jāyate kāle samaṃtācca pravarddhate |
tulyarūpaguṇopetaṃ samaveśaṃ tathaiva ca || 9 ||
[Analyze grammar]

ekamevānurūpaṃ ca cakravākasamaṃ dvijāḥ |
nirāmayāśca te lokā nityaṃ muditamānasāḥ || 10 ||
[Analyze grammar]

daśavarṣasahasrāṇi daśavarṣaśatāni ca |
jīvaṃti te mahābhāgā na cānyonyaṃ jahatyuta || 11 ||
[Analyze grammar]

bhāruṃḍā nāma śakunāstīkṣṇatuṃḍā mahābalāḥ |
tānnirharaṃtīhamṛtāndarīṣu prakṣipaṃti ca || 12 ||
[Analyze grammar]

uttarāḥkuravo viprā vyākhyātāste samāsataḥ |
merupārśvamahaṃ pūrvaṃ pravakṣyāmi yathātatham || 13 ||
[Analyze grammar]

tasya mūrddhābhiṣekastu bhadrāśvasya tapodhanāḥ |
bhadraśālavanaṃ yatra kālāmrāśca mahādrumāḥ || 14 ||
[Analyze grammar]

kālāmrāstu mahābhāgā nityaṃpuṣpaphalāḥ śubhāḥ |
drumāśca yojanotsedhāḥ siddhacāraṇasevitāḥ || 15 ||
[Analyze grammar]

tatra te puruṣāḥ śvetāstejoyuktamahābalāḥ |
striyaḥ kumudavarṇāśca suṃdaryaḥ priyadarśanāḥ || 16 ||
[Analyze grammar]

caṃdravarṇāścaturvarṇāḥ pūrṇacaṃdranibhānanāḥ |
caṃdraśītalagātrāśca nṛtyagītaviśāradāḥ || 17 ||
[Analyze grammar]

daśavarṣasahasrāṇi tatrāyurdvijasattamāḥ |
kālāmrarasapītāste nityaṃ saṃsthitayauvanāḥ || 18 ||
[Analyze grammar]

dakṣiṇena tu nīlasya niṣadhasyottareṇa tu |
sudarśano nāma mahānjaṃbūvṛkṣaḥ sanātanaḥ || 19 ||
[Analyze grammar]

sarvakāmaphalaḥ puṇyaḥ siddhacāraṇasevitaḥ |
tasya nāmnā samākhyāto jaṃbūdvīpaḥ sanātanaḥ || 20 ||
[Analyze grammar]

yojanānāṃ sahasraṃ ca śataṃ ca dvijasattamāḥ |
tathā mālyavataḥ śṛṃge pūrve pūrvānugāṃtakāḥ || 21 ||
[Analyze grammar]

yojanānāṃ sahasrāṇi paṃcāśanmālyavāndvijāḥ |
mahārajatasaṃkāśā jāyaṃte tatra mānavāḥ || 22 ||
[Analyze grammar]

brahmalokacyutāḥ sarve sarve ca brahmavādinaḥ |
tapastapyaṃti te divyaṃ bhavaṃti hyūrdhvaretasaḥ || 23 ||
[Analyze grammar]

rakṣaṇārthaṃ tu bhūtānāṃ praviśaṃti divākaram |
ṣaṣṭistāni sahasrāṇi ṣaṣṭireva śatāni ca || 24 ||
[Analyze grammar]

aruṇasyāgrato yāṃti parivārya divākaram |
ṣaṣṭivarṣasahasrāṇi ṣaṣṭireva śatāni ca || 25 ||
[Analyze grammar]

ādityatāpataptāste viśaṃti śaśimaṃḍalam || 26 ||
[Analyze grammar]

iti śrīpādme mahāpurāṇe svargakhaṃḍe caturtho'dhyāyaḥ || 4 ||
[Analyze grammar]