Chapter 116

[English text for this chapter is available]

kuṃjala uvāca |
aśokasuṃdarī puṇyā raṃbhayā saha harṣitā |
nahuṣaṃ prāpya vikrāṃtaṃ tamuvāca tapasvinī || 1 ||
[Analyze grammar]

ahaṃ te dharmataḥ patnī devairdiṣṭā tapasvinī |
udvāhayasva māṃ vīra yadi dharmamihecchasi || 2 ||
[Analyze grammar]

sadaiva ciṃtyamānā ca tvāmahaṃ tapasi sthitā |
bhavāndharmaprasādena mayā prāpto nṛpottama || 3 ||
[Analyze grammar]

nahuṣa uvāca |
madarthe niyatā bhadre yadi tvaṃ tapasi sthitā |
gurorvākyānmuhūrtena tava bhartā bhavāmyaham || 4 ||
[Analyze grammar]

anayā raṃbhayā sārddhamāvāṃ gacchāva bhāmini |
samāropya rathe tāṃ tu tāṃ raṃbhāṃ tu manoramām || 5 ||
[Analyze grammar]

tenaiva rathavaryeṇa vaśiṣṭhasyāśramaṃ prati |
jagāma laghuvegena tābhyāṃ saha mahāyaśāḥ || 6 ||
[Analyze grammar]

tamāśramagataṃ vipraṃ samālokya praṇamya ca |
tayā sārddhaṃ mahātejā harṣeṇa mahatānvitaḥ || 7 ||
[Analyze grammar]

yathā yuddhaṃ raṇe jātaṃ nihato dānavādhamaḥ |
nivedayāmāsa sarvaṃ vaśiṣṭhāya mahātmane || 8 ||
[Analyze grammar]

vaśiṣṭho'pi samākarṇya nahuṣasya viceṣṭitam |
harṣeṇa mahatāviṣṭa āśīrbhirabhinaṃdya tam || 9 ||
[Analyze grammar]

tithau lagne śubhe prāpte tayostu munipuṃgavaḥ |
vivāhaṃ kārayāmāsa agnibrāhmaṇasannidhau || 10 ||
[Analyze grammar]

āśīrbhirabhinaṃdyaiva mithunaṃ preṣitaṃ punaḥ |
mātaraṃ pitaraṃ paśya drutaṃ gatvā mahāmate || 11 ||
[Analyze grammar]

tvāṃ ca dṛṣṭvā hi te mātā pitāsau tava suvrata |
harṣeṇa vṛddhimāpnotu parvaṇīva tu sāgaraḥ || 12 ||
[Analyze grammar]

evaṃ saṃpreṣito vīro muninā brahmasūnunā |
tenaiva rathavaryeṇa jagāma laghuvikramaḥ || 13 ||
[Analyze grammar]

namaskṛtya dvijeṃdraṃ taṃ gato mātalinā tadā |
svapuraṃ pitaraṃ draṣṭuṃ tathaiva ca svamātaram || 14 ||
[Analyze grammar]

sūta uvāca |
apsarā menikā nāma preṣitā daivataistataḥ |
āyorbhāryā suduḥkhena patitā śokasāgare || 15 ||
[Analyze grammar]

tāmuvāca mahābhāgāṃ devīmiṃdumatīṃ prati |
muṃca śokaṃ mahābhāge tanayaṃ paśya sasnuṣam || 16 ||
[Analyze grammar]

nihatya dānavaṃ pāpaṃ tava putrāpahārakam |
samāyāṃtaṃ sabhāyāṃ ca vīraśriyāsamanvitam || 17 ||
[Analyze grammar]

suvṛttaṃ saṃgare tasya nahuṣeṇa yathā kṛtam |
tasyai nivedayāmāsa iṃdumatyai ca menikā || 18 ||
[Analyze grammar]

menikāyā vacaḥ śrutvā harṣeṇa mahatānvitā |
sakhi satyaṃ bravīṣi tvamityuvāca sagadgadam || 19 ||
[Analyze grammar]

sāmṛtaṃ supriyaṃ proktaṃ manaḥprotsāhakārakam |
jīvādikaṃ mayā deyaṃ tvayi sarvasvameva hi || 20 ||
[Analyze grammar]

evamābhāṣya tāṃ devī rājānamidamabravīt |
tava putro mahābāhuḥ samāyāto hi sāṃpratam || 21 ||
[Analyze grammar]

ākhyāti ca mahārāja eṣā me vai varāpsarāḥ |
bhartāramevamābhāṣya virarāma suharṣitā || 22 ||
[Analyze grammar]

samākarṇya nṛpeṃdrastu tāmuvāca priyāṃ prati |
purā proktaṃ mahābhāge muninā nāradena hi || 23 ||
[Analyze grammar]

putraṃ prati na kartavyaṃ duḥkhaṃ rājaṃstvayā kadā |
taṃ nihatya suvīryeṇa dānavaṃ caiṣyate sutaḥ || 24 ||
[Analyze grammar]

saṃjātaṃ satyamevaṃ vai muninā bhāṣitaṃ purā |
anyathā vacanaṃ tasya kathaṃ devi bhaviṣyati || 25 ||
[Analyze grammar]

dattātreyo muniśreṣṭhaḥ sākṣāddevo bhaviṣyati |
śuśrūṣitastvayā devi mayā ca tapasā purā || 26 ||
[Analyze grammar]

putraratnaṃ tena dattaṃ vaiṣṇavāṃśapradhārakam |
sadā haniṣyati paraṃ dānavaṃ pāpacetanam || 27 ||
[Analyze grammar]

sarvadaityaprahartā ca prajāpālo mahābalaḥ |
dattātreyeṇa me datto vaiṣṇavāṃśaḥ sutottamaḥ || 28 ||
[Analyze grammar]

evaṃ saṃbhāṣya tāṃ devīṃ rājā ceṃdumatīṃ tadā |
mahotsavaṃ tataścakre putrasyāgamanaṃ prati || 29 ||
[Analyze grammar]

harṣeṇa mahatāviṣṭo viṣṇuṃ sasmāra vai punaḥ || 30 ||
[Analyze grammar]

sarvopapannaṃ suravargayuktamānaṃdarūpaṃ paramārthamekam |
kleśāpahaṃ saukhyapradaṃ narāṇāṃ sadvaiṣṇavānāmiha mokṣadaṃ param || 31 ||
[Analyze grammar]

iti śrīpadmapurāṇe bhūmikhaṃḍe venopākhyāne gurutīrthamāhātmye cyavanacaritre nahuṣākhyāne ṣoḍaśādhikaśatatamo'dhyāyaḥ || 116 ||
[Analyze grammar]