Chapter 62

[English text for this chapter is available]

viṣṇuruvāca |
kuṃḍalasyāśramaṃ gatvā satyadharma samākulam |
sukarmāṇaṃ tato dṛṣṭvā pitṛmātṛparāyaṇam || 1 ||
[Analyze grammar]

śuśrūṣaṃtaṃ mahātmānaṃ gurūsatyaparākramam |
mahārūpaṃ mahātejaṃ mahājñānasamākulam || 2 ||
[Analyze grammar]

mātāpitroḥ padāṃte tamupaviṣṭaṃ dadarśa saḥ |
mahābhaktyānvitaṃ śāṃtaṃ sarvajñānamahānidhim || 3 ||
[Analyze grammar]

kuṃḍalasyāpi putreṇa sukarmaṇā mahātmanā |
āgataṃ pippalaṃ dṛṣṭvā dvāradeśe mahāmatim || 4 ||
[Analyze grammar]

āsanāttūrṇamutthāya abhyutthānaṃ kṛtaṃ punaḥ |
āgaccha tvaṃ mahābhāga vidyādhara mahāmate || 5 ||
[Analyze grammar]

āsanaṃ pādyamarghaṃ ca dadau tasmai mahāmatiḥ |
nirvighno'si mahāprājña kuśalena pravarttase || 6 ||
[Analyze grammar]

nirāmayaṃ ca papraccha pippalaṃ taṃ samāgatam |
yasmādāgamanaṃ tedya tatsarvaṃ pravadāmyaham || 7 ||
[Analyze grammar]

varṣāṇāṃ ca sahasrāṇi trīṇi yāvattvayā tapaḥ |
taptameva mahābhāga surebhyaḥ prāptavānvaram || 8 ||
[Analyze grammar]

vaśyatvaṃ ca tvayā prāptaṃ kāmacārastathaiva ca |
tena matto na jānāsi garvamudvahase vṛthā || 9 ||
[Analyze grammar]

dṛṣṭvā te ceṣṭitaṃ sarvaṃ sārasena mahātmanā |
mamābhidhānaṃ kathitaṃ mama jñānamanuttamam || 10 ||
[Analyze grammar]

pippala uvāca |
yosau māṃ sāraso vipra sarittīre prayuktavān |
sarvaṃ jñānaṃ vadenmāṃ hi sa tu kaḥ prabhurīśvaraḥ || 11 ||
[Analyze grammar]

sukarmovāca |
bhavaṃtamuktavānyo vai sarittīre tu sārasaḥ |
brahmāṇaṃ tvaṃ mahājñānaṃ taṃ viddhi parameśvaram || 12 ||
[Analyze grammar]

anyatkiṃ pṛcchase brūhi tamevaṃ pravadāmyaham |
viṣṇuruvāca |
evamuktaḥ sa dharmātmā sukarmā nṛpanaṃdana || 13 ||
[Analyze grammar]

pippala uvāca |
tvayi vaśyaṃ jagatsarvamiti śuśruma bhūtale |
tanme tvaṃ kautukaṃ vipra darśayasva prayatnataḥ || 14 ||
[Analyze grammar]

paśya kautukamevādya tvaṃ vaśyāvaśyakāraṇam |
tamuvāca sa dharmātmā sukarmā pippalaṃ prati || 15 ||
[Analyze grammar]

atha sasmāra vai devānsukarmā pratyayāya vai |
iṃdrādyā lokapālāśca devāścāgnipurogamāḥ || 16 ||
[Analyze grammar]

samāgatāḥ samāhūtā nānā vidyādharāstathā |
sukarmāṇaṃ tataḥ procurdevāścāgnipurogamāḥ || 17 ||
[Analyze grammar]

kasmātsmṛtāstvayā vipra tatorthakāraṇaṃ vada |
sukarmovāca |
ayameṣa susaṃprāpto vidyādharo hi pippalaḥ || 18 ||
[Analyze grammar]

māmevaṃ bhāṣate vipra vaśyāvaśyatvakāraṇam |
pratyayārthaṃ samāhūtā asyaiva ca mahātmanaḥ || 19 ||
[Analyze grammar]

svaṃsvaṃ sthānaṃ pragacchadhvamityuvāca surānprati |
tamūcuste tato devāḥ sukarmāṇaṃ mahāmatim || 20 ||
[Analyze grammar]

asmākaṃ darśanaṃ vripra na moghaṃ jāyate varam |
varaṃ varaya bhadraṃ te manasā yaddhirocate || 21 ||
[Analyze grammar]

tatte dadmo na saṃdehastvevamūcuḥ surottamāḥ |
bhaktyā praṇamya tāndevānyayāce sa dvijottamaḥ || 22 ||
[Analyze grammar]

acalāṃ datta deveṃdrā suḥbhaktiṃ bhāvasaṃyutām |
mātāpitrośca me nityaṃ tadvai varamanuttamam || 23 ||
[Analyze grammar]

pitā me vaiṣṇavaṃ lokaṃ prayātvetadvarottamam |
tadvanmātā ca deveśā varamanyaṃ na yācaye || 24 ||
[Analyze grammar]

devā ūcuḥ |
pitṛbhaktosi vipreṃdra bhaktyā tava vayaṃ dvija |
sukarmañchrūyatāṃ vākyaṃ prītyā yuktā sadaiva te || 25 ||
[Analyze grammar]

evamuktvā gatā devāḥ svarlokaṃ nṛpanaṃdana |
sarvamaiśvaryametena tasyāgre paridarśitam || 26 ||
[Analyze grammar]

dṛṣṭaṃ tu pippalenāpi kautukaṃ ca mahādbhutam |
tamuvāca sa dharmātmā pippalaṃ kuṃḍalātmajam || 27 ||
[Analyze grammar]

arvācīnaṃ tvidaṃ rūpaṃ parācīnaṃ ca kīdṛśam |
prabhāvamubhayoścaiva vadasva vadatāṃ vara || 28 ||
[Analyze grammar]

sukarmovāca |
parācīnasya rūpasya liṃgameva vadāmi te |
yenalokāḥ pramodaṃte iṃdrādyāḥ sacarācarāḥ || 29 ||
[Analyze grammar]

ayameva jagannāthaḥ sarvago vyāpakaḥ prabhuḥ |
asya rūpaṃ na dṛṣṭaṃ hi kenāpyeva hi yoginā || 30 ||
[Analyze grammar]

śrutireva vadatyevaṃ taṃ vaktuṃ śaṃkiteva sā |
apāṇipādanāsaśca akarṇo mukhavarjitaḥ || 31 ||
[Analyze grammar]

sarvaṃ paśyati vai karma kṛtaṃ trailokyavāsinām |
teṣāmuktamakarṇaśca sa śṛṇoti susākṣyadaḥ || 32 ||
[Analyze grammar]

gatihīno vrajetsopi sa hi sarvatra dṛśyate |
pāṇihīnopi gṛhṇāti pādahīnaḥ pradhāvati || 33 ||
[Analyze grammar]

sarvatra dṛśyate vipra vyāpakaḥ pādavarjitaḥ |
yaṃ na paśyaṃti deveṃdrā munayastattvadarśinaḥ || 34 ||
[Analyze grammar]

sa ca paśyati tānsarvānsatyāsatyapade sthitān |
vyāpakaṃ vimalaṃ siddhaṃ siddhidaṃ sarvanāyakam || 35 ||
[Analyze grammar]

yaṃ jānāti mahāyogī vyāso dharmārthakovidaḥ |
tejomūrtiḥ sa cākāśamekavarṇamanaṃtakam || 36 ||
[Analyze grammar]

tadetannirmalaṃ rūpaṃ śrutirākhyāti niścitam |
vyāsaścaiva hi jānāti mārkaṃḍeyaśca tatpadam || 37 ||
[Analyze grammar]

arvācīnaṃ pravakṣyāmi śṛṇuṣvaikāgramānasaḥ |
yadā saṃhṛtya bhūtātmā svayamekaḥ pragacchati || 38 ||
[Analyze grammar]

apsu śayyāṃ samāsthāya śeṣabhogāsanasthitaḥ |
tamāśritya svapityeko bahukālaṃ janārdanaḥ || 39 ||
[Analyze grammar]

jalāṃdhakārasaṃtapto mārkaṃḍeyo mahāmuniḥ |
sthānamicchansa yogātmā nirviṇṇo bhramaṇena saḥ || 40 ||
[Analyze grammar]

bhramamāṇaḥ sa dadṛśe śeṣaparyaṃkaśāyinam |
sūryakoṭipratīkāśaṃ divyābharaṇabhūṣitam || 41 ||
[Analyze grammar]

divyamālyāṃbaradharaṃ sarvavyāpinamīśvaram |
yoganidrā gataṃ kāṃtaṃ śaṃkhacakragadādharam || 42 ||
[Analyze grammar]

ekā nārī mahābhāgā kṛṣṇāṃjanacayopamā |
daṃṣṭrākarālavadanā bhīmarūpā dvijottama || 43 ||
[Analyze grammar]

tayoktosau muniśreṣṭho mā bhairiti mahāmuniḥ |
padmapatraṃ suvistīrṇaṃ paṃcayojanamāyatam || 44 ||
[Analyze grammar]

tasminpatre mahādevyā mārkaṇḍeyo niveśitaḥ |
keśave sati suptepi nāstyatra ca bhayaṃ tava || 45 ||
[Analyze grammar]

tāmuvāca sa yogīṃdra kā tvaṃ bhavasi bhāmini |
asminvinirjite caikā bhavatī paribṛṃhitā || 46 ||
[Analyze grammar]

pṛṣṭaivaṃ muninā devī sādaraṃ prāha bhūsura |
nāgabhogāṃkaparyaṃke sa yaḥ svapiti keśavaḥ || 47 ||
[Analyze grammar]

asyāhaṃ vaiṣṇavī śaktiḥ kālarātririhocyate |
māmevaṃ viddhi vipreṃdra sarvamāyāsamanvitām || 48 ||
[Analyze grammar]

mahāmāyā purāṇeṣu jaganmohāya kathyate |
ityuktvā sā gatā devī aṃtardhānaṃ hi pippalaḥ || 49 ||
[Analyze grammar]

devyāmanugatāyāṃ tu mārkaṃḍeyasya paśyataḥ |
tasya nābhyāṃ samutpannaṃ paṃkajaṃ hāṭakaprabham || 50 ||
[Analyze grammar]

tasmājjajñe mahātejā brahmā lokapitāmahaḥ |
tasmādvijajñire lokāḥ sarve sthāvarajaṃgamāḥ || 51 ||
[Analyze grammar]

iṃdrādyā lokapālāśca devāścāgnipurogamāḥ |
arvācīnaṃ svarūpaṃ tu darśitaṃ hi mayā nṛpa || 52 ||
[Analyze grammar]

arvācīnasvarūpoyaṃ parācīno nirāśrayaḥ |
yadā sa darśayetkāyaṃ kāyarūpā bhavaṃti te || 53 ||
[Analyze grammar]

brahmādyāḥ sarvalokāśca arvācīnā hi pippala |
arvācīnā amī lokā ye bhavaṃti jagattraye || 54 ||
[Analyze grammar]

parācīnaḥ sa bhūtātmā yaṃ supaśyaṃti yoginaḥ |
mokṣarūpaṃ paraṃ sthānaṃ parabrahmasvarūpakam || 55 ||
[Analyze grammar]

avyaktamakṣaraṃ haṃsaṃ śuddhaṃ siddhisamanvitam |
parācīnasya yadrūpaṃ vidyādhara tavāgrataḥ || 56 ||
[Analyze grammar]

sarvameva mayā khyātamanyatkiṃ te vadāmyaham |
pippala uvāca |
kasmādetanmahājñānamudbhūtaṃ tava suvrata || 57 ||
[Analyze grammar]

arvācīnagatiṃ vidvānparācīnagatiṃ tathā |
trailokyasya paraṃ jñānaṃ tvayyevaṃ parivartate || 58 ||
[Analyze grammar]

tapaso naiva paśyāmi parāṃ niṣṭhāṃ hi suvrata |
yajanaṃyājanaṃtīrthaṃtapovākṛtavānasi || 59 ||
[Analyze grammar]

tatprabhāvaṃ vadasvaivaṃ kena jñānaṃ tavākhilam |
sukarmovāca |
tapa eva na jānāmi na kṛtaṃ kāyaśoṣaṇam || 60 ||
[Analyze grammar]

yajanaṃ yājanaṃ vāpi na jāne tīrthasādhanam |
na mayā sādhitaṃ dhyānaṃ puṇyakālaṃ sukarmajam || 61 ||
[Analyze grammar]

sphuṭamekaṃ prajānāmi pitṛmātṛprapūjanam |
ubhayorapi hastena mātāpitrostu nityaśaḥ || 62 ||
[Analyze grammar]

pādaprakṣālanaṃ puṇyaṃ svayameva karomyaham |
aṃgasaṃvāhanaṃ snānaṃ bhojanādikameva ca || 63 ||
[Analyze grammar]

trikāledhyānasaṃlīnaḥ sādhayāmi dinedine |
pādodakaṃ tayoścaiva mātāpitrordinedine || 64 ||
[Analyze grammar]

bhaktibhāvena viṃdāmi pūjayāmi subhāvataḥ |
gurū me jīvamānau tu yāvatkālaṃ hi pippala || 65 ||
[Analyze grammar]

tāvatkālaṃ hi me lābho hyatulaśca prajāyate |
trikālaṃ pūjayāmyetau śuddhabhāvena cetasā || 66 ||
[Analyze grammar]

svacchaṃdalīlāsaṃcārī vartāmyeva hi pippala |
kiṃ me cānyena tapasā kiṃ me kāyasya śoṣaṇaiḥ || 67 ||
[Analyze grammar]

kiṃ me sutīrthayātrābhiranyaiḥ puṇyaiśca sāṃpratam |
makhānāmeva sarveṣāṃ yatphalaṃ prāpyate dvija || 68 ||
[Analyze grammar]

tatphalaṃ tu mayā dṛṣṭaṃ pituḥ śuśrūṣaṇādapi |
mātuḥ śuśrūṣaṇaṃ tadvatputrāṇāṃ gatidāyakam || 69 ||
[Analyze grammar]

sarvakarmasusarvasvaṃ sārabhūtaṃ jagatraye |
putrasya jāyate loko mātuḥ śuśrūṣaṇādapi || 70 ||
[Analyze grammar]

pituḥ śuśrūṣaṇe tadvanmahatpuṇyaṃ prajāyate |
tatra gaṃgā gayātīrthaṃ tatra puṣkarameva ca || 71 ||
[Analyze grammar]

yatra mātāpitā tiṣṭhetputrasyāpi na saṃśayaḥ |
anyāni tatra tīrthāni puṇyāni vividhāni ca || 72 ||
[Analyze grammar]

bhavaṃtyetāni putrasya pituḥ śuśrūṣaṇādapi |
pituḥ śuśrūṣaṇāttasya dānasya tapasaḥ phalam || 73 ||
[Analyze grammar]

satputrasya bhavedvipra anya dharmaḥ śramāyate |
pituḥ śuśrūṣaṇātpuṇyaṃ putraḥ prāpnotyanuttamam || 74 ||
[Analyze grammar]

svakarmaṇastu sarvasvamihaiva ca paratra ca |
jīvamānau gurūtvetau svamātāpitarau tathā || 75 ||
[Analyze grammar]

śuśrūṣate suto bhūtvā tasya puṇyaphalaṃ śṛṇu |
devāstasyāpi tuṣyaṃti ṛṣayaḥ puṇyavatsalāḥ || 76 ||
[Analyze grammar]

trayolokāstu tuṣyaṃti pituḥ śuśrūṣaṇādiha |
mātāpitrostu yaḥ pādau nityameva hi kṣālayet || 77 ||
[Analyze grammar]

tasya bhāgīrathīsnānamahanyahani jāyate |
puṇyairmiṣṭānnapānairyaḥ pitaraṃ mātaraṃ tathā || 78 ||
[Analyze grammar]

bhaktyā bhojayate nityaṃ tasya puṇyaṃ vadāmyaham |
aśvamedhasya yajñasya phalaṃ putrasya jāyate || 79 ||
[Analyze grammar]

tāṃbūlaiśchādanaiścaiva pānaiścāśanakaistathā |
bhaktyā cānnena puṇyena gurū yenābhipūjitau || 80 ||
[Analyze grammar]

sarvajñānī bhavetsopi yaśaḥkīrtimavāpnuyāt |
mātaraṃ pitaraṃ dṛṣṭvā harṣātsaṃbhāṣayetsutaḥ || 81 ||
[Analyze grammar]

nidhayastasya saṃtuṣṭāstasya gehe vasaṃti te |
gāvaḥ sauhṛdyamāyāṃti putrasya sukhadāḥ sadā || 82 ||
[Analyze grammar]

iti śrīpadmapurāṇe bhūmikhaṃḍe venopākhyāne mātṛpitṛtīrtha |
māhātmye dviṣaṣṭitamo'dhyāyaḥ || 62 ||
[Analyze grammar]