Chapter 1

[English text for this chapter is available]

ṛṣaya ūcuḥ |
śṛṇu sūta mahābhāga sarvatattvārthakovida |
saṃdehamāgataṃ vidvandāruṇaṃ buddhināśanam || 1 ||
[Analyze grammar]

kecitpaṭhaṃti prahlādaṃ purāṇeṣu dvijottamāḥ |
paṃcavarṣānvitenāpi keśavaḥ paritoṣitaḥ || 2 ||
[Analyze grammar]

devāsure kathaṃ prāpte hariṇā saha yudhyati |
nihato vāsudevena praviṣṭo vaiṣṇavīṃ tanum || 3 ||
[Analyze grammar]

sūta uvāca |
kaśyapena purā jñātaṃ kṛtaṃ vyāsena dhīmatā |
brahmaṇā kathitaṃ pūrvaṃ vyāsasyāgre svayaṃ prabhoḥ || 4 ||
[Analyze grammar]

tamevaṃ hi pravakṣyāmi bhavatāmagrato dvijāḥ |
saṃdehakāraṇaṃ jātaṃ chinnaṃ devena vedhasā || 5 ||
[Analyze grammar]

vyāsa uvācaḥ |
śṛṇu sūta mahābhāga brahmaṇā paribhāṣitam |
prahlādasya yathā janma purāṇepyanyathā śrutam || 6 ||
[Analyze grammar]

jātamātraḥ sarvasukhaṃ vaiṣṇavaṃ mārgamāśritaḥ |
mahābhāgavataśreṣṭhaḥ prahlādo devapūjitaḥ || 7 ||
[Analyze grammar]

viṣṇunā saha yuddhāya saputraḥ saṃgaraṃgataḥ |
nihato vāsudevena praviṣṭo vaiṣṇavīṃ tanum || 8 ||
[Analyze grammar]

sṛṣṭibhāvaṃ śṛṇuṣva tvamasyaiva ca mahātmanaḥ |
saṃgaraṃ prāpya putrādyairviṣṇunā saha vīryavān || 9 ||
[Analyze grammar]

praviṣṭo vaiṣṇavaṃ tejaḥ saṃprāpya svena tejasā |
purākalpe mahābhāga yathā jātaḥ sa vīryavān || 10 ||
[Analyze grammar]

vṛttāṃtaṃ tasya vīrasya pravakṣyāmi samāsataḥ |
paścime sāgarasyāṃte dvārakā nāma vai purī || 11 ||
[Analyze grammar]

sarvaṛddhisamāyuktā sarvasiddhisamanvitā |
tasyāmāste sadā devo yogajño yogavittamaḥ || 12 ||
[Analyze grammar]

śivaśarmeti vikhyāto vedaśāstrārthakovidaḥ |
tasyāpi paṃcaputrāstu babhūvuḥ śāstrakovidāḥ || 13 ||
[Analyze grammar]

yajñaśarmā vedaśarmā dharmaśarmā tathaiva ca |
viṣṇuśarmā mahābhāgo nūnaṃ tatkarmakovidaḥ || 14 ||
[Analyze grammar]

paṃcamaḥ somaśarmeti pitṛbhaktiparāyaṇaḥ |
pitṛbhaktiṃ vinā caiva dharmamanyaṃ dvijottamāḥ || 15 ||
[Analyze grammar]

na vidaṃti mahātmānastadbhāvena tu bhāvitāḥ |
teṣāṃ tu bhaktiṃ saṃpaśyañchivaśarmā dvijottamaḥ || 16 ||
[Analyze grammar]

ciṃtayāmāsa medhāvī niṣkarṣiṣye surottamān |
pitṛbhakteṣu yo bhāvo naiteṣāṃ manasi sthitaḥ || 17 ||
[Analyze grammar]

yathā jānāmyahaṃ cātha kariṣye buddhipūrvakam |
viṣṇoścaiva prasādātsa sarvasiddhirbabhūva ha || 18 ||
[Analyze grammar]

sadbhāvaṃ ciṃtayāmāsa aṃjanārthaṃ dvijottamāḥ |
upāyaṃ brāhmaṇaśreṣṭhastapasastejasaḥ kila || 19 ||
[Analyze grammar]

cakāra sopyupāyajño māyayā brahmavittamaḥ |
teṣāmagre tato vyājaṃ śivaśarmā vyadarśayat || 20 ||
[Analyze grammar]

mahatā jvararogeṇa mṛtā mātā vidarśitā |
taistu dṛṣṭā mṛtā mātā pitaraṃ vākyamabruvan || 21 ||
[Analyze grammar]

yayāvayaṃ mahābhāga garbhodare pravarddhitāḥ |
kalevaraṃ parityajya svayameva gatā kṣayam || 22 ||
[Analyze grammar]

apahāya gatā seyaṃ svarge tāta kimucyate |
śivaśarmoparibhavaṃ putraṃ bhaktiparāyaṇam || 23 ||
[Analyze grammar]

yajñaśarmāṇamāhūya ityuvāca dvijottamaḥ |
śivaśarmovāca |
anenāpi sutīkṣṇena śastreṇa niśitena vai || 24 ||
[Analyze grammar]

vicchidyāṃgāni sarvāṇi yatra tatra kṣipasva ha |
tatkṛtaṃ tena putreṇa yathādeśaḥ śrutaḥ pituḥ || 25 ||
[Analyze grammar]

samāyātaḥ punaḥ paścātpitaraṃ vākyamabravīt |
yathādiṣṭaṃ tvayā tāta tatsarvaṃ kṛtavānaham || 26 ||
[Analyze grammar]

samādiśa mamānyacca kāryakāraṇamadya ca |
tacca sarvaṃ kariṣyāmi durjayaṃ durlabhaṃ pitaḥ || 27 ||
[Analyze grammar]

tamājñāya mahābhāgaṃ pitṛbhaktaṃ sa ca dvijaḥ |
niścayaṃ paramaṃ jñātvā dvitīyasya viciṃtayan || 28 ||
[Analyze grammar]

vedaśarmāṇamāhūya gaccha tvaṃ mama śāsanāt |
striyā vinā na śaknomi sthātuṃ kaṃdarpamohitaḥ || 29 ||
[Analyze grammar]

māyayā darśitā nārī sarvasaubhāgyasaṃpadā |
enāmānaya vatsa tvaṃ mamārthe kṛtaniścayaḥ || 30 ||
[Analyze grammar]

evamuktastathā prāha kariṣye tava supriyam |
pitaraṃ taṃ namaskṛtya tāmuvāca gatastataḥ || 31 ||
[Analyze grammar]

tvāṃ devi yācate tātaḥ kāmabāṇaprapīḍitaḥ |
atastvaṃ jarayā yukte prasādasumukhī bhava || 32 ||
[Analyze grammar]

bhaja tvaṃ cārusarvāṃgi pitaraṃ mama suṃdari |
evamākarṇitaṃ tasya māyayā vedaśarmaṇaḥ || 33 ||
[Analyze grammar]

stryuvāca |
jarayā pīḍitasyāpi naivecchāmi kadācana |
saśleṣmamukharogasya vyādhigrastasya sāṃpratam || 34 ||
[Analyze grammar]

śithilasyāpi cārtasya tasya vṛddhasya saṃgamam |
bhavaṃtaṃ raṃtumicchāmi kariṣye tava supriyam || 35 ||
[Analyze grammar]

bhavaṃtaṃ rūpasaubhāgyairguṇaratnairalaṃkṛtam |
divyalakṣaṇasaṃpannaṃ divyarūpaṃ mahaujasam || 36 ||
[Analyze grammar]

kiṃ kariṣyasi tātena vṛddhena śṛṇu mānada |
mamāṃgabhogabhāvena sarvaṃ prāpsyasi durlabham || 37 ||
[Analyze grammar]

yadyattvamicchase vipra taddadāmi na saṃśayaḥ |
etadvākyaṃ mahacchrutvā apriyaṃ pāpasaṃkulam || 38 ||
[Analyze grammar]

vedaśarmovāca |
adharmayuktaṃ te vākyamayuktaṃ pāpamiśritam |
nedṛśaṃ māṃ vaderdevi pitṛbhaktimanāgasam || 39 ||
[Analyze grammar]

piturarthaṃ samāyātastvāmahaṃ prārthaye śubhe |
anyadevaṃ na vaktavyaṃ bhaja tvaṃ pitaraṃ mama || 40 ||
[Analyze grammar]

yadyattvamicchase devi trailokye sacarācaram |
tattaddadmi na saṃdeho devarājyādhikaṃ śubhe || 41 ||
[Analyze grammar]

stryuvāca |
evaṃ samartho dātuṃ me piturarthe yadā bhavān |
tadā me darśayādyaiva seṃdrāstvaṃ samaheśvarān || 42 ||
[Analyze grammar]

dātumevaṃ samarthosi durlabhaṃ sāṃprataṃ kila |
kiṃ te balaṃ mahābhāga darśayasva tvamātmanaḥ || 43 ||
[Analyze grammar]

vedaśarmovāca |
paśya paśya balaṃ devi prabhāvaṃ tapaso mama |
mayāhūtāḥ samāyātā iṃdrādyāḥ surasattamāḥ || 44 ||
[Analyze grammar]

vedaśarmāṇamūcuste kiṃ kurmo hi dvijottama |
yamevamicchase vipra taṃ dadāmo na saṃśayaḥ || 45 ||
[Analyze grammar]

vedaśarmovāca |
yadi devāḥ prasānnā me prasādasumukhā yadi |
dadaṃtu vimalāṃ bhaktiṃ pādayoḥ pitureva me || 46 ||
[Analyze grammar]

evamastu surāḥ sarve yathāyātāstathā gatāḥ |
tamuvāca tathā dṛṣṭvā dṛṣṭaṃ te tapaso balam || 47 ||
[Analyze grammar]

devaistu nāsti me kāryaṃ yadi dātumihecchasi |
yanmāṃ nayasi gurvarthaṃ tatkuruṣva mama priyam || 48 ||
[Analyze grammar]

dehi tvaṃ svaṃ śiro vipra svahastena nikṛtya vai |
vedaśarmovāca |
dhanyohamadya saṃjāto muktaścaiva ṛṇatrayāt || 49 ||
[Analyze grammar]

svaśiro devi dāsyāmi gṛhyatāṃ gṛhyatāṃ śubhe |
śitena tīkṣṇadhāreṇa śastreṇa dvijasattamaḥ || 50 ||
[Analyze grammar]

nikṛtya svaṃ śiraścātha dattaṃ tasyai prahasya ca |
rudhireṇa plutaṃ sā ca parigṛhya gatā munim || 51 ||
[Analyze grammar]

stryuvāca |
tavārthe preṣitaṃ vipra putreṇa vedaśarmaṇā |
etacchiraḥ saṃgṛhāṇa nikṛttaṃ cātmanātmanaḥ || 52 ||
[Analyze grammar]

uttamāṃgaṃ pradattaṃ me pitṛbhaktena tena te |
tavārthe dvijaśārdūla māmevaṃ paribhuṃkṣva vai || 53 ||
[Analyze grammar]

tasya tairbhrātṛbhirdṛṣṭaṃ sāhasaṃ vedaśarmaṇaḥ |
vepitāṃgatvamāpannāste babhūvuḥ parasparam || 54 ||
[Analyze grammar]

mṛtā no dharmasādhvī sā mātā satyasamādhinā |
ayameva mahābhāgaḥ piturarthe mṛtaḥ śubhaḥ || 55 ||
[Analyze grammar]

dhanyoyaṃ dhanyatāṃ prāptaḥ piturarthe kṛtaṃ śubham |
evaṃ saṃbhāṣitaṃ taistu bhrātṛbhiḥ puṇyacāribhiḥ || 56 ||
[Analyze grammar]

samākarṇya dvijo vākyaṃ jñātvā bhaktiparāyaṇam |
nikṛttaṃ ca śirastena putreṇa vedaśarmaṇā || 57 ||
[Analyze grammar]

dharmaśarmāṇamāhātha śira etatpragṛhyatām || 58 ||
[Analyze grammar]

iti śrīpadmapurāṇe bhūmikhaṃḍe śivaśarmacarite prathamo'dhyāyaḥ || 1 ||
[Analyze grammar]