Chapter 24

[English text for this chapter is available]

brahmovāca |
bhagavanpuruṣasyeha striyāśca varadāyakam |
śokavyādhibhayaṃ duḥkhaṃ na bhavedyena tadvada || 1 ||
[Analyze grammar]

śaṃkara uvāca |
śrāvaṇasya dvitīyāyāṃ kṛṣṇāyāṃ madhusūdanaḥ |
kṣīrārṇave sapatnīkaḥ sadā vasati keśavaḥ || 2 ||
[Analyze grammar]

tasyāṃ saṃpūjya goviṃdaṃ sarvānkāmānavāpnuyāt |
gobhūhiraṇyadānādi saptakalpaśatānugam || 3 ||
[Analyze grammar]

āvāhanādikāṃ pūjāṃ pūrvavatparikalpayet |
aśūnyaśayanā nāma dvitīyāsau prakīrtitā || 4 ||
[Analyze grammar]

tasyāṃ saṃpūjayedviṣṇumebhirmaṃtrairvidhānataḥ |
śrīvatsadhārinśrīkāṃta śrīpate śrīdharāvyaya || 5 ||
[Analyze grammar]

gārhasthyaṃ mā praṇāśaṃ me yātu dharmārthakāmadaṃ |
agnayo mā praṇaśyaṃtu devatāḥ puruṣottama || 6 ||
[Analyze grammar]

pitaro mā praṇaśyaṃtu mama dāṃpatyabhedataḥ |
lakṣmyā viyujyate devo na kadācidyathā hariḥ || 7 ||
[Analyze grammar]

tathā kalatrasaṃbaṃdho deva mā me viyujyatāṃ |
lakṣmyā na śūnyaṃ varada yathā te śayanaṃ sadā || 8 ||
[Analyze grammar]

śayyā mamāpyaśūnyāstu tathaiva madhusūdana |
gītavāditranirghoṣāndevadevasya kārayet || 9 ||
[Analyze grammar]

ghaṃṭā bhavedaśaktasya sarvavādyamayo yataḥ |
evaṃ saṃpūjya goviṃdamaśnīyāttailavarjitam || 10 ||
[Analyze grammar]

naktamakṣāralavaṇaṃ yāvattu syāccatuṣṭayaṃ |
tataḥ prabhāte saṃjāte lakṣmīpatisamanvitām || 11 ||
[Analyze grammar]

dīpānnabhājanairyuktāṃ śayyāṃ dadyādvilakṣaṇām |
pādukopānahacchatra cāmarāsana saṃyutām || 12 ||
[Analyze grammar]

abhīṣṭopaskarairyuktāṃ śuklapuṣpāṃbarāvṛtām |
avyaṃgāya ca viprāya vaiṣṇavāya kuṭuṃbine || 13 ||
[Analyze grammar]

dātavyā vedaviduṣe na vaṃdhyāpataye kvacit |
tatropaveśya dāṃpatyamalaṃkṛtya vidhānataḥ || 14 ||
[Analyze grammar]

patnyāstu bhājanaṃ dadyādbhakṣyabhojyasamanvitam |
brāhmaṇasyāpi sauvarṇīmupaskarasamanvitām || 15 ||
[Analyze grammar]

pratimāṃ devadevasya sodakuṃbhāṃ nivedayet |
evaṃ yastu pumānkuryādaśūnyaśayanaṃ hareḥ || 16 ||
[Analyze grammar]

vittaśāṭhyena rahito nārāyaṇaparāyaṇaḥ |
na tasya patnyā virahaḥ kadācidapi jāyate || 17 ||
[Analyze grammar]

nārī vā vidhavā brahmanyāvaccaṃdrārkatārakaṃ |
na virūpau na śokārtau daṃpatī bhavataḥ kvacit || 18 ||
[Analyze grammar]

na putrapaśuratnāni kṣayaṃ yāṃti pitāmaha |
saptakalpasahasrāṇi saptakalpaśatāni ca || 19 ||
[Analyze grammar]

kurvannaśūnyaśayanaṃ viṣṇuloke mahīyate |
brahmovāca |
kathamārogyamaiśvaryaṃ matirdharmasthitissadā || 20 ||
[Analyze grammar]

avyaṃgātha pare bhaktirviṣṇau cāpi bhavetkatham |
īśvara uvāca |
sādhu brahmaṃstvayā pṛṣṭamidānīṃ kathayāmi te || 21 ||
[Analyze grammar]

virocanasya saṃvādaṃ bhārgavasya ca dhīmataḥ |
prahlādasya sutaṃ dṛṣṭvā dviraṣṭaparivatsaram || 22 ||
[Analyze grammar]

tasya rūpamidaṃ brahmansohasadbhṛgunaṃdanaḥ |
sādhusādhu mahābāho virocana śivaṃ tava || 23 ||
[Analyze grammar]

tattathā hasitaṃ tasya papraccha surasūdanaḥ |
brahmankimarthametatte hāsyaṃ vai māmakaṃ kṛtam || 24 ||
[Analyze grammar]

sādhusādhviti māmevamuktavāṃstvaṃ vadasva me |
tamevaṃ vādinaṃ yuktamuvāca vadatāṃ varaḥ || 25 ||
[Analyze grammar]

vismayādvratamāhātmyāddhāsyametatkṛtaṃ mayā |
purā dakṣavināśāya kupitasya triśūlinaḥ || 26 ||
[Analyze grammar]

apatadbhīmavaktrasya svedabiṃdurlalāṭajaḥ |
bhitvā sa saptapātālānadahatsaptasāgarān || 27 ||
[Analyze grammar]

anekavaktranayanojvalajjvalana bhīṣaṇaḥ |
vīrabhadra iti khyātaḥ karapādāyutairyutaḥ || 28 ||
[Analyze grammar]

kṛtvā sa yajñamathanaṃ punarbhūtasya saṃplavaḥ |
trijagaddahanādbhūyaḥ śivena vinivāritaḥ || 29 ||
[Analyze grammar]

kṛtaṃ tvayā vīrabhadra dakṣayajñavināśanaṃ |
idānīmalametena lokadāhena karmaṇā || 30 ||
[Analyze grammar]

śāṃtipradānātsarveṣāṃ grahaṇāṃ prathamo bhava |
prahṛṣṭābhijanāḥ pūjāṃ kariṣyaṃti kṛtātmanaḥ || 31 ||
[Analyze grammar]

aṃgāraka iti khyātiṃ gamiṣyasi dharātmaja |
devaloke dvitīyaṃ ca tava rūpaṃ bhaviṣyati || 32 ||
[Analyze grammar]

ye ca tvāṃ pūjayiṣyaṃti caturthyāṃ tu dine narāḥ |
rūpamārogyamaiśvaryaṃ teṣvanaṃtaṃ bhaviṣyati || 33 ||
[Analyze grammar]

evamuktastataḥ śāṃtimagamatkāmarūpadhṛt |
sa jātastatkṣaṇādrājangrahatvamagamatpunaḥ || 34 ||
[Analyze grammar]

sa kadācidbhavāṃstasya pūjārghādikamuttamaṃ |
dṛṣṭavānkriyamāṇaṃ ca śūdreṇa tvaṃ vyavasthitaḥ || 35 ||
[Analyze grammar]

tena tvaṃ rūpavānjāto suraḥ śatrukulāśaniḥ |
vividhā ca rucirjātā yasmāttava vidūragā || 36 ||
[Analyze grammar]

virocana iti prāhustasmāt tvāṃ devadānavāḥ |
śūdreṇa kriyamāṇasya vratasya tava darśanāt || 37 ||
[Analyze grammar]

īdṛśī rūpasaṃpattiriti vismitavānaham |
sādhusādhviti tenoktamaho māhātmyamuttamaṃ || 38 ||
[Analyze grammar]

paśyatopi bhavedrūpamaiśvaryaṃ kimu kurvataḥ |
yasmācca bhaktyā dharaṇīsutasya viniṃdyamānena gavādidānam || 39 ||
[Analyze grammar]

ālokitaṃ tena surārigarbhe saṃbhūtireṣā tava daitya jātā |
atha tadvacanaṃ śrutvā bhārgavasya mahātmanaḥ || 40 ||
[Analyze grammar]

prahlādanaṃdano vīraḥ punaḥ papraccha bhārgavam |
virocana uvāca |
bhagavaṃstadvrataṃ samyakśrotumicchāmi tatvataḥ || 41 ||
[Analyze grammar]

dīyamānaṃ tu yaddānaṃ mayā dṛṣṭaṃ bhavāṃtare |
māhātmyaṃ ca vidhiṃ tasya yathāvadvaktumarhasi || 42 ||
[Analyze grammar]

iti tadvacanaṃ śrutvā vipraḥ provāca sādaraṃ |
caturthyaṃgārakadine yadā bhavati dānava || 43 ||
[Analyze grammar]

mṛdāsnānaṃ tadā kuryātpadmarāgavibhūṣitaḥ |
agnirmūrddhādivo maṃtraṃ japetsnāta udaṅmukhaḥ || 44 ||
[Analyze grammar]

śūdrastūṣṇīṃ smaranbhaumamāstāṃ bhogavivarjitaḥ |
athāstamita āditye gomayenānulepayet || 45 ||
[Analyze grammar]

prāṃgaṇaṃ puṣpamālābhirakṣatādbhiḥ samaṃtataḥ |
tadabhyarcyālikhetpadmaṃ kuṃkumenāṣṭapatrakam || 46 ||
[Analyze grammar]

kuṃkumasyāpyabhāvena raktacaṃdanamiṣyate |
catvāraḥ karakāḥ kāryāḥ bhakṣyabhojyasamanvitāḥ || 47 ||
[Analyze grammar]

taṃḍulai raktaśāleyaiḥ padmarāgaiśca saṃyutāḥ |
catuḥkoṇeṣu tānkṛtvā phalāni vividhāni ca || 48 ||
[Analyze grammar]

gaṃdhamālyādikaṃ sarvaṃ tathaiva viniveśayet |
suvarṇaśṛṃgāṃ kapilāmathārcya raupyaiḥ khuraiḥ kāṃsyadohāṃ savastrām || 49 ||
[Analyze grammar]

dhuraṃdharaṃ raktakhuraṃ ca saumyaṃ dhānyāni saptāṃbarasaṃyutāni |
aṃguṣṭhamātraṃ puruṣaṃ tathaiva sauvarṇamapyāyatabāhudaṃḍam || 50 ||
[Analyze grammar]

caturbhujaṃ hemamayaṃ ca tāmrapātre guḍasyopari sarpiyuktam |
sāmasvarajñāya jiteṃdriyāya vāgrūpaśīlānvayasaṃyutāya || 51 ||
[Analyze grammar]

dātavyametatsakalaṃ dvijāya kuṭumbine naiva tu daṃbhayukte |
bhūmiputra mahābhāga svedodbhava pinākinaḥ || 52 ||
[Analyze grammar]

rūpārthī tvāṃ prapannohaṃ gṛhāṇārghyaṃ namo'stu te |
maṃtreṇānena datvārghyaṃ raktacaṃdanavāriṇā || 53 ||
[Analyze grammar]

tatorcayedvipravaraṃ raktamālyāṃbarādibhiḥ |
dadyāttenaiva maṃtreṇa bhaumaṃ gomithunānvitam || 54 ||
[Analyze grammar]

śayyāṃ ca śaktimāndadyātsarvopaskarasaṃyutām |
yadyadiṣṭatamaṃ loke yaccāsya dayitaṃ gṛhe || 55 ||
[Analyze grammar]

tattadguṇavate deyaṃ dattasyākṣayamicchatā |
tataḥ pradakṣiṇaṃ kṛtvā visṛjya dvijasattamam || 56 ||
[Analyze grammar]

naktaṃ kṣīrāśanaṃ kuryādevaṃ cāṃgārakāṣṭakam |
caturo vātha vātasya yatpuṇyaṃ tadvadāmi te || 57 ||
[Analyze grammar]

rūpasaubhāgyasaṃpannaḥ pumānjanmani janmani |
viṣṇau vātha śive bhaktaḥ saptadvīpādhipo bhavet || 58 ||
[Analyze grammar]

saptakalpasahasrāṇi rudraloke mahīyate |
tasmātvamapi daityeṃdra vratametatsamācara || 59 ||
[Analyze grammar]

ityevamukto bhugunaṃdanena cakāra sarvaṃ vratameva daityaḥ |
tvaṃ cāpi rājankuru sarvametadyatokṣayaṃ vedavido vadaṃti || 60 ||
[Analyze grammar]

śṛṇoti yaścainamananyacetāstasyāpi sarvaṃ bhagavānvidhatte || 61 ||
[Analyze grammar]