Chapter 23

[English text for this chapter is available]

bhīṣma uvāca |
vaiṣṇavā ye tu vai dharmā yānrudraḥ proktavāniha |
tānme kathaya vipreṃdra kīdṛśāste phalaṃ tu kim || 1 ||
[Analyze grammar]

pulastya uvāca |
purā rathaṃtare kalpe paripṛṣṭo mahātmanā |
maṃdarastho mahādevaḥ pinākī brahmaṇā svayam || 2 ||
[Analyze grammar]

kathamārogyamaiśvaryamanaṃtamamareśvara |
alpena tapasā deva bhavenmokṣaḥ sadā nṛṇāṃ || 3 ||
[Analyze grammar]

kiṃ tajjñānaṃ mahādeva tvatprasādādadhokṣaja |
alpakenāpi tapasā mahāphalamihocyate || 4 ||
[Analyze grammar]

iti pṛṣṭassa viśvātmā brahmaṇā lokabhāvanaḥ |
umāpatiruvācedaṃ manasaḥ prītikārakam || 5 ||
[Analyze grammar]

īśvara uvāca |
asmādrathaṃtarātkalpādbhūyo viṃśatimo yadā |
vārāho bhavitā kalpastadā manvaṃtare śubhe || 6 ||
[Analyze grammar]

vaivasvatākhye saṃprāpte saptame saptalokadhṛk |
dvāparākhyaṃ yugaṃ tasminsaptaviṃśatimaṃ yadā || 7 ||
[Analyze grammar]

tasyāṃ te tu mahātejā vāsudevo janārdanaḥ |
bhārāvataraṇārthāya tridhā viṣṇurbhaviṣyati || 8 ||
[Analyze grammar]

dvaipāyana ṛṣistatra rauhiṇeyotha keśavaḥ |
kaṃsāriḥ keśimathanaḥ keśavaḥ kleśanāśanaḥ || 9 ||
[Analyze grammar]

purīṃ dvāravatīṃ nāma sāṃprataṃ yā kuśasthalī |
divyānubhāvasaṃyuktāmadhivāsāya śārṅgiṇaḥ || 10 ||
[Analyze grammar]

tvaṣṭā tadājñayā brahmankariṣyati jagatpateḥ |
tasyāṃ kadācidāsīnaḥ sabhāyāṃ so'mitadyutiḥ || 11 ||
[Analyze grammar]

bhāryābhirvṛṣṇividvadbhibhūribhirbhūridakṣiṇaiḥ |
kurubhirdevagaṃdharvairanvitaḥ kaiṭabhārdanaḥ || 12 ||
[Analyze grammar]

pravṛttāsu purāṇāsu dharmasaṃbadhadhinīṣu ca |
kathāsu bhīmasenena paripṛṣṭaḥ pratāpavān || 13 ||
[Analyze grammar]

tvayā pṛṣṭasya dharmasya vakṣyatyasya ca bhedadṛk |
bhavitā sa tadā brahmankartā caiva vṛkodaraḥ || 14 ||
[Analyze grammar]

pravartako'sya dharmasya pāṃḍusūnurmahābalaḥ |
yasya tīkṣṇo vṛko nāma jaṭhare havyavāhanaḥ || 15 ||
[Analyze grammar]

saṃbhāṣyate sa dharmātmā tena cāsau vṛkodaraḥ |
atīva svādaśīlaśca nāgāyuta balo mahān || 16 ||
[Analyze grammar]

dhārmikasyāpyaśaktasya tīvrāgnitvādupoṣaṇe |
idaṃ vratamaśeṣāṇāṃ vratānāmadhikaṃ yataḥ || 17 ||
[Analyze grammar]

kathayiṣyati viśvātmā vāsudevo jagadguruḥ |
aśeṣayajñaphaladamaśeṣāghavināśanam || 18 ||
[Analyze grammar]

aśeṣaduṣṭaśamanamaśeṣasurapūjitam |
pavitrāṇāṃ pavitraṃ yanmagalānāṃ ca maṃgalam |
bhaviṣyaṃ ca bhaviṣyāṇāṃ purāṇānāṃ purātanam || 19 ||
[Analyze grammar]

vāsudeva uvāca |
yadyaṣṭamī caturddaśyordvādaśīṣu ca bhārata |
anyeṣvapi dinarkṣeṣu naśaktastvamupoṣitum || 20 ||
[Analyze grammar]

tatastvagryāmimāṃ bhīma tithiṃ pāpapraṇāśinīm |
upoṣya vidhinānena gaccha viṣṇoḥ paraṃ padaṃ || 21 ||
[Analyze grammar]

māghamāsasya daśamī yadā śuklā bhavettadā |
ghṛtenābhyaṃjanaṃ kṛtvā tilaiḥ snānaṃ samācaret || 22 ||
[Analyze grammar]

tathaiva viṣṇumabhyarcennamo nārāyaṇāya ca |
kṛṣṇāya pādau saṃpūjya śiraḥ kṛṣṇātmaneti ca || 23 ||
[Analyze grammar]

vaikuṃṭhāyeti vaikaṃṭhamuraḥ śrīvatsadhāriṇe |
śaṃkhine gadine caiva cakriṇe varadāya vai || 24 ||
[Analyze grammar]

sarvaṃ nārāyaṇantvevaṃ saṃpūjyāvāhanakramāt |
dāmodarāyetyudaraṃ kaṭiṃ paṃcajanāya vai || 25 ||
[Analyze grammar]

ūrūsaubhāgyanāthāya jānunī bhūtadhāriṇe |
namo nīlāya vai jaṃghe pādau viśvabhuje punaḥ || 26 ||
[Analyze grammar]

namo devyai namaḥ śāṃtyai namo lakṣmyai namaḥ śriyai |
namastuṣṭyai namaḥ puṣṭyai dhṛtyai vyuṣṭyai namo namaḥ || 27 ||
[Analyze grammar]

namo vihaṃganāthāya vāyuvegāya pakṣiṇe |
viṣapramathanāyeti garuḍaṃ cābhipūjayet || 28 ||
[Analyze grammar]

evaṃ saṃpūjya goviṃdamumāpativināyakau |
gaṃdhairmālyaistathā dhūpairbhakṣyairnānāvidhairapi || 29 ||
[Analyze grammar]

gavyena payasā siktāṃ kṛsarāmatha pāyasam |
sarpiṣā saha bhuktvā tu gatvā sthānāṃtaraṃ punaḥ || 30 ||
[Analyze grammar]

naiyagrodhaṃ daṃtakāṣṭhamathavā khādiraṃ budhaḥ |
gṛhītvā dhāvayeddaṃtānācāṃtaḥ prāgudaṅmukhaḥ || 31 ||
[Analyze grammar]

brūyātsāyaṃtanīṃ kṛtvā saṃdhyāmastamite ravau |
namo nārāyaṇāyeti tvāmahaṃ śaraṇaṃ gataḥ || 32 ||
[Analyze grammar]

ekādaśyāṃ nirāhāraḥ samabhyarcya ca keśavam |
tāṃ rātriṃ sakalāṃ sthitvā śeṣaparyaṃkaśāyinam || 33 ||
[Analyze grammar]

sarpiṣā viśvadahanaṃ hutvā brāhmaṇapuṃgavaiḥ |
sahaiva puṃḍarīkākṣaṃ dvādaśyāṃ kṣīrabhojanam || 34 ||
[Analyze grammar]

kariṣyāmi yathātmānaṃ nirvighnenāstu tacca me |
evamuktvā svapedbhūmāvitihāsakathāṃ punaḥ || 35 ||
[Analyze grammar]

śrutvā prabhāte saṃjāte nadīṃ gatvā viśāṃpate |
snānaṃ kṛtvā mudā tadvatpāṣaṇḍānabhivarjayet || 36 ||
[Analyze grammar]

upāsya sandhyāṃ vidhivatkṛtvā ca pitṛtarpaṇam |
praṇamya ca hṛṣīkeśaṃ śeṣaparyaṅkaśāyinam || 37 ||
[Analyze grammar]

gṛhasya purato bhaktyā maṇḍapaṃ kārayedbudhaḥ |
caturhastāṃ śubhāṃ kuryādvedīmariniṣūdana || 38 ||
[Analyze grammar]

caturhastapramāṇaṃ tu vinyasettatra toraṇam |
madhye ca kalaśaṃ tatra māṣamātreṇa saṃyutam || 39 ||
[Analyze grammar]

chidreṇa jalasaṃpūrṇamadhaḥ kṛṣṇājine sthitaḥ |
tasya dhārāṃ ca śirasā dhārayetsakalāṃ niśām || 40 ||
[Analyze grammar]

dhārābhirbhūribhirbhūri phalaṃ vedavido viduḥ |
yasmāttasmātkuruśreṣṭha kārayetprayato dvijaḥ || 41 ||
[Analyze grammar]

dakṣiṇe cārdhacaṃdraṃ tu paścime vartulaṃ tathā |
aśvatthapatrākāraṃ ca uttareṇa tu kārayet || 42 ||
[Analyze grammar]

madhye tu padmākāraṃ ca kārayedvaiṣṇavo dvijaḥ |
pūrvato vedikāṃ stho na stho na yāmye ca kalpayet || 43 ||
[Analyze grammar]

pānīyadhārāṃ śirasi dhārayedviṣṇutatparaḥ |
dvitīyā vedī devasya tatra padmaṃ sakarṇikam || 44 ||
[Analyze grammar]

tasya madhye sthitaṃ devaṃ kuryādvai puruṣottamam |
hastamātraṃ ca tatkuṃḍaṃ kṛtvā tatra trimekhalam || 45 ||
[Analyze grammar]

yonivaktraṃ tatastasminbrāhmaṇairyavasarpiṣī |
tilāṃśca viṣṇudevatyairmaṃtrairevānale hunet || 46 ||
[Analyze grammar]

kṛtvā tu vaiṣṇavaṃ samyagyāgaṃ tatra prakalpayet |
ājyadhārā madhyame tu kuṃḍe dadyāttu yatnataḥ || 47 ||
[Analyze grammar]

kṣīradhārāṃ devadeve vāridhārātmanopari |
niṣpāvārdhapramāṇāṃ vai dhārāmājyasya pātayet || 48 ||
[Analyze grammar]

svecchayā kṣīrajalayoravicchinnāṃ ca śarvarīṃ |
jalakuṃbhānmahāvīrya sthāpayitvā trayodaśa || 49 ||
[Analyze grammar]

bhakṣyairnānāvidhairyuktānsitavastrairalaṃkṛtān |
pratānauduṃbaraiḥ pātraiḥ paṃcaratnasamanvitaiḥ || 50 ||
[Analyze grammar]

caturbhirbahvṛcairhomaḥ kāryastatra udaṅmukhaiḥ |
rudrajāpyaścaturbhiśca yajurvedaparāyaṇaiḥ || 51 ||
[Analyze grammar]

vaiṣṇavāni ca sāmāni caturbhiḥ sāmavedibhiḥ |
evaṃ dvādaśa vai viprānvastramālyānulepanaiḥ || 52 ||
[Analyze grammar]

pūjayedaṃgulīyaiśca kaṭakairhemasūtrakaiḥ |
vāsobhiḥ śayanīyaiśca vittaśāṭhyavivarjitaḥ || 53 ||
[Analyze grammar]

evaṃ kṣapātivāhyā vai gītamaṅgalaniḥsvanaiḥ |
upādhyāyasya ca punardviguṇaṃ sarvameva tu || 54 ||
[Analyze grammar]

tataḥ prabhāte vimale samutthāya trayodaśa |
gāvo deyāḥ kuruśreṣṭha sauvarṇaśṛṃgasaṃvṛtāḥ || 55 ||
[Analyze grammar]

payasvinyaḥ śīlavatyaḥ kāṃsyadohasamanvitāḥ |
raupyakhurāḥ savatsāśca caṃdanenābhibhūṣitāḥ || 56 ||
[Analyze grammar]

tāstu teṣāṃ tato datvā bhakṣyabhojyena tarpitān |
kṛtvā vai brāhmaṇānsarvānchatrairnānāvidhaistathā || 57 ||
[Analyze grammar]

bhuktvā cākṣāralavaṇamātmanā ca visarjayet |
anugamya padānyaṣṭau putrabhāryāsamanvitaḥ || 58 ||
[Analyze grammar]

prīyatāmatra deveśaḥ keśavaḥ kleśanāśanaḥ |
evaṃ gurvājñayā kuṃbhāngāścaiva śayanāni ca || 59 ||
[Analyze grammar]

vāsāṃsi caiva sarveṣāṃ gṛhāṇi prāpayedbudhaḥ |
abhāve bahuśayyānāmekāmapi susaṃskṛtām || 60 ||
[Analyze grammar]

śayyāṃ dadyādgṛhī bhīma sarvopaskarasaṃyutām |
itihāsapurāṇāni vācayitvā tu vāhayet || 61 ||
[Analyze grammar]

taddinaṃ kuruśārdūla ya icchedvipulāṃ śriyam |
tasmāttvaṃ sattvamālaṃbya bhīmasena vimatsaraḥ || 62 ||
[Analyze grammar]

kuru vratamidaṃ samyaksnehādguhyaṃ mayoditam |
tvayā kṛtamidaṃ vīra tvannāmnā ca bhaviṣyati || 63 ||
[Analyze grammar]

sā bhīmadvādaśī hyeṣā sarvapāpaharā śubhā |
yā tu kalyāṇinī nāma purā kalpeṣu paṭhyate || 64 ||
[Analyze grammar]

tvaṃ cādikartā bhava saukaresminkalpe mahāvīra varapradhāna |
yasyāḥ smṛteḥ kīrtanatopyaśeṣaṃ pāpaṃ praṇaṣṭaṃ tridaśādhipasya || 65 ||
[Analyze grammar]

dṛṣṭvā ca tāmapsarasāmabhīṣṭāṃ veśyākṛtāmanyabhavāṃtareṣu |
jātātha sā vaiśyakulodbhavāpi pulomakanyā puruhūtapatnī || 66 ||
[Analyze grammar]

tatrāpi tasyāḥ paricārikeyaṃ mama priyā saṃprati satyabhāmā |
kṛtaṃ purā maṃgalametadeva dvijātmajā vedavatī babhūva || 67 ||
[Analyze grammar]

asyāṃ ca kalyāṇatithau vivasvānsahasradhāreṇa sahasraraśmiḥ |
snātaḥ purā maṃḍalametya tadvattejomayaṃ kheṭapatirbabhūva || 68 ||
[Analyze grammar]

idamevakṛtaṃ maheṃdramukhyairbahubhirdevasurārikoṭibhiśca |
phalamasyeha na śakyate hi vaktuṃ yadi jihvāyutakoṭayo mukhe syuḥ || 69 ||
[Analyze grammar]

kalikaluṣavidāriṇīmanaṃtāmapi kathayiṣyati yādaveṃdrasūnuḥ |
atha narakagatānpitṝnathaiṣā hyalamuddhartumihaiva yaḥ karoti || 70 ||
[Analyze grammar]

idamanaghaśṛṇoti vakti bhaktyā paripaṭhatīha paropakārahetoḥ |
iha paṃkajanābhabhaktimānbhavedatha śakrasya sapūjyatāmupaiti || 71 ||
[Analyze grammar]

kalyāṇinī nāma purā visarge yā dvādaśī māghasitebhipūjyā |
sā pāṃḍuputreṇa kṛtā bhaviṣyatyaṃnatapuṇyānaghabhīmapūrvā || 72 ||
[Analyze grammar]

brahmovāca |
varṇāśramāṇāṃ prabhavaḥ purāṇeṣu mayā śrutaḥ |
sadācāraśca bhagavāndharmaśāstrāṃgavistaraiḥ || 73 ||
[Analyze grammar]

paṇyastrīṇāṃ samācāraṃ śrotumicchāmi tatvataḥ |
īśvara uvāca |
tasminneva pure brahmansahasrāṇi tu ṣoḍaśa || 74 ||
[Analyze grammar]

vāsudevasya nārīṇāṃ bhaviṣyaṃtyaṃbujodbhava |
tābhirvasaṃtasamaye kokilālikulākule || 75 ||
[Analyze grammar]

puṣpitopavane phullakalhārasarasastaṭe |
nirbharaṃ sahapatnībhiḥ praśastābhiralaṃkṛtaḥ || 76 ||
[Analyze grammar]

ramayiṣyati viśvātmā kṛṣṇo yadukulodvahaḥ |
kuraṃganayanaḥ śrīmānmālatīkṛtaśekharaḥ || 77 ||
[Analyze grammar]

gacchansamīpamārgeṇa sāṃbo jāṃbavatīsutaḥ |
sākṣātkaṃdarparūpeṇa sarvābharaṇabhūṣitaḥ || 78 ||
[Analyze grammar]

anaṃgaśarataptābhiḥ sābhilāṣamavekṣitaḥ |
prabuddho manmathastāsāṃ bhaviṣyati yadātmani || 79 ||
[Analyze grammar]

tadavekṣya jagannāthassarvajño dhyānacakṣuṣā |
svayaṃprabhurvakṣyati tā vo hariṣyaṃti dasyavaḥ || 80 ||
[Analyze grammar]

aparokṣaṃ yatastvevaṃ snigdhametadviciṃtitam |
tataḥ prasādito deva idaṃ vakṣyati śārṅgabhṛt || 81 ||
[Analyze grammar]

tābhiḥ śāpābhitaptābhirbhagavānbhūtabhāvanaḥ |
uttarāśritadāśānāmuddhartā brāhmaṇapriyaḥ || 82 ||
[Analyze grammar]

upadekṣyatyanaṃtātmā bhāvi kalyāṇakārakam |
bhavatīnāmṛṣirdālbhyo yadvrataṃ kathayiṣyati || 83 ||
[Analyze grammar]

ityuktvā tāḥ parityajya gatontardhānamīśvaraḥ |
tataḥ kālena mahatā bhārāvataraṇe kṛte || 84 ||
[Analyze grammar]

nivṛtte mausale tadvatkeśave divamāgate |
śūnye yadukule sarve corairapi jiterjune || 85 ||
[Analyze grammar]

hṛtāsu kṛṣṇapatnīṣu dāśabhogyāsu cārbude |
tiṣṭhaṃtīṣu ca daurgatyasaṃtaptāsu caturmukha || 86 ||
[Analyze grammar]

āgamiṣyati yogātmā dālbhyonāma mahātapāḥ |
tāstamarghyeṇa saṃpūjya praṇipatya punaḥpunaḥ || 87 ||
[Analyze grammar]

lālapyamānā bahuśo vāṣpaparyākulekṣaṇāḥ |
smaraṃtyo vividhānbhogāndivyamālyānulepanān || 88 ||
[Analyze grammar]

bharttāraṃ jagatāmīśamanaṃtamaparājitam |
divyānubhāvāṃ ca purīṃnānāratnagṛhāṇi ca || 89 ||
[Analyze grammar]

dvārakāvāsinaḥ sarvāndevarūpānkumārakān |
praśnametaṃ kariṣyaṃti munerabhimukhaṃsthitāḥ || 90 ||
[Analyze grammar]

dasyumirbhagavansarvāḥ paribhuktā vayaṃ balāt |
svadharmaścyāvitosmākamasminnaḥ śaraṇaṃ bhavān || 91 ||
[Analyze grammar]

ādiṣṭosi purā brahmankeśavena ca dhīmatā |
kasmādīśena saṃyogaṃ prāpya veśyātvamāgatāḥ || 92 ||
[Analyze grammar]

veśyānāmapi yo dharmastaṃ no brūhi tapodhana |
kathayiṣye vadattāsāṃ yaddālbhyaścaikitāyanaḥ || 93 ||
[Analyze grammar]

dālbhya uvāca |
jalakrīḍāvihāreṣu purā sarasi mānase |
bhavatīnāṃ sagarvāṇāṃ nāradobhyāśamāgataḥ || 94 ||
[Analyze grammar]

hutāśanasutāḥ sarvā bhavatyopsarasaḥ purā |
apraṇamyāvalepena paripṛṣṭaḥ sa yogavit || 95 ||
[Analyze grammar]

kathaṃ nārāyaṇosmākaṃ bharttā syādityupādiśa |
tasmādvarapradānaṃ ca śāpaścāyamabhūtpurā || 96 ||
[Analyze grammar]

śayyādvayapradānena madhumādhavamāsayoḥ |
suvarṇopaskarotsaṃgaṃ dvādaśyāṃ śuklapakṣataḥ || 97 ||
[Analyze grammar]

bhartā nārāyaṇo nūnaṃ bhaviṣyatyanyajanmani |
yadakṛtvā praṇāmaṃ me rūpasaubhāgyamatsarāt || 98 ||
[Analyze grammar]

paripṛṣṭosmi tenāśu viyogo vo bhaviṣyati |
corairapahṛtāḥ sarvā veśyātvaṃ samavāpsyatha || 99 ||
[Analyze grammar]

evaṃ nāradaśāpena keśavasya ca śāpataḥ |
veśyātvamāgatāḥ sarvā bhavatyaḥ kāmamohitāḥ || 100 ||
[Analyze grammar]

idānīmapi yadvakṣye tacchraṇudhvaṃ varāṃganāḥ |
purā daivāsure yuddhe hateṣu śataśaḥ suraiḥ || 101 ||
[Analyze grammar]

dānavāsuradaityeṣu rākṣaseṣu tatastataḥ |
teṣāṃ dārasahasrāṇi śataśotha sahasraśaḥ || 102 ||
[Analyze grammar]

pariṇītāni yāni syurbalādbhuktāni yāni vai |
tāni sarvāṇi deveśaḥ provāca vadatāṃ varaḥ || 103 ||
[Analyze grammar]

veśyādharmeṇa vartadhvamadhunā nṛpamaṃdire |
bhaktimatyo varārohāstathā devakuleṣu ca || 104 ||
[Analyze grammar]

rājataḥ svāminaścāpi jīvikāṃ ca pralapsyatha |
bhaviṣyati ca saubhāgyaṃ sarvāsāmapi śaktitaḥ || 105 ||
[Analyze grammar]

yaḥ kaścicchulkamādāya gṛhameṣyati vaḥ sadā |
niśchadmanaivopacaryaḥ prītibhāvairadāṃbhikaiḥ || 106 ||
[Analyze grammar]

devatānāṃ pitṝṇāṃ ca puṇyehni samupasthite |
gobhūhiraṇyadhānyāni pradeyāni ca śaktitaḥ || 107 ||
[Analyze grammar]

yadvrataṃ copadekṣyāmi tatkurudhvaṃ ca sarvaśaḥ |
saṃsārottāraṇāyālametadvedavido viduḥ || 108 ||
[Analyze grammar]

yadā sūryadine hastaḥ puṣyo vātha punarvasuḥ |
bhavetsarvauṣadhisnānaṃ samyaknārī samācaret || 109 ||
[Analyze grammar]

tadā paṃcaśarātmā tu harissannidhimeṣyati |
arcayetpuṃḍarīkākṣamanaṃgasyānukīrtanaiḥ || 110 ||
[Analyze grammar]

kāmāya pādau saṃpūjya jaṃghe vai mohakāriṇe |
meḍhraṃ kaṃdarpanidhaye kaṭiṃ prītimate namaḥ || 111 ||
[Analyze grammar]

nābhiṃ saukhyasamudrāya vāmanāya tathodaram |
hṛdayaṃ hṛdayeśāya stanāvāhlādakāriṇe || 112 ||
[Analyze grammar]

utkaṃṭhāyeti vai kaṃṭhamāsyamānaṃdakāriṇe |
vāmāṃsaṃ puṣpacāpāya puṣpabāṇāya dakṣiṇam || 113 ||
[Analyze grammar]

mānasāyeti vai māli vilolāyeti mūrddhajam |
sarvātmane śirastadvaddevadevasya pūjayet || 114 ||
[Analyze grammar]

namaḥ śivāya śāṃtāya pāśāṃkuśadharāya ca |
gadine pītavastrāya śaṃkhacakradharāya ca || 115 ||
[Analyze grammar]

namo nārāyaṇāyeti kāmadevātmane namaḥ |
namaḥ śāṃtyai namaḥ prītyai namāretyai namaḥ śriyai || 116 ||
[Analyze grammar]

namaḥ puṣṭyai namastuṣṭyai namaḥ sarvārthasaṃpade |
evaṃ saṃpūjya goviṃdamanaṃgātmakamīśvaram || 117 ||
[Analyze grammar]

gaṃdhamālyaistathā dhūpairnaivedyena ca bhāminī |
tata āhūya dharmajñaṃ brāhmaṇaṃ vedapāragam || 118 ||
[Analyze grammar]

avyaṃgamatha saṃpūjya gaṃdhapuṣpārcanādibhiḥ |
śāleyataṃḍulaprasthaṃ ghṛtapātreṇa saṃyutam || 119 ||
[Analyze grammar]

tasmai viprāya vai dadyānmādhavaḥ prīyatāmiti |
yatheṣṭāhārasaṃbhuktamenaṃ dvijamanuttamam || 120 ||
[Analyze grammar]

ratyarthaṃ kāmadevoyamiti citte ca dhārayet |
yadyadicchati vipreṃdrastattatkuryādvilāsinī || 121 ||
[Analyze grammar]

sarvabhāvena cātmānamarpayetsmitabhāṣiṇī |
evamādityavāreṇa sarvametatsamācaret || 122 ||
[Analyze grammar]

taṃḍulaprasthadānaṃ ca yāvanmāsāstrayodaśa |
tatastrayodaśe māsi saṃprāpte cāsya bhāminī || 123 ||
[Analyze grammar]

viprasyopaskarairyuktāṃ śayyāṃ dadyādvicakṣaṇā |
sopadhānāṃ savinyāsāṃ svāstarāvaraṇāṃ śubhām || 124 ||
[Analyze grammar]

dīpikopānahacchatra pādukāsanasaṃyutām |
sapatnīkamalaṃkṛtya hemasūtrāṃgulīyakaiḥ || 125 ||
[Analyze grammar]

sūkṣmavastraiḥ sakaṭakairdhūpamālyānulepanaiḥ |
kāmadevaṃ sapatnīkaṃ guḍakuṃbhoparisthitam || 126 ||
[Analyze grammar]

tāmrapātrāsanagataṃ hemanetrapaṭāvṛtam |
sukāṃsyabhājanopetamikṣudaṃḍasamanvitam || 127 ||
[Analyze grammar]

dadyādanena maṃtreṇa tathaikāṃ gāṃ payasvinīm |
yathāṃtaraṃ na paśyāmi kāmakeśavayoḥ sadā || 128 ||
[Analyze grammar]

tathaiva sarvakāmāptirastu vipra sadā mama |
tathā ca kāṃcanaṃ devaṃ pratigṛhya dvijottamaḥ || 129 ||
[Analyze grammar]

kodātkāmodāditi vaidikaṃ maṃtramudīrayet |
tataḥ pradakṣiṇīkṛtya visṛjya dvijapuṃgavam || 130 ||
[Analyze grammar]

śayyāsanādikaṃ sarvaṃ brāhmaṇasya gṛhaṃ nayet |
tataḥ prabhṛti yo'nyopi ratyarthaṃ gehamāgataḥ || 131 ||
[Analyze grammar]

sammānya sūryavāreṇa sa saṃpūjyo bhavetsadā |
evaṃ trayodaśaṃ yāvanmāsamekaṃ dvijottamam || 132 ||
[Analyze grammar]

tarpayitvā yathākāmaṃ preṣayeccaiva maṃdiram |
tadanujñayā rūpavaṃtaṃ yāvadasyāgamo bhavet || 133 ||
[Analyze grammar]

ātmanopi yadā vighnaṃ garbhasūtakarājakam |
daivaṃ vā mānuṣaṃ vā syāduparāgeṇa vā tataḥ || 134 ||
[Analyze grammar]

sāvārā naṣṭapaṃcāśadyathāśakti samarpayet |
etaddhi kathitaṃ samyagbhavatīnāṃ viśeṣataḥ || 135 ||
[Analyze grammar]

svadharmoyaṃ yato bhāvyo veśyānāmiha sarvadā |
śayyayā tyajyate deva na kadācidyathā bhavān || 136 ||
[Analyze grammar]

śayyā mamāpyaśūnyeyaṃ tathāstu madhusūdana |
gītavāditranirghoṣaṃ devadevasya kārayet || 137 ||
[Analyze grammar]

etadvaḥ kathitaṃ sarvaṃ veśyādharmamaśeṣataḥ |
puruhūtena yatproktaṃ dānavīṣu purā mayā || 138 ||
[Analyze grammar]

tadidaṃ sāṃprataṃ sarvaṃ bhavatīṣvapi yujyate |
sarvapāpapraśamanamanaṃtaphaladāyakam || 139 ||
[Analyze grammar]

kalyāṇinīnāṃ kathitaṃ tadetadduścaraṃ vratam |
karoti yā'śeṣamudagrametatkalyāṇinī mādhavalokasaṃsthā || 140 ||
[Analyze grammar]

sā pūjitā devagaṇairaśeṣairānaṃdakṛtsthānamupaiti viṣṇoḥ |
tapodhanaḥ sopyabhidhāya caitadanaṃgadānavratamaṃganānām || 141 ||
[Analyze grammar]

svasthānameṣyaṃti samastamitthaṃ vrataṃ kariṣyaṃti ca devayone || 142 ||
[Analyze grammar]