Chapter 252

pāṣāṇopakhyāne piśācaprasaṅgena jagadbrahmaṇoraikyapratipādanaṃ nāma sargaḥ |
dvipañcāśaduttaradviśatatamaḥ sargaḥ |
vasiṣṭhaḥ |
tataścidākāśavapurbhūtapañcakavarjitaḥ |
viharannahamākāśe piśāca iva saṃsthitaḥ || 1 ||
[Analyze grammar]

na māṃ paśyanti candrārkaśakrā hariharādayaḥ |
na devasiddhagandharvakinnarā nāpsarogaṇāḥ || 2 ||
[Analyze grammar]

nākrāmanti mayākrāntā na ca śṛṇvanti madvacaḥ |
ityahaṃ mohamāpanno vikrīta iva sajjanaḥ || 3 ||
[Analyze grammar]

atha cintitavānasmi satyakāmā ime vayam |
paśyantu māṃ suragaṇāstena tasmin surālaye || 4 ||
[Analyze grammar]

draṣṭuṃ pravṛttā māmagre vāstavyāḥ sarva eva te |
jhagityeva puraḥ prāptamindrajāladrumaṃ yathā || 5 ||
[Analyze grammar]

atha gīrvāṇageheṣu sampanno vyavahāryaham |
yathāsthitasamācāraḥ sthito niśśaṅkaceṣṭitaḥ || 6 ||
[Analyze grammar]

yairavijñātavṛttāntairdṛṣṭo'hamajirotthitaḥ |
vasiṣṭhaḥ pārthiva iti lokeṣu prathito'smi taiḥ || 7 ||
[Analyze grammar]

vātātsamudito dṛṣṭo yairahaṃ gaganāspade |
siddhairvātavasiṣṭhākhyastairahaṃ samudāhṛtaḥ || 8 ||
[Analyze grammar]

vyomanyādityaraśmibhyo dṛṣṭo'haṃ yairnabhogataiḥ |
vasiṣṭhastaijasa iti lokeṣu prathito'smi taiḥ || 9 ||
[Analyze grammar]

yairahaṃ salilāddṛṣṭaḥ protthitastairmunīśvaraiḥ |
prokto vārivasiṣṭho'hamiti me janmasantatiḥ || 10 ||
[Analyze grammar]

tataḥ prabhṛti loke'haṃ pārthivaḥ prathitaḥ kvacit |
ammayaḥ kvacidanyeṣāṃ taijaso mārutaḥ kvacit || 11 ||
[Analyze grammar]

atha kālena me tatra tasminnevātivāhike |
ādhibhautikatā dehe rūḍhā gūḍhāntarikṣatā || 12 ||
[Analyze grammar]

yadetadātivāhitvamādhibhautikatā ca kham |
dvayamapyetadekātma tataḥ kacati me citiḥ || 13 ||
[Analyze grammar]

evamātmakacidvyomakacanātmāpyahaṃ nabhaḥ |
parameva nirākāraṃ yuṣmāsvākāravānapi || 14 ||
[Analyze grammar]

jīvanmukto vyavaharannapyāste brahmakhātmakaḥ |
tathaiva dehamukto'pi tiṣṭhati brahmamātrakam || 15 ||
[Analyze grammar]

mama na brahmatāpeti tādṛgvyavaharannapi |
asambhavādanyadṛśo yuṣmadādiṣvahaṃ tvaham || 16 ||
[Analyze grammar]

yathājñasya svapnanare nirjanmani nirākṛtau |
ādhibhautikatābuddhistathā me jagato'pi ca || 17 ||
[Analyze grammar]

evamevāvabhāsante sarva eva svayambhuvaḥ |
sargāśca na tu jāyante prajātā iva coditāḥ || 18 ||
[Analyze grammar]

eṣa so'hamihākāśavasiṣṭhaḥ puṣṭatāmiva |
gato'dya svātmano'bhyāsādbhavatāṃ cābhavasthitiḥ || 19 ||
[Analyze grammar]

ākāśātmāna evaite sarva eva svayambhuvaḥ |
yathā te manmanomātramime sargāstathaiva hi || 20 ||
[Analyze grammar]

ahamādirayaṃ sargastvaparijñānadoṣataḥ |
vetāla iva bālānāṃ gato vai vajrasāratām || 21 ||
[Analyze grammar]

parijñātastu kālena svalpenaivopaśāmyati |
vāsanātānavātsneho bandhau dūragate yathā || 22 ||
[Analyze grammar]

ghanatvamahamādyasya tathā sargasya śāmyati |
parijñānād yathā svapnanidherādeyabhāvanā || 23 ||
[Analyze grammar]

śāmyantīmāḥ parijñātāḥ sakalā dṛśyadṛṣṭayaḥ |
yathā marunadīvegavārigrahaṇabuddhayaḥ || 24 ||
[Analyze grammar]

mahārāmāyaṇaprāyaśāstraprekṣaṇamātrataḥ |
etadāsādyate nityaṃ kimetāvati duṣkaram || 25 ||
[Analyze grammar]

saṃsāravāsanābhāvarūpasatyā tu yasya dhīḥ |
mandā mokṣe nirākāṅkṣā sa śvā kīṭo'tha vānaraḥ || 26 ||
[Analyze grammar]

rāmaḥ |
bhogābhogaḥ kilāyaṃ yaḥ sa jīvanmuktabuddhinā |
kīdṛśo bhujyamānaḥ syātkīdṛksyānmaurkhyasevinā || 27 ||
[Analyze grammar]

vasiṣṭhaḥ |
mahārāmāyaṇaprāyaśāstraprekṣaṇamātrataḥ |
antaśśītalatodeti padārtheṣu himopamā || 28 ||
[Analyze grammar]

mokṣaśśītalacittatvaṃ bandhaḥ santaptacittatā |
etasminnapi nārthitvamaho lokasya mūrkhatā || 29 ||
[Analyze grammar]

ayaṃ prakṛtyā viṣayairvaśīkṛtaḥ parasparaṃ strīdhanalolubho janaḥ |
yathārthasandarśanataḥ sukhībhavenmumukṣuśāstrārthavicāraṇādataḥ || 30 ||
[Analyze grammar]

vālmīkiḥ |
ityuktavatyatha munau divaso jagāma sāyantanāya vidhaye'stamino jagāma |
snātuṃ sabhā kṛtanamaskaraṇā jagāma śyāmākṣaye ravikaraiśca sahājagāma |
pāṣāṇopākhyāne vasiṣṭhaśarīravarṇanaṃ nāma sargaḥ |
samāpto'yaṃ pāṣāṇopākhyānakaḥ || 31 ||
[Analyze grammar]