Chapter 247

pāṣāṇopakhyāne dṛśyaprakāśatvapratipādanaṃ nāma sargaḥ |
saptacatvāriṃśaduttaradviśatatamaḥ sargaḥ |
rāmaḥ |
anantaraṃ vada brahmañjaganti bhavatā tadā |
bhūmaṇḍalānāṃ hṛdaye kaccitdṛṣṭāni vā na vā || 1 ||
[Analyze grammar]

vasiṣṭhaḥ |
parātmajāgratsvapnorvīmaṇḍalaughātmanā mayā |
tato'nubhūtaṃ hṛdaye dṛṣṭaṃ ca parayā dṛśā || 2 ||
[Analyze grammar]

yāvattathaiva sarvatra jagajjālamavasthitam |
sarvaṃ dṛśyamayaṃ śāntamapi dvaitamayātmakam || 3 ||
[Analyze grammar]

jaganti santi sarvatra sarvatra brahma saṃsthitam |
sarvaṃ śūnyaṃ paraṃ śāntaṃ sarvamārambhamantharam || 4 ||
[Analyze grammar]

sarvatraivāsti pṛthvyādi sthūlaṃ tacca na kiñcana |
cidvyomaiva yathā svapnapuraṃ paramajaṃ na tat || 5 ||
[Analyze grammar]

nehānānāsti no nānā na nāstitvaṃ na cāstitā |
ahamityeva naivāsti yatra tatra kuto'stu kim || 6 ||
[Analyze grammar]

anubhūtamapīdaṃ sadahamityādidṛśyakam |
nāstyeva yadi vāpyasti tadbrahmājamanāmakam || 7 ||
[Analyze grammar]

yatsvapnapuramevedaṃ sargādāveva vinnabhaḥ |
astitānāstite tatra kīdṛśe kva kutaḥ sthite || 8 ||
[Analyze grammar]

yathāhaṃ dṛṣṭavāṃstāni jagantyavanirūpadhṛt |
tathā mayā jalībhūya dṛṣṭaṃ tādṛśameva tat || 9 ||
[Analyze grammar]

vāridhāraṇayā vāri bhūtvā jaḍamivājaḍam |
samudramandireṣvantaściraṃ gulagulāyitam || 10 ||
[Analyze grammar]

tṛṇavṛkṣalatāgulmavallīnāṃ stambhanāḍiṣu |
mṛdvalakṣitamārūḍhaṃ tavāṅgeṣviva yūkayā || 11 ||
[Analyze grammar]

sarvotthānopamā stambhe tacchede valayopamā |
mṛdvyā karṇāhigatyeva racanābhre kṛtodare || 12 ||
[Analyze grammar]

vallītamālatālādipallaveṣu phaleṣu ca |
viśramya puṣṭayākṛtyā rekhāviracanaṃ kṛtam || 13 ||
[Analyze grammar]

mukhenāviśya hṛdayamṛtuvaidhuryadhāriṇā |
vṛtā vidhuritā bhuktā lūnā deheṣu dhātavaḥ || 14 ||
[Analyze grammar]

suptaṃ pallavatalpeṣu prāleyakaṇarūpiṇā |
tulyakālamaśeṣeṣu dikṣu sarvāsvakhedinā || 15 ||
[Analyze grammar]

nānāhradanadīgehagāmināviratādhvanā |
viśrāntaṃ setusuhṛdaḥ prasādena kvacitkvacit || 16 ||
[Analyze grammar]

vidā vidanusandhānājjaḍena tadanāśrayāt |
jalāśayeṣūllasitaṃ jalenāvartavṛttinā || 17 ||
[Analyze grammar]

mayā duṣkṛtinevordhvācchilāstambhena bhūbhṛtām |
sāvartavṛttinā śvabhrapāteṣu śatadhā gatam || 18 ||
[Analyze grammar]

dhūmarūpeṇa nirgatya dārubhyo gaganārṇave |
kaṇaratnena nīlarkṣamaṇāvāvartinā sthitam || 19 ||
[Analyze grammar]

viśrāntamabhrapīṭheṣu vidyudvanitayā saha |
bhinnendranīlanīlena śeṣāṅgeṣviva śauriṇā || 20 ||
[Analyze grammar]

paramāṇumaye sarge piṇḍarūpeṣvalakṣitam |
sthitamantaḥ padārtheṣu brahmaṇevābilātmanā || 21 ||
[Analyze grammar]

prāpya jihvāṇubhiḥ saṅgamanubhūtiḥ kṛtottamā |
yā nātmano na dehasya manye jñānasya kevalam || 22 ||
[Analyze grammar]

na mayā na ca dehena nānyenāsvāditātma yat |
tadantarvidhṛtaṃ śaityamajñānāya tadapyasat || 23 ||
[Analyze grammar]

sarvarturasarūpeṇa nānāmodāni dikṣvalam |
bhuktāni puṣpajālāni procchiṣṭaṃ dadatālaye || 24 ||
[Analyze grammar]

caturdaśaprakārāṇāṃ bhūtānāmaṅgasandhiṣu |
uṣitaṃ cetaneneva jaḍenāpyajaḍātmanā || 25 ||
[Analyze grammar]

śīkarotkararūpeṇa rathamāruhya mārutam |
āmodeneva vihṛtaṃ vimalavyomavīthiṣu || 26 ||
[Analyze grammar]

rāma tasyāmavasthāyāṃ paramāṇukaṇaṃ prati |
anubhūtamaśeṣeṇa yathāsthitamidaṃ jagat || 27 ||
[Analyze grammar]

ajaḍena jaḍeneva mayā jalatayā tayā |
antaḥ sarvapadārthānāṃ jñātājñātena saṃsthitam || 28 ||
[Analyze grammar]

jagatāṃ tatra lakṣāṇi nāśotpādaśatāni ca |
mayā dṛṣṭāni rūḍhāni kadalīdalapīṭhavat || 29 ||
[Analyze grammar]

evaṃ jagaccājagadvā sākāraṃ vā nirākṛti |
cinmātragaganaṃ sarvamākāśādhikanirmalam || 30 ||
[Analyze grammar]

na kaścana tvaṃ na ca kiñcanedaṃ śuddhaḥ paro bodha idaṃ vibhāti |
sa cāpi no kiñcana nāpi śūnyamākāśamevāsi viśaṅkamāssva || 31 ||
[Analyze grammar]