Chapter 214

ākāśamandire vasiṣṭhasamādhānaṃ nāma sargaḥ |
caturdaśottaradviśatatamaḥ sargaḥ |
rāmaḥ |
tvāmapyuditanirvāṇamahaṅkārapiśācakaḥ |
bādhate kimiti brūhi mune manmohaśāntaye || 1 ||
[Analyze grammar]

vasiṣṭhaḥ |
ahambhāvaṃ vinā dehasthitistajjñājñayoriha |
ādheyasya nirādhārā na saṃsthevopapadyate || 2 ||
[Analyze grammar]

ayaṃ tvatra viśeṣastaṃ śṛṇu viśrāntacetasaḥ |
śrutena yenāhambhāvapiśācaśśāntimeti te || 3 ||
[Analyze grammar]

ahambhāvapiśāco'yamajñānaśiśunāmunā |
avidyamāna evāntaḥ kalpitastena sūtthitaḥ || 4 ||
[Analyze grammar]

ajñānamapi nāstyeva prekṣitaṃ yanna labhyate |
vicāriṇā dīpavatā svarūpaṃ tamaso yathā || 5 ||
[Analyze grammar]

yathā yathā vilokyate tathā tathā vilīyate |
ihājñatāpiśācikā tathāvicāritā satī || 6 ||
[Analyze grammar]

vilasantyāmavidyāyāmajñatodeti śāśvatī |
buddhimohātmikā yakṣī nirdehaiva yathā niśi || 7 ||
[Analyze grammar]

sati sarge tvavidyāyāḥ sambhavo nāsati kvacit |
sati dvitīye śaśini dvitīyo vidyate śaśaḥ || 8 ||
[Analyze grammar]

sargastvayamajātatvādajñajñāto na vidyate |
na jātaḥ kāraṇābhāvātpūrvameva khavṛkṣavat || 9 ||
[Analyze grammar]

paramākāśakośāntarādisarge nirāmaye |
pṛthvyāderupalambhasya bhavetkimiva kāraṇam || 10 ||
[Analyze grammar]

bījātkāraṇataḥ kāryamaṅkuraḥ kila jāyate |
na bījamapi yatrāsti tatra syādaṅkuraḥ kutaḥ || 11 ||
[Analyze grammar]

kāraṇena vinā kāryaṃ na ca nāmopapadyate |
kadā ka iva khe kena dṛṣṭo labdhaḥ sphuṭo drumaḥ || 12 ||
[Analyze grammar]

saṅkalpenāmbare yadvā dṛśyate viṭapādikam |
sa saṅkalpastathābhūto na tvatrāsti padārthatā || 13 ||
[Analyze grammar]

yo'yamevaṃ cidākāśe sargādāvanubhūyate |
śūnye kūpa ivākāśaḥ sargaḥ sthitinirargalaḥ || 14 ||
[Analyze grammar]

sama eva cidākāśaḥ kacatyātmani tattayā |
svabhāva eva sargākhyaścittvāccaitanyamīśvaraḥ || 15 ||
[Analyze grammar]

svapnasargo'tra dṛṣṭāntaḥ pratyahaṃ yo'nubhūyate |
svayaṃ saṃvedanaṃ svapne sphuratyadripurākṛti || 16 ||
[Analyze grammar]

citsvabhāvo yathā svapna āste sarga iveha vaḥ |
asarge sargavadbhātastathā pūrvaṃ mahāmbare || 17 ||
[Analyze grammar]

avedyaṃ vedanaṃ śuddhameva bhātyajamavyayam |
sargādau yadanādyantaṃ sthitaḥ sargaḥ sa eva vaḥ || 18 ||
[Analyze grammar]

neha sargo'sti naivāyaṃ pṛthvyādigaṇagolakaḥ |
sarvaṃ śāntamanālambaṃ brahmaiva brahmaṇi sthitam || 19 ||
[Analyze grammar]

sarvaśaktyātma tadbrahma yathā kacati yādṛśam |
rūpamatyajadevācchaṃ tathā bhavati tādṛśam || 20 ||
[Analyze grammar]

yathā svapnapuraṃ jantościnmātrapravijṛmbhitam |
tathaiva sargaḥ sargādau śuddhacinmātrajṛmbhitaḥ || 21 ||
[Analyze grammar]

svacche citparamākāśe cidākāśo ya āsthitaḥ |
svabhāva eva sargo'sāviti tenaiva bhāvitaḥ || 22 ||
[Analyze grammar]

bhāvyabhāvakabhāvādibhūmīnāṃ bhavanaṃ bhṛśam |
sarvaṃ cinnabha evācchamātmanātmani saṃsthitam || 23 ||
[Analyze grammar]

evaṃ sthite kutaḥ sargaḥ kuto'vidyā kva cājñatā |
brahma śāntaṃ ghanaṃ sarvaṃ kvāhaṅkārādayaḥ sthitāḥ || 24 ||
[Analyze grammar]

ahambhāvasya saṃśāntireṣāsau kathitā tava |
ahambhāvaḥ parijñātaḥ piśāca iva śāmyati || 25 ||
[Analyze grammar]

mayā tvevamahambhāvaḥ parijñāto yadākhilaḥ |
tadā me vidyamāno'pi niṣphalaśśaradabhravat || 26 ||
[Analyze grammar]

citrāgnidāho vijñāto yathā dāhyeṣu niṣphalaḥ |
tathāhambhāvasargādi jñātaṃ viphalatāmiyāt || 27 ||
[Analyze grammar]

iti me'haṅkṛtestyāge rāge ca samatā yadi |
tadā vyomna iva vyomni sarge'sarge ca me sthitiḥ || 28 ||
[Analyze grammar]

ahambhāvasya naivāhaṃ nāhambhāvo mameti ca |
tena viddhi cidākāśamevedamiti nirghanam || 29 ||
[Analyze grammar]

yathā mama tathānyeṣāmiti bodhavatāmiha |
agnitvamiva citrāgnernāstyahambodhavibhramaḥ || 30 ||
[Analyze grammar]

nāhamasmi na cānyo'sti sarvaṃ vāstītiniścayaḥ |
prakṛtavyavahārastvaṃ śilāmaunamayo bhava || 31 ||
[Analyze grammar]

ākāśakośaviśadākṛtireva tiṣṭha nirdehavacciramapahnutasarvabhāvaḥ |
adyāditaśca kila cinmayameva sarvaṃ no dṛśyamasti śivamevamaśeṣamittham || 32 ||
[Analyze grammar]