Chapter 194

saṃsārabījakathanaṃ nāma sargaḥ |
caturnavatyuttaraśatatamaḥ sargaḥ |
vasiṣṭhaḥ |
icchāviṣavikārasya prayogaṃ yoganāmakam |
śāntaye śṛṇu bhūyo'pi pūrvamuktamapi sphuṭam || 1 ||
[Analyze grammar]

ātmano vyatiriktaṃ cedvidyate tadihecchayā |
iṣyatāmasati tvevaṃ svātmānyatve kimiṣyate || 2 ||
[Analyze grammar]

nirbhāgāvayavā sūkṣmā vyomnaśśūnyataraiva cit |
saivāhaṃ jagadāśāśca satī kiṃ tattayeṣyate || 3 ||
[Analyze grammar]

sā vyomarūpā vyomnyeva vettīvāvedyavedanā |
vyomātma jagadābhāsamatrecchāviṣayo'sti kaḥ || 4 ||
[Analyze grammar]

grāhyagrāhakasambandhaḥ kutaścediti tanna naḥ |
vidyate'sau prasaktānāṃ yeṣāmasti na vedmi tān || 5 ||
[Analyze grammar]

grāhyagrāhakasambandhaḥ svaniṣṭho'pi na labhyate |
asatastu kathaṃ lābhaḥ kena labdho'sitaśśaśī || 6 ||
[Analyze grammar]

eṣaiva grāhakādīnāṃ sattā yannāma niṣṭhatā |
svabhāvaprekṣayāsatyā na jāne kva prayānti te || 7 ||
[Analyze grammar]

eṣa eva svabhāvo yaddraṣṭṛdṛśyadṛśo'khilāḥ |
jñātvāsatyā vinirvāṇamahantātmani gacchati || 8 ||
[Analyze grammar]

nirvāṇe nāsti dṛśyādi dṛśyādau nāsti nirvṛtiḥ |
mitho'nayoranubhavo na cchāyātapayoriva || 9 ||
[Analyze grammar]

ubhe ete mitho'satyamasatyaivātra nirvṛtiḥ |
yato nirvāṇamajaramaduḥkhamanubhūyate || 10 ||
[Analyze grammar]

bhramabhūtaṃ tu dṛśyādi nityānantasukhapradam |
asacca tadbhāvyatāṃ mā nirvāṇe sthīyatāmaje || 11 ||
[Analyze grammar]

śuktikārupyasadṛśaṃ prekṣitaṃ yanna labhyate |
arthakāryapi tannāsti kimatrāpahnavena vaḥ || 12 ||
[Analyze grammar]

tatsadbhāvānmahadduḥkhamasadbhāvānmahatsukham |
abhāvaḥ sopapattistu dṛḍhatāṃ yāti bhāvanāt || 13 ||
[Analyze grammar]

tatkimātmani bandhāya vidadhadhvaṃ narādhamāḥ |
spaṣṭa evopacayade vastunyastamitāpadi || 14 ||
[Analyze grammar]

kāryakāraṇatādyasmin saṃvinmātrātmake tate |
mārgayantyaprabodhādyetairmṛgairalamastu naḥ || 15 ||
[Analyze grammar]

vyomarūpe kilaikasmin sarvātmani tate sati |
kāryakāraṇatādyānāmuktīnāmeva kaḥ kramaḥ || 16 ||
[Analyze grammar]

yo hetuḥ spandane vāyordravatve salilasya ca |
śūnyatve nabhasaḥ so'sya sargāditve cidātmanaḥ || 17 ||
[Analyze grammar]

kāryakāraṇabhāvādi brahmaiva sakalaṃ yadi |
tadā brahmaṇi sargāṇāṃ kāraṇārthī vilajjatām || 18 ||
[Analyze grammar]

na duḥkhamasti na sukhaṃ śāntaṃ śivamayaṃ jagat |
nāsti vinmātratānyatvamata icchodayaḥ kutaḥ || 19 ||
[Analyze grammar]

mṛddehayodhasenāyāṃ na mṛṇmātretarad yathā |
na sajjagadahantādau dṛśye brahmetarattathā || 20 ||
[Analyze grammar]

rāmaḥ |
evaṃ cettadudetvicchā mā vodetu munīśvara |
sā tu brahmaiva ko'rthaḥ syādasyā vidhiniṣedhanaiḥ || 21 ||
[Analyze grammar]

vasiṣṭhaḥ |
jñatāyāṃ samprabuddhāyāmicchā brahmaiva netarat |
yathāsi buddhavān rāma tatsatyaṃ kiṃ tvidaṃ śṛṇu || 22 ||
[Analyze grammar]

yadā yadā jñatodeti śāmyatīcchā tadā tadā |
vastusvabhāvādudayatyāditye yāminī yathā || 23 ||
[Analyze grammar]

yathā yathodayo jñapterdvaitaśāntistathā tathā |
vāsanāvilayaścaiva kathamicchodayo bhavet || 24 ||
[Analyze grammar]

tasyāvidyopaśānteyaṃ nirmalā muktatoditā |
aśeṣadṛśyavairasyād yasyecchodeti na kvacit || 25 ||
[Analyze grammar]

viraktatāsya no dṛśye na cāpyatrāsya raktatā |
kevalaṃ jñāya dṛśyaśrīḥ svadate na svabhāvataḥ || 26 ||
[Analyze grammar]

kākatalīyayogena parapreraṇayātha vā |
yadi kiñcitkadācicca samyagicchati vā na vā || 27 ||
[Analyze grammar]

tadasya secchānicchā ca brahmaivātra na saṃśayaḥ |
icchāyāṃ jñāyate jñasyāvaśyameva tu tānavam || 28 ||
[Analyze grammar]

jñatā ceduditā jantostadicchāsyopaśāmyati |
naitayoḥ sthitirekatra prakāśatamasoriva || 29 ||
[Analyze grammar]

pratiṣedhavidhīnāṃ tu tajjño na viṣayaḥ kvacit |
śāntasarvaiṣaṇecchasya ko'sya kiṃ vakti kiṃkṛte || 30 ||
[Analyze grammar]

etadeva jñatācihnaṃ yadicchāsvatitānavam |
hlādanaṃ sarvalokānāmathānudaya eva vā || 31 ||
[Analyze grammar]

dṛśyaṃ virasatāṃ yātaṃ yadā na svadate kvacit |
tadā necchā prasarati tadaiva ca vimuktatā || 32 ||
[Analyze grammar]

bodhādanaikyamadvaitaṃ yaśśāntamavatiṣṭhate |
icchānicchādayaḥ sarve bhāvāstasya śivātmakāḥ || 33 ||
[Analyze grammar]

bodhādastamitadvaitamadvaitādaikyavarjitam |
yaḥ svaccho vigatavyagraśśānta ātmanyavasthitaḥ || 34 ||
[Analyze grammar]

naiva tasya kṛtenārtho na satā nāsatā sadā |
na cātmanā na cānyena naitairmaraṇajīvitaiḥ || 35 ||
[Analyze grammar]

icchā ca tasya nodeti nirvāṇasya prabodhinaḥ |
yadi vodeti tatsvacchā brahma śāśvatameva sā || 36 ||
[Analyze grammar]

na duḥkhamasti na sukhaṃ śāntaṃ śivamajaṃ jagat |
iti yo'ntaśśilevāste taṃ prabuddhaṃ vidurbudhāḥ || 37 ||
[Analyze grammar]

duḥkhaṃ sukhaṃ bhāvanayā kurvanviṣamivāmṛtam |
iti niścayadhīrātmā prabuddha iti kathyate || 38 ||
[Analyze grammar]

tatsthitaṃ vyomani vyoma śānte śāntaṃ śive śivam |
śūnye śūnyaṃ sati ca sad yadbrahmaṇi jagatsthitam || 39 ||
[Analyze grammar]

asaṃvedanasaṃvitkhe tate viśvamiti sthite |
somye samasame śānte śive'hantābhramaḥ kṣayī || 40 ||
[Analyze grammar]

yadidaṃ dṛśyate kiñcijjagatsthāvarajaṅgamam |
tatsarvaṃ śāntamākāśaṃ paracintāpuropamam || 41 ||
[Analyze grammar]

paracintāpuro madhye gatavighnaṃ gamāgamau |
yathā stastava śūnyatvāttathaivāsmiñjagadbhrame || 42 ||
[Analyze grammar]

adridyūrvīnadīśābhā śūnyatātmani jṛmbhate |
adraṣṭṛdṛśyakaraṇaṃ mṛgatṛṣṇāmbuvīcivat || 43 ||
[Analyze grammar]

svapnanirmāṇapuravadbālavetālatālavat |
yadidaṃ dṛśyate tatra kiṃ kilāsatyatetarat || 44 ||
[Analyze grammar]

asatyamevāhamiti bhāsate satyameva ca |
bhrāntibhājaṃ vinaiveyaṃ bhrāntiḥ sphurati sāsatī || 45 ||
[Analyze grammar]

nāsanna sanna sadasatkimapīdamatīndriyam |
avācyaṃ jagadityeva bhātyavikṣubhitaṃ khavat || 46 ||
[Analyze grammar]

ihecchānicchate jñasya śamād yadyapyalaṃ same |
tathāpi śreyase manye nanvanicchodayaṃ sphuṭam || 47 ||
[Analyze grammar]

ahaṃ jagaditi jñaptiḥ khe khasyeveyamāsthitā |
cidātmano yathā vāyoḥ spando nātrāsti kāraṇam || 48 ||
[Analyze grammar]

citaścetyonmukhatvaṃ yattaccittaṃ saiva saṃsṛtiḥ |
secchā tanmuktatā muktiryuktiṃ jñātveti śāmyatām || 49 ||
[Analyze grammar]

icchā bhavatvanicchā vā sargo'stu pralayo'stu vā |
kṣatirna kasyacitkācinna ca kiñcidihāsti hi || 50 ||
[Analyze grammar]

icchānicche sadasatī bhāvābhāvau sukhāsukhe |
ityatra kalpanā vyomni sambhavanti na kāścana || 51 ||
[Analyze grammar]

icchānāṃ tānavaṃ yasya dinānudinamāgatam |
vivekaśamatṛptasya tamāhurmokṣabhāginam || 52 ||
[Analyze grammar]

icchākṣurikayā viddhe hṛdi śūlaṃ pravartate |
jayanti yatra naitāni maṇimantrauṣadhāni vaḥ || 53 ||
[Analyze grammar]

yaḥ kāryakāraṇādyūhān kṛtavānpūrvameva tam |
satprekṣayā na paśyāmo mithyābhramabharādṛte || 54 ||
[Analyze grammar]

bhramabhūtena kurmaścedvyavahāramavastunā |
tatkasmātparacintādriḥ kavalatvaṃ na nīyate || 55 ||
[Analyze grammar]

asatā vyavahāraścetprekṣāmātravināśinā |
kriyate śaśaśṛṅgeṇa tatkathaṃ cchādyate na kham || 56 ||
[Analyze grammar]

ahambhāvāccidākāśo jāḍyātiśayataḥ kṣaṇāt |
pāṣāṇatāṃ jalamiva manastvād yāti dehatām || 57 ||
[Analyze grammar]

cittvādanubhavatyetāmasatyāmeva dehitām |
avinaṣṭaiva cicchaktiḥ svapne svamaraṇaṃ yathā || 58 ||
[Analyze grammar]

vyomnyasatyamavastutvātsatyaṃ cānubhavād yathā |
nīlatvaṃ tadvadīśe'smin sargo nāsanna sanmayaḥ || 59 ||
[Analyze grammar]

yathā śūnyatvanabhasoryathā spandanabhasvatoḥ |
bhedo nāsti tathā sargabrahmaṇorekarūpayoḥ || 60 ||
[Analyze grammar]

neha sañjāyate kiñcijjagadādi na naśyati |
svapno nidrāgatasyeva kevalaṃ pratibhāsate || 61 ||
[Analyze grammar]

avidyamāne pṛthvyādau pratibhāmātrarūpiṇi |
sarge ka iva saṃrambhastyāgādānaiścidambare || 62 ||
[Analyze grammar]

na dehapratibhāto'sti buddhyādikaraṇānvitā |
kevalaṃ brahma cinmātramevamātmanyavasthitam || 63 ||
[Analyze grammar]

buddhyādeḥ karaṇatvaṃ ca dvaitaikyāsambhavānna sat |
anenedaṃ kriyata ityasyārthasyātyasambhavāt || 64 ||
[Analyze grammar]

aheturakramaṃ bhāti citi kalpakriyāgaṇaḥ |
kṣaṇenaiva yathā svapne mṛtijanmābdhisantarāḥ || 65 ||
[Analyze grammar]

khameva pṛthvī khaṃ śailāḥ khameva dṛḍhabhittayaḥ |
khameva lokāḥ spandaḥ khaṃ sargasaṃvedane citeḥ || 66 ||
[Analyze grammar]

vyomabhittau jagaccitraṃ cidraṅgamayamātatam |
nodeti nāstamāyāti na tāmyati na śāmyati || 67 ||
[Analyze grammar]

cidvāriṇi jagattuṅgataraṅgadravarūpiṇi |
kiṃ kadā kathamutpannaṃ kiṃ śāntaṃ ca kadā katham || 68 ||
[Analyze grammar]

śānte mahācidākāśe jagacchūnyatvaśālini |
cetyāsambhavataḥ santi nodayāstamayoktayaḥ || 69 ||
[Analyze grammar]

parvatā gaganāyante gaganaṃ parvatāyate |
saṃvedanaprayogeṇa brahmaṇaḥ sargatāsthitau || 70 ||
[Analyze grammar]

saṃviccūrṇaprayogeṇa nimeṣārdhena yoginaḥ |
kurvanti jagadākāśamākāśaṃ trijaganti hi || 71 ||
[Analyze grammar]

siddhasaṅkalpanagarāṇyasaṅkhyāni yathāmbare |
tathā sargasahasrāṇi santi tāni tu cinnabhaḥ || 72 ||
[Analyze grammar]

mahārṇave yathāvartā anyo'nyamapi miśritāḥ |
pṛthagevāvatiṣṭhante vyatiriktā na te tataḥ || 73 ||
[Analyze grammar]

sargātsargāntarāloko yaḥ prabuddhasya yoginaḥ |
siddhalokāntaraprāptiḥ saiveti vibudhoktayaḥ || 74 ||
[Analyze grammar]

avināśīni bhūtāni sthitāni parame śive |
vyomnīva śūnyatollāsāḥ sargavargā nirargalāḥ || 75 ||
[Analyze grammar]

paramārthanijāmodāḥ sahajāḥ sargavibhramāḥ |
nodyanti nopaśāmyanti lekhā iva śilodare || 76 ||
[Analyze grammar]

anyo'nyaṃ kusumāmodā militā apyamiśritāḥ |
vyomarūpāstathā sargā anyo'nyaṃ siddhabhūmayaḥ || 77 ||
[Analyze grammar]

saṅkalpākāśarūpatvātsarvārthānubhavasthiteḥ |
tanusaṅkalpamohānāṃ satyāśśāpavaroktayaḥ || 78 ||
[Analyze grammar]

na jñānavāditā satyā na ca bāhyārthavāditā |
yathāvedanametāni vedanāni phalanti vaḥ || 79 ||
[Analyze grammar]

citi cittvaṃ yadastyantarjagadityeva bhāti tat |
bhedo dravatvapayasoriva nātropapadyate || 80 ||
[Analyze grammar]

kālo jaganti bhuvanānyahamakṣavargastvetāni tatra ca tatheti ca sarvamekam |
cidvyoma śāntamajamavyayamīśvarātma rāgādayaḥ khalu na kecana sambhavanti || 81 ||
[Analyze grammar]