Chapter 140

nirvāṇavarṇanaṃ nāma sargaḥ |
catvāriṃśaduttaraśatatamaḥ sargaḥ |
rāmaḥ |
saptānāṃ yogabhūmīnāmabhyāsaḥ kriyate katham |
kīdṛśāni ca cihnāni bhūmikāṃ prati yoginaḥ || 1 ||
[Analyze grammar]

vasiṣṭhaḥ |
yataḥ kutaścitsampannamavidyāvyādhivedanam |
satyaṃ bhavatvasatyaṃ vā cikitsāṃ tvasya me śṛṇu || 2 ||
[Analyze grammar]

parādanantād yadyeṣā tattadeveyamakṣatam |
na jāteyaṃ na cāvidyā bodhamātrādbhavedataḥ || 3 ||
[Analyze grammar]

pakṣametamanādṛtya svasaṅkalpavilāsinaḥ |
satyāmapīhāvidyāyāṃ śṛṇu nirnāśane kramam || 4 ||
[Analyze grammar]

jantuḥ prathamajātastu suṣuptāvasthacetanaḥ |
bhāvibhāvanaduḥkhātmā krimisaṃvidbhavatyadhīḥ || 5 ||
[Analyze grammar]

bhaveccennavajātasya na bhāvī bhāvanodayaḥ |
sukhādisaṃvidā sadyastatsa eva paraṃ padam || 6 ||
[Analyze grammar]

etāvataiva sauṣuptī sthitirbhinnā parātpadāt |
yadbhāvivāsanaughāsau jaḍā copaladharmiṇī || 7 ||
[Analyze grammar]

turyāvasthāsamā svasthā sadrūpā śāntavāsanā |
jīvanmukteḥ sthitirato na suṣuptopamā bhavet || 8 ||
[Analyze grammar]

agrasthavastusambodhasantatābhyāsayogataḥ |
bālaḥ suṣuptāvasthāyāḥ kramānniryāti rāghava || 9 ||
[Analyze grammar]

kiñcijjātadhiyo jantordeśabhāṣārthavedinaḥ |
gṛhṇāmīdaṃ tyajāmīdamiti sañjāyate sthitiḥ || 10 ||
[Analyze grammar]

etāvanmātrabuddhiryaḥ svavṛddhajanagocaraḥ |
bhavetsvakarmaśāstrāṇāṃ viṣayo'sāvalaṃ vidheḥ || 11 ||
[Analyze grammar]

kulavṛddhaprayuktena svaniścayavataiva vā |
bhāvyaṃ padapadārthānāṃ tena tajjñena vai tataḥ || 12 ||
[Analyze grammar]

jantuḥ padapadārthajño heyaṃ tyajati tajjñadhīḥ |
upādeyamupādatte nālokayati madhyamam || 13 ||
[Analyze grammar]

vivekādvṛddhabhītyā vā śāstrārthavyavahāriṇaḥ |
vicārapūrvaṃ yasyehā sa pumāniti kathyate || 14 ||
[Analyze grammar]

pravṛttaśca nivṛttaśca bhavati dvividhaḥ pumān |
svargāpavargonmukhayośśṛṇu lakṣaṇametayoḥ || 15 ||
[Analyze grammar]

kimetannāma nirvāṇaṃ varaṃ saṃsṛtireva naḥ |
iti kartavyakartā yaḥ sa pravṛtta iti smṛtaḥ || 16 ||
[Analyze grammar]

calārṇavayugacchidrakūrmagrīvārpaṇopamā |
anekajanmāntarato bhāvinī tasya mokṣadhīḥ || 17 ||
[Analyze grammar]

asārā bata saṃsāravyavasthālaṃ mamaitayā |
kiṃ karmabhiḥ paryuṣitairdinaṃ taireva nīyate || 18 ||
[Analyze grammar]

kṣayātiśayanirmuktaṃ kiṃ syādviśramaṇaṃ param |
iti niścayavānyo'ntaḥ sa nivṛtta iti smṛtaḥ || 19 ||
[Analyze grammar]

sa vartamāna eveha janmani tvavivekini |
sa yogabhūmiṣvetāsu viṣayo viśadāśayaḥ || 20 ||
[Analyze grammar]

kathaṃ virāgavānbhūtvā saṃsārābdhiṃ tarāmyaham |
evaṃvicāraṇaparo yadā bhavati sanmatiḥ || 21 ||
[Analyze grammar]

sādhusaṅgamamādatte sacchāstramapi vīkṣate |
virāgamupayātyantarbhāvanāsvanuvāsaram || 22 ||
[Analyze grammar]

kriyāsūdārarūpāsu ramate mānamīhate |
grāmyāsu jaḍaceṣṭāsu calāsu vicikitsate || 23 ||
[Analyze grammar]

nodāharati marmāṇi puṇyaśarmāṇi ceṣṭate |
ananyodvegakārīṇi mṛdukarmāṇi sevate || 24 ||
[Analyze grammar]

snehapraṇayagarbhāṇi peśalānyucitāni ca |
deśakālopapannāni vacanānyabhibhāṣate || 25 ||
[Analyze grammar]

tadāsau prathamāmekāṃ prāpto bhavati bhūmikām |
vakṣyamāṇasvabhāvo'tha tatra rūḍhimupeṣyati || 26 ||
[Analyze grammar]

devāyatanadeśeṣu brāhmaṇāvasatheṣu ca |
vaneṣu ramate nityaṃ prathamāṃ bhūmikāmitaḥ || 27 ||
[Analyze grammar]

śāstrasajjanasamparkaiḥ prajñāṃ vardhayati svayam |
śuklapakṣaḥ kalāmindoriva saundaryaśālinīm || 28 ||
[Analyze grammar]

sarvāstivādanirataḥ peśalaḥ praṇayānvitaḥ |
manasā karmaṇā vācā sajjanānupasevate || 29 ||
[Analyze grammar]

kadarthalabdhāṃl labhyāṃśca tajjñānanusaraṃściram |
yataḥ kutaścidānīya nityaṃ śāstrāṇyavekṣate || 30 ||
[Analyze grammar]

vyālāpadhvaṃsanaśikhī dharmābdeśoccakandharaḥ |
snānadānatapodhyānavibhavānabhivāñchati || 31 ||
[Analyze grammar]

prathamāmityupāruhya dvitīyāmāśrayedbalāt |
puruṣārthādṛte nānyā saṅkaṭottaraṇe gatiḥ || 32 ||
[Analyze grammar]

evaṃ vicāravānyaḥ syātsaṃsārottaraṇaṃ prati |
sa bhūmikāvānityuktaśśeṣastvārya iti smṛtaḥ || 33 ||
[Analyze grammar]

āryatātulyatāṃ yātā prathamaikaiva bhūmikā |
bhūmikānāṃ tu śeṣāṇāmāryatā dāsyamarhati || 34 ||
[Analyze grammar]

vicāranāmnīmitarāmāgato yogabhūmikām |
udāramatirādatte svabhāvaṃ mahatāmiti || 35 ||
[Analyze grammar]

śrutismṛtisamācāradhāraṇādhyānakarmaṇām |
mukhyayā vyākhyayā khyātaṃ śrayati śreṣṭhapaṇḍitam || 36 ||
[Analyze grammar]

icchākutukabandheṣu jayatīndriyaśatruṣu |
ādehaṃ praharatsvantarvīreṣviva sudāruṇaḥ || 37 ||
[Analyze grammar]

kimapūrvāṃ jhagityenāṃ saṃśrayāmyanurāgiṇīm |
iti hrīmāniva hriyaṃ dayāṃ caiṣa na muñcati || 38 ||
[Analyze grammar]

padārthapravibhāgajñaḥ kāryākāryaviniścayam |
jānātyadhigataśravyo gṛhaṃ gṛhapatiryathā || 39 ||
[Analyze grammar]

madābhimānamātsaryalobhamohātiśāyitām |
bahirapyāsthitāmīṣattyajatyahiriva tvacam || 40 ||
[Analyze grammar]

candanāgurugandhīni vanitāliṅganānyapi |
aprārthitopayātāni sevate svānyanādaram || 41 ||
[Analyze grammar]

mātṛvatparadārāṇi paradravyāṇi loṣṭavat |
svātmavatsarvabhūtāni kāruṇyenābhipaśyati || 42 ||
[Analyze grammar]

yatkaroti yadaśnāti spandate yad yadīhate |
tadādau buddhibhedena ciraṃ cāru parīkṣate || 43 ||
[Analyze grammar]

avicārātmakaṃ naiti na gacchati na vakti ca |
na dadāti na cādatte na cinoti na copati || 44 ||
[Analyze grammar]

vyavahārānuvṛttyarthamaviruddhaṃ kṣaṇakṣayi |
harṣāmarṣāṃśamādatte gantevālātakaṃ niśi || 45 ||
[Analyze grammar]

durdeśaṃ duradhiṣṭhānaṃ dussaṅgaṃ durupāśrayam |
ālokyamapi dehādi liptaṃ tṛṇamivojjhati || 46 ||
[Analyze grammar]

yadudarkahitaṃ lokyaṃ yadanādhi gatabhramam |
tadeva hariṇo vātamiva maunī vidhāvati || 47 ||
[Analyze grammar]

hārihāsavilāsāsu hāvabhāvavatīṣu ca |
vīkṣate bhāvināśāsu strīṣu śuṣkalatāsviva || 48 ||
[Analyze grammar]

itthambhūtamatiśśāstraṃ gurusajjanasevanāt |
sarahasyamaśeṣeṇa yathāvadadhigacchati || 49 ||
[Analyze grammar]

asaṃsaṅgātmikāmanyāṃ tṛtīyāṃ yogabhūmikām |
tataḥ patatyasau kāntaḥ puṣpaśayyāmivāmalām || 50 ||
[Analyze grammar]

durvyākhyāmadhikavyākhyāmūnavyākhyāṃ vihāya dhīḥ |
yathāvacchāstravākyārthamādatte'syātra pāvanī || 51 ||
[Analyze grammar]

phalatyatrāsya śāstrārthaḥ kurvannantarasaṅgatām |
śikṣitaḥ sūpakārasya samyaksūpo raseṣviva || 52 ||
[Analyze grammar]

tāpasāśramaviśrāmaiḥ pāvanādhyātmasaṅkathaiḥ |
śilāśayyāsanāsīno jarayatyāyurātatam || 53 ||
[Analyze grammar]

vanāvanivihāreṇa cittopaśamaśobhinā |
asaṅgasukhasomyena kālaṃ nayati nītimān || 54 ||
[Analyze grammar]

na tathā ramayantyenaṃ jyotsnāprasarahāsinaḥ |
nivāsāḥ kusumākīrṇā yathā giriguhālayāḥ || 55 ||
[Analyze grammar]

devadvijaguruprājñapaṇḍitārcanabhojanaiḥ |
aparāhṇaṃ kṣapayati pūrvāhṇaṃ śrutasajjanaiḥ || 56 ||
[Analyze grammar]

antarāntarasampannadharmyārthopārjanakramaḥ |
santoṣāmṛtatṛptātmā sādhvācāreṇa rājate || 57 ||
[Analyze grammar]

sarasīṣvacchatoyāsu phullāsu nalinīṣu ca |
saritsu bahupuṇyāsu vāpīṣu ca nimajjati || 58 ||
[Analyze grammar]

āsannacandrakarakīrṇasudhārasāsu puṣpopakārasamasomyajalasthalāsu |
guñjadguhāsu ratamenamadhityakāsu vanyāḥ phalairupacaranti mahānubhāvam || 59 ||
[Analyze grammar]