Chapter 137

satyāvabodhayogopadeśo nāma sargaḥ |
saptatriṃśaduttaraśatatamaḥ sargaḥ |
vālmīkiḥ |
evaṃ vāsiṣṭhamākarṇya vaco vikasitāśayaḥ |
ucchvasanniva cittena rāmo vacanamabravīt || 1 ||
[Analyze grammar]

rāmaḥ |
aho nu bhāro bharavāṃścetasā projjhitaścirāt |
ayaṃ so'hamidaṃ me'dya cetyādistvagivāhinā || 2 ||
[Analyze grammar]

svacchatāmupayāte'yamantaḥkaraṇasaṃsthitiḥ |
śobhate śaradīva dyauśśāntavāridaviplavā || 3 ||
[Analyze grammar]

ayaṃ so'hamidaṃ me'dya iti bhāraṃ mahābharam |
api merorgurutaraṃ dhārayan ko na sīdati || 4 ||
[Analyze grammar]

śāmyāmi parinirvāmi jāgarmyāśvāsavānaham |
adhvagasyeva me skandhādgṛhītā mahatī śilā || 5 ||
[Analyze grammar]

etāvantamahaṃ kālamaho nu khalu vañcitaḥ |
yadimāṃ padavīṃ śāntāṃ śītalācchāṃ na labdhavān || 6 ||
[Analyze grammar]

tadimaṃ saṃśayaṃ śeṣamekaṃ me chettumarhasi |
bhagavan sarvadharmajña prodvijante hi nottamāḥ || 7 ||
[Analyze grammar]

paramātmamayaṃ sarvaṃ yadi nāma sadaiva hi |
idaṃ kāryamidaṃ neti tatkimarthaṃ kṛtaḥ kramaḥ || 8 ||
[Analyze grammar]

vasiṣṭhaḥ |
yathotpannā na votpannā jīvāḥ paramakāraṇāt |
dvaitavanto'tha vādvaitāstattāvajjñātavānbhavān || 9 ||
[Analyze grammar]

tatra tāvatsvasaṅkalpād yeṣāṃ dvaitamalaṃ sthitam |
taistāvatsaṃsṛtau kiñcitsaṃsartavyamasaṃśayam || 10 ||
[Analyze grammar]

tatra kecidbālya eva svacamatkārayogataḥ |
vidanti paramātmānaṃ tiṣṭhanti vigatajvaram || 11 ||
[Analyze grammar]

anīśvarāḥ seśvarāśca ye jīvā dehatāṃ gatāḥ |
gṛhītadvaitavistārāḥ kālenāyānti te padam || 12 ||
[Analyze grammar]

bhavatyevātiviśrāntirnāsti kasyāsti kasya ca |
sucirātkevalaṃ kaścidacirādvetti kaścana || 13 ||
[Analyze grammar]

kecidviditavedyatvaṃ yānti rāghava yauvane |
jarāvantaḥ paraṃ vastu vidantīhāpare janāḥ || 14 ||
[Analyze grammar]

evaṃ tajjñāstathājñāśca tiṣṭhantyeva yathāsthitam |
asyāṃ vyavahṛtau jīvanmuktā baddhāśca mānavāḥ || 15 ||
[Analyze grammar]

idaṃ kāryamidaṃ neti teṣāṃ yadi jagatsthitiḥ |
nonnīyate tatkṣayakṛnmātsyo nyāyaḥ pravartate || 16 ||
[Analyze grammar]

yāvatkiñcitprasphurati sargastāvatkadarthanām |
mā yātu mātsyanyāyena kileti vihitā sthitiḥ || 17 ||
[Analyze grammar]

niṣpuṇyapāpaṃ niścittaṃ nirmamo'mananakriyam |
kālātivāhanāyaiva jīvanmukto'vatiṣṭhate || 18 ||
[Analyze grammar]

māyāgrastamatistvātmavāsanāvaśataḥ phalam |
prāpnotīhāmutra caiva tadarthaṃ yatate ca saḥ || 19 ||
[Analyze grammar]

etāvattāvadābālapaṇḍitāmaramānavam |
avisaṃvādi yad yādṛkcittaṃ tanmayatātmanaḥ || 20 ||
[Analyze grammar]

svasaṅkalpaikabījāya narakasvargaśākhine |
phalāyājñasya kartṛtvamakartṛtvaṃ ca rāghava || 21 ||
[Analyze grammar]

yattu tajjñasya kartṛtvamakartṛtvaṃ ca vā kvacit |
tatprameyadaśāmeti na kadācana kasyacit || 22 ||
[Analyze grammar]

kartā bhavatvakartā vā mukta evāṅga tattvavit |
bhūyo majjati nājñāne payaḥphena ivāmbhasi || 23 ||
[Analyze grammar]

kartā bhavatvakartā vā baddha evāyathārthavit |
araṇyakūpācchvevāsmānmohānnottarati kvacit || 24 ||
[Analyze grammar]

nirdeho nirmanā maunī śāntaḥ svastho nireṣaṇaḥ |
kurvanneva ca karmāṇi tiṣṭhottiṣṭhasva tatpade || 25 ||
[Analyze grammar]

jīvo brahmārṇave vīcirjīvāmbhodhāvahaṅkṛtiḥ |
ahaṅkārāmbudhau buddhirbuddhyabdhau cittamābilam || 26 ||
[Analyze grammar]

cittābdhau vāsanā vīcirvāsanābdhau tu saṃsṛtiḥ |
saṃsārābdhau śarīraṃ ca śarīrābdhau ca jīvitam || 27 ||
[Analyze grammar]

jīvitābdhau ca yuvatā cañcale yauvanārṇave |
vīcirindriyasaṅghātaḥ spandastvindriyavāridhau || 28 ||
[Analyze grammar]

spandāmbhodhāvanubhavaḥ svānubhūtyāmbudhau tataḥ |
taraṅgaścitsamullāsa itīdaṃ sargavedanam || 29 ||
[Analyze grammar]

śabdasaṃsparśarūpādi yenedamavabudhyate |
taccinmātraṃ jagatsarvaṃ tatsāratvād raghūdvaha || 30 ||
[Analyze grammar]

akṣubdho'vyapadeśyo'sāvasargakaraṇonmukhaḥ |
unnīyate cidambhodhiḥ sadbhirbrahmeti kevalam || 31 ||
[Analyze grammar]

akṣubdhamapi tatkṣubdhamiva cetkṛtavedanam |
taccidaṃśamupāruhya brahma sarga iti sthitam || 32 ||
[Analyze grammar]

akṣubdho'sāvavācyo hi samaścitimahārṇavaḥ |
vaktuṃ na kenacinnāmnā kalayā vāpi śakyate || 33 ||
[Analyze grammar]

na ca tasya mahābāho kṣobhaḥ sambhavati kvacit |
pṛthaktanmātrarūpatvātsarvasya jagato gateḥ || 34 ||
[Analyze grammar]

svarūpe tasya devasya kevalaṃ yā vilāsitā |
saiṣoktā kṣobhaśabdena cicchabdena ca vānagha || 35 ||
[Analyze grammar]

paramārthamahāmbhodhau ciccetyalavarūpiṇī |
ūrmivatsphurati spandāttenedaṃ jāyate jagat || 36 ||
[Analyze grammar]

akṣubdho'sāvanirdeśyaḥ samaścinmātrasāgaraḥ |
kṣubdhaścetyataraṅgastu cidityākalito budhaiḥ || 37 ||
[Analyze grammar]

cidabdhau laharī cetyaṃ sā ca tasmānna bhidyate |
tāvanmātraikasāratvādvāri vīcirivāmbhasaḥ || 38 ||
[Analyze grammar]

tasmādbhūtāni jātāni tāvanmātrāṇi tāni ca |
tadevātadivābhāti sakalaṃ cākalaṃ ca tat || 39 ||
[Analyze grammar]

ekameva nakiñcid yatkiñcidvā tadidaṃ jagat |
nānānānātayā ceto mā mithyākulatāṃ naya || 40 ||
[Analyze grammar]

ekasya vāmbhaso vīcirūpeṇa sphurato yathā |
nānyatāsti tathā bhūtabhāvena sphuraṇāccitaḥ || 41 ||
[Analyze grammar]

bījameva yathā stambhaḥ pattraṃ puṣpaṃ phalaṃ rasaḥ |
pariṇāmādirahitaṃ bhavatyevaṃ jagantyajaḥ || 42 ||
[Analyze grammar]

phalāntā bījasattaiva sphuratyanyatayeva sā |
advaitaikyajagadrūpā brahmasattaiva jṛmbhate || 43 ||
[Analyze grammar]

bījaṃ sattaikasāmānyenāphalāntaṃ yathā sthitam |
brahma sattaikasāmānyenāsargāntaṃ tathā sthitam || 44 ||
[Analyze grammar]

brahmaikasattāsāmānyamātramevedamātatam |
satyamekaṃ jagaditi vyāhṛtaṃ taruvṛkṣavat || 45 ||
[Analyze grammar]

ya evācchaścitaḥ spandaḥ sa evetthaṃ jagadbhramaḥ |
yaścāspandaḥ sa evāṅga paramopaśamaśśivaḥ || 46 ||
[Analyze grammar]

aho mahattā svacchāyāścito yasyā jagantyapi |
spandamātrātsamudyanti līyante'spandamātrataḥ || 47 ||
[Analyze grammar]

yasyonmeṣanimeṣābhyāṃ bhāvānāṃ pralayodayau |
nānānānābhamiva yattadidaṃ brahma cidghanaḥ || 48 ||
[Analyze grammar]

cidvātavadabhinnātmā spandādātmagatād yathā |
tathaiva jagadetasmāttasmāttatsthaṃ tadeva ca || 49 ||
[Analyze grammar]

ataśśuddhamanābhāsaṃ sarvaṃ cidghanamakṣaye |
dṛśyamāne'pi naiva stastvattāmatte bhavābhayaḥ || 50 ||
[Analyze grammar]

naikyaṃ na ca dvaitamihāsti kiñcinna tvattvamattvādi sadapyasadvā |
sarvaṃ ca sarvatra sadaiva cāsti yadbuddhavānevamapīha tattat || 51 ||
[Analyze grammar]