Chapter 119

paramārthayogopadeśo nāma sargaḥ |
ekonaviṃśottaraśatatamaḥ sargaḥ |
vasiṣṭhaḥ |
mahākartā mahābhoktā mahātyāgī bhavānagha |
sarvāśśaṅkāḥ parityajya dhairyamālambya śāśvatam || 1 ||
[Analyze grammar]

rāmaḥ |
kimucyate mahākartā mahātyāgī kimucyate |
kimucyate mahābhoktā samyakkathaya me prabho || 2 ||
[Analyze grammar]

vasiṣṭhaḥ |
etadvratatrayaṃ rāma purā candrārdhamaulinā |
bhṛṅgīśāyottamaṃ proktaṃ yenāsau vijvaraḥ sthitaḥ || 3 ||
[Analyze grammar]

sumeroruttare śṛṅge pūrvaṃ śaśikalādharaḥ |
atiṣṭhadagnisaṅkāśe samagraparivāravān || 4 ||
[Analyze grammar]

tamapṛcchanmahātejā jñānajijñāsayā svataḥ |
bhṛṅgīśaḥ praṇato rāma baddhāñjalirumāpatim || 5 ||
[Analyze grammar]

bhṛṅgīśaḥ |
bhagavandevadeveśa sarvajña parameśvara |
yadahaṃ paripṛcchāmi kṛpayā tadvadāśu me || 6 ||
[Analyze grammar]

saṃsāraracanāṃ nātha taraṅgataralāmimām |
avalokya vimuhyāmi tattvaviśrāntivarjitaḥ || 7 ||
[Analyze grammar]

kamantarniścayaṃ kāntamurarīkṛtya susthiram |
asmiñjagajjīrṇagṛhe tiṣṭhāmi vigatajvaram || 8 ||
[Analyze grammar]

īśvaraḥ |
sarvāśśaṅkāḥ parityajya dhairyamālambya śāśvatam |
mahātyāgī mahākartā mahābhoktā bhavānagha || 9 ||
[Analyze grammar]

bhṛṅgīśaḥ |
kimucyate mahātyāgī mahābhoktā kimucyate |
kimucyate mahākartā samyakkathaya me prabho || 10 ||
[Analyze grammar]

īśvaraḥ |
dharmādharmodayāpāyaśaṅkāvirahitāśayaḥ |
yaḥ karoti yathāprāptaṃ mahākartā sa ucyate || 11 ||
[Analyze grammar]

rāgadveṣau sukhaṃ duḥkhaṃ dharmādharmau phalāphale |
yaḥ karotyanapekṣyaiva mahākartā sa ucyate || 12 ||
[Analyze grammar]

maunavānnirahambhāvo nirmāno muktamatsaraḥ |
yaḥ karoti gatodvegaṃ mahākartā sa ucate || 13 ||
[Analyze grammar]

śubhāśubheṣu kāryeṣu dharmādharmakuśaṅkayā |
matirna lipyate yasya mahākartā sa ucyate || 14 ||
[Analyze grammar]

sarvatra vigatasneho yaḥ sākṣivadavasthitaḥ |
niricchaṃ vartate kārye mahākartā sa ucyate || 15 ||
[Analyze grammar]

udvegānandarahitaḥ samayā svacchayecchayā |
na śocate yo nodeti mahākartā sa ucyate || 16 ||
[Analyze grammar]

yaḥ kāryakāle matimānasaṃsaktamanā muniḥ |
kāryānurūpavṛttistho mahākartā sa ucyate || 17 ||
[Analyze grammar]

svabhāvenaiva yasyāntaḥ samatāṃ na jahāti dhīḥ |
śubhāśubhaṃ hyācarato mahākartā sa ucyate || 18 ||
[Analyze grammar]

janmasthitivināśeṣu sodayāstamayeṣvalam |
samameva mano yasya mahākartā sa ucyate || 19 ||
[Analyze grammar]

na kiñcana dveṣṭi ca yo na kiṃ ca stauti yaḥ svayam |
bhuṅkte ca prakṛtaṃ sarvaṃ mahābhoktā sa ucyate || 20 ||
[Analyze grammar]

nādatte'pyādadānaḥ sannācaratyācarannapi |
bhuñjāno'pi na yo bhuṅkte mahābhoktā sa ucyate || 21 ||
[Analyze grammar]

sākṣivatsakalaṃ lokavyavahāramakhinnadhīḥ |
yaḥ paśyatyapayātecchaṃ mahābhoktā sa ucyate || 22 ||
[Analyze grammar]

sukhairduḥkhaiḥ kriyāyogairbhāvābhāvairbhramapradaiḥ |
yasya notkrāmati matirmahābhoktā sa ucyate || 23 ||
[Analyze grammar]

jarāmaraṇamāpacca rājyaṃ dāridryameva ca |
ramyameveti yo vetti mahābhoktā sa ucyate || 24 ||
[Analyze grammar]

mahānti sukhaduḥkhāni yaḥ payāṃsīva sāgaraḥ |
samaḥ samupagṛhṇāti mahābhoktā sa ucyate || 25 ||
[Analyze grammar]

ahiṃsā samatā tuṣṭiścandrabimbādivāṃśavaḥ |
nāpayāntyaniśaṃ yasmānmahābhoktā sa ucyate || 26 ||
[Analyze grammar]

kaṭvamblaṃ lavaṇaṃ tiktamamṛṣṭaṃ mṛṣṭamuttamam |
adhamaṃ yo'tti sāmyena mahābhoktā sa ucyate || 27 ||
[Analyze grammar]

sarasaṃ nīrasaṃ caiva surataṃ virataṃ tathā |
yaḥ paśyati samaḥ somyo mahābhoktā sa ucyate || 28 ||
[Analyze grammar]

kṣāre khaṇḍaprakāre ca śubhe vāpyaśubhe tathā |
samatā susthitā yasya mahābhoktā sa ucyate || 29 ||
[Analyze grammar]

idaṃ bhojyamabhojyaṃ cetyevaṃ tyaktvā vikalpitam |
gatābhilāṣaṃ yo bhuṅkte mahābhoktā sa ucyate || 30 ||
[Analyze grammar]

āpadaṃ sampadaṃ mohamānandamavaraṃ varam |
yo bhuṅkte samayā buddhyā mahābhoktā sa ucyate || 31 ||
[Analyze grammar]

dharmādharmau sukhaṃ duḥkhaṃ cintā maraṇajanmanī |
dhiyā yeneti santyaktaṃ mahātyāgī sa ucyate || 32 ||
[Analyze grammar]

sarvecchāḥ sakalāśśaṅkāḥ sarvehāḥ sarvaniścayāḥ |
dhiyā yena parityaktā mahātyāgī sa ucyate || 33 ||
[Analyze grammar]

dehasya manaso buddherindriyāṇāṃ jagatsthiteḥ |
nūnaṃ yenojjhitā sattā mahātyāgī sa ucyate || 34 ||
[Analyze grammar]

na me deho na janmāpi yuktāyukte na karmaṇā |
iti niścayavānyo'ntarmahātyāgī sa ucyate || 35 ||
[Analyze grammar]

yena dharmamadharmaṃ ca manomananamīhitaṃ |
sarvamantaḥ parityaktaṃ mahātyāgī sa ucyate || 36 ||
[Analyze grammar]

mano dhyānaṃ tapastejastvattāmatte śubhāśubhe |
tyaktvā yo'vasthitaḥ svastho mahātyāgī sa ucyate || 37 ||
[Analyze grammar]

svamanomananaṃ mānyo nābhivāñchati nojjhati |
yo'vāsanaḥ sarvamidaṃ mahātyāgī sa ucyate || 38 ||
[Analyze grammar]

yāvatī dṛśyakalanā sakaleyaṃ vilokyate |
sā yena suṣṭhu santyaktā mahātyāgī sa ucyate || 39 ||
[Analyze grammar]

yo'kāmakāmī nirdvandvaḥ sukhaduḥkheṣvaloladhīḥ |
dhīraḥ svastho mṛdurdānto mahātyāgī sa ucyate || 40 ||
[Analyze grammar]

kurvannapi ca kāryāṇi suṣuptasamavṛttitām |
na santyajati yaḥ pūrṇo mahātyāgī sa ucyate || 41 ||
[Analyze grammar]

ityuktaṃ devadevena bhṛṅgīśāya purānagha |
etāṃ dṛṣṭimavaṣṭabhya tiṣṭha rāma yathāsthitaḥ || 42 ||
[Analyze grammar]

śrīmatkapālaśakalāvalimadhyabaddhakhaṇḍendumaṇḍitajaṭāśirasā hareṇa |
ityuktamujjvalamaṇīndraśilaikaśṛṅge merau jvalajjvalanarūpiṇi rāmabhadra || 43 ||
[Analyze grammar]

etāṃ dṛśaṃ samavalambya vilāsakāntakāryaṃ kuru kramagataṃ samayaiva buddhyā |
nityodito'si vimalo'si nirāmayo'si śaṅkāṃ parityaja sukhī bhava yo'si so'si || 44 ||
[Analyze grammar]