Chapter 60

arjunopākhyāne jīvatvanirṇayo nāma sargaḥ |
ṣaṣṭitamaḥ sargaḥ |
bhagavān |
iti nirvāsanatvena jīvanmuktatayātmani |
antaśśītalatāmetya bandhuduḥkhamalaṃ tyaja || 1 ||
[Analyze grammar]

jarāmaraṇaniśśaṅka ākāśaviśadāśayaḥ |
tyakteṣṭāniṣṭasaṅkalpo vītarāgo bhavānagha || 2 ||
[Analyze grammar]

pravāhāpatitaṃ kāryamidaṃ kiñcid yathāgatam |
kuru kāryamakārpaṇyaṃ na kiñcidiha naśyati || 3 ||
[Analyze grammar]

pravāhāpatitaṃ karma svameva kriyate hi yat |
jīvanmuktasvabhāvo'sāvajīvanmuktatānyathā || 4 ||
[Analyze grammar]

idaṃ karma tyajāmīdamāśrayāmītyanirmalam |
mūḍhasya manaso rūpaṃ jñamanastu samasthiti || 5 ||
[Analyze grammar]

pravāhāpatitaṃ kāryaṃ kurvantaśśāntacetasaḥ |
jīvanmuktāḥ suṣuptasthāḥ sphurantyardhaprabuddhavat || 6 ||
[Analyze grammar]

sthirāṃ saṃhṛtimāyānti kūrmāṅgānīva sarvaśaḥ |
indriyāṇīndriyārthebhyo hṛdi jñasya svabhāvataḥ || 7 ||
[Analyze grammar]

cinmātre vitate tantau dṛḍhe sragiva saṃsthitam |
sadasadgrathitaṃ viśvaṃ viśvāṅge viśvakarmaṇi || 8 ||
[Analyze grammar]

prasārite prasarati tvantardhiṃ yāti saṃvṛte |
vicitraracanājālamananyaccidvitānake || 9 ||
[Analyze grammar]

ananyadapyanyadiva svāṅgarūpamanaṅgavat |
citraṃ vitānaka iva sthitaṃ jagadidaṃ citi || 10 ||
[Analyze grammar]

yathaivāracitaṃ citraṃ sthitaṃ citrakṛdīhite |
tathā jātamajātaṃ ca viśvaṃ saṃsthitamātmani || 11 ||
[Analyze grammar]

yathā sphurati kartavyaṃ citraṃ citrakṛtaściti |
viśvātmani tathā viśvaṃ kālatrayamayodayam || 12 ||
[Analyze grammar]

abhitti trijagaccitraṃ kurute cittacitrakṛt |
vyomni vyomātmakamapi prasphuṭaṃ vṛttivartibhiḥ || 13 ||
[Analyze grammar]

cittacitrakareṇādau citraṃ citraṃ vitānitam |
paścādbhittiḥ kṛtā vyomarūpā cāsāvaho bhramaḥ || 14 ||
[Analyze grammar]

apūrvaivātimāyeyaṃ kila yatra khakuḍyayoḥ |
na manāgapi bhedo'sti sphuṭamapyupalabdhayoḥ || 15 ||
[Analyze grammar]

imā yā upalakṣyante bhittayaścittacitrajāḥ |
vyomnaśśūnyatayā viddhi tāstāmarasalocana || 16 ||
[Analyze grammar]

kṣaṇena cetasi yathā bhāto lokakṣayodayau |
khātmā jagattathaivedaṃ sabāhyābhyantaraṃ nabhaḥ || 17 ||
[Analyze grammar]

cirantanamanorājyamātre'smin kila satyatā |
kathamālokite'pi syātsatyaṃ nāstyeva vibhrame || 18 ||
[Analyze grammar]

bhrameṇālokitaḥ satyamālokena vilīyate |
dṛśyamānamapi kṣāmaṃ śaradīvābhramambare || 19 ||
[Analyze grammar]

cittacitrakṛtaścitte saṃsthitāścitraputrikāḥ |
bhittyabhāvādanādhārā bahistribhuvanādikāḥ || 20 ||
[Analyze grammar]

naitāḥ santi na cāsi tvaṃ kiṃ kena parirudhyate |
rodhyarodhakasammohaṃ tyaktvā khavimalo bhava || 21 ||
[Analyze grammar]

pravṛttireva kā vyomnaḥ pravṛttiścaiva khātmikā |
ataḥ kālakriyākuḍyakalādi vimalaṃ nabhaḥ || 22 ||
[Analyze grammar]

cittasaṃsthaṃ yathā citraṃ sadrūpamapi khātmakam |
vyomnaśśūnyatamaṃ viddhi tathedamakhilaṃ jagat || 23 ||
[Analyze grammar]

cittabhittau kṛtaṃ citraṃ yacciccitrakareṇa tat |
sarvaṃ śūnyatayā vyomno manāgapi na bhidyate || 24 ||
[Analyze grammar]

yathā prakacataścitte jagannirmāṇasaṅkṣayau |
kṣaṇenaiva tathaivemau bahissthāviti viddhi he || 25 ||
[Analyze grammar]

ādyakṣaṇamanorājye nānābhuvananāmani |
kṣaṇabhāvini mohena kalpatā parikalpitā || 26 ||
[Analyze grammar]

asadeva manorājyaṃ kartuṃ śaktaṃ yathā manaḥ |
kṣaṇasya kalpīkaraṇe tathaiva balavanmanaḥ || 27 ||
[Analyze grammar]

kṣaṇaṃ kalpīkarotyetattathālpaṃ kurute bahu |
asatsatkurute kṣipramitīyaṃ bhrāntirutthitā || 28 ||
[Analyze grammar]

kṣaṇamādimanorājyaṃ pratibhātaṃ svabhāvataḥ |
yadvicitrātma tadidaṃ jagajjālamiti sthitam || 29 ||
[Analyze grammar]

sargo nirvāṇaniṣṭhatvānnimeṣamayamutthitaḥ |
pratibhāmātrato'traiva kalpitā vajrasāratā || 30 ||
[Analyze grammar]

cittacitrakṛtaścitsthaṃ jagaccitraṃ kacatsthitam |
akuḍyamapyaraṅgāḍhyamidaṃ sphāramivāgrataḥ || 31 ||
[Analyze grammar]

aho nu citraṃ nirbhitti citramujjvalamutthitam |
surañjanaṃ jagaditi sthitaṃ dṛṣṭivilobhanam || 32 ||
[Analyze grammar]

nānātamomaṣīlekhaṃ nānātejo'ṃśarañjanam |
nānākalaṅkāvayavaṃ nānārāgānurañjitam || 33 ||
[Analyze grammar]

nānādṛṣṭivilāsāḍhyaṃ nānānubhavalocanam |
nānābhrakograracanaṃ nānākārāgrapaścimam || 34 ||
[Analyze grammar]

vyomanīlasaraḥphullatārācandrārkapaṅkajam |
vicitraracanodyuktameghālīpattramañjari || 35 ||
[Analyze grammar]

svakoṣṭhakābhilikhitasurāsuranṛputrikam |
paramālokamakkoladhavalākāśakuḍyakam || 36 ||
[Analyze grammar]

ākāśa eva racitā pratibhaikaraṅgā mugdhā jagattrayamanoharaputrikeyam |
cinmātravaktraparirañjitasarvalokā līlākulā capalacittakacitrakartrā || 37 ||
[Analyze grammar]

hemācalāṅgalatikā ghanakeśapāśā candrārkalocanavicālanadṛṣṭalokā |
dharmārthakāmatrikayantritaśāstravastrā pātālatālacaraṇonnatabhūnitambā || 38 ||
[Analyze grammar]

brahmendrarudraharibāhucatuṣṭayogrā satyānṛtonnatakucā kakubaṅgayaṣṭiḥ |
abdhyantraveṣṭitamahītalapadmapīṭhapattrīkṛtācalamahābhuvanodarī ca || 39 ||
[Analyze grammar]

rātryandhakāracapalabhrurahassmitoccaistārākarālapulakā grahadantapaṅktiḥ |
cañcaccaturdaśavidhākulabhūtajātaromā dhvanatpralayavāridakambupūgā || 40 ||
[Analyze grammar]

jīvānvitā gagana eva kṛtā vicitrā vyomātmikāciravilakṣaṇacitrakartrā |
cittena citraparikarmavidā trilokī nānāvilāsavalitā varaputriketi || 41 ||
[Analyze grammar]