Chapter 59

arjunopākhyāna ātmajñānopadeśo nāma sargaḥ |
ekonaṣaṣṭitamaḥ sargaḥ |
bhagavān |
na kuryādbhogasantyāgaṃ na kuryādbhogabhāvanam |
sthātavyaṃ susamenaiva yathāprāptānuvartinā || 1 ||
[Analyze grammar]

anātmanyātmatāṃ dehe mā bhāvaya bhavātmani |
ātmanyevātmatāṃ satye bhāvayābhāvarūpiṇi || 2 ||
[Analyze grammar]

dehanāśe mahābāho na kiñcidapi naśyati |
ātmanāśe hi nāśaḥ syānna cātmā naśyati kvacit || 3 ||
[Analyze grammar]

avināśamanādyantamātmānamajaraṃ viduḥ |
naśyatyātmeti durbodho mā tavāstvatiduḥkhadaḥ || 4 ||
[Analyze grammar]

na kadācana naśyanti viditātmāna uttamāḥ |
naśyantyaviditātmāno hyanātmanyātmamāninaḥ || 5 ||
[Analyze grammar]

arjunaḥ |
evaṃ cettajjagannātha mūḍhānāmapi mānada |
dehanāśe samutpanne manye naṣṭaṃ na kiñcana || 6 ||
[Analyze grammar]

bhagavān |
evameva mahābāho na kiñcinnaśyati kvacit |
ātmaivāstyavināśātmā kiṃ tasya kva vinaśyati || 7 ||
[Analyze grammar]

idaṃ naṣṭamidaṃ yuktamiti mohādbhramādṛte |
anyattathā na paśyāmi vandhyāstrītanayaṃ yathā || 8 ||
[Analyze grammar]

nāsato vidyate bhāvo nābhāvo vidyate sataḥ |
ubhayorapi dṛṣṭo'ntastvanayostattvadarśibhiḥ || 9 ||
[Analyze grammar]

avināśi tu tadviddhi yena sarvamidaṃ tatam |
vināśamavyayasyāsya na kaścitkartumarhati || 10 ||
[Analyze grammar]

antavanta ime dehā nityasyoktāśśarīriṇaḥ |
anāśino'prameyasya tasmād yudhyasva bhārata || 11 ||
[Analyze grammar]

ātmaivaiko'sti na dvitvamasataḥ sambhavaḥ kutaḥ |
avināśastvananto'sau sato nāśo na vidyate || 12 ||
[Analyze grammar]

dvaitaikatvaparityāge yaccheṣamavaśiṣyate |
śāntaṃ sadasatormadhyaṃ tadastīha paraṃ padam || 13 ||
[Analyze grammar]

arjunaḥ |
tanmṛto'smīti bhagavan kiṃrūḍheha nṛṇāṃ sthitiḥ |
kathaṃ sthitau vā lokānāṃ tau svarganarakau prabho || 14 ||
[Analyze grammar]

bhagavān |
bhūmirāpo'nalo vāyuḥ khaṃ mano buddhireva ca |
etattanmātrajātātmā jīvo deheṣu tiṣṭhati || 15 ||
[Analyze grammar]

sa kṛṣyate vāsanayā rajjveva paśupotakaḥ |
sa tiṣṭhati śarīrāntaḥ pañjare vihago yathā || 16 ||
[Analyze grammar]

sa kālavaśato dehājjarjaratvamupāgatāt |
vāsanāvaśato yāti vṛkṣaparṇād raso yathā || 17 ||
[Analyze grammar]

śrotraṃ cakṣuḥ sparśanaṃ ca rasanaṃ ghrāṇameva ca |
gṛhītvaitāni saṃyāti vāyurgandhānivāśayāt || 18 ||
[Analyze grammar]

vāsanāvattvamevāsya deho netarayuktijaḥ |
kṣīyate vāsanātyāge kṣīṇe bhavati tatpadam || 19 ||
[Analyze grammar]

vāsanāvānpurā puṣṭo bhūtvā bhrāmyati yoniṣu |
jīvo bhramabharākāro māyāpuruṣako yathā || 20 ||
[Analyze grammar]

akṣasvabhāvānakhilāñcharīrādvāsanāvaśaḥ |
jīvo gṛhītvā saṃyāti puṣpādgandhānivānilaḥ || 21 ||
[Analyze grammar]

deho nisspandatāmeti jīve kaunteya nirgate |
nisspandāvayavābhogaśśāntavāta iva drumaḥ || 22 ||
[Analyze grammar]

aceṣṭaśchedabhedādidoṣairāyātyadṛśyatām |
mṛta ityucyate loke deho vigatajīvitaḥ || 23 ||
[Analyze grammar]

sa jīvaḥ prāṇamūrtiḥ khe yatra yatrāvatiṣṭhate |
tatra svavāsanābhyāsātpaśyatyākāramātatam || 24 ||
[Analyze grammar]

ayaṃ deho hi jīvena tvasannevāvalokitaḥ |
asya nāśe'nyamapyevaṃ paśyatyevāśu svapnavat || 25 ||
[Analyze grammar]

yathaiva paśyatyākārāṃsteṣāṃ nāśāṃstathaiva saḥ |
ādisarge bhāvanayā kilaivaṃ saṃvibhāvitaḥ || 26 ||
[Analyze grammar]

jhagityudbhavakāle tu yad yathā dṛśyate puraḥ |
ānirvāṇaṃ tadevāsyā avinābhāvisaṃvidaḥ || 27 ||
[Analyze grammar]

prāktanaṃ vāsanājālaṃ puruṣārthena jīyate |
yatnenādyatanenāśu yatanaṃ hyastanaṃ yathā || 28 ||
[Analyze grammar]

ya eva puruṣārthena dṛṣṭo balavatā kṣaṇāt |
pūrvottaranimeṣāṃśaḥ sa eva jayati sphuṭam || 29 ||
[Analyze grammar]

api sphuṭati vidhyaṇḍe vāti vā pralayānile |
pauruṣaṃ hi yathāśāstramatastyājyaṃ na dhīmatā || 30 ||
[Analyze grammar]

narakasvargasargādi vāsanāvaśato'bhitaḥ |
prapaśyati cirābhyastaṃ jīvo jaraḍhamohadhīḥ || 31 ||
[Analyze grammar]

arjunaḥ |
narakasvargasargādisambhrameṣu jagatpate |
kimasya kāraṇaṃ brūhi jīvasya janitasthiteḥ || 32 ||
[Analyze grammar]

bhagavān |
vāsanātmānamenaṃ tvaṃ jīvaṃ viddhi śarīrakam |
svavāsanātmikaivāsya sattā saṃsṛtikāraṇam || 33 ||
[Analyze grammar]

dhriyate saṃsṛtistāvad yāvatsphurati vāsanā |
svapnopamānā teneha śreyase vāsanākṣayaḥ || 34 ||
[Analyze grammar]

arjunaḥ |
cirābhyāsavaśātprauḍhā saṃsārabhramakāriṇī |
kimutthā devadeveśa vāsanā kṣīyate katham || 35 ||
[Analyze grammar]

bhagavān |
maurkhyamohasamucchrāyādanātmanyātmabhāvanāt |
ajñānādātmanaḥ sādho sattāmāyāti vāsanā || 36 ||
[Analyze grammar]

bhāvitātmāsi kaunteya satyaṃ vijñātavānasi |
ayaṃ so'haṃ janā ete mameti tyaja vāsanāḥ || 37 ||
[Analyze grammar]

vāsanāvilaye jīvo vilīno bhavati svayam |
yo hi yatsattayocchūnastannāśātsa vilīyate || 38 ||
[Analyze grammar]

dehe vilayamāyāte deśakālānyatākṛteḥ |
ko'sau bhājanatāmeti janmano maraṇasya ca || 39 ||
[Analyze grammar]

svayaṃ kalpitasaṅkalpamātmarūpaṃ yadābilam |
tadeva vāsanākāraṃ jīvaṃ viddhi mahāmate || 40 ||
[Analyze grammar]

anāyattamasaṅkalpamātmarūpaṃ yadavyayam |
prabodhādvāsanāmuktaṃ taṃ mokṣaṃ viddhi bhārata || 41 ||
[Analyze grammar]

jīvanneva mahābāho tattvaṃ prekṣya yathāsthitam |
vāsanāvāgurāmukto mukta ityabhidhīyate || 42 ||
[Analyze grammar]

yo na nirvāsano nūnaṃ sarvadharmaparo'pi saḥ |
sarvajño'pyabhito baddhaḥ pañjarastho yathā khagaḥ || 43 ||
[Analyze grammar]

durdarśanasya gagane śikhipiñchikeva sūkṣmāpi visphurati yasya na vāsanāntaḥ |
muktaḥ sa eva bhavatīha hi vāsanaiva bandho'naghasya nanu tatkṣaya eva mokṣaḥ || 44 ||
[Analyze grammar]