Chapter 48

viśrāntyavagamanaṃ nāma sargaḥ |
aṣṭacatvāriṃśaḥ sargaḥ |
vasiṣṭhaḥ |
kevalenendriyaiḥ sārdhaṃ vartamānārthavartinā |
asaṅgamena manasā yatkaroṣi na tatkṛtam || 1 ||
[Analyze grammar]

yathā prāptikṣaṇe vastu prathamaṃ tuṣṭaye tathā |
na prāptyekakṣaṇādūrdhvamiti ko nānubhūtavān || 2 ||
[Analyze grammar]

vāñchākāle yathā vastu tuṣṭaye nānyadā tathā |
tasmātkṣaṇasukhe tuṣṭiṃ bālo badhnāti netaraḥ || 3 ||
[Analyze grammar]

vāñchākṣaṇe tuṣṭaye yattatra vāñchaiva kāraṇam |
tuṣṭistvatuṣṭiparyantā tasmādvāñchāṃ parityaja || 4 ||
[Analyze grammar]

yadi tatpadamāpnoṣi kadācitkālaparyayāt |
tadahambhāvanārūpe na maṅktavyaṃ tvayā punaḥ || 5 ||
[Analyze grammar]

ātmajñānācalasyāgre rāma viśrāntavānasi |
ahambhāvamahāśvabhre na punaḥ pātamarhasi || 6 ||
[Analyze grammar]

prasṛtānantasaddṛṣṭerjñatvameruśirassthiteḥ |
punargarbhāndhakārāntaḥpātālapatanaṃ kutaḥ || 7 ||
[Analyze grammar]

dṛśyate te svabhāvo'yaṃ samatāsatyatāmayaḥ |
manye kṣīṇavikalpo'si jāto'si gatakālikaḥ || 8 ||
[Analyze grammar]

svabhāvo'yaṃ sthiro rāma ityāvedayatīva me |
somya pūrṇārṇavaprakhyā samatā nirmalā tava || 9 ||
[Analyze grammar]

āśā yātu nirāśatvamabhāvaṃ yātu bhāvanā |
amanastvaṃ mano yātu tavāsaṅgena jīvataḥ || 10 ||
[Analyze grammar]

yāṃ yāṃ vastudṛśaṃ yāsi tasyāṃ tasyāmavasthitam |
sattāsāmānyarūpeṇa brahma bṛṃhitacidghanam || 11 ||
[Analyze grammar]

ajñātātmā nibaddho'si vijñātātmā na badhyase |
rāma tvaṃ svātmanātmānaṃ bodhayasva balādataḥ || 12 ||
[Analyze grammar]

yatra na svadate vastu svadate ca yathāgatam |
avāsanatvaṃ tadviddhi sāmyamākāśakomalam || 13 ||
[Analyze grammar]

vāsanārahitairantarindriyairāharan kriyāḥ |
na vikriyāmavāpnoṣi khavatkṣobhaśatairapi || 14 ||
[Analyze grammar]

jñātā jñānaṃ tathā jñeyaṃ trayamekatayātmani |
śāntātmānubhavanbhavya na bhūyobhavabhāgasi || 15 ||
[Analyze grammar]

cittonmeṣanimeṣābhyāṃ saṃsārapralayodayau |
vāsanāprāṇasaṃrodhādanunmeṣaṃ manaḥ kuru || 16 ||
[Analyze grammar]

prāṇonmeṣanimeṣābhyāṃ saṃsṛteḥ pralayodayau |
tamabhyāsaprayogābhyāmunmeṣarahitaṃ kuru || 17 ||
[Analyze grammar]

maurkhyonmeṣanimeṣābhyāṃ karmaṇāṃ pralayodayau |
tadvilīnaṃ kuru balādguruśāstrārthasaṅgamaiḥ || 18 ||
[Analyze grammar]

yathā vātarajassaṅgaspandātstambhābhravedanam |
tathā citā cetyatayā spandādidamupasthitam || 19 ||
[Analyze grammar]

dṛśyadarśanasambandhaspandajeyaṃ jagadgatiḥ |
sphuratyālokakuḍyādisaṅgajā varṇadhīriva || 20 ||
[Analyze grammar]

dṛśyadarśanasambandhaspandābhāve na jāyate |
vedanā bhavadābhāsā citrapuṃsāmivāśaye || 21 ||
[Analyze grammar]

cittaspandotthitā māyā tadabhāve vilīyate |
payasspandotthitā vīcistadabhāvena śāmyati || 22 ||
[Analyze grammar]

tyāgato vāsanāṃśasya bodhādvā prāṇarodhanāt |
citte nisspandatāṃ yāte kutaḥ spandasya sambhavaḥ || 23 ||
[Analyze grammar]

asaṃvitspandamātreṇa yāti cittamacittatām |
prāṇānāṃ vā nirodhena tadeva ca paraṃ padam || 24 ||
[Analyze grammar]

dṛśyadarśanasambandhe yatsukhaṃ pāramātmikam |
tadantaikāntasaṃvittyā brahmadṛṣṭyā manaḥkṣayaḥ || 25 ||
[Analyze grammar]

yatra nābhyuditaṃ cittaṃ tattatsukhamakṛtrimam |
na svargādau sambhavati marau himagṛhaṃ yathā || 26 ||
[Analyze grammar]

cittopaśamajaṃ sphāramavācyaṃ vacasāṃ sukham |
kṣayātiśayanirmuktaṃ nodeti na ca śāmyati || 27 ||
[Analyze grammar]

bodhādbhavati cittānto nirbodhāccittatoditā |
bālavetālavattena mohaśrīrghanatāṃ gatā || 28 ||
[Analyze grammar]

vidyamānamapi hyetaccittaṃ bodhādvilīyate |
sadapyasadivābhāti tāmraṃ hemīkṛtaṃ yathā || 29 ||
[Analyze grammar]

jñasya cittaṃ na cittākhyaṃ jñacittaṃ sattvamucyate |
nāmārthānyatvabhākcittaṃ bodhāttāmrasuvarṇavat || 30 ||
[Analyze grammar]

na sambhavati cittatvaṃ tena tatpravilīyate |
bhramaśśāmyati bodhena nābhāvo vidyate sataḥ || 31 ||
[Analyze grammar]

avastvetadvikalpātma cittādi śaśaśṛṅgavat |
sarvatvādātmanastasmāttadvibodhādvilīyate || 32 ||
[Analyze grammar]

cittaṃ sattvaṃ samāyātaṃ kañcitkālaṃ jagatsthitau |
vihṛtya turyāvasthāyāṃ turyātītaṃ bhavatyataḥ || 33 ||
[Analyze grammar]

brahmaiva bhūribhuvanabhramavibhramaughairitthaṃ sthitaṃ samamanekatayaikameva |
sarvātma sambhavati netaradaṅga kiñciccaittādi kāñcanahṛdīva hi sanniveśaḥ || 34 ||
[Analyze grammar]