Chapter 42

niyatinṛttaṃ nāma sargaḥ |
dvicatvāriṃśaḥ sargaḥ |
īśvaraḥ |
eṣa devaḥ sa paramaḥ pūjya eṣa sadā satām |
cinmātramanubhūtātmā sarvagaḥ sarvasaṃśrayaḥ || 1 ||
[Analyze grammar]

ghaṭe paṭe vaṭe kuḍye śakaṭe vānare sthitaḥ |
śivo haro harirbrahmā śakro vaiśravaṇo yamaḥ || 2 ||
[Analyze grammar]

bahirantaśca sarvātmā sadā svātmā subuddhibhiḥ |
dvividhena krameṇaiṣa bhagavānparipūjyate || 3 ||
[Analyze grammar]

bahistāvanmahābuddhe krameṇa paripūjyate |
yena taṃ śṛṇu tattvajña śroṣyasyantaḥkramaṃ tataḥ |
pūjākrameṣu sarveṣu neha dārbhaṃ pavitrakam || 4 ||
[Analyze grammar]

pūjanaṃ dhyānamevātra dhyānamevātra pūjanam |
tasmāttribhuvanādhāre nityaṃ dhyānena pūjayet || 5 ||
[Analyze grammar]

cidrūpaṃ sūryalakṣābhaṃ samastābhāsabhāsanam |
antassthacitprakāśaṃ svamahantāsāramāśrayet || 6 ||
[Analyze grammar]

apāraparamākāśavipulābhogakandharam |
anantādhaspadākāśakośapādasaroruham || 7 ||
[Analyze grammar]

anantadiktaṭābhogabhujamaṇḍalamaṇḍitam |
nānāvidhamahālokagṛhītaparamāyudham || 8 ||
[Analyze grammar]

hṛtkośakoṇaviśrāntabrahmāṇḍaughaparamparam |
prakāśaparamākāśapāragāpāravigraham || 9 ||
[Analyze grammar]

brahmendraharirudreśapramukhāmamarādikām |
imāṃ bhūtaśriyaṃ tasya romālīṃ paricintayet || 10 ||
[Analyze grammar]

vividhārambhakāriṇyastrijagadyantrarajjavaḥ |
icchādyāśśaktayaḥ sarvāścintanīyāśśarīragāḥ || 11 ||
[Analyze grammar]

anantaikapadādhāraḥ sattāmātraikavigrahaḥ |
vivartitajagajjālaḥ kālo'sya dvārapālakaḥ || 12 ||
[Analyze grammar]

saśailabhuvanābhogamidaṃ brahmāṇḍamaṇḍalam |
dehakoṇe'sya kasmiṃścitsvāṅgāvayavatāṃ gatam || 13 ||
[Analyze grammar]

vicintayenmahādevaṃ sahasracaraṇekṣaṇam |
sahasraśirasaṃ śāntaṃ sahasrabhujabhūṣaṇam || 14 ||
[Analyze grammar]

sarvatrekṣaṇaśaktyāḍhyaṃ sarvato ghrāṇaśaktigam |
sarvatra sparśanamayaṃ sarvato rasanānvitam || 15 ||
[Analyze grammar]

sarvatra śravaṇākīrṇaṃ sarvatra manasānvitam |
sarvato mananātītaṃ sarvatra paramaṃ śivam || 16 ||
[Analyze grammar]

sarvadā sarvakartāraṃ sarvasaṅkalpitārthadam |
sarvabhūtāntarālasthaṃ sarvaṃ sarvaikasādhanam || 17 ||
[Analyze grammar]

iti sañcintya deveśamarcayedvidhivattataḥ |
vidhānamarcanasyedaṃ śṛṇu brahmavidāṃ vara || 18 ||
[Analyze grammar]

devaṃ svasaṃvidātmānaṃ nopahāreṇa pūjayet |
na dīpena na dhūpena na puṣpavibhavārpaṇaiḥ || 19 ||
[Analyze grammar]

nānnadānādidānena na candanavilepanaiḥ |
na ca kuṅkumakarpūrairbhogaiścitrairna cetaraiḥ || 20 ||
[Analyze grammar]

nityamakleśalabhyena śītalenāvināśinā |
ekenaivāmṛtenaiṣa bodhena svena pūjyate || 21 ||
[Analyze grammar]

etadeva paraṃ dhyānaṃ pūjaiṣaiva parā smṛtā |
yadanāratamantassthaśuddhacinmātravedanam || 22 ||
[Analyze grammar]

paśyañchṛṇvan spṛśañjighrannaśnan gacchan svapañchvasan |
pralapanvisṛjan gṛhṇañchuddhasaṃvinmayo bhavet || 23 ||
[Analyze grammar]

dhyānāmṛtena sampūjyaḥ svayamātmāyamīśvaraḥ |
paramāsvādayuktena muktena kusumehitaiḥ || 24 ||
[Analyze grammar]

dhyānopahāra evātmadhyānaṃ hyasya samīhitam |
dhyānamarghyaṃ ca pādyaṃ ca śuddhasaṃvedanātmakam || 25 ||
[Analyze grammar]

dhyānasaṃvedanaṃ puṣpaṃ dhūpaṃ dīpaṃ paraṃ viduḥ |
vinā tenetareṇāyamātmā labhyata eva no || 26 ||
[Analyze grammar]

dhyānātprasādamāyātaḥ sarvalokasukhaśriyam |
ayamātmā mune bhuṅkte dehe bhūpo gṛhe yathā || 27 ||
[Analyze grammar]

dhyānenānena sumune nimeṣāṃstu trayodaśa |
pūrṇo'pi pūjayatvīśaṃ gopradānaṃ labheta vai || 28 ||
[Analyze grammar]

pūjayitvā nimeṣāṇāṃ śatamekamiti prabhum |
aśvamedhasya yajñasya phalamāpnoti mānavaḥ || 29 ||
[Analyze grammar]

dhyānabalyupahāreṇa svayamātmānamātmanā |
ghaṭikāṃ pūjayed yastu rājasūyaṃ labheta saḥ || 30 ||
[Analyze grammar]

madhyāhnapūjanāditthaṃ rājasūyaikalakṣabhāk |
divasaṃ pūjayitvaivaṃ pare dhāmni vasennaraḥ || 31 ||
[Analyze grammar]

eṣo'sau paramo yoga eṣā sā paramā kriyā |
bāhyasampūjanaṃ proktametaduttamamātmanaḥ || 32 ||
[Analyze grammar]

etatpavitramakhilāghavināśahetuṃ yastvācariṣyati naraḥ kṣaṇamapyakhinnaḥ |
taṃ vandayiṣyati surāsuralokapūgaḥ prāptāspadaṃ jagati māmiva lokasāram || 33 ||
[Analyze grammar]