Chapter 77

saṃsārasāgarayoḥ sāmyapratipādanaṃ nāma sargaḥ |
saptasaptatitamaḥ sargaḥ |
rāmaḥ |
samāsena mune bhūyo dṛṣṭatattvacamatkṛtim |
kathayodāravṛttānte kaste vacasi tṛpyati || 1 ||
[Analyze grammar]

vasiṣṭhaḥ |
jīvanmuktasya bahudhā kathitaṃ lakṣaṇaṃ mayā |
bhūyo'pi ca mahābāho kathyamānamidaṃ śṛṇu || 2 ||
[Analyze grammar]

suṣuptavadidaṃ nityaṃ paśyatyapagataiṣaṇaḥ |
asadrūpaṃ ivāsaktaḥ sarvatrākhilamātmavān || 3 ||
[Analyze grammar]

kaivalyamiva samprāptaḥ parisuptamanā iva |
ghūrṇamāna ivānandī tiṣṭhatyadhigatātmadṛk || 4 ||
[Analyze grammar]

na dattamapyupādatte gṛhītamapi pāṇinā |
antarmukhatayodāttarūpayā samayā dhiyā || 5 ||
[Analyze grammar]

yantraputrakasañcāra itīmaṃ janatākramam |
antassaṃlīnayā dṛṣṭyā paśyan hasati śāntadhīḥ || 6 ||
[Analyze grammar]

nāpekṣate bhaviṣyacca vartamāne na tiṣṭhati |
na saṃsmaratyatītaṃ ca sarvameva karoti ca || 7 ||
[Analyze grammar]

suptaḥ prabuddho bhavati prabuddho'pi ca suptavat |
sarvakarmakaro'pyantarna karotīva kiñcana || 8 ||
[Analyze grammar]

antaḥ sarvaparityāgī nityamantaraneṣaṇaḥ |
kurvannapi bahiḥ kāryaṃ sarvamevāvatiṣṭhate || 9 ||
[Analyze grammar]

bahiḥ prakṛtasarveho yathāprāptakriyonmukhaḥ |
svakarmakramasamprāptadvandvakāryānuvṛttimān || 10 ||
[Analyze grammar]

samagrasukhabhogātmā sarvāśāsviva saṃsthitaḥ |
karotyakhilakarmāṇi tyaktakartṛtvavibhramaḥ || 11 ||
[Analyze grammar]

udāsīnavadāsīnaḥ prakṛtikramakarmasu |
nābhivāñchati na dveṣṭi na śocati na hṛṣyati || 12 ||
[Analyze grammar]

anubandhaparo jantāvasaṃsaktena cetasā |
bhakte bhaktasamācāraśśaṭhe śaṭha iva sthitaḥ || 13 ||
[Analyze grammar]

bālo bāleṣu vṛddheṣu vṛddho vīreṣu vīryavān |
yuvā yauvanavṛtteṣu duḥkhiteṣu tu duḥkhitaḥ || 14 ||
[Analyze grammar]

pravṛttavākpuṇyakatho dainyādapagatāśayaḥ |
dhīradhīruditānandaḥ peśalaḥ puṇyakīrtanaḥ || 15 ||
[Analyze grammar]

prājñaḥ prasannamadhuraḥ pūrṇaḥ supratibhodayaḥ |
nirastakhedadaurgatyaḥ sarvasmin snigdhabāndhavaḥ || 16 ||
[Analyze grammar]

udāracaritākāraḥ samaḥ saukhyamahodadhiḥ |
susnigdhaśśītalasparśaḥ pūrṇaścandra ivoditaḥ || 17 ||
[Analyze grammar]

na tasya sukṛtenārtho na bhogairna ca karmabhiḥ |
na duṣkṛtairna bhogānāṃ santyāgena na bandhubhiḥ || 18 ||
[Analyze grammar]

na kāryakaraṇārambhairna niṣkriyatayā tathā |
na bandhena na mokṣeṇa na pātālena no divā || 19 ||
[Analyze grammar]

yathāvastu yadā dṛṣṭaṃ jagadekamayātmakam |
tadā bandhavimokṣārthaṃ na kvacitkṛpaṇaṃ manaḥ || 20 ||
[Analyze grammar]

samyagjñānāgninā yasya dagdhā sandehajālikā |
niśśaṅkamalamuḍḍīnastasya cittavihaṅgamaḥ || 21 ||
[Analyze grammar]

yasya bhrāntivinirmuktaṃ manaḥ samarasaṃ sthitam |
sa nāstameti nodeti vyomavatsarvavṛttiṣu || 22 ||
[Analyze grammar]

mañjūṣāyāṃ niṣaṇṇasya yathā bālasya ceṣṭate |
aṅgāvalyanusandhānavarjitā jñasya vai tathā || 23 ||
[Analyze grammar]

ghūrṇan kṣīva ivānandī mandīkṛtapunarbhavaḥ |
anupādeyabuddhyā tu na smaratyakṛtaṃ kṛtam || 24 ||
[Analyze grammar]

sarvaṃ sarvaprakāreṇa gṛhṇāti ca jahāti ca |
anupādeyasarvārtho bālavacca viceṣṭate || 25 ||
[Analyze grammar]

sa tiṣṭhannapi kāryeṣu deśakālakriyākramaiḥ |
na kāryasukhaduḥkhābhyāṃ manāgapi hi gṛhyate || 26 ||
[Analyze grammar]

bahiḥ prakṛtasarvārtho'pyantaḥ punaranīhayā |
na sattāṃ yojayatyarthe na phalānyanudhāvati || 27 ||
[Analyze grammar]

nopekṣate duḥkhadaśāṃ na sukhāśāmapekṣate |
kāryodaye naiti mudaṃ kāryanāśe na khidyate || 28 ||
[Analyze grammar]

api śītarucāvarke sukṛṣṇe'pīndumaṇḍale |
apyadhaḥ prasaratyagnau vismayo'sya na jāyate || 29 ||
[Analyze grammar]

cidātmana imā itthaṃ prasphurantīha śaktayaḥ |
ityasyāścaryajāleṣu nābhyudeti kutūhalam || 30 ||
[Analyze grammar]

na dayādainyamādatte na krauryamanudhāvati |
na lajjāmanusandhatte nālajjatvaṃ ca gacchati || 31 ||
[Analyze grammar]

na kadācana dīnātmā noddhatātmā kadācana |
na pramatto na khinnātmā nodvigno na ca harṣavān || 32 ||
[Analyze grammar]

nāsya cetasi susphāre śaradambaranirmale |
kopādayaḥ pravartante nabhasīva navāṅkurāḥ || 33 ||
[Analyze grammar]

anāratapatajjātabhūtāyāṃ jagataḥ sthitau |
kva kathaṃ kila kāsya syātsukhitā duḥkhitātha vā || 34 ||
[Analyze grammar]

phenājavañjavībhāve jale bhūtakrame tathā |
kva kileha kutaḥ ko'ntaḥ prasaṅgaḥ sukhaduḥkhayoḥ || 35 ||
[Analyze grammar]

bhāvābhāvairaparyantairajasraṃ jantusambhavaiḥ |
na viṣīdanti nodyanti dṛṣṭasṛṣṭikramā narāḥ || 36 ||
[Analyze grammar]

nimeṣaṃ prati yāminyā yathānyāḥ svapnadṛṣṭayaḥ |
yathotpannavināśinyastathaitā lokadṛṣṭayaḥ || 37 ||
[Analyze grammar]

anāratasamutpattāvanāratavināśini |
kaḥ kramo dagdhasaṃsāre kāruṇyānandayoriha || 38 ||
[Analyze grammar]

śubhābhāvātsukhābhāve sthitiṃ yāte vilakṣaṇāḥ |
kīdṛśyaḥ kathamāyātāḥ kā vā tā duḥkhasaṃvidaḥ || 39 ||
[Analyze grammar]

sukhamante tadantotthā svabījaṃ vitanoti yā |
śāntaṃ duḥkhadaśā seyaṃ kathamantarite sukhe || 40 ||
[Analyze grammar]

kṣīṇābhyāṃ sukhaduḥkhābhyāṃ heyopādeyayoḥ kṣaye |
īpsitānīpsite kva sto galite'tha śubhāśubhe || 41 ||
[Analyze grammar]

ramyāramyadṛśornāśācchānte bhogābhivāñchane |
nairāśyasantatiprauḍhe himavadvigalenmanaḥ || 42 ||
[Analyze grammar]

ā mūlānmanasi kṣīṇe saṅkalpasya kathaiva kā |
tileṣvevātidagdheṣu tailasya kalanā kutaḥ || 43 ||
[Analyze grammar]

bhāveṣvabhāvaghanabhāvanayā mahātmā nirmuktasaṅkalanamambaravatsthiteṣu |
cittaṃ prati svamudito viditaikarūpī jñastiṣṭhati svapiti jīvati nityatṛptaḥ || 44 ||
[Analyze grammar]