Chapter 78

jīvanmuktavarṇanaṃ nāma sargaḥ |
aṣṭasaptatitamaḥ sargaḥ |
vasiṣṭhaḥ |
yathālātaparispandādagnicakraṃ pravartate |
asadeva sadābhāsaṃ cittaspandāttathā jagat || 1 ||
[Analyze grammar]

yathā jalaparispandādvyatirikta ivāmbhasaḥ |
dṛśyate vartulāvartaścittaspandāttathā jagat || 2 ||
[Analyze grammar]

yathā vyomnīkṣitaspandātpiñchamauktikamaṇḍalam |
dṛśyate sadivāsatyaṃ cittaspandāttathā jagat || 3 ||
[Analyze grammar]

rāmaḥ |
yena praspandate cittaṃ yena na spandate'tha vā |
tadbrahmanbrūhi me yena cikitsyeta tadeva hi || 4 ||
[Analyze grammar]

vasiṣṭhaḥ |
yathā śauklyahime rāma tilatailalavau yathā |
yathā kusumasaugandhye tathauṣṇyadahanau yathā || 5 ||
[Analyze grammar]

raghunandana saṃśliṣṭau cittaspandau tathaiva hi |
abhinnau kevalaṃ mithyā bhedaḥ kalpita etayoḥ || 6 ||
[Analyze grammar]

cittacittaparispandapakṣayorekasaṅkṣaye |
svayaṃ guṇaguṇisthityā naśyato dvau na saṃśayaḥ || 7 ||
[Analyze grammar]

dvau kramau cittanāśasya yogo jñānaṃ ca rāghava |
yogastadvṛttirodho hi jñānaṃ samyagavekṣaṇam || 8 ||
[Analyze grammar]

rāmaḥ |
kayā kīdṛkṣayā vṛttyā prāṇāpānanibaddhayā |
yoganāmnyā manaśśāntimetyanantasukhapradām || 9 ||
[Analyze grammar]

vasiṣṭhaḥ |
dehe'smindehanāḍīṣu vātaḥ sphurati yo'bhitaḥ |
skhadāsviva bhuvo vāri sa prāṇa iti kīrtitaḥ || 10 ||
[Analyze grammar]

tasya spandavaśādantaḥ kriyāvaicitryamīyuṣaḥ |
apānādīni nāmāni kalpitāni kṛtātmabhiḥ || 11 ||
[Analyze grammar]

āmodasya yathā puṣpaṃ śauklyasya tuhinaṃ yathā |
tathaiṣa ratha ādhāraścittasyābhinnatāṃ gataḥ || 12 ||
[Analyze grammar]

antaḥprāṇaparispandātsaṅkalpakalanonmukhī |
saṃvitsañjāyate yaiṣā taccittaṃ viddhi rāghava || 13 ||
[Analyze grammar]

prāṇaspandaṃ viduḥ spandaṃ tatspandādeva saṃvidaḥ |
cakrāvartavidhāyinyo jalaspandādivormayaḥ || 14 ||
[Analyze grammar]

cittaṃ prāṇaparispandamāhurāgamabhūṣaṇāḥ |
tasmin saṃrodhite nūnamupaśāntaṃ bhavenmanaḥ || 15 ||
[Analyze grammar]

manasspandopaśāntyāyaṃ saṃsāraḥ pravilīyate |
sūryālokaparispandaśāntau vyavahṛtiryathā || 16 ||
[Analyze grammar]

rāmaḥ |
aniśaṃ caratāṃ dehagehe gahanagāminām |
prāṇādīnāṃ parispando vāyūnāṃ rodhyate katham || 17 ||
[Analyze grammar]

vasiṣṭhaḥ |
śāstrasajjanasamparkādvairāgyābhyāsayogataḥ |
anāsthāyāṃ kṛtāsthāyāṃ pūrvaṃ saṃsāravṛttiṣu || 18 ||
[Analyze grammar]

yathābhivāñchitadhyānācciramekatayoditāt |
etattattvaghanābhyāsātprāṇaspando nirudhyate || 19 ||
[Analyze grammar]

pūrakādinijāyāmadṛḍhābhyāsādakhedajāt |
ekāntadhyānasaṃyogātprāṇaspando nirudhyate || 20 ||
[Analyze grammar]

oṅkāroccāraṇaprāntaśabdatattvānudhāvanāt |
suṣupte saṃvido jāte prāṇaspando nirudhyate || 21 ||
[Analyze grammar]

recake nūnamabhyaste prāṇe sphāraṃ khamāgate |
na spṛśatyaṅgarandhrāṇi prāṇaspando nirudhyate || 22 ||
[Analyze grammar]

kumbhake pūrvavatkālamanantaṃ paritiṣṭhati |
abhyāsātstambhite prāṇe prāṇaspando nirudhyate || 23 ||
[Analyze grammar]

tālumūlagatāṃ yatnājjihvayākramya ghaṇṭikām |
ūrdhvarandhragate prāṇe prāṇaspando nirudhyate || 24 ||
[Analyze grammar]

samastakalanonmukte nakiñcinnāmni sūkṣmakhe |
dhyānātsaṃvidi līnāyāṃ prāṇaspando nirudhyate || 25 ||
[Analyze grammar]

dvādaśāṅgulaparyante nāsāgre vimalāmbare |
samyagdṛśoḥ praśāmyantyoḥ prāṇaspando nirudhyate || 26 ||
[Analyze grammar]

abhyāsādūrdhvarandhreṇa tālūrdhvadvādaśāntage |
prāṇe galitasaṃvittau prāṇaspando nirudhyate || 27 ||
[Analyze grammar]

bhrūmadhye tārakālokaśāntāvastamupāgate |
cetane ketane buddheḥ prāṇaspando nirudhyate || 28 ||
[Analyze grammar]

ciraṃ kālaṃ hṛdekāntavyomasaṃvedanānmuneḥ |
avāsanamanodhyānātprāṇaspando nirudhyate || 29 ||
[Analyze grammar]

rāmaḥ |
brahmañjagati bhūtānāṃ hṛdayaṃ tatkimucyate |
idaṃ sarvaṃ mahādarśe yasmiṃstatpratibimbati || 30 ||
[Analyze grammar]

vasiṣṭhaḥ |
sādho jagati bhūtānāṃ dvividhaṃ hṛdayaṃ sthitam |
upādeyaṃ ca heyaṃ ca vibhāgo'yaṃ tayośśṛṇu || 31 ||
[Analyze grammar]

iyattayā paricchinne dehe yadvakṣaso'ntare |
heyaṃ taddhṛdayaṃ viddhi tanāvekataṭe sthitam || 32 ||
[Analyze grammar]

saṃvinmātraṃ tu hṛdayamupādeyaṃ nṛṇāṃ smṛtam |
tadantare ca bāhye ca na ca bāhye na cāntare || 33 ||
[Analyze grammar]

tattatpradhānaṃ hṛdayaṃ tatredaṃ samavasthitam |
tadādarśaḥ padārthānāṃ tatkośaḥ sarvasampadām || 34 ||
[Analyze grammar]

sarveṣāmeva jantūnāṃ saṃviddhṛdayamucyate |
na dehāvayavaikāṃśo jaḍo jīrṇopalopamaḥ || 35 ||
[Analyze grammar]

tasmātsaṃvinmaye śuddhe hṛdaye'tra vivāsanam |
balānniyojite citte prāṇaspando nirudhyate || 36 ||
[Analyze grammar]

ebhiḥ kramairathānyaiśca nānāsaṅkalpakalpitaiḥ |
nānādaiśikavaktrasthaiḥ prāṇaspando nirudhyate || 37 ||
[Analyze grammar]

abhyāsena nirābādhametāstā yogayuktayaḥ |
upāyatāmupāyānti bhavyasya bhavabhedane || 38 ||
[Analyze grammar]

abhyāsāddṛḍhatāṃ yātādvairāgyaparilāñchitāt |
yathāvāsanamāyāmaḥ prāṇānāṃ saphalaḥ smṛtaḥ || 39 ||
[Analyze grammar]

bhrūnāsātālusaṃsthāsu dvādaśāṅgulakoṭiṣu |
abhyāsācchāmyati prāṇo dūre girinadī yathā || 40 ||
[Analyze grammar]

bhūyo bhūyaścirābhyāsājjihvāprāntena tāluni |
ghaṇṭikā spṛśyate prāṇā yenordhvena vahantyalam || 41 ||
[Analyze grammar]

vikalpabahulāstvete svabhyāsena samādhayaḥ |
paramopaśamāyāśu samprayāntyavikalpatām || 42 ||
[Analyze grammar]

ātmārāmo vītaśoko bhavatyantassukhaḥ pumān |
abhyāsādeva nānyasmāttasmādabhyāsavānbhava || 43 ||
[Analyze grammar]

abhyāsena parispande prāṇānāṃ kṣayamāgate |
manaḥ praśamamāyāti nirvāṇamavaśiṣyate || 44 ||
[Analyze grammar]

vāsanāvalitaṃ janma mokṣo nirvāsanaṃ manaḥ |
prāṇaśca rāma gṛhṇāti yathecchasi tathā kuru || 45 ||
[Analyze grammar]

prāṇaspando manorūpaṃ tasmātsaṃsṛtisambhramaḥ |
tasminneva śamaṃ yāte kṣīyate saṃsṛtijvaraḥ || 46 ||
[Analyze grammar]

vikalpasaṅkṣayājjantoḥ padaṃ tadavaśiṣyate |
yato vāco nivartante samastakalanānvitāḥ || 47 ||
[Analyze grammar]

yatra sarvaṃ yataḥ sarvaṃ yatsarvaṃ sarvataśca yat |
yatra nedaṃ yato nedaṃ yannedaṃ nedṛśaṃ ca yat || 48 ||
[Analyze grammar]

vināśitvādvikalpitvādguṇitvānnirguṇātmanaḥ |
yasya no sadṛśo dṛśye dṛṣṭāntaḥ kaścideva hi || 49 ||
[Analyze grammar]

svādanī sarvaśālīnāṃ dīpikā sarvatejasām |
kalanā sarvakāmānāṃ yataściccandrikoditā || 50 ||
[Analyze grammar]

yatsaṅkalpatarorbahvyaḥ saṃsāraphalapaṅktayaḥ |
anārataṃ bahurasā jāyante ca patanti ca || 51 ||
[Analyze grammar]

tatpadaṃ sarvasīmāntamavalambya mahāmatiḥ |
yaḥ sthitaḥ sthiradhīstajjñaḥ sa jīvanmukta ucyate || 52 ||
[Analyze grammar]

vigatasarvasamīhitakautukaḥ samupaśāntahitāhitakalpanaḥ |
sakalasaṃvyavahārasamāśayo bhavati muktamanāḥ puruṣottamaḥ || 53 ||
[Analyze grammar]