Chapter 50

gādhivṛttāntaḥ samāptaḥ nāma sargaḥ |
pañcāśaḥ sargaḥ |
vasiṣṭhaḥ |
evameṣātivitatā durjñānā raghunandana |
mahāmohakarī māyā viṣamā pāramātmikī || 1 ||
[Analyze grammar]

kva muhūrtadvayasvapnasambhramālokadṛṣṭatā |
kvānekavarṣasambhuktaśvapacāvanipabhramaḥ || 2 ||
[Analyze grammar]

kva sambhramopalabdhatvaṃ kva pratyakṣanidarśanam |
kvāsatyatvamasandigdhaṃ kva satyapariṇāmitā || 3 ||
[Analyze grammar]

ato vacmi mahābāho māyeyaṃ vitatetyalam |
asāvadhānamanasaṃ yojayatyatisaṅkaṭe || 4 ||
[Analyze grammar]

rāmaḥ |
evamasya kathaṃ brahmanmāyācakrasya rodhanam |
kurmaḥ prabalino vegātsarvāṅgacchedakāriṇaḥ || 5 ||
[Analyze grammar]

vasiṣṭhaḥ |
asya saṃsārarūpasya māyācakrasya rāghava |
cittaṃ viddhi mahānābhiṃ bhramato bhramadāyinaḥ || 6 ||
[Analyze grammar]

tasminnūnamavaṣṭabdhe dhiyā puruṣayatnataḥ |
gṛhītanābhi vahanānmāyācakraṃ nirudhyate || 7 ||
[Analyze grammar]

avaṣṭabdhamanonābhi mohacakraṃ na copati |
yathā rajjvāṃ niruddhāyāṃ kīlakaṃ rajjuveṣṭitam || 8 ||
[Analyze grammar]

cakrayuddhaikatajjño'pi kasmājjānāsi nānagha |
cakraṃ nābhāvavaṣṭabdhaṃ vaśamāyāti nānyathā || 9 ||
[Analyze grammar]

cittanābhāvavaṣṭabhya tasmād yatnena rāghava |
saṃsāracakraṃ vahanādātmanaḥ parirodhaya || 10 ||
[Analyze grammar]

etāṃ yuktiṃ vinā duḥkhamanantamidamātmanaḥ |
asyāṃ yuktau kṣaṇāttvantaṃ gatamevāvalokaya || 11 ||
[Analyze grammar]

cittākramaṇamātrākhyātparamādauṣadhādṛte |
prayatnenāpi saṃsāramahārogo na śāmyati || 12 ||
[Analyze grammar]

tasmād rāghava santyajya tīrthadānatapaḥkriyāḥ |
śreyase paramāyāntaścittameva vaśīkuru || 13 ||
[Analyze grammar]

cittāntareva saṃsāraḥ kumbhāntaḥ kumbhakhaṃ yathā |
cittanāśe na saṃsāraḥ kumbhanāśe na kumbhakham || 14 ||
[Analyze grammar]

cittasaṃsāraṇākāśakoṭare cittakumbhakham |
vināśyātulitākāśarūpaṃ svaṃ rūpamāviśa || 15 ||
[Analyze grammar]

vartamānaṃ kramāyātaṃ bhajadbāhyadhiyā kṣaṇam |
bhūtaṃ bhaviṣyadabhajad yāti cittamacittatām || 16 ||
[Analyze grammar]

saṅkalpaṃ sānusandhānavarjanaṃ cetpratikṣaṇam |
karoṣi tadacittatvaṃ prāpta evāsi pāvanam || 17 ||
[Analyze grammar]

yāvatsaṅkalpakalanaṃ tāvaccittavibhūtayaḥ |
yāvajjaladavistārastāvatkhe jalabindavaḥ || 18 ||
[Analyze grammar]

sacittaṃ cetanaṃ yāvattāvatsaṅkalpakalpanam |
sacandrāṃśu jagad yāvattāvatprāleyaleśakāḥ || 19 ||
[Analyze grammar]

cetanaścittariktaścedbhāvitastatkusaṃsṛteḥ |
āmūlameva dagdhāni viddhi mūlāni siddhiman || 20 ||
[Analyze grammar]

cetanaṃ cittariktaṃ hi pratyakcetanamucyate |
nirmanaskasvabhāvaṃ tanna tatra kalanāmalaḥ || 21 ||
[Analyze grammar]

sā satyatā sā śivatā sā sattā pāramātmikī |
sarvajñatā sā sā tṛptirnanu yatra manaḥ kṣatam || 22 ||
[Analyze grammar]

mano yatra tu tatrāsthāstatra duḥkhasukhāni ca |
sadā sannidhimāyānti śmaśāna iva vāyasāḥ || 23 ||
[Analyze grammar]

avastutvāvabodhena sarvabhāvavyavasthiteḥ |
saṃsṛtivrataterbījaṃ saṅkalpe nopajāyate || 24 ||
[Analyze grammar]

śāstrasajjanasamparkasantatābhyāsayogataḥ |
jāgatānāmavastutvaṃ bhāvānāmadhigamyate || 25 ||
[Analyze grammar]

avivekādupāhṛtya cetaḥ svairyatnaniścayaiḥ |
balātkāreṇa saṃyojyaṃ śāstrasatpuruṣakrame || 26 ||
[Analyze grammar]

mukhyaṃ kāraṇamātmaiva paramātmāvalokane |
agādhe patitaṃ ratnaṃ ratnenaivāvakṛṣyate || 27 ||
[Analyze grammar]

svānubhūtāni duḥkhāni svātmaiva tyaktumarhati |
tenātmaivātmavijñāne heturekaḥ paraḥ smṛtaḥ || 28 ||
[Analyze grammar]

pralapanvisṛjan gṛhṇannunmiṣannimiṣannapi |
nirastamananānantasaṃvinmātraparo bhava || 29 ||
[Analyze grammar]

mamedaṃ tadayaṃ so'hamiti santyajya vāsanāḥ |
ekaniṣṭhatayāntassthasaṃvinmātraparo bhava || 30 ||
[Analyze grammar]

vartamānabhaviṣyantyoḥ sthityorādehamekadhīḥ |
svasaṃvittyanusandhānātsamādhānaparo bhava || 31 ||
[Analyze grammar]

palāyaneṣu yuddheṣu duḥkheṣu ca sukheṣu ca |
jāgratsvapnasuṣupteṣu svasaṃvittiparo bhava || 32 ||
[Analyze grammar]

malaṃ saṃvedyamutsṛjya mano nirmathya mantharam |
āśāpāśānalaṃ chittvā svasaṃvittiparo bhava || 33 ||
[Analyze grammar]

aśubhāśubhasaṅketaḥ saṃśāntāśāviṣūcikaḥ |
naṣṭeṣṭāniṣṭadṛṣṭistvaṃ saṃvitsāraparo bhava || 34 ||
[Analyze grammar]

sakartṛkarmakaraṇān svān sparśānantaraspṛśan |
nirvikalpanirālambaḥ svacinmātraparo bhava || 35 ||
[Analyze grammar]

jāgratyeva hi sauṣuptīṃ bhāvayan susthirāṃ sthitim |
sarvamastīti sañcintya sattaikātmavapurbhava || 36 ||
[Analyze grammar]

nānānānādaśāmukto yukto muktatayāśaye |
samagrakalanādīpaḥ svacinmātraparo bhava || 37 ||
[Analyze grammar]

ātmatāparate tyaktvā nirvibhāgo jagatsthitau |
vajrastambhavadātmānamavalambya sthiro bhava || 38 ||
[Analyze grammar]

chittvāntarmānasānpāśānāśārūpānudārayā |
dhiyā dhairyaikadhāriṇyā nirdharmādharmatāṃ vraja || 39 ||
[Analyze grammar]

samāsādayatastattvaṃ svasaṃvedanamityalam |
viṣaṃ hālāhalamapi yāsyatyamṛtatāṃ tava || 40 ||
[Analyze grammar]

tadodeti mahāmohaḥ saṃsṛtibhramakāraṇam |
nirmalāyā niraṃśāyāḥ svasaṃvitteścyutiryadā || 41 ||
[Analyze grammar]

tadā saṅkṣīyate mohaḥ saṃsṛtibhramakāraṇam |
nirmalāyāṃ niraṃśāyāṃ svasaṃvittau sthitiryadā || 42 ||
[Analyze grammar]

svarūpamanuyātasya tīrṇasyāśāmahārṇavam |
prasariṣyati te saṃvitsūryāṃśuriva sarvataḥ || 43 ||
[Analyze grammar]

svabhāvamālokayata ānandamayasaṃsthiteḥ |
rasāyanamapi svādu rāma prativiṣāyate || 44 ||
[Analyze grammar]

tairna lajjāmahe pumbhirye svabhāvamupāgatāḥ |
śeṣāḥ puruṣanāmāno gardabhā dīrghabāhavaḥ || 45 ||
[Analyze grammar]

parvatāḥ kharvatāṃ yānti puro'dreriva dantinaḥ |
parāṃ koṭiṃ prayātasya svasaṃvittyunnatasthiteḥ || 46 ||
[Analyze grammar]

ādṛśyadraṣṭṛsīmno'ntaḥ sūryādīnyakhilānyapi |
na tejāṃsyupakurvanti svasaṃviddivyacakṣuṣaḥ || 47 ||
[Analyze grammar]

avastutāṃ vrajantyete madhyāhna iva dīpakāḥ |
arkādayo mahālokavidhāvadhigatātmanaḥ || 48 ||
[Analyze grammar]

tejo'ṃśuṣu prabhāveṣu baleṣvatimahatsvapi |
sarveṣūnnatiyukteṣu tattvajñaḥ paramonnataḥ || 49 ||
[Analyze grammar]

bhānti bhāsā yathā sūryavahnīndumaṇitārakāḥ |
tathā jagati rājante jñātajñeyā narottamāḥ || 50 ||
[Analyze grammar]

dharāvivarakīṭebhyo gardabhebhyo'pi mānavāḥ |
tiryagbhyaścāpyatattvajñā rāma tucchatarāḥ smṛtāḥ || 51 ||
[Analyze grammar]

tāvatsammohavetālo deho yāvadanātmavān |
ātmajña eva saṃyuktaścetaneneti tadvidaḥ || 52 ||
[Analyze grammar]

anātmajño hi durdehaḥ prasphurannapi bhūtale |
śava eva bhramatyuccairātmajñastu sacetanaḥ || 53 ||
[Analyze grammar]

dūramātmajñatā yāti citte pīvaratāṃ gate |
ālokalakṣmīramalā mahāmegha ivotthite || 54 ||
[Analyze grammar]

bhogābhogatiraskāraiḥ kārśyaṃ neyaṃ manaśśanaiḥ |
rasāpahāraistajjñena kālenājīrṇaparṇavat || 55 ||
[Analyze grammar]

anātmanyātmabhāvena dehamātrāsthayānayā |
putradārakuṭumbaiśca ceto gacchati pīnatām || 56 ||
[Analyze grammar]

ahaṅkāravikāreṇa mamatāmalahelayā |
idaṃ mameti bhāvena ceto gacchati pīnatām || 57 ||
[Analyze grammar]

jarāmaraṇaduḥkhena vyarthamunnatimīyuṣā |
doṣāśīviṣakośena ceto gacchati pīnatām || 58 ||
[Analyze grammar]

durāśākṣīrapānena bhogānilabalena ca |
āsthādānena cānena cittāhiryāti pīnatām || 59 ||
[Analyze grammar]

ādhivyādhivilāsena samāśvāsena saṃsṛtau |
heyādeyaprayatnena ceto gacchati pīnatām || 60 ||
[Analyze grammar]

āgamāpāyavapuṣā viṣavaiṣamyaśaṃsinā |
bhogābhogena pīnena cittāhiryāti pīnatām || 61 ||
[Analyze grammar]

śarīraduśśvabhraciraprarūḍhaṃ cintācayoccākṛtimañjarīkam |
jarāmṛtivyādhiphalāvanamraṃ kāmopabhogaughavikāsipuṣpam || 62 ||
[Analyze grammar]

vicārasārakrakacena cittaviṣadrumaṃ tvaṃ drutamindukalpa |
āśāmahāśākhamaśaṅkameva cchinddhi prasahyārdravikalpapattram || 63 ||
[Analyze grammar]

mattaṃ kṣaṇaṃ caikataṭopaveśaviśrāntisaukhyeṣvasamarthamugram |
āloḍanotkaṃ sujanakramābjaṣaṇḍasya caṇḍaṃ sukhaduḥkhagaṇḍam || 64 ||
[Analyze grammar]

cetogajaṃ kāyakukānanasthaṃ sutīkṣṇayā dhīkarajāgrapaṅktyā |
vidārayādīrghavikāradantaṃ kriyākaraṃ rāghava rājasiṃha || 65 ||
[Analyze grammar]

ratiṃ gataṃ nityamasatpradeśe śarīramālāgrasanena puṣṭam |
dhṛṣṭaṃ kriyākarkaśacañcucaṇḍamekekṣaṇaṃ puṣṭatamo'ṃśakṛṣṇam || 66 ||
[Analyze grammar]

dūre samutsāraya sārabhūtaṃ duśceṣṭitaṃ karkaśamāraṭantam |
garvoddhataṃ kāyakulāyakośāddoṣopaśāntyai nijacittakākam || 67 ||
[Analyze grammar]

tṛṣṇāpiśācyā paricaryamāṇaṃ viśrāntamajñānamahāvaṭeṣu |
bhrāntaṃ ciraṃ dehaśateṣvaṭavyāṃ svasaṃsṛtau cetanavarjiteṣu || 68 ||
[Analyze grammar]

vivekavairāgyaguruprayatnamantraiḥ svatantraiḥ svacidātmagehāt |
notsāritaścittapiśācako'yaṃ yāvatkutastāvadihātmasiddhiḥ || 69 ||
[Analyze grammar]

śubhāsubhāśīrhatamānavaughaṃ cintāviṣaṃ kāyakukañcukaṃ ca |
ajasramacchaśvasanāśanaṃ ca sarvasya rāmābhayanāśanaṃ ca || 70 ||
[Analyze grammar]

hṛdabjaduśśalmalikoṭarasthaṃ bhogaughagarhākhagamantraśaktyā |
nītvā śamaṃ rāma manomahāhiṃ bhayaṃ bhṛśaṃ projjhya bhavābhayātmā || 71 ||
[Analyze grammar]

amaṅgalākāradharaśśarīraśavāvalīsantatasevanena |
digāvalīsambhramaṇaśramārtaśśmaśānasevī vapuṣā kṣatena || 72 ||
[Analyze grammar]

bhogāmiṣe dikṣvabhidhāvamāna utkandharo dhīravivṛddhagarvaḥ |
uḍḍīya cedgacchati cittagṛdhro dehadrumāttannipuṇaṃ jayaste || 73 ||
[Analyze grammar]

bhrāntaṃ vanānteṣu digantareṣu phalārthinaṃ cañcalamākulāṅgam |
janmāvanerjanmamahīṃ prayāntaṃ saṃsārapānthaṃ janamāhasantam || 74 ||
[Analyze grammar]

drume'kṣināsākusume bhujādiśākhe vilolāṅgulijālapattre |
samullasantaṃ parimārayainaṃ manomahāmarkaṭamaṅga siddhyai || 75 ||
[Analyze grammar]

abhyutthitaṃ satphalasaṅkṣayāya lasatsukhāsaṅgataḍitprakāśam |
varṣantamāsāramanarthasārthamāndolitaṃ vāsanavātyayāntaḥ || 76 ||
[Analyze grammar]

saṅkalpyasaṅkalpanavarjanogramantraprabhāvāddhṛdayāmbarāttvam |
sotsāhamutsādaya cittameghaṃ mahatphalaṃ prāpya bhavālamāḍhyaḥ || 77 ||
[Analyze grammar]

granthīkṛtaṃ karmabhirātmasṛṣṭaiśśastrairabhedyaṃ jvalanairadagdham |
pīḍāṃ parāmātmani kalpayantaṃ samastajātyantaradīrghadāma || 78 ||
[Analyze grammar]

samprotanissaṅkhyaśarīramālaṃ balādasaṅkalpanamātraśastraiḥ |
chittvā svayaṃ rāghava cittapāśaṃ yathāsukhaṃ tvaṃ viharāstaśaṅkaḥ || 79 ||
[Analyze grammar]

phūtkāradagdhākhilamārgalokamatyantaduṣprāpaparaprabodham |
āśāviṣāśoṣitalokaṣaṇḍaṃ vātāmiṣocchūnaśarīradaṇḍam || 80 ||
[Analyze grammar]

āmantharaṃ dehaguhāprasuptaṃ saṅkalpaghorājagaraṃ javena |
akāmanānāmamahānalena balena dagdhvā vibhayo bhava tvam || 81 ||
[Analyze grammar]

cittena cetaśśamamāśu nītvā śuddhena ghorāstramivāstrayuktyā |
cirāya sādho tyaja cañcalatvaṃ vimarkaṭo vṛkṣa ivākṣataśrīḥ || 82 ||
[Analyze grammar]

alamalamiti kṛtvā cetasā vītaśaṅkaṃ vyupaśamitamalo'ntaḥ sarvamādehameva |
tṛṇalavalaghu paśyaṃl līlayāheyadṛṣṭyā piba vihara ramasva prāptasaṃsārapāraḥ || 83 ||
[Analyze grammar]