Chapter 84

sūcyupākhyānaṃ samāptaṃ nāma sargaḥ |
caturaśītitamaḥ sargaḥ |
vasiṣṭhaḥ |
etatte kathitaṃ sarvamupākhyānamaninditam |
karkaṭyā vanarākṣasyā yathāvadanupūrvaśaḥ || 1 ||
[Analyze grammar]

rāmaḥ |
himavadgahvaraproktā sā kathaṃ kṛṣṇarākṣasī |
kathaṃ ca karkaṭī nāmnā yathāvadvada me prabho || 2 ||
[Analyze grammar]

vasiṣṭhaḥ |
kulāni santyanekāni rākṣasānāṃ svabhāvataḥ |
tāni kṛṣṇāni śuklāni haritānyujjvalāni ca || 3 ||
[Analyze grammar]

karkaṭaprāṇisadṛśaḥ karkaṭo nāma rākṣasaḥ |
babhūva tajjā sā kṛṣṇā karkaṭī karkaṭākṛtiḥ || 4 ||
[Analyze grammar]

karkaṭīpraśnasaṃsmṛtyā mayaiṣā kathitā tava |
adhyātmoktiprasaṅgena citsvarūpanirūpaṇe || 5 ||
[Analyze grammar]

sampannamevamekasmādasampannamapi sphuṭam |
idaṃ jagadanādyantātpadātparamakāraṇāt || 6 ||
[Analyze grammar]

bhāvinyo vīcayo vāriṇyanyānanyāḥ sthitā yathā |
vartamānā api pare sṛṣṭayaḥ saṃsthitāstathā || 7 ||
[Analyze grammar]

ajvalanneva kāṣṭheṣu vahnirarthakriyāṃ yathā |
karoti markaṭādīnāṃ śītāpaharaṇādikām || 8 ||
[Analyze grammar]

samaṃ saumyatvamajahadeva nityoditasthiti |
tathā brahma karotīdaṃ nānākarteva sajjagat || 9 ||
[Analyze grammar]

apyanāgata evāyamevaṃ sarga upāgataḥ |
bhoḥ sālabhañjikāsaṃviddāruṇīva subodhitā || 10 ||
[Analyze grammar]

bījād yathānanyadapi phalādyanyadivotthitam |
citestathānanyadapi cetyamanyadivotthitam || 11 ||
[Analyze grammar]

acchedādekasattāyā na bhedaḥ phalabījayoḥ |
ciccetyayośca vāryūrmyoriva vastuni kaścana || 12 ||
[Analyze grammar]

avicārādṛte bhedo naitayorupapadyate |
yataḥ kutaściduditaḥ sa vicāreṇa naśyati || 13 ||
[Analyze grammar]

bhrāntireṣā yathāyātā tathā yātu raghūdvaha |
jñāsyasyetatprabuddhastvamenāṃ kevalamutsṛja || 14 ||
[Analyze grammar]

bhrāntigranthau vitruṭite maduktiśravaṇāttava |
jñānaśabdārthabhedānāṃ vastu jñāsyasyalaṃ svayam || 15 ||
[Analyze grammar]

cittādiyamanarthaśrīstacca sā cetaraśca te |
maduktiśravaṇādeva śāntimeṣyantyasaṃśayam || 16 ||
[Analyze grammar]

brahmaṇaḥ sarvamutpannaṃ sarvaṃ brahmaiva ceti ca |
madgīrbhiḥ samprabuddhaḥ sañjñāsyasyalamanindita || 17 ||
[Analyze grammar]

rāmaḥ |
tasmādidamiti brahmanvyatirekārthapañcamī |
nanu kiṃ vakṣi deveśādabhinnaṃ sarvamityapi || 18 ||
[Analyze grammar]

vasiṣṭhaḥ |
upadeśāya śāstreṣu jātaśśabdo'thavārthajaḥ |
pratiyogivyavacchedaḥ saṅkhyālakṣaṇapakṣavān || 19 ||
[Analyze grammar]

bhedo dṛśyata evāyaṃ vyavahārānna vāstavaḥ |
vetālo bālakasyeva kāryārthaṃ parikalpitaḥ || 20 ||
[Analyze grammar]

dvaitaikyamapi no yasyāṃ yathābhūtārthasaṃsthitau |
asti tasyāmīdṛśaḥ syātkutaḥ saṅkalpaviplavaḥ || 21 ||
[Analyze grammar]

kāryakāraṇabhāvo hi yathā svasvāmilakṣaṇaḥ |
hetuśca hetumāṃścaiva tathaivāvayavakramaḥ || 22 ||
[Analyze grammar]

vyatirekāvyatirekapariṇāmādivibhramaḥ |
tathā bhāvavikārāśca vidyāvidye sukhāsukhe || 23 ||
[Analyze grammar]

evamādimayī mithyāsaṅkalpakalanombhitā |
ajñānāmavabodhārthaṃ na tu bhedo'sti vastuni || 24 ||
[Analyze grammar]

asambodhādayaṃ bhedo jñāte dvaitaṃ na vidyate |
jñāte saṃśāntakalanaṃ maunamevāvaśiṣyate || 25 ||
[Analyze grammar]

paramekamanādyantamavibhāgamakhaṇḍitam |
iti jñāsyasi siddhāntakāle bodhamupāgataḥ || 26 ||
[Analyze grammar]

vikalpante hyasambuddhāḥ svavikalpavijṛmbhitaiḥ |
upadeśādayaṃ vādo jñāte dvaitaṃ na vidyate || 27 ||
[Analyze grammar]

vācyavācakasambandho vinā dvaitaṃ na sidhyati |
na ca dvaitaṃ sambhavati maunaṃ vā vāca ityalam || 28 ||
[Analyze grammar]

mahāvākyārthaniṣṭhāṃ tvaṃ buddhiṃ kṛtvā raghūdvaha |
vacobhedamanādṛtya yadidaṃ vacmi tacchṛṇu || 29 ||
[Analyze grammar]

jātaṃ kutaścidutthāya gandharvapuravanmanaḥ |
bhrāntimātraṃ tanotīdaṃ jagadākhyaṃ svajṛmbhaṇam || 30 ||
[Analyze grammar]

yathā cetastanotīmāṃ jaganmāyāṃ tathānagha |
śṛṇu tvaṃ kathayāmīdaṃ dṛṣṭāntaṃ sṛṣṭivedane || 31 ||
[Analyze grammar]

yaṃ śrutvā sarvamevedaṃ bhrāntimātramiti svayam |
rāma niścayavānbhūtvā dūre tyakṣyasi vāsanām || 32 ||
[Analyze grammar]

manomanananirmāṇamātrameva jagattrayam |
sarvamutsṛjya śāntātmā svātmanyeva nivatsyasi || 33 ||
[Analyze grammar]

madvākyārthāvadhānastho manovyādhicikitsane |
vivekauṣadhilepena prayatnaṃ ca kariṣyasi || 34 ||
[Analyze grammar]

evaṃ sthite jagadrūpaṃ cittameveha jṛmbhate |
na vidyate śarīrādi sikatāntaratailavat || 35 ||
[Analyze grammar]

cittameva hi saṃsāro rāgādikleśadūṣitam |
tadeva tairvinirmuktaṃ bhavānta iti kathyate || 36 ||
[Analyze grammar]

cittaṃ sādhyaṃ pālanīyaṃ vicāryaṃ kāryamāryavat |
āhāryaṃ vyavahāryaṃ ca sañcāryaṃ dhāryamādarāt || 37 ||
[Analyze grammar]

evamabhyantare citraṃ bibharti trijaganmanaḥ |
aṇḍaṃ māyūramiva tad yathākālaṃ vijṛmbhate || 38 ||
[Analyze grammar]

yo'yaṃ cittasya cidbhāgaḥ saiṣā sarvārthabījatā |
yaścāsya jaḍabhāgaḥ svastajjagatso'ṅga vibhramaḥ || 39 ||
[Analyze grammar]

avidyamānamevedamādisarge dharādikam |
nirākṛtirajaḥ svapnaṃ paśyatīva na paśyati || 40 ||
[Analyze grammar]

sargādi dīrghasaṃvittyā śailādi jaḍasaṃvidā |
sūkṣmaṃ sūkṣmavidā vetti dehaṃ śūnyaṃ na vāstavam || 41 ||
[Analyze grammar]

sarvagenātmanā vyāptaṃ svacetyātmavapurmanaḥ |
ātalaṃ somyavimalaṃ vārīva ravitejasā || 42 ||
[Analyze grammar]

cittabālo jagadyakṣaṃ mithyā paśyatyabodhataḥ |
bodhato'sau paraṃ rūpaṃ svaṃ paśyati nirāmayam || 43 ||
[Analyze grammar]

yathātmā dṛśyatāmeti dvaitaikyabhramadāyinīm |
śṛṇu tatte pravakṣyāmi vakṣyamāṇakathākramaiḥ || 44 ||
[Analyze grammar]

yatkathyate hi hṛdayaṅgamayopamānayuktyā girā madhuramugdhapadārthayā ca |
śrotustadaṅga hṛdayaṃ parito visāri vyāpnoti tailamiva vāriṇi vāryaśaṅkam || 45 ||
[Analyze grammar]

tyaktopamānamamanojñapadaṃ durarthaṃ kṣubdhaṃ tvarāvidhuritaṃ vinigīrṇavarṇam |
śroturna yāti hṛdayaṃ pravināśameva saṃyāti cājyamiva bhasmani hūyamānam || 46 ||
[Analyze grammar]

ākhyānakāni bhuvi yāni kathāśca yā yā yad yatprameyamuditaṃ paripeśalaṃ vā |
dṛṣṭāntadṛṣṭikathanena tadeti sādho prākāśyamāśu bhuvanaṃ sitaraśmineva || 47 ||
[Analyze grammar]