Chapter 71

sūcyupākhyāne sūcivyavahāravarṇanaṃ nāma sargaḥ |
ekasaptatitamaḥ sargaḥ |
vasiṣṭhaḥ |
atha sā bahukālena karkaṭī nāma rākṣasī |
sarveṣāṃ naramāṃsānāṃ nūnaṃ tṛptimupāyayau || 1 ||
[Analyze grammar]

pūrveṇaiva kilāhnā sā tṛptā rudhirabindunā |
sūcyāṃ kimiva mātyantastṛṣṇāsūcistu durbharā || 2 ||
[Analyze grammar]

cintayāmāsa hā kaṣṭaṃ kimidaṃ sūcitāṃ gatā |
sūkṣmāsmi hataśaktiśca mayi grāso na māti ca || 3 ||
[Analyze grammar]

kva me tāni viśālāni gatānyaṅgāni durdhiyaḥ |
kālameghavilāsāni vane śīrṇāni parṇavat || 4 ||
[Analyze grammar]

mayyasyāṃ mandabhāgyāyāṃ manāgapi na māti ca |
svādumāṃsarasagrāso vasāvāsita āsavaḥ || 5 ||
[Analyze grammar]

paṅke'ntarvinimajjāmi patāmi dharaṇītale |
hatāsmi janapadaughaistaskarairdalitāsmi ca || 6 ||
[Analyze grammar]

hā hatāhamanāthāhamanāśvāsā nirāspadā |
duḥkhādduḥkhe nimajjāmi saṅkaṭātsaṅkaṭe'pi ca || 7 ||
[Analyze grammar]

na me sakhī na me dāsī na me mātā na me pitā |
na me bandhurna me bhṛtyo na me bhrātā na me sutaḥ || 8 ||
[Analyze grammar]

na me deho na me sthānaṃ na me kaścitsamāśrayaḥ |
naikasthānasamāśvāso bhramāmi vanaparṇavat || 9 ||
[Analyze grammar]

āpadāṃ dhuri tiṣṭhāmi niviṣṭāsmi sudāruṇe |
abhāvamabhivāñchāmi so'pi sampadyate na me || 10 ||
[Analyze grammar]

svako dehaḥ parityakto mūḍhacetanayā mayā |
kācabuddhyā vimūḍhena hastāccintāmaṇiryathā || 11 ||
[Analyze grammar]

āpatantī manomohaṃ pūrvamāpatprayacchati |
paścādanarthavistārarūpeṇa pravijṛmbhate || 12 ||
[Analyze grammar]

buseṣu parisuptāsmi mārgeṣu lulitāsmi ca |
vraṇeṣu preṣitāsmyantarhā me duḥkhaparamparā || 13 ||
[Analyze grammar]

parapreṣyakarī nityaṃ parasañcāracāriṇī |
paraṃ kārpaṇyamāyātā jātā paravaśāsmyaham || 14 ||
[Analyze grammar]

bhṛtiṃ karomi tucchaiva sāpi vedhanarūpiṇī |
aho mamālpabhāgyāyā daurbhāgyamapi durlabham || 15 ||
[Analyze grammar]

utthitaḥ sphāravetālaḥ kurvantyāśśāntimeva me |
sarvanāśo dhanādāne pravṛttāyā mamoditaḥ || 16 ||
[Analyze grammar]

kimandhayā mayā tādṛksantyaktaṃ tanmahāvapuḥ |
yathā nāśena vā bhāvyaṃ tathodetyaśubhā matiḥ || 17 ||
[Analyze grammar]

māmavāntaranirdagdhāṃ nyūnāṃ kīṭakaṇādapi |
uddhariṣyati ko nāma pāṃsurāśiṣu hāritām || 18 ||
[Analyze grammar]

viviktamanasāṃ buddhau kva sphuranti hatāśayāḥ |
grāmamārgatṛṇānīva girerupari vāsinām || 19 ||
[Analyze grammar]

sthitānāmajñasambodhe kathamabhyudayo bhavet |
aṇvapyudeti prākāśyaṃ na khadyotānusevinaḥ || 20 ||
[Analyze grammar]

ataḥ kiyantaṃ no jāne kālamāvalitāpadam |
mayāpacchvabhragarteṣu luṭhitavyaṃ hatehayā || 21 ||
[Analyze grammar]

kadā syāmañjanamahāśailaputrakarūpiṇī |
dyāvāpṛthivyorvaiḍūryastambhatāmanutiṣṭhatī || 22 ||
[Analyze grammar]

meghamālāsamabhujā sthiravidyucchaṭekṣaṇā |
nīhārajālavasanā proccakeśāsitāmbarā || 23 ||
[Analyze grammar]

lambodarābhrasandarśapranartitaśikhaṇḍinī |
lambalolastanī śyāmadehapātadravatsurā || 24 ||
[Analyze grammar]

hāsabhasmacchaṭācchannasūryamaṇḍalarodhinī |
kṛtāntagrasanodyuktakṛtyaikākṛtidhāriṇī || 25 ||
[Analyze grammar]

kuṇālolūkhalabṛsīśūrpasragdāmabhāriṇī |
parvatātparvate śṛṅge nyasya pādaṃ vihāriṇī || 26 ||
[Analyze grammar]

kadā me syāduruśvabhrabhāsuraṃ tanmahodaram |
kadā me syāccharanmeghamedurā nakharāvalī || 27 ||
[Analyze grammar]

kadā me syānmahārakṣovidrāvaṇakaraṃ smitam |
svasphigvādyairaraṇyānyāṃ kadā nṛtyeyamunmadā || 28 ||
[Analyze grammar]

vasāsavamahākumbhairmṛtamāṃsāsthisañcayaiḥ |
kadā kariṣye virataṃ madhurodarapūraṇam || 29 ||
[Analyze grammar]

kadā pītamahālokarudhirā kṣīvatāṃ gatā |
bhaveyamuditonnṛttā mudritā nidrayā tataḥ || 30 ||
[Analyze grammar]

mayaiva kutapovahnau taddagdhvā bhāsuraṃ vapuḥ |
bhasmatvaṃ kanakeneva sūcitvamurarīkṛtam || 31 ||
[Analyze grammar]

kva kilāñjanaśailābhaṃ vapurbharitadiktaṭam |
kva mūṣikākhurasamaṃ sūcitvaṃ tṛṇapelavam || 32 ||
[Analyze grammar]

tyajatyāśu mṛdityajñaḥ prāpyāpi kanakāṅgadam |
mayā sūcitvalobhena santyaktaṃ bhāsuraṃ vapuḥ || 33 ||
[Analyze grammar]

hā mahodara vindhyādrisanīhāraguhopamam |
adya nāntaṃ karoṣi tvaṃ kathaṃ siṃhaiṇahastinām || 34 ||
[Analyze grammar]

hā bhujau bharanirbhugnaśikharau śaśabhṛnnakhau |
puroḷāśadhiyā candraṃ kathamadya na dhāvathaḥ || 35 ||
[Analyze grammar]

hā vakṣaḥ kācavaiḍūryagirīndrataṭasundara |
nādya siṃhādiyaukaṃ taddhṛtaṃ romavanaṃ tvayā || 36 ||
[Analyze grammar]

hā netre kṛṣṇarajanījvalacchuṣkavanojjvale |
kasmānna me bhūṣayatho dṛgjvālāmālayā diśaḥ || 37 ||
[Analyze grammar]

hā skandhabandho naṣṭo'si vibhraṣṭo'si mahītale |
kālena viniviṣṭo'si nighṛṣṭo'si śilodare || 38 ||
[Analyze grammar]

hā mukhendo tapasi kiṃ nādya tvaddantaraśmibhiḥ |
kalpāgnidagdhasaṃśāntacandrabimbamanohara || 39 ||
[Analyze grammar]

hā hā hastau mahākārau tāvadya kva gatau mama |
sampannā kimahaṃ sūcī makṣikākhuradolitā || 40 ||
[Analyze grammar]

hā bhagograkarañjāḍhyasukhadaśvabhraśobhana |
vindhyādryaraṇyavipulanitambāmalabimbaka || 41 ||
[Analyze grammar]

kvākāro'mbarapūrakaḥ kva ca navaṃ tucchātmasūcīvapū rodorandhrasamaḥ kva cāsyakuharaḥ kvedaṃ ca sūcīmukham |
kva grāso bahumāṃsabhārabahalaḥ kvābbindunā rodhanaṃ sūkṣmāsyetadaho mayaiva racitaṃ svātmakṣaye nāṭakam || 42 ||
[Analyze grammar]