Chapter 38

līlopākhyāne janapadadvandvayuddhavarṇaṃ nāma sargaḥ |
aṣṭatriṃśaḥ sargaḥ |
vasiṣṭhaḥ |
evamatyākule yuddhe sāsphoṭabhaṭasaṅkaṭe |
ādināntamasaṃruddhe raṭatkaṭhinakaṅkaṭe || 1 ||
[Analyze grammar]

vahantīṣūtpatantīṣu patantīṣvaśmavṛṣṭiṣu |
nadīṣu kṣepaṇotthāsu caṭatketvabjapaṅktiṣu || 2 ||
[Analyze grammar]

mithaḥ phalāgraṭaṅkotthavahniśīkariṇīsu khe |
āyāntīṣu patantīṣu dūraṃ śaranadīṣu ca || 3 ||
[Analyze grammar]

vahallūnaśiraḥpadmacakrāvartaistaraṅgitaiḥ |
khārṇave pūrite hetivṛndamandākinīgaṇaiḥ || 4 ||
[Analyze grammar]

samīraṇaraṇadvāriśastracūrṇaghanairghanaiḥ |
sadāhāṅgeṣu siddheṣu kapikacchavyathāpradaiḥ || 5 ||
[Analyze grammar]

aṣṭabhāgadaśāśeṣaṃ pratāpamadhurākṛtiḥ |
śastraghātaujasā vīra ivāhastanutāṃ yayau || 6 ||
[Analyze grammar]

śrāntāśvena prabhagnāgrahetisaṅghātadīptayaḥ |
dineśena samaṃ senā yayurmandapratāpatām || 7 ||
[Analyze grammar]

atha senādhināthābhyāṃ vicārya saha mantribhiḥ |
dūtāḥ parasparaṃ dattā yuddhaṃ saṃhriyatāmiti || 8 ||
[Analyze grammar]

tataśśramavaśānmandapattraśastraparākramaiḥ |
raṇasaṃharaṇaṃ kāle sarvairevorarīkṛtam || 9 ||
[Analyze grammar]

tato mahārathottuṅgaketuprānte kṛtāspadam |
balayorārurohaika eko yodho dhruvo yathā || 10 ||
[Analyze grammar]

aṃśukaṃ bhrāmayāmāsa sarvadiṅmaṇḍalekṣitam |
dyāmeva dīrghamindvaṃśuṃ yuddhaṃ saṃhriyatāmiti || 11 ||
[Analyze grammar]

tato dundubhayaśśemuḥ pratidhvanitadiṅmukhāḥ |
mahāpralayasaṃśāntau puṣkarāvartakā iva || 12 ||
[Analyze grammar]

śarādihetisarito vistīrṇe gaganasthale |
pravṛttāśśoṣamāgantuṃ śāradyaḥ sarito yathā || 13 ||
[Analyze grammar]

yodhadordrumasañcārastanutāmāyayau śanaiḥ |
bhūkampānte vanaspanda ivāvāta ivārṇavaḥ || 14 ||
[Analyze grammar]

vinirgantuṃ pravavṛte raṇāraṇyādbaladvayam |
vāripūraścaturdikkaṃ pralayaikārṇavādiva || 15 ||
[Analyze grammar]

utkṣiptamandarakṣīrasamudravalanākulam |
sainyaṃ praśamadāvartaṃ śanaiḥ sāmyamupāyayau || 16 ||
[Analyze grammar]

krameṇāsīnmuhūrtena vikaṭodarabhīṣaṇam |
agastyapītārṇavavacchūnyameva raṇāṅganam || 17 ||
[Analyze grammar]

śavasantatisampūrṇaṃ vahadraktamahāhradam |
parikūjanajhāṅkārapūrṇakhillīvanopamam || 18 ||
[Analyze grammar]

bṛhadraktasaritsrotastaraṅgaravaghargharam |
sākrandāvasṛtāhūtasvatrāṇavyagramānavam || 19 ||
[Analyze grammar]

mṛtārdhamṛtadehaugharaktaughasrutanirjharam |
sajīvanarapṛṣṭhasthaśavaspandanabhītidam || 20 ||
[Analyze grammar]

karīndraśavarāśyagraviśrāntāmbudakhaṇḍakam |
viśīrṇarathasaṅghātajitacchattramahāvanam || 21 ||
[Analyze grammar]

vahadraktanadīraṃhaḥprohyamānarathadvipam |
śaraśaktyṛṣṭimusulagadāprāsāsisaṅkulam || 22 ||
[Analyze grammar]

paryāṇāñcalasannāhakavacāvṛtabhūtalam |
ketucāmarapaṭṭaughaguptaśāvaśarīrakam || 23 ||
[Analyze grammar]

sphārasphoṭakatūṇīrakuñjakūjatsamīraṇam |
śararāśipalāśaughatalpasuptaśaveśvaram || 24 ||
[Analyze grammar]

maulihārāṅgadoddyotacakracāpavanāvṛtam |
śvasṛgālakhagākṛṣṭasāndrāntradīrgharajjukam || 25 ||
[Analyze grammar]

raktakṣetrakvaṇatkiñciccheṣajīvātidanturam |
raktakardamanirmagnasajīvanaradurduram || 26 ||
[Analyze grammar]

varāṭakacayaprekṣyanirgatākṣiśatoccayam |
vahadbhujaughakāṣṭaughaghoraraktasaricchatam || 27 ||
[Analyze grammar]

sākrandabandhuvalitamṛtārdhamṛtamānavam |
sarvāyudharathāśvebhaparyāṇāsañcarāntaram || 28 ||
[Analyze grammar]

nṛtyatkabandhadordaṇḍaṣaṇḍakānanitāmbaram |
madamedovasāgandhapiṇḍāktaghrāṇakoṭaram || 29 ||
[Analyze grammar]

utphālārdhamṛtebhāśvamāryamāṇālpajīvitam |
vahadraktanadīvīcīprahārahatadundubhi || 30 ||
[Analyze grammar]

uhyamānamṛtāśvebhamakarāsṛksaricchaṭam |
mriyamāṇanarānīkaphūtkṛtāsṛgghanānilam || 31 ||
[Analyze grammar]

svalpajīvaśarāpūrṇamukhahikkāṅkitasvaram |
piṇḍahāryavasāgandhavātāttotpīḍalohitam || 32 ||
[Analyze grammar]

unnāsārdhamṛtebhendrakarākrāntakabandhakam |
niradhiṣṭhitahastyaśvapātitodyatkabandhakam || 33 ||
[Analyze grammar]

rudadbandhusakhibhraṣṭaśavakṣubdhāsṛguddhvani |
mṛtabhartṛgale śastratyaktaprāṇakulāṅganam || 34 ||
[Analyze grammar]

śavasthānakṛtodgrīvabandhukāyaparīkṣaṇam |
śavahārakharākṛṣṭasampṛktanaravyākulam || 35 ||
[Analyze grammar]

keśaśevalavaktrābjacakrāvartananartanam |
tarattuṅgataraṅgāḍhyavahadraktamahānadam || 36 ||
[Analyze grammar]

prāṇāntasmṛtaputreṣṭamātṛdevadhanābhidham |
hāhāhīhītikathitamarmacchedanavedanam || 37 ||
[Analyze grammar]

aṅgalagnāyudhoddhāravyagrārdhamṛtamānavam |
videśamṛtasākrandahūnataṅganatājikam || 38 ||
[Analyze grammar]

mriyamāṇamithodviṣṭaprārabdharathasaṅgaram |
dantayuddhāsamarthāsyasmṛtageheṣṭadaivatam || 39 ||
[Analyze grammar]

mriyamāṇapathalajjaśūrāśritapalāyanam |
aśaṅkitāsṛgāvartanītāspadagamotsukam || 40 ||
[Analyze grammar]

marmacchediśaravrātavyathāvihitahuṅkṛti |
kabandhabandhaprārabdhavetālavalanākramam || 41 ||
[Analyze grammar]

uhyamānadhvajacchattracārucāmarapaṅkajam |
kiratsandhyāruṇaṃ dikṣu tejasviraktapaṅkajam || 42 ||
[Analyze grammar]

rathacakravanāvartaṃ raktārṇavamivāṣṭamam |
patākāphenapuñjāḍhyaṃ cārucāmarabudbudam || 43 ||
[Analyze grammar]

viparyastarathaṃ bhūmikampabhagnapuropamam |
utpātavātanirdhūtadrumaṃ vanamivātatam || 44 ||
[Analyze grammar]

kalpadagdhajagatprakhyaṃ munipītārṇavopamam |
ativṛṣṭihato deśa iva procchinnamānavam || 45 ||
[Analyze grammar]

kālāyaḥkuntavalitaṃ bhusuṇḍīmaṇḍalākulam |
mattanāgaśavākāraṃ sannatomaramudgaram || 46 ||
[Analyze grammar]

śilāśikharasañjātatālajālamivātatam |
patadraktanadītīrajātakuntonnatadrumam || 47 ||
[Analyze grammar]

nāgāgasyūtahetyoghavṛkṣāṃśukusumākulam |
kaṅkakṛṣṭāntraraśanāvṛndajālakitāmbaram || 48 ||
[Analyze grammar]

asṛksarovaradhvastapatākānalinīgaṇam |
raktakardamanirmagnanarāhūtasuhṛjjanam || 49 ||
[Analyze grammar]

karīndrakuṇapāgāraniryadbhītajanekṣitam |
hetilūnalatairvṛkṣaiḥ sandigdhograkabandhakam || 50 ||
[Analyze grammar]

asṛṅnadīvahaddhastikaṭakarparanaugaṇam |
raktasrotassphuracchuklavastradiṇḍīrapiṇḍakam || 51 ||
[Analyze grammar]

sañcarannipatatkṣipramṛtyuvicchinnamānavam |
itaścetaśca nipatatkabandhanavadānavam || 52 ||
[Analyze grammar]

ūrdhvasthālakṣyacakraughachinnasainyadravajjanam |
raktanissrāvabhāṅkārahikkārārdhamṛtāravam || 53 ||
[Analyze grammar]

sirāmukhollasadraktadhārādhautavrajatkhagam |
sutālottālavetālatālatāṇḍavasaṅkaṭam || 54 ||
[Analyze grammar]

paryastarathadārvantarvanāntaritasadbhaṭam |
antassthasajjīvabhaṭasyandisyandanabhītidam || 55 ||
[Analyze grammar]

raktakardamapūrṇāsyakiñcijjīvakvaṇacchavam |
kiñcijjīvanarodgrīvakaṣṭadṛṣṭaśvavāyasam || 56 ||
[Analyze grammar]

ekāmiṣograkravyādayuddhakolāhalākulam |
ekāmiṣārthayuddhehāmṛtakravyādasaṅkulam || 57 ||
[Analyze grammar]

vivṛttāsaṅkhyāśvadviradapuruṣādhīśvararathapravṛttāstagrīvaprakṛtirudhirodgārasusarit |
raṇodyānaṃ mṛtyostadabhavadaśuṣkāyudhalataṃ saśailaṃ kalpānte jagadiva viparyastamakhilam || 58 ||
[Analyze grammar]