Chapter 31

līlopākhyāne brahmāṇḍavarṇanaṃ nāma sargaḥ |
ekatriṃśaḥ sargaḥ |
vasiṣṭhaḥ |
evamākalayantyau te nirgatya jagato nijam |
antaḥpuraṃ dadṛśaturjhagitīva vinidrite || 1 ||
[Analyze grammar]

sthitapuṣpabharāpūrṇamahārājamahāśavam |
śavapārśvopaviṣṭāntaścittalīlāśarīrakam || 2 ||
[Analyze grammar]

ghanarātritayālpālpamahānidrajanākulam |
dhūpacandanakarpūrakuṅkumāmodamantharam || 3 ||
[Analyze grammar]

tamālokya punarbhartuḥ saṃsāraṃ gantumādṛtā |
papāta līlā saṅkalpadehenātraiva tannabhaḥ || 4 ||
[Analyze grammar]

viveśa bhartṛsaṅkalpasaṃsāraṃ kañcidātatam |
saṃsārāvaraṇaṃ bhittvā bhittvā brahmāṇḍakarparam || 5 ||
[Analyze grammar]

prāpa sārdhaṃ tayā devyā punarāvaraṇānvitam |
brahmāṇḍamaṇḍapaṃ sphāraṃ taṃ praviśya tathā javāt || 6 ||
[Analyze grammar]

dadarśa bhartṛsaṅkalpajagajjambālapalvalam |
sā haṃsī śailakamalaṃ tamojaladapaṅkilam || 7 ||
[Analyze grammar]

devyau viviśatustatte vyoma vyomātmake jagat |
brahmāṇḍe'ntaryathā pakvamṛdubilvaṃ pipīlike || 8 ||
[Analyze grammar]

tatra lokāntarāṇyadrīnantarikṣamatītya te |
prāpaturbhūtalaṃ śailamaṇḍalāmbhodhisaṅkulam || 9 ||
[Analyze grammar]

meruṇālaṅkṛtaṃ jambudvīpaṃ navadalodaram |
tatrātha bhārate varṣe līlānāthasya maṇḍalam || 10 ||
[Analyze grammar]

etasminnantare tasminmaṇḍale maṇḍitāvanau |
cakre'vaskandanaṃ kaścitsīmāntodriktabhūmipaḥ || 11 ||
[Analyze grammar]

tena saṅgrāmasaṃrambhaprekṣārthaṃ samupāgataiḥ |
trailokyabhūtaistadvyoma babhūvātyantasaṅkaṭam || 12 ||
[Analyze grammar]

aśaṅkitāgate te tu devyau dadṛśaturnabhaḥ |
nabhaścaragaṇākrāntamambudairiva mālitam || 13 ||
[Analyze grammar]

siddhacāraṇagandharvagaṇavidyādharānvitam |
śūragrahaṇasaṃrabdhasvargalokāpsarovṛtam || 14 ||
[Analyze grammar]

raktamāṃsamukhonnṛtyadbhūtarakṣaḥpiśācakam |
vṛṣṭipuṣpabharāpūrṇahastavidyādharāṅganam || 15 ||
[Analyze grammar]

vetālayakṣakumbhāṇḍairdvandvālokanasādaraiḥ |
āyudhāpātarakṣārthagṛhītādritaṭairvṛtam || 16 ||
[Analyze grammar]

astramārganabhobhāgavidravadbhūtamaṇḍalam |
svargārhaśūrānayanavyagrendrabhaṭabhāsuram || 17 ||
[Analyze grammar]

śūrārthālaṅkṛtottuṅgalokapālāgryavāraṇam |
āgacchacchūrasaṅghātagandharvonmukhacāraṇam || 18 ||
[Analyze grammar]

śūrotsukāmarastraiṇakaṭākṣekṣitasadbhaṭam |
āhopuruṣikākṣubdhaprekṣakāmoṭanodbhaṭam || 19 ||
[Analyze grammar]

āsannabhīmasaṅgrāmakiṃvadantīparamparam |
līlāhāsavilāsotkasundarīdhūtacāmaram || 20 ||
[Analyze grammar]

dharmyapakṣaprayuktāgryamunisvastyayanastavam |
sampannānekalokeśavanitānavasaṃstavam || 21 ||
[Analyze grammar]

vīradormaṇḍalāśleṣalampaṭastrīgaṇākaram |
śuklena śūrayaśasā candrīkṛtadivākaram || 22 ||
[Analyze grammar]

rāmaḥ |
bhagavañchūraśabdena kīdṛśaḥ procyate bhaṭaḥ |
svarge'laṅkaraṇaṃ kaḥ syātko vā ḍimbāhato bhavet || 23 ||
[Analyze grammar]

vasiṣṭhaḥ |
śāstroktācārayuktasya prabhorarthena yo raṇe |
mṛto'thavā jayī vā syātsa śūraśśūralokabhāk || 24 ||
[Analyze grammar]

anyathā tu nikṛttāṅgo raṇe yo mṛtimāpnuyāt |
ḍimbāhavahataḥ proktaḥ sa naro narakāspadam || 25 ||
[Analyze grammar]

ayathāśāstrasañcāravṛttenārthena yudhyate |
yo narastasya saṅgrāme mṛtasya nirayo'kṣayaḥ || 26 ||
[Analyze grammar]

yathāsambhavaśāstrārthalokācārānuvṛttimān |
yudhyate tādṛśasyaiva bhaktyā śūraḥ sa ucyate || 27 ||
[Analyze grammar]

gorarthe brāhmaṇasyārthe mitrasyārthe ca sanmatiḥ |
śaraṇāgatayatnena mṛtaḥ svarge vibhūṣaṇam || 28 ||
[Analyze grammar]

paripālya svadeśaikapālanīyasthitiṃ sadā |
rājā mṛtastadarthaṃ yaḥ sa vīro vīralokabhāk || 29 ||
[Analyze grammar]

prajopadravaniṣṭhasya yasya rājño'thavā prabhoḥ |
arthena ye mṛtā yuddhe te vai nirayagāminaḥ || 30 ||
[Analyze grammar]

dharmyaṃ yathā tathā yuddhaṃ yadi syāttadimāṃ sthitim |
nāśayeyuralaṃ mattā yena lokabhayojjhitāḥ || 31 ||
[Analyze grammar]

yatra yatra hataśśūraḥ svargya ityadhamoktayaḥ |
dharmyo yoddhā bhavecchūra ityevaṃ śāstraniścayaḥ || 32 ||
[Analyze grammar]

sadācāravatāmarthe khaḍgadhārāṃ sahanti ye |
te śūrā iti kathyante śeṣā ḍimbāhavāhatāḥ || 33 ||
[Analyze grammar]

teṣāmarthe raṇavyomni tiṣṭhantyutkaṇṭhitāśayāḥ |
surībhūtamahāsattvadayitotkāḥ surāṅganāḥ || 34 ||
[Analyze grammar]

vidyādharīmadhuramantharagītagarbhaṃ mandāramālyavalanākulamāninīkam |
viśrāntakāntasurasiddhavimānapaṅkti vyomotsave racitaśobhamivollalāsa || 35 ||
[Analyze grammar]