Chapter 29

līlopākhyāne girigrāmavarṇanaṃ nāma sargaḥ |
ekonatriṃśaḥ sargaḥ |
vasiṣṭhaḥ |
tatra te petaturdevyau grāme'ntaśśītalātmani |
bhogamokṣaśriyau śānte puṃsīva viditātmani || 1 ||
[Analyze grammar]

kālenaitāvatā līlā tenābhyāsena sābhavat |
śuddhajñānaikadehatvāttrikālāmaladarśinī || 2 ||
[Analyze grammar]

atha sasmāra sarvāstāḥ prāktanīḥ saṃsṛtergatīḥ |
svāḥ svayaṃ svarasenaiva prāgjanmamaraṇādikāḥ || 3 ||
[Analyze grammar]

līlā |
devi deśamimaṃ dṛṣṭvā tvatprasādātsmarāmyaham |
iha tatprāktanaṃ sarvaṃ ceṣṭitaṃ veṣṭitāntaram || 4 ||
[Analyze grammar]

ihābhūvamahaṃ jīrṇā sirālāṅgī kṛśāsitā |
brāhmaṇī śuṣkadarbhāgrabhedarūkṣakarodarā || 5 ||
[Analyze grammar]

bhartuḥ kulakarī bhāryā dohamanthānaśobhinī |
mātā sakalaputrāṇāmatithīnāṃ priyaṅkarī || 6 ||
[Analyze grammar]

devadvijasatāṃ bhaktā siktāṅgī ghṛtagorasaiḥ |
gargarīcarukumbhādibhāṇḍopaskaraśodhinī || 7 ||
[Analyze grammar]

nityamannalavāktaikakācakambuprakoṣṭhakā |
jāmātṛduhitṛbhrātṛpitṛmātṛprapūjinī || 8 ||
[Analyze grammar]

ādehaṃ sadmavṛttyaiva prakṣīṇadinayāminī |
vācaṃ ciraṃ ciramiti vadantyaniśamākulā || 9 ||
[Analyze grammar]

kāhaṃ ka iva saṃsāra iti svapne'pyasaṅkathā |
jāyā śrotriyamūḍhasya tādṛśasyaiva durdhiyaḥ || 10 ||
[Analyze grammar]

ekaniṣṭhā samicchākagomayendhanasañcaye |
mlānakambalasaṃvītasirālakṣā sagātrikā || 11 ||
[Analyze grammar]

tarṇakīkarṇajāhasthakriminiṣkāsatatparā |
gṛhaśākavanāsekasatvarā gṛhakarmaṇāṃ || 12 ||
[Analyze grammar]

nīlatīrataraṅgāktatṛṇatarpitatarṇakā |
pratikṣaṇaṃ gṛhadvārakṛtacandanavarṇakā || 13 ||
[Analyze grammar]

nītyarthaṃ gṛhabhṛtyānāṃ sādināṃ kṛtavācyatā |
maryādāniyamādabdhivelevāniśamacyutā || 14 ||
[Analyze grammar]

jīrṇaparṇasavarṇaikakarṇadolādhirūḍhayā |
kaṣṭatāpajarābhītajīvabhṛtyeva cihnitā || 15 ||
[Analyze grammar]

vasiṣṭhaḥ |
ityuktvā sañcarantī sā śikharigrāmakoṭare |
sañcarantyāḥ sarasvatyā darśayāmāsa sā svayam || 16 ||
[Analyze grammar]

iyaṃ me pāṭalāṣaṇḍamaṇḍitā puṣpavāṭikā |
iyaṃ me puṣpitodyānamaṇḍapākāravāṭikā || 17 ||
[Analyze grammar]

iyaṃ puṣkariṇītīradrumagrathitatarṇakā |
iyaṃ sā karṇikānāmnī tarṇikā bhuktaparṇikā || 18 ||
[Analyze grammar]

iyaṃ sā medasā kṣīṇā varākī jalahārikā |
adyāṣṭamaṃ dinaṃ bāṣpapūrṇākṣī pariroditi || 19 ||
[Analyze grammar]

iha devi mayā proktamihoṣitamiha sthitam |
iha suptamihātītamidaṃ dattamihāhṛtam || 20 ||
[Analyze grammar]

eṣa me jyeṣṭhaśarmākhyaḥ putro roditi mandire |
eṣā me jaṅgale dhenurdoghdrī carati śādvalam || 21 ||
[Analyze grammar]

gṛhe'vasannaṃ dāhāya rūkṣaṃ kṣāravidhūsaram |
svaṃ dehamiha pañcākhyaṃ paśyemaṃ praghanaṃ mama || 22 ||
[Analyze grammar]

tumbīlatābhirugrābhistṛṣṇābhiriva veṣṭitam |
mahānasasthānamidaṃ mama dehamivāparam || 23 ||
[Analyze grammar]

ete rodanatāmrākṣā bandhavo bhuvi bandhanam |
aṅgadārpitarudrākṣā āharantyanalendhanam || 24 ||
[Analyze grammar]

anārataṃ śilākacchagucchācchoṭanakāribhiḥ |
taraṅgaistuṅgitākāraspṛṣṭatīralatādalaiḥ || 25 ||
[Analyze grammar]

śīkarākīrṇaparyantaśādvalasthalavellitaiḥ |
śilāphalahakāsphālaphenilotphālaśīkaraiḥ || 26 ||
[Analyze grammar]

tuṣārīkṛtamadhyāhnadivākarakarotkaraiḥ |
phullapuṣpotkarāsārapradānotkataṭadrumaiḥ || 27 ||
[Analyze grammar]

vidrumairiva saṅkrāntaphullakiṃśukakāntibhiḥ |
vyāptayā puṣparāśīnāṃ samullāsanakāribhiḥ || 28 ||
[Analyze grammar]

uhyamānaphalāpūrasuvyagragrāmabālayā |
mahākalakalāvartasaktayā grāmyakulyayā || 29 ||
[Analyze grammar]

veṣṭitastaralāsphālajaladhautatalopamaḥ |
ghanapattratarucchattracchāyāsatataśītalaḥ || 30 ||
[Analyze grammar]

ayamālakṣyate puṣpalatāvalanasundaraḥ |
laladgulucchakacchannagavākṣo gṛhamaṇḍapaḥ || 31 ||
[Analyze grammar]

atra me saṃsthito bhartā jīvākāśalavākṛtiḥ |
catussamudraparyantamekhalāyā bhuvaḥ patiḥ || 32 ||
[Analyze grammar]

āsmṛtaṃ pūrvametena kilāsīdabhivāñchitam |
śīghraṃ syāmiva rājeti tīvrasaṃvegadharmiṇā || 33 ||
[Analyze grammar]

dinairaṣṭabhirevāsau tena rājyaṃ samṛddhimat |
cirakālapratyayadaṃ prāptavānparameśvari || 34 ||
[Analyze grammar]

atrāsau bhartṛjīvo me gṛhe vyomni sthito nṛpaḥ |
adṛśyaḥ khe yathā vāyurāmodo vā yathānile || 35 ||
[Analyze grammar]

ihaivāṅguṣṭhamātrānte tadvyomnīva padaṃ sthitam |
madbhartṛrājyaṃ mama tu gataṃ yojanakoṭitām || 36 ||
[Analyze grammar]

āvāṃ khameva tatkhaṃ ca bhartṛrājyaṃ mameśvari |
pūrṇaṃ sahasraiśśailānāmaho māyeyamātatā || 37 ||
[Analyze grammar]

taddevi bharturnikaṭaṃ punargantuṃ mamepsitam |
tadehi tatra gacchāvaḥ kiṃ dūraṃ vyavasāyinām || 38 ||
[Analyze grammar]

vasiṣṭhaḥ |
ityuktvā praṇatā devīṃ sā praviśyāśu maṇḍapam |
vihaṅgīva tayā sārdhaṃ pupluve'sinibhaṃ nabhaḥ || 39 ||
[Analyze grammar]

bhinnāñjanacayaprakhyaṃ saumyaikārṇavasundaram |
nārāyaṇāṅgasadṛśaṃ bhṛṅgapṛṣṭhāmalachavim || 40 ||
[Analyze grammar]

meghamārgamatikramya vātaskandhāvaniṃ tathā |
sauraṃ mārgamathākramya cāndraṃ mārgamatītya ca || 41 ||
[Analyze grammar]

dhruvamārgottaraṃ gatvā sādhyānāṃ mārgameva ca |
siddhānāṃ samatītyorvīmullaṅghya svargamaṇḍalam || 42 ||
[Analyze grammar]

brahmalokāntare gatvā tuṣitānāṃ ca maṇḍalam |
golokaṃ śivalokaṃ ca pitṛlokamatītya ca || 43 ||
[Analyze grammar]

videhānāṃ ca devānāṃ dūramuttīrya dūragam |
dūrāddūrataraṃ gatvā kiñcid ruddhā babhūva sā || 44 ||
[Analyze grammar]

paścādālokayāmāsa samatītaṃ nabhastalam |
yāvanna kiñciccandrārkatārādyālakṣyate hyadhaḥ || 45 ||
[Analyze grammar]

tamaḥ stimitagambhīramāśākuharapūrakam |
ekārṇavodaraprakhyaṃ śilodaraghanaṃ sthitam || 46 ||
[Analyze grammar]

līlā |
taddevi bhāskarādīnāṃ kvādhastejo gataṃ vada |
śilājaṭharanisspandaṃ muṣṭigrāhyaṃ tamaḥ kutaḥ || 47 ||
[Analyze grammar]

devī |
etāvatīmimāṃ vyomnaḥ padavīmāgatāsi bhoḥ |
arkādīnyapi tejāṃsi yato dṛśyanta eva no || 48 ||
[Analyze grammar]

yathā mahāndhakūpādhaḥ khadyoto nāvalokyate |
pṛṣṭhagena tathehāto nādhaḥ sūryo'valokyate || 49 ||
[Analyze grammar]

līlā |
aho nu padavīmetāṃ dūrāmāvāmupāgate |
sūryo'pyadho'ṇukaṇavanna manāgapi lakṣyate || 50 ||
[Analyze grammar]

ita uttaramanyā syātpadavī kā nu kīdṛśī |
kathaṃ ca pātanī bhavyā kathyatāmiti devi me || 51 ||
[Analyze grammar]

sarasvatī |
ita uttaramagre te brahmāṇḍapuṭakarparam |
yasya vajrādayo nāma dhūlileśāḥ samutthitāḥ || 52 ||
[Analyze grammar]

vasiṣṭhaḥ |
iti prakathayantyau te prāpte brahmāṇḍakarparam |
bhramaryāviva śailasya kuḍyaṃ nibiḍamaṇḍalam || 53 ||
[Analyze grammar]

akleṣenaiva te tasmānnirgate gaganādiva |
niścayatvaṃ hi yadvastu tadvajragati netarat || 54 ||
[Analyze grammar]

nirāvaraṇavijñānā sā dadarśa tatastataḥ |
jalādyāvaraṇānpāre brahmāṇḍasyātibhāsurān || 55 ||
[Analyze grammar]

brāhmādaṇḍāddaśaguṇaṃ toyatattvaṃ vyavasthitam |
āsthitaṃ veṣṭayitvā tattvagivākṣoṭapṛṣṭhagā || 56 ||
[Analyze grammar]

tasmāddaśaguṇo vahnistasmāddaśaguṇo'nilaḥ |
tato daśaguṇaṃ vyoma tataḥ paramamambaram || 57 ||
[Analyze grammar]

tasminparamake vyomni madhyādyantavikalpanāḥ |
na kāścana samudyanti vandhyāputrakathā iva || 58 ||
[Analyze grammar]

kevalaṃ vimalaṃ śāntaṃ tadanādi gatabhramam |
ādyantamadhyarahitaṃ mahatyātmani tiṣṭhati || 59 ||
[Analyze grammar]

ākalpamuttamabalena śivāpatiścettasminbalādgaruḍaketurathotpateścet |
taddhyānato'valabhate vimale'mbare'ntamākalpamekajavagāmyatha māruto'pi || 60 ||
[Analyze grammar]