Chapter 28

līlopākhyāne janmāntaravarṇanaṃ nāma sargaḥ |
aṣṭaviṃśaḥ sargaḥ |
rāmaḥ |
vajrāṅgasārādbrahmāṇḍakuḍyānnibiḍamaṇḍalāt |
koṭiyojanasaṃviṣṭātkathaṃ te nirgate ubhe || 1 ||
[Analyze grammar]

vasiṣṭhaḥ |
kva brahmāṇḍaṃ kva tadbhittiḥ kvātrāsau vajrasāratā |
kilāvaśyaṃ sthite devyāvantaḥpuravarāmbare || 2 ||
[Analyze grammar]

tasminneva girigrāme tasminnevālayāmbare |
brāhmaṇaḥ sa vasiṣṭhākhya āsvādayati rājatām || 3 ||
[Analyze grammar]

tameva maṇḍapākāśakoṇakaṃ śūnyamātrakam |
catussamudraparyantaṃ bhūtalaṃ so'nubhūtavān || 4 ||
[Analyze grammar]

ākāśātmani bhūpīṭhe tasmiṃstad rājapattanam |
rājasadmānubhavati sa ca sā cāpyarundhatī || 5 ||
[Analyze grammar]

līlābhidhānā sañjātā tayā ca jñaptirarcitā |
jñaptyā saha samullaṅghya khamāścaryamanoramam || 6 ||
[Analyze grammar]

prādeśamātre nabhasi sā tatraiva gṛhodare |
brahmāṇḍāntaramāsādya giriṃ vāsavamandiram || 7 ||
[Analyze grammar]

brahmāṇḍātparinirgatya svagṛhe sthitimāyayau |
svapnātsvapnāntaraṃ prāpya yathā talpagataḥ pumān || 8 ||
[Analyze grammar]

pratibhāmātramevaitatsarvamākāśamātrakam |
na brahmāṇḍaṃ na saṃsāro na kuḍyādi na dūratā || 9 ||
[Analyze grammar]

svacittameva kacati tayostādṛṅ manoharam |
vāsanāmātrasollekhaṃ kva brahmāṇḍaṃ kva saṃsṛtiḥ || 10 ||
[Analyze grammar]

nirāvaraṇamevedaṃ jñaptyākāśamanantakam |
kiñcitsvacittenonnītaṃ spandayuktyeva mārutaḥ || 11 ||
[Analyze grammar]

cidākāśamajaṃ śāntaṃ sarvatraiva hi sarvadā |
cittvājjagadivābhāti svayamevātmanātmani || 12 ||
[Analyze grammar]

yena buddhaṃ tu tasyaitadākāśādapi śūnyakam |
na buddhaṃ yena tasyaitadvajrasārācalopamam || 13 ||
[Analyze grammar]

gṛha eva yathā svapne nagaraṃ bhāti bhāsvaram |
tathaitadasadevāntaściddhātau bhāti bhāsvaram || 14 ||
[Analyze grammar]

yathā marujale'mbutvaṃ kaṭakatvaṃ ca hemani |
asatsadiva bhātīdaṃ tathā dṛśyatvamātmani || 15 ||
[Analyze grammar]

evamākalayantyau te lalane lalanākṛtī |
gṛhānniryayaturbāhyaṃ cārucaṅkramaṇakramaiḥ || 16 ||
[Analyze grammar]

adṛśye grāmalokena prekṣamāṇe puro girim |
cumbitākāśakuharaṃ saṃsprṣṭādityamaṇḍalam || 17 ||
[Analyze grammar]

nānāvarṇākhilotphullavicitravanakambalam |
nānānirjharanirdhūtakūjadvanavihaṅgamam || 18 ||
[Analyze grammar]

vicitramañjarīpuñjapiñjarāmbudamaṇḍalam |
abhrakacchagulucchāgraviśrāntakhagasāravam || 19 ||
[Analyze grammar]

sāravañjulavistāraguptākhilasarittaṭam |
asamāptaśilāśvabhralatānartanamārutam || 20 ||
[Analyze grammar]

puṣpābhrapihitākāśakośakuṭṭakavāridam |
pataddīrghasaritsrotassitamuktākalāpakam || 21 ||
[Analyze grammar]

caladvṛkṣavanavyūhavātaghaṭṭitadiktaṭam |
nānāvanākulopāntacchāyāsatataśītalam || 22 ||
[Analyze grammar]

atha te lalane tatra tadā dadṛśatuḥ svayam |
taṃ girigrāmakaṃ vyomnaḥ svargakhaṇḍamiva cyutam || 23 ||
[Analyze grammar]

vahatpraṇālīpaṭalaṃ pūrṇapuṣkariṇījalam |
dvijaiḥ kurukucaiḥ kūjatsuṣiraśvabhrakacchalam || 24 ||
[Analyze grammar]

garjadgovṛndahuṅkārakarālākhilakuñjakam |
guñjāgulmakaṣaṇḍāḍhyaṃ sacchāyaghanamārutam || 25 ||
[Analyze grammar]

duṣpraveśārkakiraṇaṃ pṛthaṅ nīhāradhūsaram |
udañcanmañjarīpuñjajaṭālaviśikhāntaram || 26 ||
[Analyze grammar]

śilāphalahakasphāraprocchalacchuklanirjharaiḥ |
smāritācalanirdhūtakṣīrodadhijalaśriyam || 27 ||
[Analyze grammar]

phalamālāmahābhārabhāsurairajiradrumaiḥ |
ānīya puṣpasambhāraṃ tiṣṭhadbhiriva saṅkulam || 28 ||
[Analyze grammar]

tarattaralajhāṅkārakārimārutakampitaiḥ |
kīrṇapuṣpamahāvṛṣṭiṃ drumairiva rasākulaiḥ || 29 ||
[Analyze grammar]

aśaṅkitaśilākūṭasravadabbindujhāṅkṛtaiḥ |
kiñcitkṛtaravaṃ guptairaśaṅkaiśśaṅkitaiḥ khagaiḥ || 30 ||
[Analyze grammar]

utphālalaharīprāntaśīkarāsvādanākulaiḥ |
nadyāmuḍḍayanāvartavṛttibhirvihagairvṛtam || 31 ||
[Analyze grammar]

uttālatālaviśrāntakākālokanaśaṅkitaiḥ |
bālaiḥ pragopitāmikṣākhaṇḍaṃ jīrṇasvabhūptakaiḥ || 32 ||
[Analyze grammar]

puṣpaśekharasambhāravasanagrāmabālakam |
kadambanimbajambīragahanopāntaśītalam || 33 ||
[Analyze grammar]

kṣaumānutastāsvarayā mañjarīpūrṇakarṇayā |
kṣutkṣāntayā bhrāntarathyaṃ grāmakheṭakakāntayā || 34 ||
[Analyze grammar]

sarittaraṅgasaṅghaṭṭasaṃrāvāśrutasaṅkatham |
karṇajāḍyaghanatrāsavāñchitaikāntasaṃsthitim || 35 ||
[Analyze grammar]

dadhiliptāsyahastāṃsairbaddhapuṣpalatādharaiḥ |
nagnairgomayapaṅkāṅkairbālairākulacatvaram || 36 ||
[Analyze grammar]

tīraśādvalavallīnāṃ dolāndolanahāribhiḥ |
taraṅgairvāhyamānāmbulekhikāṅkitasaikatam || 37 ||
[Analyze grammar]

dadhikṣīraghanāmodamattamantharamakṣikam |
kālyabhaktārthanodbāṣpajarjarāmbarabālakam || 38 ||
[Analyze grammar]

gomayāsiktavalayakaravārīkṛtakrudham |
dhammillavalanāvyagrabhūtastrīvihasajjanam || 39 ||
[Analyze grammar]

dāntapucchacchaṭacchannapatatkakudavāyasam |
gṛharathyāṅganadvārakīrṇakundakaraṇḍakam || 40 ||
[Analyze grammar]

gṛhapārśvasthitaśvabhrajātaiḥ kusumitadrumaiḥ |
pratyahaṃ prātarāgulphamākīrṇakusumājiram || 41 ||
[Analyze grammar]

saraccāmarasāraṅgacalajaṅgalaṣaṇḍakam |
guñjānikuñjasañjātaśaṣpasuptamṛgārbhakam || 42 ||
[Analyze grammar]

ekāntarāstavatsaikakarṇaspandāstamakṣikam |
gopocchiṣṭīkṛtadadhisamparkāspandamakṣikam || 43 ||
[Analyze grammar]

samastasadmasu kṣīṇamākṣikākṣiptamakṣikam |
phullāśokadrumoddyotakṛtalākṣikamandiram || 44 ||
[Analyze grammar]

śīkarāsāramarutā nityārdravikacaddrumam |
kadambamukulaprotasaptacchadacchadotkaram || 45 ||
[Analyze grammar]

vṛtivrātalatāphullaketakotkaramālinam |
bṛhatpraṇālīpaṭalīraṇadruṭaruṭāravam || 46 ||
[Analyze grammar]

vātāyanaguhāniryatsaudhaviśrāntavāridam |
pūrṇapuṣkariṇīpaṅktipūtarājapathāntaram || 47 ||
[Analyze grammar]

nīrandhraviṭapacchāyāśītalāmalaśādvalam |
sarvapuṣpāsravadbindupratibimbitatārakam || 48 ||
[Analyze grammar]

anāratapatatpuṣpahimavarṣasitālayam |
vicitramañjarīpuṣpapattrapalvalapādapam || 49 ||
[Analyze grammar]

gṛhakakṣyāntarālīnameghaguptaciraṇṭikam |
saudhasthameghavidyudbhiranādeyapradīpakam || 50 ||
[Analyze grammar]

kandarānilajhāṅkāraghanaghuṅghumamaṇḍapam |
caraccakorahārītahariṇīhārimandiram || 51 ||
[Analyze grammar]

unnidrakandalodvāntamāṃsalāmodamantharaiḥ |
marudbhirmandamādātumārabdhairlolapallavam || 52 ||
[Analyze grammar]

lāvakālāpalīlāyāmālīnalalanākulam |
kokakokilakākolakolāhalasamākulam || 53 ||
[Analyze grammar]

sālatālītamālāḍhyanīlapalvalamālitam |
valīvalayavinyāsavilāsavalitadhruvam || 54 ||
[Analyze grammar]

ālolapallavalatāvalitālayānāmutphullakandalasilindhrasugandhitānām |
sārāvavārivalanākulagokulānāmānīlaṣaṣpakusumasthalaśobhitānām || 55 ||
[Analyze grammar]

tīradrumaprakaraguptasaridrayāṇāṃ nīrandhrapuṣpitalatogravitānakānām |
udyānakundamakarandasugandhitānāṃ gandhāndhaṣaṭpadakulāntaritāmbudānām || 56 ||
[Analyze grammar]

saundaryatarjitapurandaramandirāṇām rājīvarājirajasāruṇitāmbarāṇām |
raṃhovahadgirinadīravaghargharāṇāṃ kundāvadātajaladadyutibhāsurāṇām || 57 ||
[Analyze grammar]

saudhasthalollasitapuṣpalatālayānāṃ līlāvilolakalakaṇṭhavihaṅgamānām |
ullāsikausumadalāstaraṇasthayūnāmāpādamāvalitamālyavilāsinīnām || 58 ||
[Analyze grammar]

sarvaṃ tu sundaranavāṅkuradanturāṇām helollasadvanalatākulamārgagāṇām |
sañjātakomalalatopalasaṅkulānām varṣatpayodapaṭasaṃvalitālayāṇām || 59 ||
[Analyze grammar]

nīhārahāriharitasthalavistṛtānāṃ saudhasthameghataḍidākulitāṅganānām |
nīlotpalollasitasaurabhasundarāṇām huṅkārahāriharitonmukhagokulānām || 60 ||
[Analyze grammar]

vidhvastamugdhamṛgaśāvagṛhāṅganānāmunmattabarhigaṇaśīkaranirjharāṇām |
saugandhyamattapavanāhṛtasaurabhānām vaprauṣadhijvalanavismṛtadīpakānām || 61 ||
[Analyze grammar]

kolāhalākulakulāyakulākulānāṃ kulyākulākalakalāśrutasaṅkathānām |
muktāphalaprakarasundarabindupātaśītākhiladrumalatātṛṇapallavānām || 62 ||
[Analyze grammar]

lakṣmīmanastamitapuṣpavikāsabhājām |
śaknoti kaḥ kalayituṃ girimandirāṇām || 63 ||
[Analyze grammar]