Chapter 19

līlopākhyāne sakalasargabhrāntitvapratipādanaṃ nāma sargaḥ |
ekonaviṃśaḥ sargaḥ |
devī |
vittaveśavayaḥkarmavidyāvibhavaceṣṭitaiḥ |
vasiṣṭhasyeva sadṛśo na tu vāsiṣṭhacetanaḥ || 1 ||
[Analyze grammar]

vasiṣṭha iti nāmnābhūttasyābhūdindusundarī |
nāmnā tvarundhatī bhāryā bhūmivyomanyarundhatī || 2 ||
[Analyze grammar]

vittaveśavayaḥkarmavidyāvibhavaceṣṭitaiḥ |
sameva sāpyarundhatyā na tu cetanasattayā || 3 ||
[Analyze grammar]

akṛtrimapremarasā vilāsālasagāminī |
sāsya saṃsārasarvasvamāsītkumudahāsinī || 4 ||
[Analyze grammar]

sa viprastasya śailasya sānau sarasaśādvale |
kadācidupaviṣṭaḥ sandadarśādho mahīpatim || 5 ||
[Analyze grammar]

samagraparivāreṇa yāntamākheṭakecchayā |
mahatā sainyaghoṣeṇa meroriva bibhitsayā || 6 ||
[Analyze grammar]

cāmaraiḥ kīrṇacandrāṃśu patākābhirlatāvanam |
kurvāṇaṃ khaṃ sitacchatramaṇḍalai raupyakuṭṭimam || 7 ||
[Analyze grammar]

aśvīyāgnipṛṣatpūrapūrṇareṇvabhravarṇavat |
hāstikottambhitakaravāṭāṭṭālakagopitam || 8 ||
[Analyze grammar]

mahākalakalāvartadravaddigbhūtamaṇḍalam |
kacatkāñcanamāṇikyahārakeyūrakuṇḍalam || 9 ||
[Analyze grammar]

tamālokya mahīpālamidaṃ cintitavānasau |
aho nu ramyā nṛpatā sarvasaubhāgyabhāsitā || 10 ||
[Analyze grammar]

padātirathahastyaśvapatākācchatracāmaraiḥ |
kadā syāṃ daśadikkuñjapūrako'haṃ mahīpatiḥ || 11 ||
[Analyze grammar]

kadā me vāyavaḥ kundamakarandasugandhayaḥ |
pāsyantyantaḥpurastrīṇāṃ surataśramaśīkarān || 12 ||
[Analyze grammar]

karpūreṇa purandhrīṇāṃ kīrṇena yaśasā diśām |
indūdayāvadātāni kadā kuryāṃ mukhānyaham || 13 ||
[Analyze grammar]

itthaṃ tataḥprabhṛtyeva vipraḥ saṅkalpavānabhūt |
svadharmanirato nityaṃ yāvajjīvamatandritaḥ || 14 ||
[Analyze grammar]

himāśanirivāmbhojaṃ jarjarīkartumādṛtā |
jarā hārdānvitevainaṃ javāddvijamupāyayau || 15 ||
[Analyze grammar]

āsannamaraṇasyātra bhāryā mlānimupāyayau |
tasya śāmyati puṣpartau lateva grīṣmabhītitaḥ || 16 ||
[Analyze grammar]

māmathārādhitavatī sā tatastvamivāṅganā |
amaratvaṃ suduṣprāpaṃ buddhvemaṃ sāvṛṇodvaram || 17 ||
[Analyze grammar]

devi svamaṇḍapādeva jīvo bharturmṛtasya me |
mā yāsīdityatastasyāḥ sa evāṅgīkṛto mayā || 18 ||
[Analyze grammar]

atha kālavaśādvipraḥ sa pañcatvamupāyayau |
tasminneva gṛhākāśe jīvākāśatayā sthitaḥ || 19 ||
[Analyze grammar]

sampannaḥ prāktanānalpasaṅkalpavaśataḥ svayam |
ākāśavapurevorvīpatiḥ paramaśaktimān || 20 ||
[Analyze grammar]

prabhāvājjitabhūpīṭhaḥ pratāpākrāntaviṣṭapaḥ |
kṛpāpālitapātālastrilokavijayī nṛpaḥ || 21 ||
[Analyze grammar]

kālāgniraripakṣāṇāṃ strīṇāṃ makaraketanaḥ |
merurviṣayavāyūnāṃ sādhvabjānāṃ divākaraḥ || 22 ||
[Analyze grammar]

ādarśaḥ sarvaśāstrāṇāmarthināṃ kalpapādapaḥ |
pādapīṭhaṃ dvijāgryāṇāṃ rākā dharmāmṛtatviṣaḥ || 23 ||
[Analyze grammar]

svagṛhābhyantarākāśe cittākāśamayātmani |
tasmindvije śavībhūte bhūtākāśaśarīriṇi || 24 ||
[Analyze grammar]

sā tasya brāhmaṇī bhāryā śokeṇātyantakarṣitā |
śuṣkeva māṣaśimikā hṛdayena dvidhāgamat || 25 ||
[Analyze grammar]

bhartrā saha śavībhūtā dehamutsṛjya dūrataḥ |
ātivāhikadehena bhartāraṃ samupāyayau || 26 ||
[Analyze grammar]

nadī nikhātamiva taṃ bhartāramanusṛtya sā |
ājagāma viśokatvaṃ savasanteva mañjarī || 27 ||
[Analyze grammar]

tatrāsya viprasya sutā gṛhāṇi bhūsthāvarādīni ghanāni santi |
adyāṣṭamaṃ vāsaramāptamṛtyorjīvo girigrāmakamandirasthaḥ || 28 ||
[Analyze grammar]