Chapter 20

līlopākhyāne brāhmaṇamaraṇaṃ nāma sargaḥ |
viṃśaḥ sargaḥ |
devī |
sa te bhartādya sampanno dvijo bhūpatvamāgataḥ |
yāsāvarundhatī nāma brāhmaṇī sā tvamaṅgane || 1 ||
[Analyze grammar]

ihemau kuruto rājyaṃ tau bhavantau sudampatī |
cakravākāviva navau bhuvi jātau śivāviva || 2 ||
[Analyze grammar]

eṣa te kathitaḥ sarvaḥ prāktanaḥ saṃsṛtibhramaḥ |
bhrāntimātrakamākāśameva jīvasvarūpadhṛt || 3 ||
[Analyze grammar]

bhramādasmāccidādarśe bhramo'yaṃ pratibimbitaḥ |
asatya eva cāsatyādbhavatorbhavabhaṅgadaḥ || 4 ||
[Analyze grammar]

tasmādbhrāntimayaḥ kaḥ syātko vā bhrāntyujjhito bhavet |
sargo nirargalānalpabodhānnānyadvijṛmbhate || 5 ||
[Analyze grammar]

vasiṣṭhaḥ |
ityākarṇya ciraṃ cāruvismayotphullalocanā |
bhūtvovāca vaco līlā līlālasapadākṣaram || 6 ||
[Analyze grammar]

devi tvadvacanaṃ mithyā kathaṃ sampannamīdṛśam |
kva viprajīvaḥ svagṛhe kveme vayamiha sthitāḥ || 7 ||
[Analyze grammar]

tādṛg lokāntaraṃ sā bhūste śailāstā diśo daśa |
kathaṃ mānti gṛhasyāntarmadbhartā yeṣvavasthitaḥ || 8 ||
[Analyze grammar]

matta airāvaṇo baddhaḥ siddhārthakaṇakodare |
maṣakena kṛtaṃ yuddhaṃ siṃhaughairaṇukoṭare || 9 ||
[Analyze grammar]

padmākṣe sthāpito merurnigīrṇo madhupāyinā |
svapnābhragarjitaṃ śrutvā citre nṛtyanti varhiṇaḥ || 10 ||
[Analyze grammar]

asamañjasamevaitad yathā sarveśvareśvari |
tathā gṛhāntaḥ pṛthivī śailāścetyasamañjasam || 11 ||
[Analyze grammar]

yathāvadetaddeveśi kathayāmalayā dhiyā |
prasādasugṛhīte hi nodvijante mahaujasaḥ || 12 ||
[Analyze grammar]

devī |
nāhaṃ mithyā vadāmīdaṃ yathāvacchṛṇu sundari |
bhedanaṃ niyatīnāṃ hi kriyate nāsmadādibhiḥ || 13 ||
[Analyze grammar]

vibhidyamānāmanyena sthāpayāmyahameva yām |
maryādāṃ tāṃ mayā bhinnāṃ ko'paraḥ pālayiṣyati || 14 ||
[Analyze grammar]

sagrāmaṃ dvijajīvātmā tasminneva svasadmani |
vyomnyevedaṃ mahīrāṣṭraṃ vyomātmaiva prapaśyati || 15 ||
[Analyze grammar]

prāktanī sā smṛtirluptā yuvayoruditānyathā |
svapne jāgratsmṛtiryadvadetanmaraṇamaṅgane || 16 ||
[Analyze grammar]

yathā svapne tribhuvanaṃ saṅkalpāttrijagad yathā |
yathā kathārthasaṅgrāmo marubhūmau yathā jalaṃ || 17 ||
[Analyze grammar]

tasya brāhmaṇagehasya saśailavanapattanā |
iyamantassthitā bhūmiḥ saṅkalpādarśayoriva || 18 ||
[Analyze grammar]

asatyaiveyamābhāti satyeva ghanasargatā |
tasyāsatyāvabhāsasya cidvyomnaḥ kośakoṭare || 19 ||
[Analyze grammar]

asatyād yatsamutpannaṃ smṛtyā nāma tadapyasat |
mṛgatṛṣṇātaraṅgiṇyāstaraṅgo'pi na satyataḥ || 20 ||
[Analyze grammar]

idaṃ tvadīyaṃ sadanaṃ tadgehākāśakośagam |
viddhi māṃ tvāṃ ca sarvaṃ vā tacca vyomaiva kevalam || 21 ||
[Analyze grammar]

svapnasaṅgamasaṅkalpasvānubhūtiparamparāḥ |
pramāṇānyatra mukhyāni sambodhāya pradīpavat || 22 ||
[Analyze grammar]

sthito brāhmaṇagehe'ntardvijajīvastadantare |
sasamudravanā pṛthvī sthitābja iva ṣaṭpadī || 23 ||
[Analyze grammar]

tasyāḥ kasmiṃścidekasminpelave koṭarodare |
idaṃ pattanamābhāti keśoṇḍuka ivāmbare || 24 ||
[Analyze grammar]

tasminnasminpure tanvi tavedaṃ sadanaṃ sthitam |
tasmātkimaṇumātre'ntargajavṛndamiva sthitam || 25 ||
[Analyze grammar]

paramāṇau paramāṇau santi vatse cidātmani |
antarantarjagantīti kenaitannāma saṅkhyate || 26 ||
[Analyze grammar]

līlā |
aṣṭamaṃ divasaṃ vipraḥ sa mṛtaḥ parameśvari |
gato varṣagaṇo'smākamataḥ kathamidaṃ bhavet || 27 ||
[Analyze grammar]

devī |
deśadairghyaṃ yathā nāsti kāladairghyaṃ tathaiva ca |
nāstyeveti yathānyāyaṃ kathyamānaṃ mayā śṛṇu || 28 ||
[Analyze grammar]

yathaitatpratibhāmātraṃ jagatsargāvabhāsanam |
tathaitatpratibhāmātraṃ kṣaṇakalpāvabhāsanaṃ || 29 ||
[Analyze grammar]

kṣaṇakalpajagatsargatvattāmattātmajanmanām |
yathāvatpratibhāsasya vatse kramamimaṃ śṛṇu || 30 ||
[Analyze grammar]

anubhūya kṣaṇaṃ jīvo mithyāmaraṇamūrchanām |
tadaivonmeṣamātreṇa vyomnyeva vyomarūpyapi || 31 ||
[Analyze grammar]

ādheyo'hamihādhāre sthito'hamiti cetati |
hastapādādimāndeho mamāyamiti paśyati || 32 ||
[Analyze grammar]

yadaiva cetati vapustadaivedaṃ sa cetati |
etasyāhaṃ pituḥ putro varṣāṇīmāni santi me || 33 ||
[Analyze grammar]

ime me bāndhavā ramyā mamedaṃ ramyamāspadam |
jāto'hamabhavaṃ bālo vṛddhiṃ yāto'hamīdṛśaḥ || 34 ||
[Analyze grammar]

bāndhavāścāsya te sarve tathaiva viharantyapi |
cidākāśaghanaikyatvātsvātmanyapi bhavanti te || 35 ||
[Analyze grammar]

evaṃ nāmodite'pyasyāściteḥ saṃsāraṣaṇḍake |
na kiñcidapyabhyuditaṃ sthitaṃ vyomaiva nirmalam || 36 ||
[Analyze grammar]

svapne draṣṭari yadvaccittadvaddṛśye cideva sā |
sarvadaikatayā tasmātsā svapne draṣṭṛdarśanam || 37 ||
[Analyze grammar]

yathā svapne tathodeti paralokadṛśā citiḥ |
paraloke yathodeti tathaivehāpyudeti sā || 38 ||
[Analyze grammar]

tatsvapnaparalokehalokānāmasatāṃ satāṃ |
na manāgapi bhedo'sti vīcīnāmiva vāriṇi || 39 ||
[Analyze grammar]

ato'jātamidaṃ viśvamajātatvādanāśi ca |
kharūpatvācca nāstyeva yacca bhāti cideva sā || 40 ||
[Analyze grammar]

yathaiṣā cetyanirhīnā paramavyomarūpiṇī |
sacetyāpi tathaivaiṣā paramavyomarūpiṇī || 41 ||
[Analyze grammar]

yasmāccetyamato nānyadvīcitvādiva vāritā |
vīcitvaṃ ca na caivāsti śaśaśṛṅgavadeva hi || 42 ||
[Analyze grammar]

saiva cetyamivāpannā svabhāvādacyutāpyalam |
tasmānnāstyeva dṛśyo'rthaḥ kuto'to draṣṭṛdṛśyadhīḥ || 43 ||
[Analyze grammar]

nimeṣeṇaiva jīvasya mṛtimohādanantaram |
trijagatsargadṛśyaśrīḥ pratibhāmupagacchati || 44 ||
[Analyze grammar]

yathādeśaṃ yathākālaṃ yathārambhaṃ yathākramam |
yathotpādaṃ yathāmātṛ yathāpitṛ yathaurasam || 45 ||
[Analyze grammar]

yathāvayo yathāsaṃvid yathāsthānaṃ yathehitam |
yathābandhu yathābhṛtyaṃ yathehāstamayodayam || 46 ||
[Analyze grammar]

ajātameva jāto'hamiti paśyati cidvapuḥ |
deśakālakriyādravyamanobuddhīndriyāṇi ca || 47 ||
[Analyze grammar]

jhagityeva mṛterante vapuḥ paśyati yauvanam |
eṣā mātā pitā tveṣa bālo'bhūvamahaṃ tviti || 48 ||
[Analyze grammar]

nānubhūto'nubhūto vā yaḥ syātsmṛtimayaḥ kramaḥ |
paścādudetyasau tasya puṣpasyeva phalodayaḥ || 49 ||
[Analyze grammar]

nimeṣeṇaiva sakalo gata ityanubhūyate |
rātrirdvādaśavarṣāṇi hariścandre tathāpyabhūt || 50 ||
[Analyze grammar]

kāntāvirahiṇāmekaṃ vāsaraṃ vatsarāyate |
mṛto jāto'hamanyo me piteti svapnadhāmni ca || 51 ||
[Analyze grammar]

abhuktasyaiva bhogyasya bhuktadhīrupajāyate |
bhukte cābhuktadhīrdṛṣṭamityalaṃ kitavādiṣu || 52 ||
[Analyze grammar]

śūnyamākīrṇatāmeti tulyaṃ vyasanamutsavaiḥ |
vipralambho'pi lābhaśca madasvapnādisaṃvidi || 53 ||
[Analyze grammar]

taikṣṇyaṃ yathā maricabījakaṇe sthitaṃ svaṃ stambhe'thavā racitaputrakajālamantaḥ |
dṛśyaṃ tvananyadidamevamaje'sti śāntaṃ kasyāsti bandhanavimokṣadṛśaḥ kutaḥ kāḥ || 54 ||
[Analyze grammar]