Chapter 10

paramakāraṇavarṇanaṃ nāma sargaḥ |
daśamaḥ sargaḥ |
rāmaḥ |
mahāpralayasampattau yadetadavaśiṣyate |
bhavatvetadanākāraṃ nāma nāstyatra saṃśayaḥ || 1 ||
[Analyze grammar]

na śūnyaṃ kathametatsyānna prakāśaḥ kathaṃ bhavet |
kathaṃ vā na tamorūpaṃ kathaṃ vā naiva khātmakam || 2 ||
[Analyze grammar]

kathaṃ vā naiva cidrūpaṃ jīvo vā na kathaṃ bhavet |
kathaṃ na buddhitattvaṃ syātkathaṃ vā na mano bhavet || 3 ||
[Analyze grammar]

kathaṃ vā na nakiñcitsyātkathaṃ vā sarvamityapi |
anayā ca vacobhaṅgyā mama moha ivoditaḥ || 4 ||
[Analyze grammar]

vasiṣṭhaḥ |
viṣamo'yamati praśno bhavatā samudāhṛtaḥ |
bhinadmyenaṃ tvayatnena naiśaṃ tama ivāṃśumān || 5 ||
[Analyze grammar]

mahākalpāntasampattau yattatsadavaśiṣyate |
tannāma na yathā śūnyaṃ tadidaṃ kathyate śṛṇu || 6 ||
[Analyze grammar]

anutkīrṇā yathā stambhe saṃsthitā sālabhañjikā |
tathā viśvaṃ sthitaṃ tatra tena śūnyaṃ na tatpadam || 7 ||
[Analyze grammar]

ayamitthaṃ mahābhogo jagadākhyo'vabhāsate |
satyo bhavatvasatyo vā yatra tatra kva śūnyatā || 8 ||
[Analyze grammar]

yathā na putrikāśūnyaḥ stambho'nutkīrṇasālikaḥ |
tathā tāta jagadbrahma tena śūnyaṃ na tatpadam || 9 ||
[Analyze grammar]

saumyāmbhasi yathā vīcirna cāsti na ca nāsti ca |
tathā jagadbrahmaṇīdaṃ śūnyāśūnyapadaṃ gatam || 10 ||
[Analyze grammar]

deśakālādiśāntatvātputrikāracanaṃ drume |
sambhavatyajadhātau tu kena nāntarvimuhyate || 11 ||
[Analyze grammar]

tatstambhaputrikādyetatparamārthajagatsthiteḥ |
ekadeśena sadṛśamupamānaṃ na sarvataḥ || 12 ||
[Analyze grammar]

na kadācidudetīdaṃ parasmānna ca śāmyati |
itthaṃrūpaṃ kevalaṃ sadbrahma svātmani saṃsthitam || 13 ||
[Analyze grammar]

aśūnyāpekṣayā śūnyaśabdārthaparikalpanā |
aśūnyatvāsambhavataśśūnyatāśūnyate kutaḥ || 14 ||
[Analyze grammar]

brahmaṇyayaṃ prakāśo hi na sambhavati bhūtajaḥ |
sūryānalendutārādi kutastatra kilāvyaye || 15 ||
[Analyze grammar]

mahābhūtaprakāśānāmabhāvastama ucyate |
mahābhūtābhāvajaṃ tu tenātra na tamaḥ kvacit || 16 ||
[Analyze grammar]

svānubhūtiprakāśo'sya kevalaṃ vyomarūpiṇaḥ |
yo'ntarasti sa tenaiva na tvanyenānubhūyate || 17 ||
[Analyze grammar]

muktaṃ tamaḥprakāśābhyāmityetadajaraṃ padam |
ākāśakośamevainaṃ viddhi kośaṃ jagatsthiteḥ || 18 ||
[Analyze grammar]

bilvasya bilvasañjñasya yathā bhedo na kaścana |
tatheha brahmajagatorna manāgapi bhinnatā || 19 ||
[Analyze grammar]

salile'ntaryathā vīcirmṛdo'ntarghaṭako yathā |
tathā yatra jagatsattā tatkathaṃ khātmakaṃ bhavet || 20 ||
[Analyze grammar]

mṛjjalādyupamānaśrīḥ sākārātrā samā na sā |
brahma tvākāśaviśadaṃ tasyāntassthaṃ tathaiva tat || 21 ||
[Analyze grammar]

tasmād yādṛkcidākāśamākāśādapi nirmalam |
tadantassthaṃ tādṛgeva jagacchabdārthabhāgapi || 22 ||
[Analyze grammar]

marice'ntaryathā taikṣṇyamṛte bhokturna lakṣyate |
cinmātratvaṃ parākāśe tathā cetyakalāṃ vinā || 23 ||
[Analyze grammar]

tasmāccidapyacidrūpā cetyariktatayātmani |
jagattā tādṛśyeveyaṃ tādṛṅmātrātmatāvaśā || 24 ||
[Analyze grammar]

rūpālokamanaskārāstanmayā eva netarat |
yathāsthitamato viśvaṃ suṣuptaṃ turyameva vā || 25 ||
[Analyze grammar]

tena yogī suṣuptātmā vyavahāryapi śāntadhīḥ |
āste brahma nirābhāsaṃ sarvabhāsāṃ samudgakam || 26 ||
[Analyze grammar]

ākāriṇi yathā saumye sthitastoye dravakramaḥ |
anākṛtau tathā viśvaṃ sthitaṃ tatsadṛśaṃ pare || 27 ||
[Analyze grammar]

pūrṇātpūrṇaṃ prasarati nirākārānnirākṛti |
brahmaṇo viśvamābhātaṃ tadviśvārthavivarjitam || 28 ||
[Analyze grammar]

pūrṇātpūrṇaṃ prasarati saṃsthitaṃ pūrṇameva tat |
ato viśvamanutpannaṃ yaccotpannaṃ tadeva tat || 29 ||
[Analyze grammar]

cetyāsambhavatastasminpade keva cidarthatā |
āsvādakāsambhavato marice keva tīkṣṇatā || 30 ||
[Analyze grammar]

satyeveyamasatyaiva citeścittoditā pare |
abhāvātpratibimbasya pratibimbārhatā kutaḥ || 31 ||
[Analyze grammar]

paramāṇorapi paraṃ tadaṇīyo'pyaṇīyasaḥ |
śuddhaṃ sūkṣmaṃ paraṃ śāntaṃ tadākāśodarādapi || 32 ||
[Analyze grammar]

dikkālādyanavacchinnarūpatvādativistṛtam |
tadanādyantamābhāsaṃ bhāsanīyavivarjitam || 33 ||
[Analyze grammar]

cidrūpameva no yatra labhyate tatra jīvatā |
kathaṃ syāccittatākārā vāsanānilarūpiṇī || 34 ||
[Analyze grammar]

cidrūpānudayādeva tatra nāstyeva jīvatā |
na buddhitā na cittatvaṃ nendriyatvaṃ na vāsanāḥ || 35 ||
[Analyze grammar]

evaṃ sthitaṃ layārambhapūrṇamapyajaraṃ padam |
asmaddṛṣṭyā sthitaṃ śāntaṃ śūnyamākāśato'dhikam || 36 ||
[Analyze grammar]

rāmaḥ |
paramārthasya kiṃ rūpaṃ tasyānantacidākṛteḥ |
punaretatsamācakṣva nipuṇaṃ bodhavṛddhaye || 37 ||
[Analyze grammar]

vasiṣṭhaḥ |
mahāpralayasampattau sarvakāraṇakāraṇam |
śiṣyate yatparaṃ brahma tadidaṃ varṇyate śṛṇu || 38 ||
[Analyze grammar]

nāśayitvā svamātmānaṃ manaso vṛttisaṅkṣaye |
yad rūpaṃ yadanākhyeyaṃ tad rūpaṃ tasya vastunaḥ || 39 ||
[Analyze grammar]

nāsti dṛśyaṃ jagaddraṣṭā dṛśyābhāvādvilīnavat |
bhātīti bhāsanaṃ yatsyāttad rūpaṃ tasya vastunaḥ || 40 ||
[Analyze grammar]

citerjīvasvabhāvo yo yadi cetyonmukho vapuḥ |
cinmātraṃ vimalaṃ śāntaṃ yattatkāraṇakāraṇam || 41 ||
[Analyze grammar]

aṅguṣṭhasyātha vāṅgulyā vātādyasparśane sati |
jīvataścetaso rūpaṃ yattadparamamātmanaḥ || 42 ||
[Analyze grammar]

asvapnāyā anantāyā ajaḍāyā ghanasthiteḥ |
yad rūpaṃ ciracintāyāstattadānagha śiṣyate || 43 ||
[Analyze grammar]

yadvyomno hṛdayaṃ yadvā śilāyāḥ pavanasya ca |
tasyācetyasya cidvyomnastad rūpaṃ paramātmanaḥ || 44 ||
[Analyze grammar]

acetyasyāmanaskasya jīvato yā kriyāvataḥ |
syātsthitiḥ sā parā śāntā sattā tasyādyavastunaḥ || 45 ||
[Analyze grammar]

citprakāśasya yanmadhyaṃ prakāśasya ghanasya vā |
darśanasya ca yanmadhyaṃ tad rūpaṃ paramātmanaḥ || 46 ||
[Analyze grammar]

vedanasya prakāśasya dṛśyasya tamasastathā |
vedanaṃ yadanādyantaṃ tad rūpaṃ paramātmanaḥ || 47 ||
[Analyze grammar]

yato jagadudetīva nityānuditarūpyapi |
vibhinnavadivābhinnaṃ tad rūpaṃ pāramātmanaḥ || 48 ||
[Analyze grammar]

vyavahāraparasyāpi yatpāṣāṇavadāsanam |
avyomna eva vyomatvaṃ tad rūpaṃ pāramātmikam || 49 ||
[Analyze grammar]

vedyavedanavettṛtvarūpatrayamidaṃ punaḥ |
yatrodetyastamāyāti tattatparamamuttamam || 50 ||
[Analyze grammar]

vedyavedanavettṛtvaṃ yatredaṃ pratibimbati |
abuddhyādau mahādarśe tad rūpaṃ paramaṃ smṛtam || 51 ||
[Analyze grammar]

manaṣṣaṣṭhendriyonmuktaṃ yad rūpaṃ syānmahāciteḥ |
jaṅgame sthāvare vāpi tatsargānte'vaśiṣyate || 52 ||
[Analyze grammar]

sthāvarāṇāṃ hi yad rūpaṃ taccedbodhamayaṃ bhavet |
manobuddhyādinirmuktaṃ tatpareṇa samaṃ bhavet || 53 ||
[Analyze grammar]

brahmārkaviṣṇuharaśakrasadāśivādiśāntau śivaṃ paramametadihaikamāste |
śiṣṭaṃ pradiṣṭamavinaṣṭamakaṣṭamiṣṭaṃ miśraṃ na miśramaṇunāśritamāśritena || 54 ||
[Analyze grammar]