Moksopaya [sanskrit]

192,019 words | ISBN-10: 8120831470 | ISBN-13: 9788120831476

This Sanskrit edition of the Moksopaya. It is a large philosophical text dealing with “the science of liberation”. Similar to the Yoga-vasistha in content, the Mokshopaya-shastra was likely its predecessor, said to contain 30,000 shlokas (metrical verses). One of the core philosophies of the texts teaches the non-existence of cognitive objects; while holding such a view leads to an attitude of dispassion towards worldly matters.

sacchāstranirṇayo nāma sargaḥ |
navamaḥ sargaḥ |
vasiṣṭhaḥ |
taccittāstadgataprāṇā bodhayantaḥ parasparam |
kathayantaśca tannityaṃ tuṣyanti ramayanti ye || 1 ||
[Analyze grammar]

teṣāṃ jñānaikaniṣṭhānāmātmajñānavicāraṇāt |
sā jīvanmuktatodeti videhonmuktataiva yā || 2 ||
[Analyze grammar]

rāmaḥ |
brahmanvidehamuktasya jīvanmuktasya lakṣaṇam |
brūhi yena tathaivāhaṃ yate śāstradṛśā dhiyā || 3 ||
[Analyze grammar]

vasiṣṭhaḥ |
yathāsthitamidaṃ yasya vyavahāravato'pi ca |
astaṅgataṃ sthitaṃ vyoma sa jīvanmukta ucyate || 4 ||
[Analyze grammar]

bodhaikaniṣṭhatāṃ yāto jāgartyeva suṣuptavat |
ya āste vyavahartaiva sa jīvanmukta ucyate || 5 ||
[Analyze grammar]

nodeti nāstamāyāti sukhe duḥkhe mukhaprabhā |
yathāprāptasthiteryasya sa jīvanmukta ucyate || 6 ||
[Analyze grammar]

yo jāgarti suṣuptastho yasya jāgranna vidyate |
yasya nirvāsano bodhaḥ sa jīvanmukta ucyate || 7 ||
[Analyze grammar]

rāgadveṣabhayādīnāmanurūpaṃ carannapi |
yo'ntarvyomavadatyacchaḥ sa jīvanmukta ucyate || 8 ||
[Analyze grammar]

yasya nāhaṅkṛto bhāvo buddhiryasya na lipyate |
kurvato'kurvato vāpi sa jīvanmukta ucyate || 9 ||
[Analyze grammar]

yaśconmeṣanimeṣābhyāṃ vidheḥ pralayasambhavau |
paśyettrilokyāḥ khasamaḥ sa jīvanmukta ucyate || 10 ||
[Analyze grammar]

bhoktaiva yo na bhoktaiva śuddhabodhaikatāṃ gataḥ |
buddhaḥ supta ivāste'ntaḥ sa jīvanmukta ucyate || 11 ||
[Analyze grammar]

nityaṃ draṣṭaiva cādraṣṭā jīvanneva mṛtopamaḥ |
vyavahartaiva śailābhaḥ sa jīvanmukta ucyate || 12 ||
[Analyze grammar]

yasmānnodvijate loko lokānnodvijate ca yaḥ |
harṣāmarṣabhayonmuktaḥ sa jīvanmukta ucyate || 13 ||
[Analyze grammar]

śāntasaṃsārakalanaḥ kalāvānapi niṣkalaḥ |
yaḥ sacitto'pi niścittaḥ sa jīvanmukta ucyate || 14 ||
[Analyze grammar]

yaḥ samastārthajāteṣu vyavahāryapi śītalaḥ |
parārtheṣviva pūrṇātmā sa jīvanmukta ucyate || 15 ||
[Analyze grammar]

jīvanmuktapadaṃ tyaktvā dehe kālavaśātkṣate |
cid yātyadehamuktatvaṃ pavano'spandatāmiva || 16 ||
[Analyze grammar]

videhamukto nodeti nāstameti na śāmyati |
na sannāsanna dūrasthaṃ na cāhaṃ na ca vetarat || 17 ||
[Analyze grammar]

sūryo bhūtvā pratapati viṣṇuḥ pāti jagattrayam |
rudraḥ sarvān saṃharati sarvān sṛjati padmabhūḥ || 18 ||
[Analyze grammar]

khaṃ bhūtvā pavanaskandhāndhatte sarkṣasurāsurān |
kulācalagaṇo bhūtvā lokapālapurāspadam || 19 ||
[Analyze grammar]

bhūmirbhūtvā bibhartīmāṃ lokasthitimakhaṇḍitām |
tṛṇagulmalatā bhūtvā dadāti phalasantatim || 20 ||
[Analyze grammar]

bibhrajjalānalākārañjvalati dravati drutaḥ |
candro'mṛtaṃ prasavati mṛtiṃ hālāhalaṃ viṣam || 21 ||
[Analyze grammar]

tejaḥ prakaṭayatyāśāstanotyāndhyaṃ tamo bhavan |
śūnyaṃ sanvyomatāmeti giriḥ san rodhayatyalam || 22 ||
[Analyze grammar]

karoti jaṅgamaṃ cittve sthāvaraṃ sthāvarākrṭiḥ |
bhūtvārṇavo valayati bhūstriyaṃ valayo yathā || 23 ||
[Analyze grammar]

paramārkavapurbhūtvā prakāśe'ntarvisārayan |
trijagattrasareṇvoghaṃ śāntamevāvatiṣṭhati || 24 ||
[Analyze grammar]

yatkiñcididamābhāti bhātaṃ vā bhāmupaiṣyati |
kālatrayagataṃ dṛśyaṃ tadasau sarvameva vā || 25 ||
[Analyze grammar]

rāmaḥ |
kathamevaṃ vada brahmanbhūyate viṣamā hi me |
dṛṣṭireṣā tu duṣprāpā durākramyeti niścayaḥ || 26 ||
[Analyze grammar]

vasiṣṭhaḥ |
muktireṣocyate rāma brahmaitatsamudāhṛtam |
nirvāṇametatkathitaṃ śṛṇu samprāpyate katham || 27 ||
[Analyze grammar]

yadidaṃ dṛśyate dṛśyamahantvattādisaṃyutam |
sato'pyasyāpyanutpattyā buddhayaitadavāpyate || 28 ||
[Analyze grammar]

rāmaḥ |
videhamuktāstrailokyaṃ sampadyante yadā tadā |
manye te sargatāmeva gatā vedyavidāṃ vara || 29 ||
[Analyze grammar]

vasiṣṭhaḥ |
vidyate cettribhuvanaṃ tattattāṃ samprayāntu te |
yatra trailokyaśabdārtho na sambhavati kaścana || 30 ||
[Analyze grammar]

tatra trilokatāṃ yātaṃ brahmetyuktyarthadhīḥ kutaḥ |
tasmānno sambhavatyanyā jagacchabdārthakalpanā || 31 ||
[Analyze grammar]

ananyacchāntamābhāsamātramākāśanirmalam |
brahmaiva jagadityeva satyaṃ satyāvabodhinaḥ || 32 ||
[Analyze grammar]

yathā hi hemakaṭake vicāryāpi na dṛśyate |
kaṭakatvaṃ kvacinnāma ṛte nirmalahāṭakam || 33 ||
[Analyze grammar]

jalādṛte payovīcau nāhaṃ paśyāmi kiñcana |
vīcitvaṃ tvādṛśairdṛṣṭaṃ yattu nāstyeva tatra hi || 34 ||
[Analyze grammar]

spandatvaṃ pavanādanyanna kadācana kutracit |
spanda eva sadā vāyurjagattasmānna vidyate || 35 ||
[Analyze grammar]

yathā śūnyatvamākāśastāpa eva marau jalam |
teja eva yathāloko brahmaiva trijagattathā || 36 ||
[Analyze grammar]

rāmaḥ |
atyantābhāvasampattyā jagaddṛśyasya muktatā |
yayodeti mune yuktyā tāṃ mamopadiśottamām || 37 ||
[Analyze grammar]

vasiṣṭhaḥ |
mithaḥ sampannayordraṣṭṛdṛśyayorekasaṅkṣaye |
dvayābhāve sthitiṃ yāte nirvāṇamavaśiṣyate || 38 ||
[Analyze grammar]

rāmaḥ |
dṛśyasya jagatastasmādatyantānudbhavo yathā |
brahma cetthaṃ svabhāvasthaṃ budhyate vada me tathā || 39 ||
[Analyze grammar]

kayaitajjñāyate yuktyā kathametatprasidhyati |
etasmiṃstu mune siddhe na sādhyamavaśiṣyate || 40 ||
[Analyze grammar]

vasiṣṭhaḥ |
bahukālamiyaṃ rūḍhā mithyājñānaviṣūcikā |
nūnaṃ vicāramantreṇa nirmūlamupaśāmyati || 41 ||
[Analyze grammar]

na śakyate jhagityeva samucchedayituṃ kṣaṇāt |
samaprayatane hyadrau samārohāvarohaṇe || 42 ||
[Analyze grammar]

tasmādabhyāsayogena yuktyā nyāyopapattibhiḥ |
jagadbhrāntiryathā śāmyettathedaṃ kathyate śṛṇu || 43 ||
[Analyze grammar]

vadāmyākhyāyikāṃ rāma yāmimāṃ bodhasiddhaye |
tāṃ cecchṛṇoṣi tatsādho mukta evāsi buddhimān || 44 ||
[Analyze grammar]

athotpattiprakaraṇaṃ mayedaṃ tava kathyate |
yaḥ kilotpadyate rāma tena muktena bhūyate || 45 ||
[Analyze grammar]

iyamitthaṃ jagadbhrāntirbhātyajātaiva khātmikā |
ityutpattiprakaraṇe kathyate'sminmayādhunā || 46 ||
[Analyze grammar]

yadidaṃ dṛśyate kiñcijjagatsthāvarajaṅgamam |
sarvaṃ sarvaprakārāḍhyaṃ sasurāsurakinnaram || 47 ||
[Analyze grammar]

tanmahāpralaye prāpte rudrādipariṇāmini |
bhavatyasadadṛśyaṃ ca kvāpi yāti vinaśyati || 48 ||
[Analyze grammar]

tataḥ stimitagambhīraṃ na tejo na tamastatam |
anākhyamanabhivyaktaṃ satkiñcidavaśiṣyate || 49 ||
[Analyze grammar]

na śūnyaṃ nāpi cākāśaṃ na dṛśyaṃ na ca darśanam |
na ca bhūtapadārthaugho yadanantatayā sthitam || 50 ||
[Analyze grammar]

kimapyavyapadeśātma pūrṇātpūrṇatarākrṭi |
na sannāsanna sadasannābhāvo bhavanaṃ na ca || 51 ||
[Analyze grammar]

cinmātraṃ cetyarahitamanantamajaraṃ śivam |
anādimadhyaparyantaṃ yadanādhi nirāmayam || 52 ||
[Analyze grammar]

yasmiñjagatprasphurati dṛṣṭimauktikahaṃsavat |
yaścedaṃ yaśca naivedaṃ devaḥ sadasadātmakaḥ || 53 ||
[Analyze grammar]

akarṇajihvo'nāsātvaṅnetraḥ sarvatra sarvadā |
yaśśṛṇotyāsvādayati jighran spṛśati paśyati || 54 ||
[Analyze grammar]

sa eva sadasadrūpaṃ yenālokena lakṣyate |
sargacitramanādyantaṃ kharūpaṃ cāpyarañjanam || 55 ||
[Analyze grammar]

ardhonmīlitadṛgbhrūbhūmadhyatārakavajjagat |
vyomātmaiva sadābhāsaṃ svarūpaṃ yo'bhipaśyati || 56 ||
[Analyze grammar]

yasyānyadasti na vibhoḥ kāraṇaṃ śaśaśṛṅgavat |
yasyedaṃ ca jagatkāryaṃ taraṅgaugha ivāmbhasaḥ || 57 ||
[Analyze grammar]

jvalataḥ sarvato'jasraṃ cittasthālīṣu tiṣṭhataḥ |
yasya cinmātradīpasya bhāsā bhāti jagattrayam || 58 ||
[Analyze grammar]

yaṃ vinārkādayo'pyete prakāśāstimiropamāḥ |
sati yasminpravartante trijaganmṛgatṛṣṇikāḥ || 59 ||
[Analyze grammar]

saspande samudetīva nisspande'ntargateva ca |
iyaṃ yasmiñjagallakṣmīralāta iva cakratā || 60 ||
[Analyze grammar]

jagannirmāṇavilayavilāso vyāpako mahān |
spandāspandātmako yasya svabhāvo nirmalo'kṣayaḥ || 61 ||
[Analyze grammar]

spandāspandamayī yasya pavanasyeva sarvagā |
sattā nāmnaiva bhinneva vyavahārānna vastutaḥ || 62 ||
[Analyze grammar]

sarvadaiva prabuddho yaḥ supto yaḥ sarvadaiva ca |
na supto na prabuddhaśca yaḥ sarvatraiva sarvadā || 63 ||
[Analyze grammar]

yadaspandaśśivaṃ śāntaṃ yatspandastrijagatsthitiḥ |
spandāspandavilāsātmā ya eko bharitākṛtiḥ || 64 ||
[Analyze grammar]

āmoda iva puṣpeṣu na naśyati vināśiṣu |
pratyakṣastho'pyathāgrāhyaśśauklyaṃ śuklapaṭeṣviva || 65 ||
[Analyze grammar]

mūkopamo'pi yo vaktā mantā yo'pyupalopamaḥ |
yo bhoktā nityatṛpto'pi kartā yaścāpyakiñcana || 66 ||
[Analyze grammar]

yo'naṅgo'pi samastāṅgaḥ sahasrakaralocanaḥ |
nakiñcitsaṃsthitenāpi yena vyāptamidaṃ jagat || 67 ||
[Analyze grammar]

nirindriyabalasyāpi yasyāśeṣendriyakriyāḥ |
yasya nirmanaso'pyetā manonirmāṇarītayaḥ || 68 ||
[Analyze grammar]

yadanālocanādbhānti saṃsāroragabhītayaḥ |
yasmindṛṣṭe palāyante sarvathā sarvadetayaḥ || 69 ||
[Analyze grammar]

sākṣiṇi sphāra ābhāse dhruve dīpa iva kriyāḥ |
sati yasminpravartante citrehāḥ spandapūrvikāḥ || 70 ||
[Analyze grammar]

yasmādghaṭapaṭākārapadārthaśatapaṅktayaḥ |
taraṅgakaṇakallolavīcayo vāridheriva || 71 ||
[Analyze grammar]

sa evānyatayodeti yaḥ padārthaśatabhramaiḥ |
kaṭakāṅgadakeyūranūpurairiva kāñcanam || 72 ||
[Analyze grammar]

yastvamekāvabhāsātmā yo'hamete janāśca ye |
yaśca na tvamabuddhātmannāhaṃ naite janāśca ye || 73 ||
[Analyze grammar]

anyevāvyatiriktaiva saivāseva ca bhaṅgurā |
payasīva taraṅgālī yasmin sphurati dṛśyabhūḥ || 74 ||
[Analyze grammar]

yataḥ kālasya kalanā yato dṛśyasya dṛśyatā |
mānasī kalanā yena yena bhāsāṃ vibhāsanam || 75 ||
[Analyze grammar]

kriyāṃ rūpaṃ rasaṃ gandhaṃ sparśaṃ śabdaṃ ca cetanam |
yadvetsi tadasau devo yena vetsi tadapyasau || 76 ||
[Analyze grammar]

draṣṭṛdarśanadṛśyānāṃ madhye yaddarśanaṃ sthitam |
sādho tadavadhānena svātmānamavabudhyase || 77 ||
[Analyze grammar]

ajamajaramajāḍyaṃ śāśvataṃ brahma nityaṃ śivamamalamanādyaṃ vandhyavedyairanindyam |
sakalakalanaśūnyaṃ kāraṇaṃ kāraṇānāmanubhavanamavedyaṃ vedanaṃ vittvamantaḥ || 78 ||
[Analyze grammar]

Other print editions:

Also see the following print editions of the Sanskrit text or (alternative) English translations of the Moksopaya Chapter 9

Cover of edition (2008)

The Yogavasistha of Valmiki
by Vasudeva Laxmana Sharma Pansikar (2008)

With the Commentary Vasistha Maharamayana Tatparyaprakasa (Volume I and II): Sanskrit Only; [Motilal Banarsidass Publishers Pvt. Ltd.]

Buy now!
Like what you read? Consider supporting this website: