Chapter 27

anityatāpratipādanaṃ nāma sargaḥ |
saptaviṃśaḥ sargaḥ |
rāmaḥ |
yaccedaṃ dṛśyate kiñcijjagatsthāvarajaṅgamam |
tatsarvamasthiraṃ brahman svapnasaṅgamasannibham || 1 ||
[Analyze grammar]

śuṣkasāgarasaṅkāśo nikhāto yo'dya dṛśyate |
sa prātarabhrasaṃvīto nagaḥ sampadyate mune || 2 ||
[Analyze grammar]

yo vanavyūhavistīrṇo vilīḍhagagano'calaḥ |
dinaireva sa yātyurvīsamatāṃ kūpatāṃ ca vā || 3 ||
[Analyze grammar]

yadaṅgamadya saṃvītaṃ kauśeyasragvilepanaiḥ |
digambaraṃ tadeva śvo dūre viśaritāvaṭe || 4 ||
[Analyze grammar]

yatrādya nagaraṃ dṛṣṭaṃ vicitrācāracañcalam |
tatraivodeti divasaiḥ saṃśūnyāraṇyadhanvatā || 5 ||
[Analyze grammar]

yaḥ pumānadya tejasvī maṇḍalānyadhitiṣṭhati |
sa bhasmakūṭatāṃ rājandivasaireva gacchati || 6 ||
[Analyze grammar]

araṇyānī mahābhīmā yā nabhomaṇḍalopamā |
patākācchāditākāśā saiva sampadyate purī || 7 ||
[Analyze grammar]

yā latāvalitā bhīmā bhātyadya vipināvalī |
divasaireva sā yāti mune marumahīpadam || 8 ||
[Analyze grammar]

salilaṃ sthalatāṃ yāti sthalī bhavati vāribhūḥ |
viparyasyati sarvaṃ hi sakāṣṭhāmbutṛṇaṃ jagat || 9 ||
[Analyze grammar]

anityaṃ yauvanaṃ bālyaṃ śarīraṃ dravyasañcayāḥ |
bhāvādbhāvāntaraṃ yānti taraṅgavadanāratam || 10 ||
[Analyze grammar]

vātāttadīpakaśikhālolaṃ jagati jīvitam |
taḍitsphuraṇasaṅkāśā padārthaśrīrjagattraye || 11 ||
[Analyze grammar]

viparyāsamiyaṃ yāti bhūribhūtaparamparā |
bījarāśirivājasraṃ prathamānaḥ punaḥ punaḥ || 12 ||
[Analyze grammar]

manaḥpavanaparyastabhūribhūtarajaḥpaṭā |
pātotpātaparāvartavarābhinayabhūṣitā || 13 ||
[Analyze grammar]

ālakṣyate sthitiriyaṃ jāgatī janitabhramā |
nṛttāveśavivṛtteva saṃsārārabhaṭīnaṭī || 14 ||
[Analyze grammar]

gandharvanagarākāraviparyāsavidhāyinī |
apāṅgabhaṅgurodāravyavahāramanoramā || 15 ||
[Analyze grammar]

taḍittaralamālokamātanvānā punaḥ punaḥ |
saṃsārarañjanā brahmannṛttamatteva rājate || 16 ||
[Analyze grammar]

divasāste mahāntaste sampadastāḥ kriyāśca tāḥ |
sarvaṃ smṛtipadaṃ yātaṃ yāmo vayamapi kṣaṇāt || 17 ||
[Analyze grammar]

pratyahaṃ kṣayamāyāti pratyahaṃ jāyate punaḥ |
adyāpi hatarūpāyā nānto'syā dagdhasaṃsṛteḥ || 18 ||
[Analyze grammar]

tiryaktvaṃ puruṣā yānti tiryañco naratāmapi |
devāścādevatāṃ caite kimeveha vibho sthiram || 19 ||
[Analyze grammar]

racayan raśmijālena rātryahāni punaḥ punaḥ |
ativāhya raviḥ kālaṃ vināśāvadhimīkṣate || 20 ||
[Analyze grammar]

brahmā viṣṇuśca rudraśca sarvā vā bhūtajātayaḥ |
nāśamevānudhāvanti salilānīva vāḍavam || 21 ||
[Analyze grammar]

dyauḥ kṣamā vāyurākāśaṃ parvatāḥ sarito diśaḥ |
vināśavāḍavasyaitatsarvaṃ saṃśuṣkamindhanam || 22 ||
[Analyze grammar]

dhanāni bandhavo bhṛtyā mitrāṇi vibhavāśca ye |
vināśabhayabhītasya sarvaṃ nīrasatāṃ gatam || 23 ||
[Analyze grammar]

svadante tāvadevaite bhāvā jagati dhīmataḥ |
yāvatsmṛtipathaṃ yāti na vināśakurākṣasaḥ || 24 ||
[Analyze grammar]

kṣaṇamaiśvaryamāyāti kṣaṇameti daridratā |
kṣaṇaṃ vigatarogatvaṃ kṣaṇamāgatarogatā || 25 ||
[Analyze grammar]

pratikṣaṇaṃ viparyāsadāyinā mahatāmunā |
jagadbhrameṇa ke nāma dhīmanto'pi na mohitāḥ || 26 ||
[Analyze grammar]

tamaḥpaṅkasamālabdhaṃ kṣaṇamākāśamaṇḍalam |
kṣaṇaṃ kanakaniṣṣyandakomalālokasundaram || 27 ||
[Analyze grammar]

kṣaṇaṃ jaladanīlābjamālāvalitakoṭaram |
kṣaṇamuḍḍāmararavaṃ kṣaṇaṃ mūkamavasthitam || 28 ||
[Analyze grammar]

kṣaṇaṃ tārāvilasitaṃ kṣaṇamarkeṇa bhūṣitam |
kṣaṇamindukṛtāhlādaṃ kṣaṇaṃ sarvabahiṣkṛtam || 29 ||
[Analyze grammar]

āgamāpāyaparayā sthityā saṃsthitanāśayā |
na bibhetīha saṃsāre dhīro'pi ka ivānayā || 30 ||
[Analyze grammar]

āpadaḥ kṣaṇamāyānti kṣaṇamāyānti sampadaḥ |
kṣaṇaṃ janmātha maraṇaṃ mune kimiva na kṣaṇam || 31 ||
[Analyze grammar]

prāgāsīdanya eveha jātastvanyetaro dinaiḥ |
apyekarūpaṃ bhagavan kiñcidasti na susthitam || 32 ||
[Analyze grammar]

ghaṭasya paṭatā dṛṣṭā paṭasyāpi ghaṭasthitiḥ |
na tadasti na yaddṛṣṭaṃ viparyasyati saṃsṛtiḥ || 33 ||
[Analyze grammar]

aśūreṇa hataśśūra ekenāpi śataṃ hatam |
prākṛtāḥ prabhutāṃ yātāḥ sarvamāvartate jagat || 34 ||
[Analyze grammar]

janateyaṃ viparyāsamajasramanugacchati |
jaḍaspandaparāmarśāttaraṅgānāmivāvalī || 35 ||
[Analyze grammar]

bālyamadya dinaireva yauvanaśrīstato jarā |
dehe'pi naikarūpatvaṃ kāsthā bāhyeṣu vastuṣu || 36 ||
[Analyze grammar]

kṣaṇamānanditāmeti kṣaṇameti viṣāditām |
kṣaṇaṃ saumyatvamāyāti sarvasminnaṭavanmanaḥ || 37 ||
[Analyze grammar]

itaścānyaditaścānyaditaścānyadayaṃ vidhiḥ |
racayanvastu nāyāti khedaṃ līlāsvivārbhakaḥ || 38 ||
[Analyze grammar]

cinotyunmādayatyatti nihantyāhanti cātmasāt |
jagajjātamidaṃ dhātā pātotpātaśatairiha || 39 ||
[Analyze grammar]

kṣaṇenānyaddinenānyatprātaranyaditastataḥ |
racayanvañcanādakṣo vidhirdṛṣṭo na kenacit || 40 ||
[Analyze grammar]

yadadya tattu na prātaryatprātastattu nādya ca |
yadanyadā tu tannādya sarvamāvartatetarām || 41 ||
[Analyze grammar]

santatānīha duḥkhāni sukhāni viralāni ca |
satataṃ rātryahānīva vivartante naraṃ prati || 42 ||
[Analyze grammar]

āvirbhāvatirobhāvabhāgino bhavabhāvinaḥ |
janasya sthiratāṃ yānti nāpado na ca sampadaḥ || 43 ||
[Analyze grammar]

padātpadamayaṃ pāpaḥ sarvamāpadi pātayan |
helāvivalitāśeṣaḥ khalakālalavaḥ sthitaḥ || 44 ||
[Analyze grammar]

samaviṣamadaśāvipākabhinnāstribhuvanabhūtaparamparāphalaughāḥ |
samayapavanapātitāḥ patanti pratidinamātatasaṃsṛtidrumebhyaḥ || 45 ||
[Analyze grammar]