Chapter 26

durvilāsavarṇanaṃ nāma sargaḥ |
ṣaḍviṃśaḥ sargaḥ |
rāmaḥ |
anyacca tātātitarāmaramye manorame veha jagatsvarūpe |
na kiñcidapyeti tadarthajātaṃ yenātiviśrāntimupaiti cetaḥ || 1 ||
[Analyze grammar]

bālye gate kalpitakelilole vayomṛge dāradarīṣu kīrṇe |
śarīrake jarjaratāṃ prayāte vidūyate kevalameva lokaḥ || 2 ||
[Analyze grammar]

jarātuṣārābhihatāṃ śarīrasarojinīṃ dūratare vihāya |
kṣaṇādgate jīvitacañcarīke janasya saṃsārasaro viśuṣkam || 3 ||
[Analyze grammar]

yadā yadā pākamupaiti nūnaṃ tadā tadeyaṃ natimātanoti |
jarābharānalpanavaprasūnavijarjarā kāyalatā narāṇām || 4 ||
[Analyze grammar]

tṛṣṇānadī sāratarapravāhagrastākhilānantapadārthajātā |
taṭasthasantoṣasuvṛkṣamūlanikāṣadakṣā vahatīha loke || 5 ||
[Analyze grammar]

śarīranauścarmanibaddhabandhā bhavāmbudhāvālulitā bhramantī |
pravroḍyate pañcabhirindriyākhyairadho vahantī makarairadhīnā || 6 ||
[Analyze grammar]

tṛṣṇālatākānanacāriṇo'mī śākhāśataṃ kāmamahīruheṣu |
paribhramantaḥ kṣapayanti kāmaṃ manomṛgā no phalamāpnuvanti || 7 ||
[Analyze grammar]

kṛcchreṣu dūrāstaviṣādamohāḥ svāmyeṣvanutsiktamano'bhirāmāḥ |
sudurlabhāḥ samprati sundarībhiranāhatāntaḥkaraṇā mahāntaḥ || 8 ||
[Analyze grammar]

taranti mātaṅgaghaṭātaraṅgaṃ raṇāmbudhiṃ ye mayi te na śūrāḥ |
śūrāsta eveha manastaraṅgaṃ ye hīndriyāmbhodhimimaṃ taranti || 9 ||
[Analyze grammar]

akliṣṭaparyantaphalābhirāmā na dṛśyate kasyacideva kācit |
kriyā durāśāhatacittavṛtteryāmetya viśrāntimupaiti lokaḥ || 10 ||
[Analyze grammar]

kīrtyā jagaddikkuharaṃ pratāpaiśśriyā gṛhaṃ sattvabalena lakṣmīm |
ye pūrayantyakṣatadharmabandhā na te jagatyāṃ sulabhā manuṣyāḥ || 11 ||
[Analyze grammar]

apyantarasthaṃ giriśailabhittervajrālayābhyantarasaṃsthitaṃ vā |
sarvaṃ samāyānti samiddhavegāḥ sarvāśśriyaḥ santatamāpadaśca || 12 ||
[Analyze grammar]

putrāśca dārāśca dhanaṃ ca buddhyā prakalpyate tāta rasāyanaṃ va |
sarvaṃ tu tannopakarotyathānte yatrātiramyā viṣamūrchanaiva || 13 ||
[Analyze grammar]

viṣādayukto viṣamāmavasthāmupāgataḥ kāyavayo'vasāne |
bhāvān smaran svānabhidharmariktāñjano jarāvānabhidahyate'ntaḥ || 14 ||
[Analyze grammar]

kāmārthadharmāptikṛśāntarābhiḥ kriyābhirādau divasāni nītvā |
cetaścaladbarhiṇapiñchalolaṃ viśrāntimāgacchatu kena puṃsaḥ || 15 ||
[Analyze grammar]

purogatairapyanavāptarūpaistaraṅgiṇītuṅgataraṅgakalpaiḥ |
kriyāphalairdaivavaśādupetairviḍambyate bhinnarucirhi lokaḥ || 16 ||
[Analyze grammar]

imānyamūnīti vibhāvitāni kāryāṇyaparyantamanoramāṇi |
janasya jāyājanarañjanena jaṭājarāntaṃ jarayanti cetaḥ || 17 ||
[Analyze grammar]

parṇāni śīrṇāni yathā tarūṇāṃ sametya janmāśu layaṃ prayānti |
tathaiva lokāḥ svavivekahīnāḥ sametya gacchanti kuto'pyahobhiḥ || 18 ||
[Analyze grammar]

itastato dūrataraṃ vihṛtya praviśya gehaṃ divasāvasāne |
vivekilokāśrayisādhukarmarikte'hni yāte ka upaiti nidrām || 19 ||
[Analyze grammar]

vidrāvite śatrujane samaste samāgatāyāmabhitaśca lakṣmyām |
sevyanta etāni sukhāni yāvattāvatsamāyāti kuto'pi mṛtyuḥ || 20 ||
[Analyze grammar]

kuto'pi saṃvardhitatuccharūpairbhāvairamībhiḥ kṣaṇadṛṣṭanaṣṭaiḥ |
vilobhyamānā janatā jagatyāṃ na vettyupāyātamaho na yātam || 21 ||
[Analyze grammar]

yiyāsubhiḥ kālamukhaṃ kriyante janaiḍakaiste hatakarmabandhāḥ |
ye pīnatāmeva balādupetya śarīrabandhe nanu te bhavanti || 22 ||
[Analyze grammar]

ajasramāgacchati satvareyamanārataṃ gacchati satvaraiva |
kuto'pi lolā janatā jagatyāṃ taraṅgamālā kṣaṇabhaṅgureva || 23 ||
[Analyze grammar]

prāṇāpahāraikaparā narāṇāṃ mano manohāritayā haranti |
raktacchadāṣṣaṭpadacañcalākṣyo viṣadrumā lolalatāḥ striyaśca || 24 ||
[Analyze grammar]

ito'nyataścopagatā mudhaiva samānasaṅketanibaddhabhāvā |
yātrāsamāsaṅgasamā narāṇāṃ kalatramitravyavahāramāyā || 25 ||
[Analyze grammar]

pradīpakāntiṣviva bhuktabhūridaśāsvatisnehanibandhanīṣu |
saṃsāramāyāsu calācalāsu na jñāyate tattvamatāttvikīṣu || 26 ||
[Analyze grammar]

saṃsārasaṃrambhakucakrikeyam prāvṛṭpayobudbudabhaṅgurāpi |
asāvadhānasya janasya buddhau cirasthirapratyayamātanoti || 27 ||
[Analyze grammar]

śobhojjvalā dainyavaśādvinaṣṭā guṇāḥ sthitāḥ samprati jarjaratve |
āśvāsanā dūrataraṃ prayātā janasya hemanta ivābjinīṣu || 28 ||
[Analyze grammar]

punaḥ punardaivavaśādupetya svadehabhāreṇa kṛtāpakāraḥ |
vilūyate yatra taruḥ kuṭhārairāśvāsane tatra hi kaḥ prasaṅgaḥ || 29 ||
[Analyze grammar]

manoramasyāpyatidoṣavṛtterantarvighātāya samutthitasya |
viṣadrumasyeva janasya saṅgādāsādyate samprati mūrchanaiva || 30 ||
[Analyze grammar]

kāstā dṛśo yāsu na santi doṣāḥ kāstā diśo yāsu na duḥkhadāhaḥ |
kāstāḥ prajā yāsu na bhaṅguratvaṃ kāstāḥ kriyā yāsu na nāma māyā || 31 ||
[Analyze grammar]

kalpābhidhānakṣaṇajīvino'pi kalpaughasaṅkhyākalane viriñcāḥ |
ataḥ kalāśālini kālajāle laghutvadīrghatvadhiyo'pyasatyāḥ || 32 ||
[Analyze grammar]

sarvatra pāṣāṇamayā mahīdhrā mṛdā mahī dārubhireva vṛkṣāḥ |
māṃsairjanāḥ pauruṣabaddhabhāvā nāpūrvamastīha vikārahīnam || 33 ||
[Analyze grammar]

ālokyate cetanayānuviddhaḥ payonibaddho'ṇucayo nabhassthaḥ |
pṛthagvibhāgena padārthalakṣmyā etajjagannetaradasti kiñcit || 34 ||
[Analyze grammar]

camatkṛtiśceha manasviloke cetaścamatkārakarī narāṇām |
svapne'pi sādho viṣayaṃ kadācitkeṣāñcidapyeti na citrarūpā || 35 ||
[Analyze grammar]

adyāpayāte tvapi kalpanāyā ākāśavallīphalavanmahattve |
udeti no'lobhalavāhatānāmudāravṛttāntamayī kathaiva || 36 ||
[Analyze grammar]

ādātumicchanpadamuttamānāṃ svacetasaivopahato'dya lokaḥ |
patatyaśaṅkaṃ paśuradrikūṭādānīlavallīdalavāñchayeva || 37 ||
[Analyze grammar]

avāntaranyastanirarthakāṃsacchāyālatāpattraphalaprasūnāḥ |
śarīra eva kṣatasampadaśca śvabhradrumā adyatanā narāśca || 38 ||
[Analyze grammar]

kvacijjanā mārdavasundareṣu kvacitkarāleṣu ca sañcaranti |
daśāntarāleṣu nirantareṣu vanāntaṣaṇḍeṣviva kṛṣṇaśārāḥ || 39 ||
[Analyze grammar]

dhāturnavāni divasaṃ prati bhīṣaṇāni ramyāṇi cāvalulitākhilamānavāni |
kāryāṇi kaṣṭaphalapākahatodayāni vismāpayanti na śaṭhasya manāṃsi keṣām || 40 ||
[Analyze grammar]

janaḥ kāmāsakto vividhakukalāvedanaparaḥ samaḥ svapne'pyasmiñjagati sulabho nādya sujanaḥ |
kriyā duḥkhāsaṅgādvidhuravidhurā nūnamakhilā na jāne netavyā kathamiva daśā jīvitamayī || 41 ||
[Analyze grammar]