Chapter 6

saṃjaya uvāca |
senāpatyaṃ tu saṃprāpya bhāradvājo mahārathaḥ |
yuyutsurvyūhya sainyāni prāyāttava sutaiḥ saha || 1 ||
[Analyze grammar]

saindhavaśca kaliṅgaśca vikarṇaśca tavātmajaḥ |
dakṣiṇaṃ pārśvamāsthāya samatiṣṭhanta daṃśitāḥ || 2 ||
[Analyze grammar]

prapakṣaḥ śakunisteṣāṃ pravarairhayasādibhiḥ |
yayau gāndhārakaiḥ sārdhaṃ vimalaprāsayodhibhiḥ || 3 ||
[Analyze grammar]

kṛpaśca kṛtavarmā ca citraseno viviṃśatiḥ |
duḥśāsanamukhā yattāḥ savyaṃ pārśvamapālayan || 4 ||
[Analyze grammar]

teṣāṃ prapakṣāḥ kāmbojāḥ sudakṣiṇapuraḥsarāḥ |
yayuraśvairmahāvegaiḥ śakāśca yavanaiḥ saha || 5 ||
[Analyze grammar]

madrāstrigartāḥ sāmbaṣṭhāḥ pratīcyodīcyavāsinaḥ |
śibayaḥ śūrasenāśca śūdrāśca maladaiḥ saha || 6 ||
[Analyze grammar]

sauvīrāḥ kitavāḥ prācyā dākṣiṇātyāśca sarvaśaḥ |
tavātmajaṃ puraskṛtya sūtaputrasya pṛṣṭhataḥ || 7 ||
[Analyze grammar]

harṣayansarvasainyāni baleṣu balamādadhat |
yayau vaikartanaḥ karṇaḥ pramukhe sarvadhanvinām || 8 ||
[Analyze grammar]

tasya dīpto mahākāyaḥ svānyanīkāni harṣayan |
hastikakṣyāmahāketurbabhau sūryasamadyutiḥ || 9 ||
[Analyze grammar]

na bhīṣmavyasanaṃ kaściddṛṣṭvā karṇamamanyata |
viśokāścābhavansarve rājānaḥ kurubhiḥ saha || 10 ||
[Analyze grammar]

hṛṣṭāśca bahavo yodhāstatrājalpanta saṃgatāḥ |
na hi karṇaṃ raṇe dṛṣṭvā yudhi sthāsyanti pāṇḍavāḥ || 11 ||
[Analyze grammar]

karṇo hi samare śakto jetuṃ devānsavāsavān |
kimu pāṇḍusutānyuddhe hīnavīryaparākramān || 12 ||
[Analyze grammar]

bhīṣmeṇa tu raṇe pārthāḥ pālitā bāhuśālinā |
tāṃstu karṇaḥ śaraistīkṣṇairnāśayiṣyatyasaṃśayam || 13 ||
[Analyze grammar]

evaṃ bruvantaste'nyonyaṃ hṛṣṭarūpā viśāṃ pate |
rādheyaṃ pūjayantaśca praśaṃsantaśca niryayuḥ || 14 ||
[Analyze grammar]

asmākaṃ śakaṭavyūho droṇena vihito'bhavat |
pareṣāṃ krauñca evāsīdvyūho rājanmahātmanām |
prīyamāṇena vihito dharmarājena bhārata || 15 ||
[Analyze grammar]

vyūhapramukhatasteṣāṃ tasthatuḥ puruṣarṣabhau |
vānaradhvajamucchritya viṣvaksenadhanaṃjayau || 16 ||
[Analyze grammar]

kakudaṃ sarvasainyānāṃ lakṣma sarvadhanuṣmatām |
ādityapathagaḥ ketuḥ pārthasyāmitatejasaḥ || 17 ||
[Analyze grammar]

dīpayāmāsa tatsainyaṃ pāṇḍavasya mahātmanaḥ |
yathā prajvalitaḥ sūryo yugānte vai vasuṃdharām || 18 ||
[Analyze grammar]

asyatāmarjunaḥ śreṣṭho gāṇḍīvaṃ dhanuṣāṃ varam |
vāsudevaśca bhūtānāṃ cakrāṇāṃ ca sudarśanam || 19 ||
[Analyze grammar]

catvāryetāni tejāṃsi vahañśvetahayo rathaḥ |
pareṣāmagratastasthau kālacakramivodyatam || 20 ||
[Analyze grammar]

evametau mahātmānau balasenāgragāvubhau |
tāvakānāṃ mukhaṃ karṇaḥ pareṣāṃ ca dhanaṃjayaḥ || 21 ||
[Analyze grammar]

tato jātābhisaṃrambhau parasparavadhaiṣiṇau |
avekṣetāṃ tadānyonyaṃ samare karṇapāṇḍavau || 22 ||
[Analyze grammar]

tataḥ prayāte sahasā bhāradvāje mahārathe |
antarnādena ghoreṇa vasudhā samakampata || 23 ||
[Analyze grammar]

tatastumulamākāśamāvṛṇotsadivākaram |
vātoddhūtaṃ rajastīvraṃ kauśeyanikaropamam || 24 ||
[Analyze grammar]

anabhre pravavarṣa dyaurmāṃsāsthirudhirāṇyuta |
gṛdhrāḥ śyenā baḍāḥ kaṅkā vāyasāśca sahasraśaḥ |
uparyupari senāṃ te tadā paryapatannṛpa || 25 ||
[Analyze grammar]

gomāyavaśca prākrośanbhayadāndāruṇānravān |
akārṣurapasavyaṃ ca bahuśaḥ pṛtanāṃ tava |
cikhādiṣanto māṃsāni pipāsantaśca śoṇitam || 26 ||
[Analyze grammar]

apataddīpyamānā ca sanirghātā sakampanā |
ulkā jvalantī saṃgrāme pucchenāvṛtya sarvaśaḥ || 27 ||
[Analyze grammar]

pariveṣo mahāṃścāpi savidyutstanayitnumān |
bhāskarasyābhavadrājanprayāte vāhinīpatau || 28 ||
[Analyze grammar]

ete cānye ca bahavaḥ prādurāsansudāruṇāḥ |
utpātā yudhi vīrāṇāṃ jīvitakṣayakārakāḥ || 29 ||
[Analyze grammar]

tataḥ pravavṛte yuddhaṃ parasparavadhaiṣiṇām |
kurupāṇḍavasainyānāṃ śabdenānādayajjagat || 30 ||
[Analyze grammar]

te tvanyonyaṃ susaṃrabdhāḥ pāṇḍavāḥ kauravaiḥ saha |
pratyaghnanniśitairbāṇairjayagṛddhāḥ prahāriṇaḥ || 31 ||
[Analyze grammar]

sa pāṇḍavānāṃ mahatīṃ maheṣvāso mahādyutiḥ |
vegenābhyadravatsenāṃ kirañśaraśataiḥ śitaiḥ || 32 ||
[Analyze grammar]

droṇamabhyudyataṃ dṛṣṭvā pāṇḍavāḥ saha sṛñjayaiḥ |
pratyagṛhṇaṃstadā rājañśaravarṣaiḥ pṛthakpṛthak || 33 ||
[Analyze grammar]

saṃkṣobhyamāṇā droṇena bhidyamānā mahācamūḥ |
vyaśīryata sapāñcālā vāteneva balāhakāḥ || 34 ||
[Analyze grammar]

bahūnīha vikurvāṇo divyānyastrāṇi saṃyuge |
apīḍayatkṣaṇenaiva droṇaḥ pāṇḍavasṛñjayān || 35 ||
[Analyze grammar]

te vadhyamānā droṇena vāsaveneva dānavāḥ |
pāñcālāḥ samakampanta dhṛṣṭadyumnapurogamāḥ || 36 ||
[Analyze grammar]

tato divyāstravicchūro yājñasenirmahārathaḥ |
abhinaccharavarṣeṇa droṇānīkamanekadhā || 37 ||
[Analyze grammar]

droṇasya śaravarṣaistu śaravarṣāṇi bhāgaśaḥ |
saṃnivārya tataḥ senāṃ kurūnapyavadhīdbalī || 38 ||
[Analyze grammar]

saṃhṛtya tu tato droṇaḥ samavasthāpya cāhave |
svamanīkaṃ mahābāhuḥ pārṣataṃ samupādravat || 39 ||
[Analyze grammar]

sa bāṇavarṣaṃ sumahadasṛjatpārṣataṃ prati |
maghavānsamabhikruddhaḥ sahasā dānaveṣviva || 40 ||
[Analyze grammar]

te kampyamānā droṇena bāṇaiḥ pāṇḍavasṛñjayāḥ |
punaḥ punarabhajyanta siṃhenevetare mṛgāḥ || 41 ||
[Analyze grammar]

atha paryapataddroṇaḥ pāṇḍavānāṃ balaṃ balī |
alātacakravadrājaṃstadadbhutamivābhavat || 42 ||
[Analyze grammar]

khacaranagarakalpaṃ kalpitaṃ śāstradṛṣṭyā caladanilapatākaṃ hrādinaṃ valgitāśvam |
sphaṭikavimalaketuṃ tāpanaṃ śātravāṇāṃ rathavaramadhirūḍhaḥ saṃjahārārisenām || 43 ||
[Analyze grammar]